Saturday, December 31, 2005

Banjir Kilat

Bangat endar ujan demalam ... enggau ribut sekali. Sekeda utai tekebu dalam ribut.

Tu gamal depan rumah kami ... latak serta banjir!

Tu gamal simpang ba endor kami diau.

Mata panas bisi pansut enda lama. Gambar tu di ambi ba rumah Rich pagi tu tadi. Peda gamal moa hari! Ujan di adang baru lemai tu lagi datai ka pagila. Reti nya kami ditu ngintu taun baru ti basah!

Thursday, December 29, 2005

Bedau Ulih Bekaraoke

Asa asa asai ati ka bekaraoke. Speaker udah ga di pasang tang maya masang microphone nadai pansut nyawa ti ka belagu! :-( Bisi lah utai dia enda betul di pasang, engka meh nya.

Aku bisi macha pasal speaker ti dikena bekaraoke .. paduhal enda sebaka enggau speaker ti dikena kitai ninga muzik tauka meda video/DVD. Enti udah munyi nya, enggai aku masau speaker dikena aku meda DVD, enggai ka pechah lagi laban nyawa ti kelalu inggar!

Enggai nyadi enda ngiga speaker bukai ga aku ti tau di kena aku belagu karaoke! Apu, nyau besai endar belanja tu ila laban ti ka bekaraoke! Udah bisi speaker, enggai enda bisi mixer ga ... aisey. Bepeda ka katalog meh aku tu ditu, aisey, enggai enda ngeluar sekurang kurang iya $400! :-( Ti tak bisi endar nyawa dianjong belagu enda ga ngawa! Hahaha!

Enggai alah bulu, Cuthess udah mai aku bepekit belagu! Kapa enda mantai nyawa semadi nadai! Heheh.

Sunday, December 25, 2005

Krismas 2005

Selamat Hari Krismas ngagai samoa kaban belayan enggau bala pangan ti di kesayau. Arap ka kita lantang serta bulih berkat musim Krismas taun tu.

Tu gamal manok kulok di panggang aku ka dempa kena Hari Krismas. Boleh tahan ga asai iya, eh.

Tu gamal utai di idang. Siti utai enda ingat di bantai! Heheh. Stuffing enda ingat di bantai. Maya beberus ngeli udah bekau makai baru te-ingat ka stuffing ... agi dudok ba atas stove!

Friday, December 23, 2005

Kasut Kuboi

Aku rindu shopping ba thrift store (kedai nyual utai terpakai). Chukop macham utai ulih di temu ba kedai baka tu. Sahari tu kami duai Doug bisi shopping ba Big Valley Thrift - kedai endor kami selalu shopping. Aku selalu ngiga pakaian anembiak ditu laban iya murah tambah mega ulih jimat duit. Gari nembiak ukai lama sida ngena, udah nya enda umbas agi. Bisi sekeda bedau sempat di kena, udah enda umbas agi.

Aku tepeda ka kasut kulit ala kuboi, alu nguji iya. Eh, umbas ba kaki aku tu ah .. heheh, meda rega iya mina $2, eh, beli aja! Bisi hari ngansing iya ila! Nya iya Cuthess, enda ingin nuan bulih kasut baka tu mega? Heheh. Agi manah endar kasut nya, engka mina bisi di kena 2 -3 kali aja. Brand iya, Guess! Heheh, pama meh nya.

Thursday, December 22, 2005

Lagu Iban

Rindu endar ninga lagu Iban ari Jukebox Vynne. Terima kasih, Vynne. Bisi ga teperindang enggau tepantup mimit ati ninga munyi lagu bansa diri empu. Ditu sapa ti enggau bejako Iban? Enti bisi pen mina bejako dalam talipon enggau bala apai-indai, enggau sida ipar. Bisi pangan Iban ditu tang nya meh ukai tak semak alai diau! Nyin seberai benoa sepiak nyin ti alai (Maryland)! Bala anak di bai bejako Iban bedau ga nemu nyaut kitai!

Vynne, anang enda nambah koleksi lagu dia. Sintimintel enggau lelengau asai ati. Heheh. Bah, dini alai aku ngiga lagu Iban kena aku bekaraoke ditu? Vynne, ulih ngaga musik kena aku karaoke ditu? Heheh. Aku bisi download musik Krismas kena aku karaoke ditu .. baru iya nemu bisi alai bekaraoke ba internet!

Saturday, December 17, 2005

Sushi

Demalam kami menyanak makai ba Mama's - siti restoran Jepun ba Galt ditu. Mama's endang endor kami selalu makai sekumbang restoran tu di buka ditu. Orang ka empu restoran tu bansa Korea, taja menu ba restoran tu pemakai Jepun.

Tu gamal sushi di order aku. Iya di kumbai Sunflower - 3 macam ikan, enggau 3 macham teluk ikan. Aku sigi rindu makai sushi - endang ngorder sushi belama ma makai ba restoran tu.


Tu iya miso sup ti endang di sadong ma makai ditu. Duncan rindu ngirup sup tu ... bederut munyi iya ngirup sup! :-)

Thursday, December 15, 2005

Ansa

Peda kita, ansa kami nemu nilik kami dalam rumah. Engka chelap ba luar din, nya sida meda kami tak nyamai aja, nyau ka enggau ga sida! Dua hari tu udah saduai nemu ngetuk pintu, baka ti ka minta tama. :-)

Wednesday, December 14, 2005

Kuih Makmur

Ahh, tu iya kuih makmur gaga aku sahari tu. Tu baru bisi sepur .. lelak dalam nyawa. Mula mula asai ka kelalu sepur, abis lekat ba kulit kanit! Udah iya chelap, ok ga asai iya.

Bah, nama dianti bala kita? Ngabang kitu meh Grace, Aku Gerubi, Encha Ler Geith, Cathess, Uchu Keling, Agus, Vynne, enggau Beremas. Udah sedia bala sida kuih enggau ai! :-)

Tuesday, December 13, 2005

Biskut Nescafe

Kemari tengok endar asai ka makai biskut ti selalu dempa ba Malaysia baka sida Tat Nenas, Kuih Bangkit, tauka Kuih Makmur. Aku bisi ngaga Kuih Makmur kutai, tang udah abis dempa. Keterubah aku ngaga Kuih Makmur, enda entu nyadi laban salah tunyau. Stail tunyau aku baka ti ngaga pastri! Ni ka sama asai iya! Heheh. Ka pen enda nunyau baru .. nya baru nyadi tang enda entu sepur .. nyamai agi enti sepur tauka lelak dalam nyawa.

Pagi tadi aku ngaga Biskut Nescafe. Resipi tu di temu aku ba www.resepi.mesra.net Meda nya enda mayoh macham perengka di guna kena gaga iya, ka aku nguji. Nyamai ga ah, heheh, taja nya baru iya nguji resepi tu.

Di menoa kami ditu, baka kitai di Malaysia din ga, ma musim Christmas begaga ka biskut bala mensia. Puas ninga ba radio pasal begaga ka biskut, nyau ka ga asai ngaga, tang biskut stail kitai Malaysia. Biskut orang ditu kelalu manis. Ka tingkil asai ngeli ma makai biskut di gaga sida! :-(

Tu gamal iya udah tembu, sebedau di simpan dalam oven.


Ahh, tu iya udah mansau! Nyamai! :-)

Kitu meh kita, ngabang ngagai aku ditu! Biskut udah bisi, ai bisa pen bisi. Enti enggai ngirup ai bisa, ai bukai dalam tin bisi meh!


Saturday, December 10, 2005

Lampu Pelip

Lemai tu tadi kami menyanak bejalai ngagai kawan aku benama Judy Sassman. Tiap taun Judy saduai laki iya ngias rumah enggau sebelah tanah saduai enggau lampu pelip ti chukop manah. Tiap taun mega rumah saduai bisi pansut ba TV laban rumah saduai antara rumah ti pemadu manah di ias ba Sacramento. Tu sekeda gambar di ambi aku lemai tu tadi.

Tu di kumbai Memory Trees - nama orang ti udah nadai di tulis ditu, nyadi ka pengingat. Bala orang ti datai tau nulis nama orang ti dikesayau ti udah nadai alu ngantong nama nya ba Memory Trees tu. Tu siti kebuah sekeda orang rindu datai ka rumah Judy tiap taun. Tiap taun sida ngiga bisi ka enda nama kaban sida agi begantong ba kayu pengingat tu.

Wednesday, December 07, 2005

Enda Rindu Nganti

Tengah hari tadi, aku ka farmasi, ngambi ubat hydrochlorothiazide, ubat tinggi darah. Kemari aku udah talipon .. refill prescription. Ditu kami tau ngena talipon, enti ka ngambi ubat .. ubat endang ti dempa ngelama tu, enti ubat nya udah ka abis. Tang ukai mensia ti enggau bejako ba talipon nya ... computer! Nuan mina nitih ka instructions .. tekan nombor pesakit (kad insuran), tekan nombor bansa ubat ti deka di ambi .. udah nya hari siti, ubat nya tau di ambi ba farmasi. Ko nyawa ba talipon nya, aku tau datai udah pukul dua tengah hari.

Aku datai ba farmasi, nyau ka pukul 2.40 .. nganjong diri ngagai kaunter, ko indu ba kaunter, ubat aku bedau datai. :-( Iya tau nginsil order aku nya, lalu ngaga baru .. reti nya ba farmasi nya alai sida ngisi prescription aku nya ... anti 15 minit ... apu, boring endar! Enggai ga aku nganjong diri shopping dulu, enggai ka enda ingat pasal ngambi ubat nya lagi. Nganti meh aku dia, bisi setengah jam aku nganti dia. Nya utai ti enda dikerindu aku .. nganti!! Masau jam aja. Tegal ti nganti nya tadi, nyau beguai-guai ti shopping udah nya. Enggai ka laun ngambi anak pulai sekula lagi. Ujan agi hari maya pulai .. jalai pen nyau penuh enggau orang pulai kerja ... essshhh!

Saturday, December 03, 2005

Pengawa Aku Sahari Tu

Sahari tu hari pengada aku. Tumu pagi, Doug, meri aku card serta gelang emas. Enda kala tudah bebeli barang kemas ka aku! Keterubah iya meh tu!

Sapa enda lembut ati nerima pemeri baka tu? :-)

Malam tu tadi aku enggau bala pangan aku bisi begempuru makai, sambil ngintu hari pengada aku, lalu bisi mega ngumpul duit kena di derma ngagai World Vision. Duit ti di gumpul nya di kena meli siko unta ka orang di Afrika. Orang ti nerima nya ila, World Vision ti nentu.

Kek di gaga Kathy

Kami bela mai roti (biscuit) ti di kunsi enggau pangan diri. Rindu ga ngasai roti di gaga bala pangan.

Sekeda roti di gaga bala pangan ti sempat di bai pulai

Aku sempat mega ngajar bala ngaga gelang ngena kristal Swarovski. Tiap iko pulai mai gelang ba lengan diri. :-)

Paula ngeringak ngaga gelang

Endor kami ti begumpuru nya, iya nya ba rumah Kathy. Rumah iya endang udah di ias ngena decoration Krismas. Rindu endar meda.

Rindu meda rumah Kathy - udah bisi hiasan Krismas

Friday, December 02, 2005

Makai Malam

Kenyang endar aku malam tu! :-) Pagila hari pengada aku tang laban aku bisi pengawa lemai pagila kami menyanak nganjong diri makai ba restoran china malam tu. Ba penemu aku, restoran china tu paling best ba Sacramento! Heheh.

Enti kami makai ba restoran tu enda tau enda ngudar undang di goreng enggau chabi gadong enggau garam! Nyamai endar! Keruk endar datai ka chabi iya keruk.

Kami bisi ngudar kerang campur sos kacang chelum.

Sayur enda tau enda bisi mega, sekali tu aku nguji tugey kachang peas di champur enggau teluk masin. Nyamai! :-)

Tu gamal Denice makai tugey peas ngena chopstick. Pama iya, baru nguji ngena chopstick ... tanda iya nya bisi darah china! Heheh.

Duncan mina kenyang diri makai sup kusong enggau asi.

Selamat Hari Pengada Mommy! :-)

Thursday, December 01, 2005

Ujan

Bendar hari nya ujan sahari tu. Ukai semina ujan, ribut mega. Tang enda ga datai bisi bah mit (flashflood) baka enggi sida UchuKeling di Piasau din! :-) Kasih tudah bala ka diau ba Piasau Jaya.

Ma kami ujan ditu, sida ba atas bukit din, ari peninggi 4,000 kaki katas, salju bisi turun. Rindu meda salju tang nya meh, orang mai kerita ti terok. Rantai melit tayar enda tau enda di pasang tauka ngena bansa tayar ka di kena maya driba ba jalai bisi salju.

Pengawa Doug ba luar dia ampuh ai. Ari bulan lapan kutai iya betumbak ka tanah endor iya masang paip gas enggau ai. Lubang ti di tumbak iya agi telenga-lenga, apin di tutup enggau tanah. Ai meh dalam nya diatu ... baka ai dalam parit.

Arap ka hari enda ujan ujung minggu tu lagi, ngambi ka iya tau nutup lubang "parit" iya nya. Hari endang selalu ujan maya musim chelap.

Tuesday, November 29, 2005

Main Chukor

Tengah hari tadi, Duncan saduai Denice nitih aku ka bilik tindok. Saduai endang enda tau tama ka bilik nya enti aku enda enggau saduai. Iya ga saduai ka endar bejangkau ka utai. Denice beserungkai ka kasut aku lalu aku enda entu berati ka pengawa Duncan. Leboh aku malik aku meda Duncan udah ngunsur chukor daddy iya ba atas mulut iya. Aiee, kini tunga nuan ngunsur chukor nya ba mulut nuan, panjong aku. Hehehe, bedau lama udah nya, iya nyabak murus atas mulut iya. Nasit enda telih, mina merah (razor burn). Selemai nya ma iya ngasai bisa ba atas mulut iya, nyabak iya serta murus atas mulut iya nya. His first razor burn, ko daddy iya. Mesti di gambar ngambi ka nyadi pengingat.

Lelak

Demalam enda entu tindok laban Duncan ti bendar endar batuk datai ka temutah mutah. :-( Ma sakit baka tu iya enggai di tinggal ba bilik iya empu. Enggai enda enggau iya tindok dia ga kitai.

Nyelai endar ga bala anak mit, selalu endar sakit rengak. Tambah mega iya ti begulai enggau anak mit bukai ba endor iya sekula. Bejangkit jangkit penaykit! Kitai besai tuai tu pen kena rampit penyakit sida. Leboh aku betemu enggau lutor apin lama tu tadi, dia aku nanya lutor nama kebuah sakit batuk aku enda gerai gerai - lebih sebulan udah ngenat. Ni nuan bisi begulai enggau orang ko iya nanya aku. Nya ah bala anak aku, ko aku. Sigi iya ko iya, agi mit kelia kitai ti bisi kena penyakit baka nya, diatu enti begulai enggau anak mit, nye kena baru.

Siti agi, enda ngawa sakit enti rajin makai ubat, tang nya meh, nye begagai enti ka meri ubat. Lari ari kitai, monyet nya! Puas ngumbok baru ka makai ubat.

Monday, November 28, 2005

Rindu serta Sinu Ngenang

Kemari bendar aku betebah ka sida lagu lama .. Michael Jemat, Alley Cats, Carefree, Broery ... lagu ti suah di dinga maya ti agi sekula ba kolej kelia. Laban ti baru nemu begaga ka audio CD ari lagu MP3 tauka RAM, nya ti bisi betebah ka lagu lama ba CD player. Amat tau ngasoh sinu ati ngenang maya ti agi biak suba .. maya ti bedau entu bisi mayoh tanggunjawab. Kebuah sinu laban enda ulih pulai biak baru tauka ngagai maya nya agi.

Enda lah aku madah enti ulih aku ka musin jam alu pulai ngagai maya nya baru! Heheh. Mina rindu ngenang pemeli diri maya nya suba. Au ah, asai ka nemu amat pasal pengidup maya nya suba. Nya aku iran, kati ko sekeda bala classmates tumu endar belaki! Asai ka bedau chukop tuai, bedau chukop nemu pasal dunya, tang udah belaki beranak. Mayoh sida ti rebak aku, besai tuai anak bala sida, sekeda nyu udah beruchu.

Nadai jako bukai, mina rindu serta sinu ngenang maya agi biak suba.

Sunday, November 27, 2005

Bendar Shopping

Demalam kami menyanak bisi keluar makai ba restoran orang Vietnam. Aku makai mee hoon soup bechampur seafood. Doug makai wonton soup bechampur kway teow. Bala anak mutik utai dempa kami duai! :-)

Udah makai kami lalu limpang ba K-Mart laban ti berimbai enggau restoran Vietnam nya tadi. Chukop gaga aku tama ba K-Mart laban ti meda bisi 40%- 50% kurang ba sekeda gari dia. Aku tepeda ka jaket kulit ... 40 % kurang ari rega asal. Chukop gaga aku meda rega nya laban lama udah bisi ati ka meli jaket kulit (lambswool leather). Ngelama tu aku nadai ngembuan jaket ti manah agi di kena enggau gari ti formal. Kelimpah ari jaket kulit, aku mega meli siti agi jaket .. heheh, warna chelum mega. Kebuah meli jaket kedua tu, laban aku mina bisi siti ti kelalu tebal ... pedis di kena enti enda lama ba luar dalam chelap.

Udah bebeli ka sida jaket, dia aku ngiga memory card ka kamera baru aku. Nadai meda ti bansa ka 512 MB, mina ka 256 MB. Leboh ka bepunsin ba electronics department, dia aku tepeda ka Sony player ti ulih endor bemain CD bansa ka CD-R/RW. Alu di beli! Heheh. Bisi ga di binching kin kitu maya main sida lagu Iban. Aku sigi enda rindu bedinga ka lagu ngena headphones .. nadai ulih ninga utai bukai!

Pama ga pulai ari shopping demalam .. puas asai ati. :-) Bisi ga meli utai bukai, perengka di kena bala anak, serta bul siti ti deka di beri ngagai nembiak siko leboh Krismas tu ila.

Saturday, November 26, 2005

Hee Haw!


Puas kuda di tepan, alu di tiki kena ngambi utai atas TV, atas meja tinggi ... enda tau lama bemain enggau kuda nya. Ma peda udah lejuk, taroh ba bilik, enggai ka nyadi tangga bejengkau ka utai!

Ngerinda

Puas makai teda manok kulok ... nye enggai asai makai tauka nyium bau nya agi! :-( Di gaga ka sandwich, di gulai enggau mee ..

Kemari leboh Black Friday, aku bisi enggau orang begelut ba JoAnn. Aku ka meli kain batik tang enda tepeda ka kain batik. Engka agi ba orang ti ka meli iya. Iya ga ditu, enti kitai ka meli kain be-ila, kitai alu mai sekayu kain nya ngagai meja alai sales assistant nguntin kain nya ka kitai. Enti mayoh orang shopping dia tentu kain ti digiga kitai agi dipegai orang ti ka meli nya mega. Pengujong iya aku meli kain bisi chorak katun .. ka ngaga quilt ka bala anak.

Aku bisi meli dua gulung benang maya ti shopping ba JoAnn, kena ngaga scarf. Sekali tu aku milih warna ti bisi warna unggu. Ngeringak meh aku sahari tu ngerinda scarf nya ... cheessss ... kati ko scarf nya tak majak kuchup? Heheheh .. di bacha ga chara ngerinda nya, engka bisi salah kira utai dia, nya ti ngasoh iya kuchup! Tanda kitai bedau nemu iga pasal ngerinda meh nya!

Scarf kuchup

Thursday, November 24, 2005

Hari Manok Kulok

Pama endar ga manggang manok kulok! Ko resipi ti di tunda aku, panggang manok kulok nya 18 minit tiap paun - pemerat manok kulok nya 10 paun, reti nya 3 jam baru iya mansau. Enda nemu nama main oven aku nya tak enda entu angat. Chukop 3 jam setengah, apin ga gamal nya mansau! Chey! Simpan baru dalam oven ... enggai makai manok kulok enda entu mansau, wai, enggai ka kena penyakit cirit lagi! Heheheh.

Tu iya gamal manok kulok panggang. Baru pansut ari oven. Heheheh. Stidi ga asai iya ahh.

Manok kulok Thanksgiving 2005

Denice, Mommy, Grandma enggau Duncan ba belakang.

Wednesday, November 23, 2005

Christmas?

Amat tumu taun tu, di peda aku ba sebelah Galt, udah di pasang decorations Krismas. Ngelama tu udah Thanksgiving baru iya pansut decorations.

Enti ba shopping centers din, enda kira, sekeda hari bulan tujuh tu tadi udah pansut barang kena ngerami Krismas.

Ba radio muzik Krismas udah di tebah. Aku rindu ninga Rush Limbaugh ba radio ... ba program iya udah pansut muzik Krismas! Pagila pengerami Thanksgiving. Thanksgiving tu meh di kira iya pun holiday season .... datai ka taun baru.

Peda aku bala ka berandau ba rumahdayak.com udah meh bekirum ka selamat hari krismas ngagai pangan diri! :-)

Eh, aku ka meh enggau bepasang ka decorations Krismas sebelah rumah! Begantong ka api pelip sebelah ruai rumah enggau melit pun kayu belah tanah dia! :-) Enda iboh nganti bulan dua belas!

Chelap!

Enti di banding tempat bukai ba menoa kami ditu, California leboh musim chelap enda nyelap tempat bukai. Bedau lama aku udah datai ba menoa ditu, kami duai Doug bisi diau ba Michigan lima bulan. Rumah endor kami diau berimbai enggau Tasik Besai Michigan. Nya baru iya chelap!! Tebal snow maya musim chelap!

Tang pagi tadi leboh aku nganjong anak ke sekula tak chelap endar asai iya. Enda lama jam di ambi nyimpan anak dalam kereta, tang jari asai ais. Engka udah maya iya meh nya bekena ka sarong jari maya hari chelap! :-)

Kasih tudah bala anak, alu bedau di beli ka sarong jari. Ngelama tu saduai bedau kala diau lama di California maya musim chelap. Taun tu enti bisi peluang, ka mai saduai ka tempat bebukit, alai orang rindu main sukan ski tuaka snowboarding. Bedau kala saduai meda snow seumur idup saduai. Tentu rindu saduai bemain ba snow.

Bah, kati ko kitai Iban ngumbai snow? Salju? Tang salju jako Melayu ga.

Monday, November 21, 2005

Angel Tree

Kena 13 November tu tadi, gereja kami bisi ngatur pengerami. Pengerami tu di kumbai Angel Tree Dinner. Malam nya bala raban gereja mai utai dempa di kunsi enggau bala bukai, baka reti potluck meh nya. Kelimpah ari makai serumpu, dia bala raban tau ngambi kad ti ngundan nama nembiak di gantung ba christmas tree ti di kumbai Angel Tree. Bala nembiak ti bisi nama di gantong ba christmas tree nya iya nya nembiak seranta ti diau ba sebelah Galt ditu.

Taun dulu, kami bisi enggau pengerami Angel Tree Dinner tang taun tu, kami sebilik enda ulih enggau laban ti sakit. Aku sakit batuk alu bala anak batuk mega serta be-insak.

Taja kami enda enggau, kami ampit enggau ngambi nama nembiak ari Angel Tree. Hari Minggu tu tadi, Angel Tree ba gereja agi bisi nama bala nembiak begantung ba dia. Ba kad di tulis nama siko nembiak serta peminta sida, baka pakaian enggau ayam. Kad ti di ambi aku ngundan nama nembiak laki umur 9 taun. Peminta iya, jacket, bol, enggau ayam power ranger. :-)

Rindu ga asai ulih nulong orang ti seranta ari kitai, alu nulong sida ngerami musim christmas enggau pemeri ari kitai.

Saturday, November 19, 2005

Scarf


Tu iya gamal scarf ti udah tembu. Nadai ga lama nembu iya kutai! :-)

Wednesday, November 16, 2005

Hobi

Aku endang rindu begaga ka utai tang nya meh kadang kadang kelalu mayoh utai deka di gaga nye nadai chukop hari nembu ka samoa utai ti udah di gaga.

Tu scarf di gaga, tang udah lebih seminggu alu bedau ga tembu! Ukai tak nemu endar ngerinda tang maya meda benang ti dikumbai suede ba Walmart alu bisi ati ka nguji gaga scarf ngena benang tu. :-)

Quilt tu ari bulan tujuh kutai alu bedau ga tembu! Mina nyambung samoa block ti udah di jait aja agi ... tang nya meh kiroh laban utai bukai! :-)

Maya nyerungkai manik, alu ngepun tenggak tu ... ukai tak lama nembu siti tenggak tang maya ngiga pintu kena nembu tenggak, enda tetemu ka sida pintu! Diatu pintu udah di beli bedau ga nya tembu! :-)

Meda pangan aku besimpan ka gambar dalam scrapbook, alu ka asai ati nyimpan gambar nunda stail tu. Rindu ga laban album ukai mina di simpan gambar ... chukop macham utai di lekat ba album nya ngambi ka manah agi di peda ... nya di kumbai orang ditu scrapbooking.

Sunday, November 13, 2005

Ulah Bala Anak

Enda ngasoh ketawa meda gamal nembiak baka tu? Baru udah mandi, di gari enggau gari bersi enggau manah, tang enda bulih 2 jam udah nya, tu meh gamal saduai. Duncan bisi nyerungkai beg kerja daddy iya, alu ngambi bala pen serta marker ari beg. Manah dinding nadai kena chunting! Mina belah tilam, belah lengan, kaki enggau moa aja di chunting.

Cheeezze! :-)

Meda gamal tapa jari saduai?

Denice, nama main tapa jari nuan baka nya?

Peda mommy, tapa aku enda ngamah enggi Denice!

Saturday, November 12, 2005

Sale

Sapa kitai bala indu enda rindu shopping? Kemari bisi sale besai ba JoAnn. Bekareh meh aku tu enggau orang begau kin. JoAnn endang endor aku rindu shopping .. endor meli kain kena aku ngaga quilt, serta alai meli marik kena ngaga gelang, tenggak ... Arap meh aku berangkut pulai ari JoAnn.

Dua jam aku bepusin pusin ba JoAnn tang tak nadai siti utai ti narit ati. :-( Engka laban tempat nya nye sekut laban orang. Bingong enggau orang begelut dia. Bisi meh ati aku ka meli bup bejalar ngaga rinda, hehehe, nye enda ingat agi ngerinda! Tang bup rinda nadai on sale. Agi mar. Rindu meda benang kena ngaga rinda .. benang tebal kena ngaga scarf, tauka baju chelap.

Aku mina meli magazine siti, Beadwork: Stringing enggau sepeket pintu tenggak. Asai ka tebasau jam aku ba JoAnn hari nya!

Malam nya mai apai tuai enggau bala anak keluar makai. Makai ba kedai mee orang Vietnam. Aku ngorder sup wantan dichampur enggau kway teow. Ka endar Duncan makai wantan enggau kway teow! :-)

Udah makai, kami alu ka Wal-mart. Aku bisi meli tanjut jean minggu dulu, tang enda entu ngam .. tukar, ngiga saiz ti ngam agi. Aku bisi nuchi gambar ba Wal-mart mega, alu ngambi gambar ti di tuchi nya. Cheyy, nye ka dua minggu baru gambar nya tembu! Enda berapa! Ko jako ka jampat .. di upload online, udah nya ngambi ba Wal-mart, tang aku enda sedar, gambar nya di tuchi ba siti endor, ukai ba Wal-mart, udah nya di anjong kin. Patut lah lama! Ngambi ka murah ko jako tang servis enda berapa! Bisi ga utai bukai di beli ba Wal-mart ... dian bebau wangi (scented candle), lampin anak (Huggies), album gambar (scrapbook), enggau sida roti ka dempa bala anak.

Puas ga ati pulai shopping malam nya, udah bekau ti nadai bisi asil shopping ba JoAnn sebedau nya! :-)

Thursday, November 10, 2005

Kway Teow Basah

Hari satu tu tadi, udah bekau aku perasa mammography ba klinik, dia aku bisi ke pasar .. meli beras, ikan, sayur, santan dalam tin, roti ka dempa bala anak, enggau meli kway teow.

Lama udah enda mandok kway teow basah. Tu meh gamal iya. Enda tingat meli undang maya ke pasar tu tadi. Asai ka agi bisi dalam peti ais. Aku ngena dagin manok, fish ball, sayur, enggau tomato aja. Nyamai ga asai iya ahhh... :-)

Wednesday, November 09, 2005

Kirkwood

Apin lama tu tadi, aku serta 3 iko pangan indu aku bisi nemuai ngagai tempat siti di kumbai Kirkwood. Tempat tu ba bukit din, endang alai orang ka rindu main sukan ski tauka snowboard. Maya kami kin kutai, bisi snow mimit ba tanah, laban dua hari sebedau kami kin, snow bisi turun.

Kami mupok lemai hari lima tang nyau tengah malam maya kami datai din. Kami bisi ngetu makai dulu enggau mega, ngetu laban aku bisi mabok mimit ... jalai bukit, bebelit belit ... :-( Maya aku ti pansut mutah dia meh pangan aku ti benama Kathy sedar ka iya enda ingat mai kunchi condo ti endor kami deka bemalam! :-( Apu! Nikal kami ngiga alai tau betelipon. Puas telipon nadai ga bulih alai tau ngiga kunchi spare. Ka pen enda, laki Kathy betemu enggau kami ba siti tempat alai iya nyua kunchi condo nya. Kasih tudah, driba sejam setengah nganjong kunchi. Nya ti ngasuh kami datai laun ba Kirkwood. Chelap condo endor kami malam nya. Udah ga enda entu nemu masang heating ba condo nya! Heheheh.

Pagi hari enam kami bisi nurun hiking. Tu iya sekeda gambar di ambi maya kami di Kirkwood.


Tu condo alai kami bemalam.

Ari kiba: Aku, Rhea, Kathy, Karen

Rindu meda snow ba tanah.

Tuchong bukit di peda ari jalai endor kami hiking.

Taun baru, musin bunga, dia kami bisi ka ka Kirkwood baru. Maya nya rindu meda bunga pansut ba sebelah tanah.

Related Posts Plugin for WordPress, Blogger...