Enda Chukop Duit

Ari enam nyin kemari, udah pulai shopping, kami menyanak bisi ngetu ba stesen minyak, ka ngisi minyak kereta.

Ba sekeda stesen minyak kami ditu, enti mayar ngena cash, murah 2 sen minyak se gilin. Rega minyak kami ditu pen enda sebaka ari stesen ka stesen .. ngiga meh endor ti nyual minyak murah agi enti ka jimat duit mimit! :-)

Ba stesen endor kami ngetu nya tadi, rega minyak pengabis murah ari stesen bukai ti udah di pansa kami lemai nya. Mayoh kereta nganti ka ngisi minyak dia, laban ti murah ari endor bukai.

Leboh Doug nyimpan duit kena mayar minyak ba mesin duit, dia aku tepeda siko lelaki ngena slipar, ngena tanjut mirah pandak, serta ngena t-shirt mansang ngagai Doug. Bulih tahan siko tu, enda chelap, ko aku dalam ati diri. Peda aku orang tu tadi bejako enggau Doug, udah nya aku lalu meda Doug nyua $1 ngagai iya. Udah iya nerima duit nya, orang tu lalu mansang tama ngagai kedai stesen minyak. Udah nya, iya lalu ngisi minyak dalam kereta iya. Tang peda aku, iya mina ngisi $2 aja! Apu, enda datai se gilin nya!

Leboh Doug ngisi minyak ba kereta kami, aku alu nanya iya pasal lelaki ti di beri iya duit nya. Ko Doug, siko nya tadi madah ka diri iya mina bisi $1 lalu nanya Doug enti iya ulih meri iya $1 da, awak ka ulih ngisi se gilin. Iya madah ka diri pansut nadai mai wallet iya.

Sinu ga ati aku meda iya, engka enda ulih pulai enti enda chukop minyak ba kereta. Kereta iya bansa Trooper model lama. Aku lalu ngasoh Doug nyua iya $3 da, laban orang tu tadi agi bediri berimbai enggau kereta iya, engka agi nganti enti bisi orang bukai alai iya minta duit! Mansang meh Doug ngagai orang tu tadi lalu nyua iya $3 da. Udah nya mansang ga iya baru tama dalam kedai stesen minyak. Udah iya ngisi minyak rega $3, iya pen alu mupok. Apu, amat tusah iya nya .. $2 enda datai se gilin minyak ulih di isi, tambah $3 da, pama meh nya.

Aku mina sekali aja suba udah meda orang (bala anembiak)minta duit kena ngisi minyak kereta sida. Enggai kami meri sida duit .. enda nemu meh, tak enda sinu ati meda sida nya suba! Heheh. Tang siko tu, gamal iya ukai baka orang ti nadai kerja .. baka orang ti beguai pansut ari rumah enda ingat mai wallet! Ka ga aku nulung orang baka nya.

Nya meh, sekeda ulah orang ba menoa tu!

Spiling Jako Iban: Mata vs Mata'

Pagi kemari aku bisi be-chat enggau petunggal aku ngena MSN Messenger. Petunggal aku tu diau ba France laban ti udah belaki enggau bansa Peranchis .. engka lebih ari 15 taun iya udah diau din.

Chukop macham utai di kerandau kami duai .. ngena chara taip lah laban maya kami duai masang webcam aku ulih ninga iya tang iya enda ulih ninga aku. Bepeda ka moa pangan meh kami mina ti enda ulih bejako enggau pangan.

Petunggal aku alu nanya pasal penyakit burung (Bird Flu) ..

Petunggal: Kati baka kita dia, bisi kena chicken flu kita dia?

Aku: Ohh, nadai kami ditu udah bisi kena penyakit Bird Flu .. ..

Petunggal: Au ah, sinu meda bala manok di bunuh .. nyu udah ribu bala manok di sacrifice baru nemu enda nganu kitai ma makai manok .. asal aja di pandok mansau mansau ..

Aku: Au ah ..

Petunggal: Pelaba aku sida ba Vietnam ti mati laban Bird Flu nya .. makai mata .. sida rindu makai manok mata, di campur enggau limau, nyu mansau manok nya .. Bisi pangan Vietnam aku mai aku makai nya ditu.

Aku: Ukai, sida ti sakit nya laban ti begulai enggau manok .. ba tai manok nya bisi virus penyakit nya alu tau idup ba tai nya lama .. sida ti begulai semak enggau manok udah nya ngunsut mata ... nya lah kena jangkit penyakit nya.

Petunggal: Makai manok uncooked .. enda mansau ..

Nya baru aku sedar, "mata" ko iya, nya "mata'" ... alu geli meh ati aku ... petunggal aku pen alu ketawa ..

Aku: Hahaha, makai mata ikan nemu aku sekeda orang sigi rindu makai mata ikan .. aku tu ti kala diau ba Vietnam nadai kala pen udah meda orang makai mata manok!

Apu, nya baru kami duai bendar ketawa .. datai ka berai mata kami duai ketawa.


Petunggal:Nya lah, pedis endar ga spiling jako Iban, apa agi enggau leka jako ti ujong enggau "a".

Aku: Nya lah, kadang kadang nyu nyepil leka jako Iban baka ti munyi jako akih meh, tambah "k" dia.

Amat ga jako Iban, spiling sama, tang sebut iya lain, ni enda ka saru sekeda kitai ti macha tulis Iban!

Happy Valentine

Denice makai tortilla chip.

Tu group sida ti umur 2 taun. Duncan dudok ba ujung meja.

Tu group sida ti umur 3 taun.

Rindu endar meda bala anembiak rami baka nya ... theme Valentine tampak endar ba kelas sida. :-) Tiap iko nembiak ba kelas tu pulai mai goody bag ... stickers, chocolates, candy etc.

Ansa Mangah

Peda kita, amat mangah endar ansa kami nya! Tiap kali aku muka pintu, iya alu belanda nuju aku, pala iya tunduk, serta meresih ka mantuk aku! Heheh!

Gamal nuan, ko aku, aku palu nuan legi! Eh, kapa iya peduli, di palu meh iya ngena kayu enda meh lari. Bendar ngemba, baru iya mindah ka bukai. Nya meh enda tau enda mai kayu aku ma ka pansut ari rumah. Ma aku melakang ka iya beguai iya belanda ngagai aku ka mantuk burit aku kini! Heheh.

Ansa kami nya, dua iko. Siko laki, siko indu. Ka indu nya baru berengkah beteluk. Tiga igi udah teluk iya di gumpul kami. Nitih ko utai di bacha kami pasal perangai ansa, keterubah iya ansa indu beteluk, teluk iya enda ulih nyadi anak .. agi "infertile" .. nama jako nya dalam jako Iban? Taun dudi ila baru teluk iya tau di peram. Ansa indu beteluk ari bulan dua datai ka bulan lima. Reti nya, anak iya tau besai maya musim panas, udah nya maya musim chelap kira iya anak ansa udah chukop besai .. hari chelap enda ngachau iya agi.

Balat pemesai omelette di gaga ila ngena dua igi teluk ansa! Heheh.

Klinik

Ba menoa kami ditu, enti nuan sakit, nuan enda naka ati mupok ka klinik lalu betemu enggau lutor. Nuan enda tau enda ngaga appointment dulu sebedau betemu enggau lutor! Amat merinsa sepi aku atur baka tu. Malam hari empat nyin kemari aku enda ulih tindok laban pedis perut, di pelaba aku sakit jugal. Semalam malam datai ka pagi, agi ka pedis perut aku. Makai ubat ti ngelama tu ngasi ba aku pen nadai bisi insur. Pagi hari lima aku endang udah bisi appointment mai Duncan betemu enggau lutor. Betelipon meh aku ka opis lutor engka tak ulih betemu enggau lutor maya aku ti nganjong Duncan. Pei!! Ni bisi ulih, udah penuh appointment lutor sahari nya!

Tudah Duncan di bai betemu enggau lutor laban di peda kami duai Doug bisi utai kembai ba rekong iya. Ko lutor tonsilitis .. enda nemu nama nya dalam jako Iban. Nadai ngachau ko lutor, enti nadai nyekat seput tauka nyekat nelan maya makai. Pulai kami ari lutor, ngambi Denice ari sekula iya. Datai ba rumah nemu nya Denice ga angat isi. Apu, naka meh nya, sakit magang magang bala anak aku! Malam nya mutah tudah Denice. Siko tu ma udah angat isi enda tau enda bisi mutah.

Tumu pagi tu tadi aku talipon ngagai klinik engka tak ulih di bai pagi nya betemu enggau lutor. Duncan endang dua bulan udah batuk lalu demalam enda tindok iya laban batuk. Ko lutor, maya kami mai Duncan hari lima nyin kemari, enti batuk iya nadai insur, bai betemu enggau iya baru. Nasit endar ga pagi tu, bisi kosong appointment lutor alu ulih di bai saduai ngagai klinik.

Aku ka endar mut mut pasal chara kitai betemu enggau lutor ditu. Amat meh chukop macham penyakit tau di ubat ditu tang enti ka betemu enggau lutor baka ti ka betemu enggau Agung! Pama agi kitai di Malaysia din, barangsapa lutor tau alai kitai betemu enti udah sakit. Asal bisi duit aja kena berubat, enti nadai duit spital perintah bisi alai nganjong diri. Ditu enggai enda bisi insuran baru tau nganjong diri berubat. Sekeda lutor enggai di bayar enggau duit. Mesti ngena kad insuran. Tambah mega enti udah sakit amat amat datai ka bebuntas, puluh ribu bayar iya, nya meh enti nadai insuran enda ulih meh tudah kitai berubat. Tang enti nganjong diri ngagai bilik emergency ba spital nadai ga orang enggai nerima kitai masuk spital. Nya meh bilik emergency ditu penuh enggau orang ti masuk sechara haram ngagai menoa tu... iya ga sida nadai insuran tambah mega nadai duit kena mayar lutor pribit.

Chisss, amat enda berapa! :-)

Mamau

Pagi kemari, maya aku nyugu bok udah ka baru badu mandi, aku nyepi bok aku tak agi lekat asai iya. Eh, nama kebuah tu? Di basu ga bok tu tadi. Hmm .. udah di sugu, alu di blow bok nya tadi. Aiee, nama hal bok tu tak enggai manah di stail? Tak enda lembut asai bok nya. Udah nya alu nanya diri, bisi di shampu pala nya tadi? Basah amat basah, tang bisi ke enda di shampu? Eh, enda ingat, bisi ka enda? Heheh, engka enda ingat di shampu meh nya tadi! Sedap endar asai bediri baroh ai ujan ngenat ai angat laboh ba tuboh, engka tak kelalu sedap asai iya aku alu besabun, enda teingat ka diri bedau nyampu bok. Selalu iya pala di shampu dulu, baru nyabun tubuh.

Heheh, engka udah mupok mamau meh nya! Umur ga udah majak tuai!