Thursday, April 27, 2006

Kek Hari Jadi

Aku ngaga spice kek ngena kek mix Betty Crocker. Aku mina nyampur 3 igi teluk, 1.25 cup ai, enggau 0.33 cup minyak masak, tunyau samoa enggau kek mix, masuk dalam tin kek, udah nya tunu dalam oven. Udah iya mansau serta udah chelap sapu cream cheese frosting atas kek nya. Simpan dalam peti ais enda lama awak ka frosting kering mimit.


Spice kek baru pansut ari oven.


Hehe, enda entu beresi frosting nya di sapu atas kek!


Tuesday, April 25, 2006

Wednesday, April 19, 2006

Cheeeezzzze

Mommy, cheeezzzeee! Nama tu nadai entu peda utai deh? Nyau juling diri mata aku!


Monday, April 17, 2006

Rojak Suntong Kangkong Tahu


Tu baru iya aku nguji ngaga rojak suntong kangkong becampur tahu. Ngelama tu aku enda kala meda suntong ti di kena kitai ngaga rojak. Mina suntong tu enda entu ka kembai taja udah di rendam lama. Tang tau di kenyadi laban iya enda liat. :-)

Enda berasai aku ngabis semangkuk besai rojak! Heheh.

Sunday, April 16, 2006

Cencaluk

Udah bekau aku ka macha post Encha pasal iya ti ngirum cencaluk ngagai menyadi iya ba Johor, tengok asai ati aku ka makai cencaluk mega! Ba Asian supermarket ba Sacramento ditu aku sigi kala meda cencaluk di jual dia, tang nadai bisi ati ka nguji.

Lemai kemari aku tepeda ka cencaluk ba supermarket nya, hey Buatan Malaysia!, alu ka meh aku nguji iya!

Aku bisi mega tetemu ka tahu goreng, kangkong, enggau suntong rangkai. Ila aku ka ngaga rojak kangkong suntong! Bisi gambar iya ila, F2mia!

Tu meh gamal cencaluk dempa kami ba Amerika! Cencaluk import ari Malaysia.

Lauk Tengah-hari Hari Easter

Orang kiroh sembiang maya Hari Easter, aku kiroh nyumai! Heheh. Nadai nurun sembiang kami menyanak sahari tu laban hari ujan .... enggai mai anak ngelaban ujan, tambah mega, service kedua sahari tu nadai bisi child care. Saduai enggai dudok jenoh, enda ulih dibai sama sama dudok sembiang.

Lemai kemari aku bisi meli kangkong, bisi mega meli itit panggang. Demalam udah belauk ka itit nya, tang laban ti agi bisi, bantai baru ke-empa tengah hari tu! Ooii, nyamai endar itit panggang nya! Diatu nyau nemu agi aku ngoreng kangkong belacan .. heheh, puas ga ati makai iya!

Kangkong pandok kami ba menoa Amerika! :-)


Itit panggang gaga cina ba menoa Amerika!

Friday, April 14, 2006

Makai

Bendar aku begaga/bepandok ka utai udah bekau aku ti "bepuasa" sebedau aku peresa barium enema! Heheh.

Aku bisi ngaga bubur chacha, mandok undang bechampur enggau vodka, bisi mega ngaga rojak! Hehe, mina rojak nadai suntong lah .. nyamai agi enti bisi suntong neh! Tambah mega tahu goreng aku enda senyamai tahu goreng di temu kitai di Malaysia din .. ka pen enda, nya meh di kena!

Sahari tu aku ngaga asi pulut ti ditabur enggau sambal undang ... ishh best iya! Bekareh aku telipon ngagai kawan aku di Miri din nanya ka chara ngaga kuih pulut undang tu. Kawan aku tu, indu cina, sigi landik bepandok ka utai. Ka belajar ngaga pau ari iya ila! :-)

Rojak ala Puteri

Undang becampur vodka

Kuih pulut sambal undang

Oh, f2mia, anang meliur nuan meda tu! Heheh. Poison, hope you've had your lunch when you look at these pictures! Haha.

Tuesday, April 11, 2006

The New Greek Village Inn

Tengah hari tu tadi kami menyanak bisi ngetu merarau ba restoran Greek. Lama udah nadai makai utai pandok stail Greek. Aku sigi rindu makai lamb pandok Greek tauka sandwich sida di kumbai gyros.

Kami menyanak nadai kala makai ba restoran tu laban iya ba Sacramento, tang laban iya semak klinik alai aku perasa tadi, kami ngetu dia laban enggai kiroh ngiga alai bukai.

Mayoh endar orang makai dia .. bala lelaki bekena ka business suits, paduhal tempat nya popular alai orang kerja sebelah dia makai. Rega utai dempa dia kira umbas iya ga tang enti hari hari makai dia besai ga belanja iya! Rega sandwich antara $ 8.00 - $11.00.

Aku ngorder sandwich di kumbai gyros dip ... nyamai endar lamb enggau beef slices ba sandwich nya! Heheh. Doug mina ngorder salad laban iya udah makai Macdonald's burger udah iya ninggal aku ba klinik.

Gyros Dip Sandwich


Salad enggau cheese

Sunday, April 09, 2006

Red Robin

Red Robin Restaurant

Hari lima tu tadi, udah kami pulai ari klinik nganjong bala anak berubat, kami bisi ngetu ba restoran Red Robin. Sekumbang restoran tu di buka ba Elk Grove, enda jauh ari klinik alai bala anak berubat, kami nadai udah kala nguji restoran tu. Aku mina dua kali aja kala makai ba Red Robin dibai entua indu aku, Red Robin ti enda jauh ari alai iya diau.

Menu restoran tu endang menu Ameican .. burgers, bisi ga seafood mimit, tang samoa bansa ka di goreng enggau tepong. Aku enda berapa rindu makai burger tang enti burger nya di gaga fresh, ka ga aku makai .. baka sida MacDonalds, Burger King etc, nya aku enda rindu.

Aku ngorder kerang enggau kentang goreng (clamstrips and fries). Tu iya gamal iya:

Kerang goreng enggau ubi kentang goreng

Doug ngorder gourmet burger ...Whiskey River BBQ burger. Bisi aku nyepi, nyamai ga asai iya.

Whiskey River BBQ Burger

Bala anak di perindang enggau crayons enggau coloring sheets. Tu utai di kerindu aku ma makai ba family restaurant .. endang selalu bisi utai di beri kena ngerindang bala anembiak.

Saturday, April 08, 2006

Puteri's Photo Blog

Puas puas ngambar utai .. eh, manah muka siti blog alai nyimpan gambar! Nadai tak nemu iga ngambar utai tang sigi rindu .. apa agi sekumbang aku bisi camera baru! :-) Blog baru tu di kumbai Puteri's Photo Blog.

Arap ka kita ngabas photoblog aku tu. Sekeda gambar endang udah pansut ba blog tu enggau ba blog Puteri's Musings.




Tu gamal bungai pun quince ba belakang rumah kami. Asai buah quince nye ka asai buah jambu. Buah tu enda di empa mata' .. enti di panggang enggau ai singut, nyamai endar! :-)

Thursday, April 06, 2006

Bungai











Sekeda bungai ti di gambar lemai kemari maya ti ba Garden Center ba Lowe's. Enda nemu nama samoa bungai nya, mina sekeda aja aku ngelala nama iya.

Banjir

Lemai kemari kami bisi nurun ka pasar Lodi. Ka bilok ngagai jalai ti selalu di tengah kami, tang enda ulih laban udah di block .. banjir kenu, tang nadai ga meda ai dia. Ka pen enda nyau mansa downtown Galt dulu sebedau nuju jalai besai. Enda puas ati Doug, agi ga iya ka nengah jalai ti di tutup .. limpang meh kami ari jalai besai.

Apu, nya baru meda ai ba jalai! Sungai ti di kumbai Dry Creek, nadai kala aku meda ai dia, tang sekali tu, endang penuh ai sampai ka ngampoh golf course semak dia. Ni enda 10 hari beturut turut hari ditu ujan. Orang bukai bisi ga nengah jalai ti ditutup nya, kapa sida peduli pasal sign ti enda ngasoh nengah jalai nya! Heheh, laban kami ti ngena pick up truck nadai ngawa .. ai ba jalai nya agi ulih di tengah, kereta biasa pen agi ulih nengah.

Udah kami pulai ari Lodi, ai ba jalai dia nyau udah surut. Jampat iya surut laban kemari nadai ujan. Sahari tu baru iya nadai ujan. Sebelah rumah kami ditu endang mayoh endar ai betakong.


Wednesday, April 05, 2006

Teberayan

Nama utai ti kala di peda kita teberayan ba tengah jalai? Aku jarang pen meda utai teberayan ba nanga jalai di Malaysia din .. bangkai ukoi, tauka mayau endang selalu di peda .. nye nadai temu gamal agi .. kasih.

Tang ba menoa kami ditu endang selalu meda utai teberayan ba nanga jalai besai. Ba radio kami ditu endang bisi hourly traffic report .. madah pasal accident ka, traffic jam ka, chemical spill kah, tauka utai ti teberayan ba nanga jalai.

Sahari tu aku ninga pasal tilam teberayan ba nanga jalai. Bala orang ti dreba kereta anang enda berati ka tilam tu enggai ka ngelanggar tilam, enggai ka enti salah hari bulan tau accident laban tilam tu.

Kelimpah ari tilam, tangga enggau kerusi selalu teberayan. Kadang kadang tin chat, meja, sofa, enggau bag (luggage). Kati ko utai tu tau teraberayan? Iya ga enda di tanchang enggau manah, bai dreba laju, puput angin, terebai lah utai tu ari belakang truck!

Utai bukai ti selalu di peda ba nanga jalai baka kulit tayar (tyre treads), axel, exhaust pipes .. heheh. Kami duai Doug kala pen ngelanggar axle, akai, merinsa laban tayar kereta kami pecah laban nya! Pedis endar ati!

Sekali kami pulai ari San Francisco, nye ka ngelanggar kerusi! Nasit ulih di seliah, enti enda abis pen kereta penyik laban ti ngelantak kerusi! Kelalu mayoh kereta ba depan, ni ulih meda nama utai ba depan din!

Sekali mega aku mai kereta enggau kawan aku, nye ka ngelantak panggal! Heheh, au ah, panggal! Enda meh kitai nemu engka bisi orang pindah ....

Baka sida jelu ti kena langgar, sida mayau enggau ukoi, mina ba residential area aja. Enti ba jalai besai jelu siga di peda mati ba jalai ... road kill, baka sida skunk, apu bau iya! Heheh. Sida possum, rabbit ...

Enti pasal sampah di buai tisi jalai, ah, tu enda iboh sebut. Enda jauh ari rumah kami ditu utai ti selalu di buai orang iya nya tilam, sofa lama, peti ais, kereta lama .. kami nyangka orang ti ngerja utai tu iya nya pendatang haram. Laban ba menoa sida din (Mexico) baka nya sida enggau utai ti enda di guna sida .. buai ba tisi jalai aja. :-(

Ok, naka tu aja, cherita semadi nadai. :-)
Related Posts Plugin for WordPress, Blogger...