Sunday, June 29, 2008

Kasut

Nah, lawa ka enda kasut beheel tu? Besai ba kaki aku? Eh, utai ulih mutik ari cousin aku! Sigi baka ma nya utai diberi orang! mrgreen Bah, ka meda batang tubuh aku ka ngena kasut tu?

*
*
*
*

Anang guai, scroll down ...

*
*
*

Agi, ah, scroll down ... buat suspen aje, eh!

*
*
*
*
*
*

Scroll baru!

*
*
*
*
Jeng, jeng, jeng! pucca_love_14




Hansem ka enda gamal aku ngena kasut beheel?

Ooii, tau dikena bemain scooter kasut tu!! Sigi best amat! pucca_love_04

Tuesday, June 24, 2008

Wifi booster upgrade

Lemai tu tadi aku bisi ke pasar alu bisi tepeda ka aluminium strainer. Meda rega nya mina RM 3.99 aku alu meli, ka nguji kena ngaga wifi booster, ko aku.

Amat enda rugi aku meli nya laban signal strength wifi ulih niki ngagai 63%. Wifi booster ke dulu ti ngasoh sekeda kita ketawa mina ulih nangkap signal naka 60%.




Dua iti signal ari wifi router neighbour aku ulih mega ditangkap wifi booster aku tu. Minggu nyin tadi aku kira ka "numpang" wifi linksys neighbour aku, laban signal ti ulih ditangkap ari bilik aku leboh ka ngena laptop menyadi aku mina wifi signal ari neighbour nya. Minta ampun, neighbour!

Aku bisi terunding ka ngena bisin aluminium laban ka ngiga ka besai sereta lempong. Kali sigi tau dikena tang nya meh berat, tambah mega pedis ka ngelekat ba kayu mit. Tang laban ka bisi tetemu ka strainer aluminium, nya aja lah dulu. Engka dudi ila enti tepeda ka kali aluminium ka besai agi, tau ga experiment ngena nya! mrgreen

Monday, June 23, 2008

Wifi booster gaga kediri

Kita anang ketawa meda utai digaga aku tu! Coki datai ka bebaring ba lantai ketawa meda wifi booster digaga aku!



Wifi booster tu ditunga ngagai Shell office laban dia bisi hotspot. Shell office ulih dipeda ari balcony rumah apai aku nya.




Nah, taja gamal tu nyelai dipeda iya bisi mai asil! Suba laptop aku, ngena external wifi adapter diachok ba USB port ba laptop, nadai nerima signal ari Deconnexion. Diatu, udah dipasang enggau USB extender cable pemanjai 5 metre, alu digantong ba booster digaga aku nya, ditanchang ba rail balcony ... jeng, jeng, jeng!!






Ari nadai signal, diatu ulih nerima tiga tauka empat bar, connection signal hovers between good and very good!

Nah, barangsapa kita ka diau ba tempat ti enda berapa ulih nerima signal wifi tau ngaga utai baka enggi aku tu! Enggi aku tu ngena tudung kipas, about 12 inches in diameter.

Ko Doug madah ka aku, aluminium foil nya sepatut iya diadu manah, anang kelalu balat kerunyuk ko iya. Enti iya smooth agi, manah agi radio signal diterima. Ohhh, ko aku! Hehe, main gasak aja! Tang ka ga nyadi eh!! Pagi tu tadi bekareh aku masang aluminium foil ka baru ba tudung kipas nya ...tang agi ga signal strength iya baka enggi kemari.

Pokoknya (nunda jako Indon), wifi signal booster aku tau dikenyadi! mrgreen

Thursday, June 19, 2008

Makai Tindoh

Sapa bala kita ka rindu makai tindoh ... ulat mulong la, enti kita enda nemu nama utai nya!

Aku nadai bisi ati ka nyepi penyamai tauka enda tindoh! Tentu nya asai indu utai ko aku! Aku mina udah kala nguji makai ulat sutera .. silk worm. Asai indu utai!


Ipar aku siko sigi rindu amat makai tindoh. Suba iya enda ulih makai kelalu mayoh laban isi iya alu gatal. Tang diatu isi iya enda gatal agi, sigi bebendar meh iya makai tindoh maya kami ka dirumah panjai tu tadi. Ni ka dibai iya pulai ka Miri agi!


Doug tu pantang dikumbai orang takut makai utai nyelai. Ma orang nyadong iya lauk tindok, jeput ga iya siko dua! Nah, enda ka alah aku ti Iban tulin tu gasak iya?! Tu meh gamal utai dempa iya tengah hari siti.


Ka meda orang putih makai tindoh? Tu meh gamal iya! Anang kelalu berati iga! Enggai ka tepeda bulu idung! Heheh.

Tuesday, June 17, 2008

Ngabang

Cherita aku ka ngabang ngagai Cuthess saduai Grace lama udah ditusoi saduai. Enggi aku baru sahari tu! Ehhh, internet connection ditu semadi nadai!! Sahari tu aku sempat nginjau laptop menyadi aku. Enggi iya pama agi nerima wi-fi signal! Enggi aku sekejap bisi sekejap nadai! Peiii!!!

Maya kami ka angkat ka Bintangor hari sigi endang udah bemoa. Udah kami datai ba Sarikei ujan pen nyu tebubuh! Nasib iya Doug ka mai kereta. Enti nya aku endang asai ka enda meda utai ma udah mai kereta dalam ujan!



Kami ka dalam kereta nya nadai siko udah kala ka Sarikei. Terus kin, ko orang. Au meh, terus kin, dah datai ba Sarikei, nama nya sungai deh? Ni jalai ka Bintangor? Nasib bisi telipun neh! Nyau tudah Cuthess madah chara ka Bintangor! Paduhal ngena ferry! Nanya cina ba workshop siti, nadai siko nemu madah jalai ngagai ferry! Enda berapa! Jalai ka ditengah nuju ferry ngemit nya baka ka ukai nuju ngagai ferry! Enti Cuthess enda nyebut jalai nya sigi sempit, sigi ka ngiga jalai bukai aku! Amat baka ka ukai jalai nuju ngagai sebarang alai!

Ko Cuthess, udah pansut ari ferry, nitih aja orang bukai. Tentu sida nya nuju ka Bintangor. Nitih meh kami. Dah datai ba pasar Bintangor kami ngetu ba stesin minyak Shell nganti Cuthess ka datai ngulu kami ngagai rumah iya.



Manah endar utai dempa disedia Cuthess! Ni ka babi tunu, manok tunu, asi ruas, sup undang, oii, boleh tahan indu tu nyendia pemakai! Apai Cuthess bisi datai apin lama kami udah datai dia. Bendar endar apai Cuthess ngambar Denice saduai Duncan. Ko aku, iya angan angan uchu iya dudi ila baka gamal Duncan! Heheh.

Maya kami ka deka pulai, Duncan nyabak laban iyaminta siti camera lama apai Cuthess. "I like the one with the flash on top," ko iya. Ni lah orang ka magi iya collection camera lama orang!

Bisi dua jam kami ka ngabang ba rumah Cuthess. Sigi rindu endar ga ulih betemu enggau pangan ti udah dikelala ari blogging neh! Cuthess looks exactly as I had imagined her!



Ari rumah Cuthess kami bisi ngetu ba rumah Grace enggau menyadi iya Fred ba Sarikei. Rumah saduai tu sigi dipansa kami pulai ka Saratok. Nyamai amat ga rumah iya digiga, mina simpang masuk ngagai rumah Grace ka sempit mimit!



Taja Grace jarang ngayan ka gambar diri iya empu ba blog iya, aku sigi endang ngelala nya iya leboh aku ka betemu enggau iya! Hari kami ka datai endang hari Open House iya, so mayoh lah utai dempa! Aku ampit makai bak kut teh ba rumah Grace!



Duncan ka endar dibai Fred betundi! Denice mina nuchok nuchok Duncan aja!

Maya kami ka pulai ka Miri kami bisi ngetu baru ba sida Grace, ngambi tuak. Tuak ti ka diberi Cuthess nyau abis enda ingat dibai pulai! Tuak nya diatu udah datai ba California din, dibai Doug pulai dulu tu tadi.

Aku ngarap ka dudi ila, bala kita ti bisi enggau aku bekelala ari pengawa blogging tau ngabas kami ba menoa California! Simpan duit, bisi chukop ka tambang umbas meh! Rumah kami endang semampai tebuka nerima temuai ari Malaysia!

Saturday, June 14, 2008

Free Wi-Fi

Berapa minggu aku ngetat ka internet connection ti ngelubah tekura!! Peiiii!!! rolleyes Tang lemai tu enda liat agi ati aku .. bai laptop ka sadau ... aim kitu aim kin, ngicha ka bulih signal free wi-fi! Nyau ka puas puas iya tetemu ka signal ba patio luar bilik tindok apai aku! Peeewwwiiit!

Endang bisi aku udah nguji kutai tang nadai bulih signal ba bilik lama aku. Tang menyadi aku madah ba bilik iya bulih signal, ehhh, enda patut aku enda bulih ko ati aku. Weak signal, mina bulih 5.5 Mbps, tang nya kira ka jauh laju ari signal 28.8 kbps TMNet!! Ka parai nganti page loading!! Peii!

Di patio sadau meh aku nulis tu. Nyamai amat bisi angin lemai tu. Mujur asai blog update blog aku lemai tu, eh!! mrgreen

Monday, June 09, 2008

Gambar ba rumah panjai

Tu sekeda gambar diambi ba rumah panjai. Hari ba Saratok, maya kami ka din, sebaka enggau hari ba endor bukai ba Sarawak .. selalu ujan.

Sekali ujan bangat amat datai ka paip ai bisi putus. Begau bala mensia pagi hari ka mandi meda nadai ai pansut ari paip. Bala ka rajin agi mupok nurun ka pendai mandi. Aku? Sorry la, kapa nganjong diri mandi ai chelap! Ko Douglas, ai nya enda entu chelap, laban iya udah nyepi ai chelap agi ari nya!

Ai tampak keroh, alu mayoh daun melepong atas ai.

Tu gambar kami nurun ka pasar sahari udah kami datai ba rumah panjai. Penyauh rumah panjai ari endor kami ninggal kerita bisi 10 minit bejalai kaki.

Tu gamal jematan gantong meraka ai Krian.

Taja Denice tu takut ka sida ukoi enggau mayau, iya enda takut nengah jematan tu. Iya selalu ka dulu. "I'm the leader," ko iya.

Ngaga ketupat kena ngintu malam hari gawai. Aku mina ngemata orang ngaga ketupat laban aku sigi enda nemu ... alah laban menyadi laki aku ka biak sekali!

Bisi orang kawin ba rumah panjai enda jauh ari rumah panjai kami. Aku enggai enggau orang ngagai pengerami tikah, enggai ngelaban ujan enggau latak! Doug bisi enggau orang.


Tu siti agi gambar rumah panjai ti bisi pengerami tikah. Samoa gambar tu diambi Doug.

Aku endang udah tindok maya iya ka pulai ari pengerami tikah. Lelak .. jet lag. Nadai bisi ati ka enggau orang ngabang ngagai orang kawin!

Naka tu aja sekali tu! Ila nulis cherita pasal ngabang ngagai sida Cuthess enggau Grace!
Related Posts Plugin for WordPress, Blogger...