Monday, August 31, 2009

Lauk tengah hari tu

Ari kemari aku udah tetengukka manuk dipanduk enggau lia tutuk. Ma enda nyamai asai isi aku endang lauk manuk digulai enggau lia tu meh utai digiga aku. Ukai mina lia digulai dia, arak meh bisi ditambah dia. Nya baru berangat asai perut!

Berangat, ngicha ka angin ba perut tau nyau! mrgreen


Puteri's Signature

Sunday, August 30, 2009

Tikus!

Pagi tadi, laban ka tumu dani, tumu ga aku meri mayau makai alu ngasuh iya pansut ari rumah.

Aku alu nyendia breakfast alu dudok nunga netbook. Benung aku makai, aku malik ka luar pintu laban aku meda mayau bemain enggau utai. Paduhal utai ka dimain iya nya tikus. Arrrggghhh!

Aku tu endang enda tau meda tikus. Geli alu nyeregu bulu ma meda tikus. Nya meh aku tu tadi beratika mayau bemain enggau tikus nya bakaka bemain enggau buah bul. Disurung surung iya enggau jari iya, dipanggum iya, dikelambung iya katas udah nya alu merejuk iya nangkap tikus nya tadi ... apu, nyeregu bulu aku meda! eek

Ni tikus nya tan dimain mayau nya. Nah, kasih tudah nyu lepi. Apin mati nya .. mina pitam aja enda lama.

Enda dempa iya tikus; dibai iya lari ngagai babas udah nya dilengka iya. Engka alu mati meh tudah tikus nya dia.

Aku beguai guai ngambar mayau nya tadi, enggai ka iya alu tama mai tikus ka dalam rumah. Nya baru ninga aku manjung alu merejuk katas kerusi enti iya mai nya ka dalam! mrgreen


Puteri's Signature

Saturday, August 29, 2009

Bisi mood!


Mood Krismas! mrgreen Baru ga bulan lapan, oi! Agi berapa bulan baru ngintu Krismas?

Ni enda bisi mood, nyu enggai agi ngetat pengangat hari. Nyu enda teranti agi hari tu mupuk chelap.

Tambah mega, sekeda program ba TV tak program Krismas. Pagi tadi program kartun ti dipeda Duncan pasal sida kartun ngintu Krismas. Sida wayang ba TV pen pasal Krismas baka cherita How the Grinch Stole Christmas .... Sapa kitai enda tingat ka Krismas? Aku alu bisi mood... nyu meda gambar bala anak musim Krismas taun tu kemari, meda gambar sida Margaret sebilik ti bisi nemuai maya nya ga, meda gambar rumah niang Judy (geng quilting) musim Krismas ..

Aku bisi ngasuh sida Lyana sebilik nemuai alu ngintu Krismas enggau kami taun tu. Ka meh ati, ko iya, tang meda baka ila.

*Semadi nadai cherita, nyu becherita pasal Krismas!*


Puteri's Signature

Friday, August 28, 2009

Cherita hari lima

Begedi amat, mata enggai agi tinduk maya jam baru ga pukul 3.30 pagi. Kasak kasak nguji nindukka diri baru tang ... ujung ujung angkat alu masang TV. Jam baru ga pukul 5.00 pagi. Enti aku tu enggau orang nurun kereja, enda ga ngawa dani ngenumu nya! evil

♥ ♥ ♥ ♥ ♥ ♥ ♥ ♥

Berapa iti TV ba rumah kita? Kami tau dikumbai kita kaya TV. Lima iti TV dalam rumah kami tu. Bala anak tumu dani, alu masang TV nengali siti siko. Siko ngalah TV ba bilik tinduk aku, siko masang TV ba bilik diri empu, alu aku? Enggi aku TV endang udah dipasang ari pukul 5.00 pagi tadi! eek Udah nya mansa bilik tinduk siko, TV bemain tang batang tubuh orang ka masang TV nadai dipeda dalam bilik! Huh. Masau karan!

♥ ♥ ♥ ♥ ♥ ♥ ♥ ♥

Engka laban ka enda chukup tinduk kini, pala tak pedis. Meda enti agi pedis udah aku ngirup sechangkir kupi tu lagi. Aku kiraka baru diatu enggau orang beirup kupi, tang aku enda ulih enggau orang ngirup kupi ka pait .. sorry sida kupi ari Starbucks enda aku ulih enggau orang ngirup - kelalu pait!

Setaun taun tu aku beirup ka kupi ka bisi red guara ari DCL ti diintroduce ipar aku. Manah ka nuan, ko iya madah ka aku. Nah, tak gian diri aku laban kupi nya! Ma enda ngirup kupi alu pedis pala! Maya aku di Miri tu tadi, aku beirup ka kupi Ali Cafe - au ah, iya ka bisi Tongkat Ali nya! Udah nya tetemu kupi Ali Cafe ka bisi Kacip Fatimah. Ngirup ga aku nya. Sempat ga aku mai berapa bungkus pulai tu tadi.

Enda ga aku madah bisi insur isi labanka ngirup kupi tu .. siti aja .. hot flashes kurang agi sekumbang aku udah pulai kitu. Tegal aku ka ngirup kupi Ali Cafe, tauka tegal hari kami ditu lain agi ari hari di Malaysia?

♥ ♥ ♥ ♥ ♥ ♥ ♥ ♥

Udah 2 minggu kami ka pulai ari Malaysia. Tang sida beg apin abis diruah. Lembau asai tulang. Mina beg Doug enggau beg bala anak aja udah diruah. Enggi aku agi bisi utai, mina sekeda gari ti deka dikena aja udah pansut ari beg. redface

Bah, nama pengawa kita sahari tu enggau ujung minggu tu?

Puteri's Signature

Thursday, August 27, 2009

Anggur

Apai tuai seberai kami ti benama Charlie, bisi nanam buah anggur niti pagar iya. Aku enda nemu nama anggur tu tang bisi meniga bansa anggur ditanam iya dia. Iya ka chelum tu manis amat, nadai belaka alu enti dijembui iya nyadi kismis.

Pagi kemari, taja kami bisi meli anggur ba pasar, kami sempat ngetu ngambi buah anggur Charlie. Nadai iya ibuh enti kami begumpul ka buah ba kebun iya, tang kami ti enda ngumpul. Pun anggur ka ditanam iya nyu bebelit ba dan kayu berimbai enggau alai iya ditanam. Nyu abis negu kerita kami ma kami mansa.

Duncan saduai Denice bela mai setangkai (?) siko buah anggur. Manis, ko saduai, alu nadai belaka enda bakaka dibeli aku ba pasar.

Enti aku rajin, tau digaga kismis sida anggur nya. Niang bini Charlie suba dibasu iya dulu buah anggur, alu digaga iya nyadi kismis, reti nya dijembui ngambi iya ka rangkai alu nyadi kismis. Taun tu, enda entu diintu gamal kebun Charlie. Kasih tedah iya laban udah nadai agi bini, bisi dua taun kini bini iya udah ninggal. Ma aku meda iya ba supermarket, nadai utai bukai dibeli iya ... secase beer. sad


Puteri's Signature

Wednesday, August 26, 2009

Nurun ka pasar

Pagi tadi kami tiga menyanak bisi nurun ka pasar. Enda lama kami di pasar din laban kiruh endar laban anak dua iko. Duncan ti ngirit bakul, nadai beratika kaki orang.

Aku berati ka peria, manah endar gamal peria sahari tu peda aku tang aku enda ga meli peria. Mina meli daun ubi enggau kangkung aja. Kelimpah ari nya, bisi ga meli buah anggur laban bala anak kiak kiak minta beli. Meda kachang tanah aku alu meli, laban sigi rindu makai kachang tanah rebus.

Chabi merah sigi pedis ngiga ditu, tang sahari tu aku tepeda ka chabi mirah alu meli. Bisi ga kena nguring daun ubi lemai lagi alu kena nguring kangkung lemai pagila.

Lebuh aku ka mansa orang ka nyual seafood, aku bisi meda iya bisi mega nyual pama (frog legs). Bisi endar ati aku ka meli laban ti meda lauk pama Chris. Tang aku ka enda nemu manduk pama. Nganti aku nanya Chris dulu! Keteburah iya aku makai pama suba maya aku gawa di Vietnam. Nadai mayuh macham chara sida manduk - di guring laban udah digaga sida baka buah bul mit.

Lebuh aku ka meda orang siko mai burung parrot ba atas bau iya, aku alu nitih iya alu nanya enti aku tau ngambar burung iya nya. mrgreen Mereti endar burung orang nya!

Maya musim panas mayuh orang nurun ka pasar kami ditu laban pasar nya mina dua kali seminggu, alu mina hari tiga aja ka bisi orang bejual ka buah enggau sayur. Aku datai din jam udah pukul 9.00 pagi, nindik ga enda ibuh kelalu balat bepusin ngiga alai parking. Enti ngiga alai semak agi enggau market, enda ibuh aja. Besusun orang ka nganti orang bukai pulai laban sida ti ka ngambi alai parking sida tu. Maya kami bejalai pulai nuju kerita tadi, siko dalam kerita alu nitih kami tiga laban ti ka ngambi alai parking kami.

Naka tu aja cherita sahari tu. Ka mela daun ubi agi!

Puteri's Signature

Tuesday, August 25, 2009

Perengka sekula

Lemai kemari kami mupuk bebeli ka perengka kena bala anak nurun sekula. Sekula sida buka kena 8hb September tu ila.

Sida tanchut panjai enggau skirt sekula ka lama enda ulih dikena agi. Pemanjai skirt ba sekula baru sida tu, enggai enda labuh baruh pala patung. Bala anembiak lelaki enda tau ngena tanchut pandak. Tanjut panjai enggai enda warna khaki tauka navy aja. eek

Keteburah iya kemari kami ngagai kedai ka direcommend sekula nya tang kedai nya tutup lebuh kami ka datai din. Enda berapa. Meda nya tutup ngiga ka bukai ga kami. Dua iti alai kami meli sida pakaian sekula nya kemari. Punggung Duncan ti mit nya ti ngasuh aku pedis amat ngiga tanjut ti ngam ba iya. Nasib ga bala tanchut bisi getah ti tau ditarit ngasuh punggung nya mit agi.

Perengka sekula bukai baka sida color pencil, crayon, eraser, folder, guntin, ... nya bisi ga dibeli tang sekeda utai bukai apin bulih. Nasib ga agi bisi hari alai ngiga. Enggai enda meli Bible New King James version ga ... ku kami duai Doug, enggai meli bansa ka manah ... ka ngiga bansa ka paper back!

Masuk grade 1 meh saduai bulan sembilan tu ila. Arap ka saduai ulih ngatur diri meh ba sekula baru tu ila. Nadai siku kawan saduai ari sekula lama ti sama enggau masuk sekula baru tu. Nya ti ngasuh Duncan sinu, laban kawan lama nadai enggau begulai agi. Kasih.


Puteri's Signature

Monday, August 24, 2009

Main Ai


Jam apin pukul 10.00 pagi, hari agi chelap, Duncan udah kiak kiak madah diri ka main ai ba luar. Aku madah, nganti hari nyu angat mimit baru main. Orang enggai ninga, majak masuk ka tanchut mandi, alu pansut ngasuh Daddy masang sprinkler ka iya.


Denice meda Duncan bemain ai, alu kiak kiak nanya dini alai baju mandi iya ga.

Main ai lah kita dia, meda gamal saduai gasak ai chelap nya lagi! Nah enda bulih sepuluh minit saduai bemain, alu begetar. Rauh rauh minta tawel laban enggai agi bemain ba luar!





Puteri's Signature

Sunday, August 23, 2009

Abas la ...

Aku bisi ngaga photo blog. Abas la ... mrgreen Minta ampun laban kutai aku bisi meri link alu bisi salah taip ba link nya. Tu link iya ka betul.


Ukai ga aku ngumbai diri nya terer pasal ngambar utai. Kamera ka dikembuan pen enda canggih! redface Tang laban ka rindu ngambar utai alu bisi ga ati ka bekunsi gambar ka udah diambi enggau bala kita ka selalu sangkai ba blog aku tu nya kebuah ngaga blog tu. Tambah mega enggai enda enggau orang ngeruh ka ai!

Kebuah siti da, aku endang lama udah bisi blog wordpress ti dihost kediri empu. Rugi ga mayar wordpress blog dihost (besai storage space!) kediri empu tang enda dikena alai nyimpan fail gambar ti besai agi!

Suba photoblog tu blog pasal chukop macham utai tang diatu udah ditukar ngagai photoblog. Nyu enggai agi ngintu blog kelalu mayuh. Ditukar ngagai photo blog laban enti utai nya begambar nadai entu beguna kelalu mayuh utai ditulis. A picture is worth a thousand words, ko orang.

Ahh, enti kita apin nemu, Flo, Chris anak Apai, enggau Charlene pen bisi photo blog. Abas enggi sida ga!


Puteri's Signature

Saturday, August 22, 2009

Buntau

Pagi tadi, lembau amat asai ka angkat. Ni enda lembau, semalam malam kasak kasak laban mata enggai tindok. Udah ga mata enggai tindok, perut ga engkriok.

Tak enda liat agi aku, alu angkat, kerus kerus ba dapur ngiga utai dempa. Jam maya nya pukul 2.00 pagi. Muzik orang ka diau seberai kami agi belagu inggar. Ngumba endar ga siko nya, ma udah angin iya, betebahka lagu country iya nginggar nya siko tu. Sekampung, munyi ko jako, ulih ninga muzik country iya nya. Nya enti ga enda lama iya ka nebah muzik iya nya. Hari pukul 6.00 lemai muzik iya endang udah. Nya meh munyi ko aku tadi, pukul 2.30 pagi baru muzik nya ngetu.

Ko Doug, engka iya ka ngemedis ati orang Mexican ka diau semak iya dia. Kutai sida ga bemain lagu Mariachi semalam malam. Sekampung ulih ninga.

Bisi sekali, iya ka seberai kami nya bemain lagu country iya semalam malam. Nyu ringat orang Mexican ninga lagu iya nginggar nya. Nyu betimbak ka senapang nuju ka langit laban ka ringat. Leo (orang seberai kami) alu ringat ninga timbak senapang sida nya. Iya alu mansut senapang iya ga alu nimbak ka langit! Enda memunyi bala Mexican udah nya.

Ukai ga tegal muzik Leo ti inggar ti ngasuh aku buntau. Jendela semua tutup, nadai ga tak inggar ni muzik nya didinga tang laban nya jauh malam, semua utai ti memunyi ulih didinga magang.

Buntau laban sigi maya iya ga buntau. Lama udah penyakit buntau nya enda ngachau aku. Engka laban jet lag aku apin abis, kini.


Puteri's Signature

Friday, August 21, 2009

Repa

Amat enda nyamai amat ati aku meda gamal kebun bunga aku lebuh hari aku ka datai ba rumah kutai. Repa, bunga layu .... Ni orang ka diasuh nulong ngintu kebun aku deh?



Maya aku ka mupok bulan enam kutai, ukai main pemanah enggau beresi gamal kebun aku. Gladiola bebunga magang. Rumput dientun selalu. Ai ba kulam beresi.

Sekumbang udah pulai baru sahari tu aku ka bisi pansut meresi sida pintu enggau jendela ti dibalut pukat emplawa. Bedau bisi ati ka ngintu utai. Sida bunga dalam pasu dalam rumah pen semadi idup gamal. Bendar aku mutap.


Taja kebun repa, daun daun layu, bisi ga siko kesulai terbai alu inggap ba daun maya aku ka ngambar kebun aku nya tadi. Sida indu penyengat enda ibuh sebut, nyu betansang ba baruh perabung!

Enti diintu manah, manah amat gamal bunga tu. Mansang endar ari maya aku ka nanam iya suba, mina daun iya aja bisi layu. Hari ba menua kami ditu sigi angat amat alu enti kurang dipanchit ai, sigi enda tan bunga laban angat.


Bunga morning glory endang ditagang tumbuh laban enti diteju abis bunga bunga bukai alai iya bebelit. Leka bunga tu ti labuh ba tanah ari taun dulu sigi mayuh, tang laban dientun lebuh iya pansut kutai mina mimit aja bisi tumbuh.

Nganti udah nyu nadai agi jet lag, baru aku ngintu kebun nya ila. Utai udah baka nya kapa enda bakanya dulu. Hari pen agi kelalu angat. Lembau asai pansut ari rumah ka beair-cond. wink

Puteri's Signature

Thursday, August 20, 2009

Raun ka Melaka

Maya kami ka ba KL kutai, kawan aku, Margaret, bisi mai kami bejalai ka Melaka, pulai hari.

Bala anak bai bejalai ngelaban panas di Melaka alu kiak kiak mai pulai ngagai hotel. Nyu enda tan agi bejalai ba panas. Ka berendam ba swimming pool, ko Duncan. Ka mai Kristen (anak tuai Margaret) bemain ba pool enggau sida.

Aku geli ati meda becha dirias ngemalat nya!

Aku baru iya ka Melaka. Sigi lama dah ka kin tang alu ga enda. Ngena endar ga Margaret mai kami kin. Nya pen nyu ga enda nyadi laban diasuh kempeni ni ka Bintulu hari iya ti ka mai kami nya! Tang nindik ga ulih ditukar bilun iya ngagai malam nya. Nya meh enda entu ulih lama iga raun meda menua Melaka.

Aku bisi meda bala tourists nepan bot raun meda menua nengai ai tu. Laban kami ka beguai, nadai meh terunding ka meda menua nengah ai.

Gate nuju gereja Anglika, St. Paul.

Gamal orang ka enggai agi bejalai dalam panas. Sempat niki pun kayu!

Ma kitai meda gambar menua Melaka, gambar gereja tu ti tebilang amat. Nah, ampit ga aku meda gereja tu enggau mata aku empu!

Gereja lama St. Xavier, digaga dalam taun 1856.

Gambar diambi aku maya kami chuti di Malaysia tu tadi tau dipeda kita ba photo blog aku ... blog lama tang diatu udah ditukar ngagai blog alai aku mantai gambar. Arap ka kita tau ngabas blog aku nya mega.

Puteri's Signature

Related Posts Plugin for WordPress, Blogger...