Sunday, January 30, 2011

Lauk Enchaluk


Nadai bukai pengawa bala geng ba Facebook. Kerja berapi! Rindu amat meda utai dipanduk bala pangan. Kepuas ngiga resipi kuih ba website indu Cina ari KL, tepeda aku resipi janik guring enggau enchaluk. Janik gulai enchaluk?! Nanya magang bala pangan laban ti enda kala meda lauk janik guring enggau enchaluk!

Anang enda nguji kita laban nyamai amat panduk stail baka tu! Nadai mayuh macham utai digulai dia - bawang merah, bawang putih, chabi, ai asam jawa mimit, garam mimit, gula mimit enggau 2 sudu enchaluk. Isshh, anang enda nguji!


Pagi tadi agi belala nyawa makai enchaluk alu ngukus telu gulai enggau enchaluk! Ngelama tu enchaluk diguring enggau telu sigi kala aku meda tang chara indu cina Nonya tu, main kukus. Nya meh utai dempa enggau asi bubur pagi tadi! Laju kayuh, nya pan ulih nagang diri makai asi bubur kelalu mayuh! mrgreen

Bah, nama lauk bala kita sahari tu?

Tuesday, January 18, 2011

Pengawa Ujung Minggu


Ujung minggu tu kemari kami menyanak bisi ke South Lake Tahoe, nemuai baru ngagai pangan aku ke diau din. Iya meh ti alai kami ngintu Krismas tu kemari. Manah amat mua hari maya kami ke din. Seleka salju nadai meh meda tang salju agi tebal ba tanah. Laban nyu udah seminggu nadai turun salju, mupuk lela iya ke ba perabung rumah enggau iya ke ba tanah.


Kami dibai pangan aku raun meda Lake Tahoe. Amat manah endar ga danau nya maya musim chelap. Ku pangan aku, sepatut iya burak laban salju sida bukit, tang laban seminggu udah nadai salju turun, nyu tampak gadung tisi bukit. Arapka agi turun meh salju sebulan dua bulan tu.


Nah, sapa enda rindu meda utai baka tu? Nya meh ngachit mengachit kamera meda utai ngemanah tu maya lemai hari!

Maya musim panas ila, engka bisi kami kin baru, sekali tu nganjung diri camping. Gaga amat bala anak ninga rita pasal camping. Siti aja utai ti dikenangi aku. Bisi beruang menua nya dia! Ni alah maya kitai tinduk dalam kemah tak tama beruang! Eeek! eek

Friday, January 14, 2011

Bulih!

Haha, anang guai, nadai aku tu bisi kena tikit alu bulih duit beribu! Utai ti ngasuh gaga, iya nya meda diri bulih endar sahari tu ngambar burung House Finch! Bemua meh gamal hari pagi tadi tang ati ti enda liat meda pemayuh burung inggap ba pun walnut enggau nutu leka rumput ba tanah.



Lubah lubah meh aku ti mansang semak agi mai tripod enggau camera/telescope ba tanah. Ninjik ga burung ka nikal udah aku ke jenuh bediri ba tengah tanah ngipa sida.



Udah kelama aku ke bediri ba luar, mata panas pan mupuk pansut. Tang siti aja penyalah. Burung ka diipa udah beterebus lari laban bisi burung woodpecker inggar terbai mansa sida. Geram diri ga kitai laban maya mata panas pansut burung nadai siku nunga kitai!

Thursday, January 13, 2011

Ka ngambar burung tang ...



Amat enda puas endar ati aku lebuhka meda burung House Finches! Ngemayuh nya sida ba belakang rumah aku taun tu, tang nya meh aku enda entu ulih ngambar sida! Hari selalu bemua, tambah lindung ari pun eucalyptus ti berintai ba tisi rumah, lalu aku empu enda ulih duduk ba luar ngipa sida! Hari kelalu chelap! Laban hari ti selalu bemua, gambar ke diambi nyu enda menyana laban ti enda chukup "lighting" enggau kelalu balat "backlight".

Enti aku pansut mai telescope kena ngambar sida pan nadai guna. Nadai burung ka ngenat diri meda mensia pansut! Meda ayung kitai deh bekebus sida terbai lari!

Naka tu meh gambar ke ulih diambi aku ... ari jauh. Amat enda puas laban enda entu terang!

Tuesday, January 11, 2011

Satay! Satay!



Asai ti ke betanda aku meda kuah satay aku nyadi, alu satay ke ditunu ba oven mit ngemanah nya gamal! mrgreen

Ngelama tu aku endang nadai kala nguji ngaga satay laban ti amat enda nemu. Tang bala pangan ba Facebook ti nemu ngaga ngumba endar ga mantai gambar satay ti udah digaga sida. Kati kitai enda meliur ngapa ti meda gambar sida! Nyau meh bekareh ngiga resipi satay, engka tak bisi resipi ti enda pedis ditunda.

Naka pengaga meh tetemu ka resipi indu Cina ari Malaysia ti diau ba menua kami ditu mega. Amat muntang endar ga chara ngaga iya. Mata ngelama tu enda tak ngiga resipi!

Bah, anang malu jengkau dia satay kala agi angat! Agi mayuh iya ke benung ditunu din! lol

Friday, January 07, 2011

Kemisi Musim Chelap


Gamal jalai ke di tengah lebuh ke South Lake Tahoe.

Musim Krismas tu tadi, kami menyanak dikangau pangan aku (indu Cina ari Sarikei/Kuching) ke diau di South Lake Tahoe ngintu Krismas enggau iya din. Mupuk meh kami kena ngalih hari 24hb Disember. Kala orang udah manggil neh! Bala anak sigi gaga amat laban menua South Lake Tahoe ba bukit (kiraka 2 1/2 jam ari rumah kami) alu tebal meh salju maya nya din.


Sereta datai din, bala anak alu beguai nganjung diri bemain ba salju. Gaga meh orang. Denice ke buyan pen nyu merani ke diri nepan sled alu gelunsur ba salju!


Ngumba endar ga aku - lebuh ke ngambar bala anak ba baruh bukit mit, enggai enda kena langgar Duncan ti nepan sled ke berat! Nyau telentang rebah laban kena langgar! Lapa deh, nyu biru betis ari baruh pala patung dataika buku ali! Amat ngumba endar ga nasib aku sahari nya! rolleyes


Ngalih hari hari Krismas kami dibai pangan aku enggau laki iya raun meda menua semak South Lake Tahoe. Pama endar ga penebal salju ba menua ke dipansa! Menua siti ti enda entu jauh ari South Lake Tahoe iya nya dikumbai Kirkwood. Ba Kirkwood dia bisi ski resort. Aku sekali udah kin tang Doug enggau bala anak baru iya kin. Ngemayuh nya mensia bemain ski enggau snow boarding din.

Tengan bulan satu tu lagi, engka bisi kami menyanak ke South Lake Tahoe baru laban maya nya bisi hari diau ngintu Hari Martin Luther King. Enti kami enda ngambi peluang nya ke South Lake Tahoe, naka maya Krismas nya aja meh bala anak sempat bemain ba salju. Menua alai kami diau endang tau dikumbai ukai alai salju turun. Tekalih dunya enti salju tak turun ba menua kami nya! mrgreen

Bah, naka tu aja cherita aku sekali tu! Arapka kita teperindan meda gambar ke dikunsi aku ditu!

Thursday, January 06, 2011

Taun Baru 2011

Sahari tu udah hari ke enam ba taun baru 2011. Kati, bisi insur taun tu ari taun ke udah? Tauka taun tu agi biak alu apin temu pengujung iya ila!?

Sapa bisi ninga rita pasal taun tu meh taun Tuhan Jesus datai baru? Nadai udah ninga rita nya kita? Tauka kita ngumbai taun 2012, taun dunya tu kiamat? Sapa nadai udah meda wayang 2012? biggrin



Nah, tu meh utai ti dipansa aku lebuhka nganjung diri makai ba hari penudi taun 2010 tu kemari. Enda takut kita meda utai ke disebut ba billboard tu? mrgreen

Anang irau! Besedia aja kitai, laban nitih ku Tuhan Jesus, iya deka datai baru baka penchuri ti deka tama ngagai rumah kitai! Nadai aku kala ninga penchuri dulu madah diri ka datai enchuri ba rumah kitai!

Harold Camping, tuai raban Kristian ti arapka penatai baru Tuhan Jesus iya nya kena 21hb May, kala udah ngaga "prediction" baka tu. Dini nya Tuhan Jesus bisi datai ba haribulan ke disebut iya suba?!

Nah, atur pengidup kitai bakaka Tuhan Jesus deka datai pagila. Lebuh iya datai, kitai endang udah dipeda iya besedia. Reti nya tadi barangmaya iya datai, kitai endang udah besedia alu nadai utai dikirau agi!

Selamat Taun Baru 2011! mrgreen
Related Posts Plugin for WordPress, Blogger...