Makai Tengah Hari

Bulan sepuluh iya nya bulan kitai ngingat ka pengawa bala sida pastor/paderi. Sahari tu kami (Lunch Bunch Bible Study Group) mai Dianne saduai Pastor John makai tengah hari ba Golden Corral. Taun dulu dia meh alai kami mai saduai makai tengah hari.

Aku semadi enda entu nyamai isi, nya enda berabis ati makai buffet ba Golden Corral. Mayuh macham pemakai disedia - enti bansaka tegar makai, sigi puas amat makai dia!

Angin!

Gambar hiasan: Mata panas niki ti dipeda maya mupuk ka San Francisco minggu nyin tadi.

Bangat amat angin sahari tu! Taja hari enda entu chelap iga, tang ma udah digasak angin begetar ga asai tubuh ma diluar din. Buk terunsai gasak angin enda ibuh sebut! Trak (high profile vehicles) deh nemu tumbang gasak angin!

Nyu angin nyadi tegal enda nurun nulung ngemata bala nembiak ba sekula sahari tu!  

Makai Malam Hari Satu

Kekadang lembau amat asai tulang ka berapi. Iya ka bendar ati ka makai ba restoran tang lembau ga asai nganjung diri ka restoran!

Ujung ujung mee laksa segera Lee Fah (bai ari Miri kutai) dipanduk. Muntang sereta jampat mansau!



Kami bisi nanam sida entekai enggau honey dew melon. Semadi aja idup. Ngemit nya saiz buah honey dew, mutik besai mimit ari saiz softball! Sida entekai nya sigi bansa ka mit. Buah honey dew nya meh dempa udah makai mee laksa lemai tu tadi.

Kenyang ga perut, eh!

Ione

Lemai kemari kami menyanak bisi bejalai ngagai tempat siti dikumbai Ione, 26 batu ari rumah kami. Lama endar kami nadai udah kin. Tempat nya mit (old cowbody town), nadai entu utai dipeda, tambah mega diatu ekonomi enda berapa, mayuh endar kedai tutup din peda aku.


Nama tempat tu Preston Castle, dipansa lebuh ka mansang ngagai Ione. Suba tu meh alai bala nembiak ti udah diukum perintah dikurung. Manah amat alai kitai dijel, enti udah munyi nya! Diatu nadai agi dikena laban endang udah bisi jel meruan alai ngurung sida nembiak (juvenile offenders), semak dia ga alai jel nya.

Ione endang tebilang laban tempat tu asal iya pasar kuboi - maya orang begiga ka emas ba menua California tunga nya suba. Agi bediri sekeda kedai tang sinu aku meda, laban nadai entu rami agi. Mayuh tutup kedai dia.

Pulai ari pasar Ione, kami alu ngiga tempat orang nimbak (shooting range). Lama udah Doug madah diri ka enggau orang masuk kelab nimbak. Enda jauh ari pasar Ione alai tempat nya - besai amat alu manah endar alai orang besukan nimbak dia. Aku nadai ati ngambar utai dia, mina tempat ka bisi ai tu laban rindu meda panas lemai hari manchar sida pun kayu ti udah bebali kaler.


Maya kami angkat ari tempat nimbak nya mata panas pan mupuk padam. Bekareh meh ngetu ba tisi jalai ngambika aku ulih gambar biew tu! Rindu amat meda laban sekali tu bisi awan ba langit tunga mata panas turun. Enti musim panas menua California tunga kami diau jarang ujan alu jarang meh meda awan tebal ba langit.

Naka tu aja cherita hari minggu sekali tu.

P.S. Gambar sunset enggau gambar autumn ti besai agi tau dipeda ba photoblog. Abas la ..

Bubur

Dani pagi, nyawa alu tenguk ka bubur. Amat lama ga udah nadai manduk bubur ka empa maya pagi hari.

Bekareh ga mepat babi enggau nyirap lia kena nyampur asi bubur nya. Teluk masin (gaga Doug) agi mayuh - diguring bechampur enggau 2 igi teluk manok laban kelalu masin. Udah nya alu nguring 2 iku ikan masin - ikan masin ka diberi sida Chris enggau Kathy maya ka betemu di Kuching kutai.

Nah, tepantup nyawa pagi tu tadi laban asi bubur! Mansi nyawa ka udah makai ubi kentang, keju, salsa etc demalam ba pengawa sekula bala nembiak. Nyawa enda ulih dibai makai pemakai orang ribai selalu!

Sapi dalam embun

Pagi kemari aku sempat driba ngagai jalai enda jauh ari rumah kami laban ti ka ngambar sida jelu dalam embun. Tiga kali aku turun niki jalai nya! Mula mula servey dulu, ngiga alai bisi jelu enda entu jauh ari jalai, alu servey mega alai tau ngetu. Embun nya tebal enggai nyadi sebarang ngetu, pechuma dilantak orang!

Ngenung sida sapi meda aku ngambar sida! Haha. Aku enggai nguji driba kediri ngagai Consumnes River Preserve. Takut, enggaika embun tebal mega din. Takut mega kediri .. ni nemu sapa orang bisi din. Tempat nya kira ka 6 batu ari rumah kami, enda jauh iga. Tang laban menua dia paya, tentu embun tebal din enti bisi embun.


Udah ka pulai ari ngambar sida sapi, aku alu ngambar sida indu kemindang ti ngerayap sebelah rumput ba depan rumah. Indu kemindang ba gambar tu endang diengkah atas bunga, ngambi ka manah agi lebuh digambar! Leka ai ba sayap nyu nyau labanka kena jeput alu dipindah ngagai bunga.


Gambar asal terang agi ari tu, tang gambar ka diupload ngagai blogger susut kualiti ... enda berapa endar! Nah, endang mayuh indu kemindang sebelah tanah kami dia .. enggai ka sekeda ngumbai gambar ka dibantai ditu ukai diambi aku empu!

School Field Trip

Kemari kami duai Doug enggau bala pengajar enggau apai indai bukai ngulu bala nembiak sekula ngagai Academy of Sciences ba San Francisco. Kami mai empat iku (nyengkaum D & D) nembiak dalam kerita kami.

Datai din kami bela ngati prugrim kediri empu. Sigi enda ulih betitih pangan diri laban kelalu mayuh mensia din. Kebuah mayuh mensia din kemari laban hari nya nadai bebayar tama. Sapa orang enggai ma utai pri?!

Sida empat iku nya endang dikemata kami. Siku ari pengajar endang udah dulu ari kami datai din laban enggai ka enda ampit tikit tama ngaga Planetarium. Manah amat planeterium dia - pala aku pan nemu ngelu meda utai! Asai ka enggau bepusin lebuhka meda sida bintang enggau planet bepusin!

Nadai gambar dalam planetarium dibantai ditu laban enda diasuh ngambar utai dalam nyin.

Laban temu ngambar sida kesulai enggau jelu bukai ba Rainforest, nyu enda sempat meda tempat bukai. Aquarium pan nyu beguai musin.

Maya jam pukul satu tengah hari kami mupuk bejalai betemu enggau bala bukai ba playground semak dia. Orang mai kerita sida, kami bejalai. Dia meh alai kami begumpuru makai. Nyamai amat pemakai, ai, enggau snek endang udah disedia sekula dulu. Bisi orang tukang angkut semua utai nya.

Gaga amat bala nembiak bejelangkit ka utai, begagai enggau pangan diri ba park nya. Rindu amat mai bala nembiak kemari. Mina siti aja ngerusak prugrim aku .... pedis pala. Engka laban enda chukup tinduk alu ditambah mega nadai ngirup kupi pagi nya! Dua leka panadol dempa, agi ga pedis.

Jam pan nyu pukul 6.30 lemai maya kami ka datai ba sekula. Irau sida bukai laban sida sejam udah dulu datai ari kami! Ni enda laun, kami bejalai ari playground ngagai alai parking kerita, udah nya nganti bala ngagai jamban dulu. Maya kami ka angkat, maya orang berebut rebut pulai kereja.

Agi lelak asai tubuh sahari tu! "Have you recovered from the trip, Mrs Campbell?" ko principal nanya aku lebuh aku ka ngambi D & D pulai sekula lemai tu tadi.

Meli Tilam

Gold Bond 707 - 8" All Cotton Futon Mattress
Retail Price: $340.00
Sale: $200.00

Begedi! Enda tan agi! Sapa kitai ka ngetat tiap pagi kitai dani, belakang pedis, punggung pedis ....

Sahari tu aku ngorder tilam kapas ... tilam getah, pedis belakang; tilam angin, pedis ga belakang. Nah, kapa enda nguji tilam kapas agi!

Begedi ga meda rega. Iya ka murah agi mina 4" penebal iya, enggai ga gali ba tilam ti kelalu mipau. Rega $200 nya bedau agi nyengkaum tax. Nasib ka pri ungkus orang ngirum tilam nya.

Arap ka tilam nya manahka belakang aku meh. Nyu enggai agi begiga ka tilam ti ngam, ti enda ngasuh belakang pedis.

Panggal Gulin

Tu gamal orang gaga udah bisi panggal gulin. Lama udah iya nagih, baru pagi tadi aku bisi hari ngaga nya ka iya. Kutai kami pulai ari Miri nyu ka mai panggal gulin aki iya; semadi beg enda ngundan!

Utai diisi dalam panggal nya ukai kapok - gamal baka kapok tang digaga ari polyester. Nyamai agi ngena polyester fiber fill laban panggal nya tau dibasu. Ni alah enda ulih dibasu enti udah laban mutah maya ka sakit!

Ngambar utai ba Consumnes River Preserve

Pagi tadi, urung pukul 9.00 pagi, kami menyanak nurun ngagai Consumnes River Preserve. Hari pagi tadi bisi embun alu aku ka nguji ngambar ai ti alai sida itit, ansa enggau burung ai dalam embun.

Gamal hari nya bisi embun din! Asa endar asai ati udah datai din! Ukai main utai dipansa dibalut embun ... sida kambin, sida sapi sida kuda ba padang dibalut embun ... hari majak panas tunga Consumnes River Preserve.

Taja pia, mayuh endar ga utai digambar ba Consumnes River Preserve.  Klik gambar ba baruh enti ka meda iya besai agi.

Besai amat emplawa tu!

Ngambar bayang pun kayu ba ai, kenu.

Bangau ngiga pemakai ba ai.

Ansa terbai ba langit.  Sekeda bisi ga terengkah ba ai semak dia.

Rindu amat aku meda gambar panas tembus ba dan kayu enggau ayung iya sekali atas ai.

Mayuh itit nyemerai enggau ngiga pemakai ba paya tu.

Pagila, enti agi bisi embun, kami ka kin baru. Sekali tu tumu agi nurun, laban makin tinggi mata panas makin lesap embun. Enggai asa baru!

Terong Pipit

Amat tekenyit aku, keterubah iya aku meda terong pipit dijual ba pasar minggu kami ditu. Bisi meh aku meli kutai tang enda ingat dipanduk ... buruk diri dalam peti ais! Pagi tadi, meli baru aku.

Chara indai aku manduk terong pipit - diguring enggau pusu enggau belachan. Ah, balat bau rumah gasak aku nguring terong pipit begulai belachan lemai tu lagi. Nasib ga hari nadai ujan sahari tu alu tau ga sida pintu enggau jendela dibuka!

Update:

Apu, begau lalat nyium bau belachan guring! Engka bau belachan nya ngasuh sida datai baru! Kumbai aku nadai agi lalat udah bekau kabut kemari laban nadai meda siku inggap ba sebelah pintu belakang sebedau aku berapi tadi.