Wednesday, January 25, 2006

Randau Anak Iban

Keterubah iya aku enggau orang beforum tak rindu endar asai, lebih agi enggau bala orang ari Malaysia ti diau sebelah dunya. Chukop macam utai ti di kerandau, mayoh utai di pelajar tauka ka di temu ari ti begulai enggau orang ba forum.

Tengok ga asai ati ka ngiga bala Iban enggau berandau. Engka tak bisi ga bala Iban beforum tang maya nya nadai nemu sapa bisi ngatur forum. Udah bekau aku tetemu ka James, nya aku lalu meda bisi 3 iti forum alai bala Iban begempuru. Gagit endar ati terubah iya aku bekelala enggau bala ba forum tu. Tang siti utai lain dipeda aku ba forum Iban ari forum bukai ti endor aku udah enggau beforum.

Di peda aku bala nembiak Iban nadai mayoh utai berat dikerandau. Bisi meh berapa iko ti rindu berandau pasal politik tang ke bukai nadai bisi pengerindu, engka enda entu nemu kati ko enggau orang berandau pasal politik meh nya.

Batang randau ti dikerindu nembiak Iban, randau pasal bujang dara, randau pasal main bul, bisi meh randau bukai, randau ngerichau bisi meh nya dia. Baka sekeda ti rindu endar mantai ka randau pasal seks. Enti orang ti baru nyengok ba forum nya, kumbai orang ooh .. orang ditu rindu berandau ka utai baka nya neh .. laban datai ka 10 lambar enti enda lebih, pemanjai randau nya enti udah pasal seks.

Engka laban ti umur udah tuai meh nya, nya kebuah ti enda rindu meda randau baka nya. Ba penemu aku, nadai mai penguntong randau baka nya. Mina ngasoh sekeda ti nadai nemu malu jegak enda tentu pasal ... Enti sekeda ti rindu macha pasal pengawa seks orang bukai, patut nanya diri, nama kebuah ka macha utai baka nya? Bala ti mantai randau baka nya ukai nya nembiak umur 13 tauka 14 taun. Enti nembiak umur baka nya, enda iran aku laban ti baru iya ngasai ka tubuh diri angkat bujang serta dara. Tu bala udah lebih 20 taun umur... maya aku ngerara, wah, ringat sekeda, abis utai bukai dibangkit. Nya sigi ulah orang ti pandak runding ba penemu aku, bedau nemu sapa ti enggau ringat nya tadi, biak ka, tuai ka, nemu agi pasal topik nya ka, nya enggai laun nimbak serta nuduh utai mapap.

Ukai enggai, batang randau ti tebal agi nadai mai penguntong ti ngasoh aku lubah agi diatu ka beforum ba forum Iban. Nadai randau ti ngerindu ati aku dia. Mina ngabas serta merati ka ulah bala nembiak. Nama kebuah aku empu enda mantai randau ti ngerindu ati aku empu? Ukai nadai udah kala mantai, tang nya meh, nadai orang ti ka dibai berandau pasal utai ti lebih agi bisi reti. Nadai ko enggau meh, mensia ukai nya sama, pengerindu siko siko ukai nya sama.

Enda ngawa, diatu aku rindu agi betulis ka blog. Jako Iban aku pen nyau mansang pama meh! Heheh. Sekumbang ti udah betulis ka blog, mayoh endar ga orang ti udah enggau bekelala. Rindu agi bekelala enggau bala ti bisi blog, laban kitai sama meda, tiap iko ti bisi blog, mesti bisi utai ti ngerindu di tulis dia! Enda pia, Cuthess, Encha, Dara, Chris, Grace, Desmond, James, Bobby, Jerry, Vavai, Vynne etc? Heheh.

Aku pen rindu endar meda jako Iban di kerembai sertai di kemesai ba dunya blog. Enti di banding enggau bansa bukai amat lubah kitai. Blog dalam jako Tagalog bejumbuh dia peda aku, jako bansa bukai enda kira agi. Nya meh, kedung sekeda kitai bisi pengerindu nulis blog ngena jako bansa Iban aram meh kitai majak ka pengawa tu.

Monday, January 23, 2006

Quilting

Sekeda kita endang nemu aku bisi home business. Business aku di kumbai long arm machine quilting .. reti nya aku provide machine quilting servis. Aku rindu gawa ka diri empu ... enda kiroh enggau orang berebut nengah jalai tumu pagi, tambah mega tau gawa ngena baju tindok! Nadai orang meda tauka peduli! Heheh.

Tu gamal long arm quilting machine aku. Aku enda ngaga quilt ka orang, mina nyait quilt ti udah di tampong orang .. nyait ngena machine, awak ka nyadi pua. Aku bediri ba depan pala machine nya tauka ba belakang, lalu ngiring machine nya nitih ka pattern tauka nyait free hand, nitih pattern kedeka ati aku.


Siti view quilt ti udah di atur atas meja quilting .. di gulong ba bar .. 4 iti bar samoa.

Tu applique quilt di gaga siko ari customer aku. Perati ka jait ba background. Nya di jait aku ngena machine aku.

Tu gambar close up siti blok ari quilt nya tadi. Jait zig zag ba background .. nya utai di gaga aku .. free hand.

Tu quilt di gaga kawan aku, Shirley. Perati ka jait ba background putih. Nya kerja aku! :-) Nya ti di kumbai long arm machine quilting .. I am a long arm machine quilter!

Friday, January 20, 2006

Apu!

Panic endar aku tu tadi .. kumbai aku abis nyau setting aku ba blog tu! Heheh, aku baru udah back up blog aku nitih ka instructions ba Blogger Help. Lama udah aku berunding ka back up bala blog aku, enggai ka dudi hari Blogspot absi modal kah alu nadai agi ulih di kena kitai.

Udah bekau aku macha Encha ti enda ulih muka blog iya, aku pen ngasai diatu meh aku patut back up blog aku .. takut abis nyau nadai temu tunga agi. Rugi asai jam tebasau ngapa, utai di tulis nadai ulih di ambi pulai agi! Heheh. Ngelama tu enti aku bisi bekeritok ka utai ba Blog Template aku mesti muka 2 iti browser, ba page sama nya tadi. Enti bisi salah, agi ga ulih ngena browser siti, save baru, lalu enda lah blog nya nyau ngapa.

Aku nguji ba blog Jewelry By Puteri dulu. Enti nya nyau, enda ngawa iga, laban nya tebal ka agi gambar aja. Samoa ok, lalu udah nya back up Puteri's Musings. Ok, samoa nyadi. Penudi endar blog tu. Enda nemu nama kebuah aku enda nitih pengawa aku chun chun baka ka udah. Issshhh, nyah, nyu ka nyau da! Nasib ulih back, back, back browser, alu tetemu ka original page ba Template, lalu beguai Save Template nya! Heheh, selamat lah aku!

Knitting

Sekeda kita endang nemu aku rindu begaga ka utai .. baka ngaga gelang, antin, tenggak ngena marik enggau kristal. Aku rindu mega ngaga quilt (pua tampung seribu), ngerinda lalu diatu bisi nguji knitting! Heheh, kelia aku endang bisi udah nguji knitting tang lama udah enda nyau enda ingat agi. Bedau lama tu tadi aku meda scarf di gaga kawan aku ngena chara knitting. Aku alu ka ga ngaga scarf baka nya!

Bisi lah aku tu, bebeli ka knitting needles, enggau benang kena nguji knitting. Aku diatu benong ngaga scarf, simple aja lah, kena nguji lalu mulai ka pengingat chara knitting serta belajar ka chara tauka stail ngeknit. Au, Grace, ingat aku nuan minta gaga scarf! Heheh, aku udah bisi idea .. ila nuan meda iya!

Tu gamal scarf ti benong di gaga aku. Segulong agi benang, tembu iya. Maya iya tembu ila, hari pen enda chelap agi! Heheh.

Wednesday, January 18, 2006

Meda Wayang

Udah bekau aku ka meda cherita The Sleeping Dictionary, aku lalu bisi ati ngiga cherita Farewell to the King. Aku udah meda cherita tu maya iya pansut dalam taun 1989, tang aku enda ingat agi cherita iya.

Aku ngiga ba Netflix, laban enti sida bisi, aku ka nginjau, tang sayau sida nadai cherita nya. Leboh aku ngiga iya ba internet, aku tetemu ka orang bisi ka nyual video cherita tu ba ebay enggau ba Amazon. Aku endang bisi account ba Amazon lalu leboh meda rega video lama nya mina $2.77, aku lalu ngorder iya.

Video nya datai kemari, lalu malam nya kami duai Doug meda cherita nya. Rindu ga aku meda cherita Farewell to the King tu. Mina siti aja lah, ko jako bala Iban ti enggau hero tu diau, tang rumah panjai sida dia, bisi bechampur enggau baruk orang Bidayuh. Heheh. Doug berati ka sida senapang ti di kena orang beperang dalam cherita tu, lalu meri comment, "Those are authentic rifles for the period". Maklum lah Doug tu orang minat samoa utai pasal senapang! Lalu madah diri ka nulis ngagai Nick Nolte, madah ka how much iya enjoy meda cherita nya. Heheh.

Cuthess, ila aku ngaga DVD copy ka nuan cherita Farewell to the King enti nuan enda tetemu ka cherita tu di Sarawak din. Nganti aku pulai ka Miri ila lah, aku ngepost nya ngagai nuan.

Saturday, January 14, 2006

Insomnia

Insomnia, jako English, reti nya mata enggai tindok. Berapa malam tu udah, enggai entu tindok mata aku .. mina lelap enda lama udah nya tedani. Lama udah aku enda baka tu. Amat merinsa asai tubuh enti mata enggai tindok ... semadi ka dani pagi hari. :-(

Aku enda entu ka bepakai ka ubat ti tau nulong kitai tindok, laban enti udah makai ubat tu, tindok tentu tindok, tang tindok nya enda jenak, kelalu balat bemimpi! Siti ti ngasi ba aku .. ubat allergy. Enti aku udah makai ubat tu, jenak tindok, asai ka enggai dani ma udah pagi hari! :-) Ka pen enda, anak dua iko, kaung kaung minta pansut ari bilik! Ni ka minta tusu!

Sekali aku amat amat insomnia .. tiga bulan mata aku enggai entu tindok. Macham macham utai di uji .. ngirup teh leka lotus (lotus seed tea) meh aku. Mina sahari dua aja iya ngasi ba aku, udah nya enda ngasi agi. Pengujong iya aku meli ubat ba pharmacy, ubat ngasoh tindok, tang pharmacist mina ka nyual 3 leka aja sekali .... enggai ka ubat nya kena munuh diri kenu! Chissss .. kitai ka tindok ukai munoh diri .. hahaha. Maya nya aku gawa ba Vietnam.

Engka malam tu aku makai ubat allergy aja. Berapa minggu tu udah isi aku nadai gatal .. hari udah chelap lalu bisi embun, reti iya enda rangkai asai isi. Engka gari di kena aku sahari tu ngasoh isi aku bisi gatal. Sambil ngubat isi gatal, ngubat mata enggai tindok meh aku ma bepakai ka ubat allergy nya.

Selamat malam ka kita samoa! Arap ka tindok jenak serta nadai bisi mimpi.

Monday, January 09, 2006

Bubo

Denice saduai Duncan rindu main "bubo". Heheh, nya munyi jako "bubbles" di sebut saduai. Hari lima kutai kami bisi shopping ba Big Lots, lalu dia Daddy tepeda ka mesin ti tau ngemansut ka mayoh bubbles. Mesin tu ngena batteri. Apu basah lantai leboh ngambi gambar mesin tu!

Tu iya Turbo Bubble Technology: Billion Bubbles

Sunday, January 08, 2006

DVD Cherita Cina

Malam hari lima kami menyanak bisi pansut makai serta shopping. Ba Big Lots aku tetemu ka DVD cina ... cherita kung fu, enggau cherita pedang. Apu, sigi cherita ti dikerindu maya agi mit suba. Berebut rebut enggau bala meli tikit 50 sen ba panggong Lutong kelia! Heheh. Meda rega DVD nya mina $1.00 siti aku bisi meli 3 iti. Ba dua iti DVD nya, bisi dua iti cherita ba siti DVD. Reti nya empat iti cherita dalam dua iti DVD. Mina siti aja aku enda entu rindu ... cherita cina nya udah di alih bahasa ngagai English ... ka agi aku ninga jako cina, lalu macha subtitles!

Malam nya aku alu main siti DVD. Aahh? Kati aku tau rindu meda cherita baka tu suba? Heheh, special effects maya nya suba enda baka ke diatu. Orang ti bekung-fu dia, endang peda endar jari, lengan serta kaki enda entu datai maya ti bebekut tauka besipak! Ko Doug, cherita cina nya "too hokey", reti nya baka cherita bula, seula-ula.

Kelimpah ari DVD china, aku bisi meli siti DVD cherita Bruce Willis: Blind Date enggau siti DVD cherita lama ... agi ngena filem chelum putih. Ba DVD cherita lama bisi dua iti cherita lalu siti cherita nya di kumbai Three Came Home. Cherita tu di ambi ari bup di tulis Agnes Keith. Agnes Keith, maya musim Jepun suba, di tan ba siti kem Jepun di Sabah. Doug bisi bup tu, nya kebuah aku meli DVD tu. Ila nganti udah meda cherita tu baru nyerita lebih agi pasal pemanah tauka enda cherita tu!

Pama endar ga Big Lots bisi nyual DVD cherita lama enggau DVD cherita cina! :-)

Wednesday, January 04, 2006

Aram Kitai Bekaraoke!

Ah, ulih bekaraoke diatu! Nyau ka 2 minggu aku nganti, baru demalam bunyi microphone bisi pansut ari speaker. Paduhal, ngelama tu Doug nyambung karaoke player enggau speaker ngena optical cable. Ko orang ti nyaut talipon aku ba Ace Karaoke(alai aku meli karaoke player), microphone signal ngena analog, reti nya enti aku ngena optical cable (digital signal) iya sigi enggai nyadi. Ok, bekareh meh Doug meli ka aku adapter kena iya nyambung RCA cable ngagai control pod speaker set aku.

Heheh, udah aku pulai ari Bible Study demalam aku alu nguji bekaraoke ngena RCA cable nyambung speaker enggau player. Nya baru iya ninga nyawa diri empu pansut ba speaker! Sempat bekaraoke enda lama ... enda ulih inggar lah, laban bala anak udah tindok, tambah mega enti kelalu inggar bala ukoi orang sepiak kami tentu begau ninga nyawa aku! Iissssh, enti ga manah endar nyawa di tebah jauh malam! Hahaha!

Bah, ni DeeJay ti ka ngaga ka aku VCD karaoke Iban? Enti enda nuan ga ngaga ka aku, Cuthess. Enda ulih bepekit tua ila enti aku enda nemu lagu iban! Heheh. Nadai lah, ila pangan aku maya iya bisi pulai ka Miri bulan dua tu, aku ngasoh bala menyadi aku meli VCD karaoke Iban, alu ngasoh Rose mai iya pulai ari Miri ka aku. Rose indu Iban ari Miri/Bintulu diau ba Maryland, jadi ka orang ditu serta bisi anak siko.

Limpang mimit cherita ... rindu endar ninga livestream ari Vynne's Interactive Media. Aku bisi nanya Vynne, enti iya beguna ka part-time DJ. Aku ka apply! Heheh. Aku bisi enggau bala orang ari Malaysia ba forum MyBuddies. Sida bisi meh radio show, tang ngena jako cina, bisi ngaga drama meh sida dia. Nya aku berunding nadai salah mega enti kitai ngaga drama radio, enti teulih ka script manah, neh! Maya hari besai baka Father's Day, Merdeka, sida selalu bisi special program ngerami hari besai tu.

Besai endar harapan aku ka pengawa Vynne! Aku endang nyukong serta meri peransang ka pengawa iya. Syabas, Vynne.

Monday, January 02, 2006

Taun Baru

Sahari tu baru masuk hari kedua dalam taun baru tu. Nadai entu mayoh utai udah nyadi ditu mina ujan aja. Boring endar ga laban hari ti selalu ujan.

Tournament of Roses Parade di Pasadena endang tiap taun di intu kena 1 haribulan satu tang laban ti ujan bangat kena 1 hari bulan nya iya di intu sahari tu. Pama mimit ga sahari tu taja iya ujan, iya enda entu bangat sereta nadai angin. Aku bisi meda mimit parade tu ba TV tang nadai tepeda ka float ari Malaysia. Tiap taun Malaysia Tourism Promotion Board bisi enggau parade tu.

Kemari bangat endar angin ditu. Tiga kali nadai karan, tang mina berapa sikin aja udah nya nyadi baru api. Maya kami pansut shopping kena pukul 4:30 lemai kami tepeda ka 3 iti tiang letrik enda jauh ari rumah kami tumbang. Apu, amat bangat angin nya! Patut 3 kali kijap kijap api ba rumah maya nya! Kami ti shopping nya ngelaban angin enggau ujan! Heheh, semadi Doug agi diau, sereta enggai agi diau ba rumah laban ti boring amat nya meh bekareh pansut!

Ansa kami rindu meda ai mayoh ba tanah dia. Bisi alai saduai nyemarai meh nya dia! Itit kami nadai temu tunga agi. Sida nemu terbai, engka bisi tetemu ka endor bisi ai alai sida tau nyemerai. Bedau lama tu tadi bisi meda siko ba atas pun kayu orang diau sepiak kami.

Selamat Taun Baru, arap ka kita ti agi bujang dara bulih tuah taun tu sereta tetemu ka jodoh! :-) Dinga saduai Cuthess enggau Grace!
Related Posts Plugin for WordPress, Blogger...