Tuesday, December 20, 2011

Pengawa Ujung Minggu



Maya kami menyanak ke Los Osos ujung minggu tu tadi, kami duai Doug sempat makai malam ba Great American Fish Company ba Morro Bay. Morro Bay enda entu jauh ari Los Osos. Bala anak diambi aki enggau ini saduai pagi nya, dibai saduai bemalam enggau saduai. Lantang meh kami duai Doug pegi date night!

 

 Aku enda entu ka dibai Doug bejalai meda waterfront udah ke badu makai. Chelap!

 

Hari siti, kami menyanak dibai entua aku makai ba restoran ba Pismo. Early Christmas dinner, ku iya. Bala menyadi Doug enggau laki sida, enggau siku ipar entua aku enggau kami makai lemai nya. Tu gambar di ambi ari jendela restoran. Sayau amat mata panas padam di lindung remang ba tisi langit.

Kiraka enda ngatur Christmas dinner ba rumah iya meh entua aku taun tu laban udah mai orang makai ba restoran! Kami menyanak sigi enda nemuai ngagai sida maya Christmas tu lagi laban ti bisi temuai maya nya ila.

Bah, udah sedia nyambut Hari Krismas?

Saturday, December 17, 2011

Cherita Tengan Bulan Dua Belas



Tu meh sekeda gamal hari tumu pagi ba menua kami dalam bulan dua belas tu. Minggu nyin kemari lima hari beturut turut embun meku ba tanah. Pagi hari lima tu kemari baka nya ga hari. Tang selalu iya ma udah ngalih tengah hari, kabus mupuk nadai agi.

 Mua hari udah terang, nadai entu tampak kabus agi, maya kami ke berangkat mupuk ke menua sida entua aku hari lima tu tadi. Kami menyanak sempat ngetu enda lama ba San Joaquin Valley National Cemetery laban kami udah besemaya enggau auntie Doug ka ngambar pendam niang laki iya. Niang uncle Doug soldadu ba perang Korea enggau Vietnam, nya kebuah iya tau dikubur ba National Cemetery. Iya mati tegal cancer, ukai mati maya beperang.

 

Peda ulah Duncan bema ma enggau Denice. Iya madah iya enggai ngindik orang ke ba baruh tanah, nya iya ngasuh Denice ngema iya! Wreath ke ditinggal kami ba pendam niang Uncle Doug ulih aku meli udah nya di hias aku ngena bunga enggau ribbon. Maya Thanksgiving bulan nyin kemari kami ti ka ngetu ba pendam uncle Doug tang ujan maya kami ti mansa menua nya, lalu maya ke pulai ari Los Osos hari udah petang laban hari sigi tumu petang maya bulan dua belas. Alu enda nyadi.

Bala nembiak udah berengkah kemisi musim Krismas nya kami menyanak ngambi peluang nemuai ke Los Osos baru maya ujung minggu tu. Maya Krismas tu lagi aku bisi temuai, bala pangan ari Vietnam. Nya ga siti kebuah ka nemuai ngagai sida entua kala ke ulih. Ku entua aku lemai tu tadi, lemai pagila iya ka mai kami dinner - early Christmas dinner, laban kami enda betemu maya hari Krismas tu ila.

Bah, kati bala kita, udah besedia ngintu Hari Krismas?  Aku bisi ngaga kuih makmur kutai, tang berapa leka agi tinggal!  Kek buah alu apin ngaga - nya ka aku ngalau ngambika bisi di sepi pangan ari Vietnam!

Selamat Hari Krismas ngagai bala kita ti ngintu hari besai tu!

Saturday, December 10, 2011

Christmas Bokeh

Lima belas hari agi alu ngintu Krismas kitai! Aku baru sahari tu nganjung gambar dituchi ngambika bisi dikena ngaga kad Krismas! Laun, ku Doug! Iya ga tukang gambar bisi mogok mimit!



Tu siti ari gambar diambi aku sahari tu kena ngaga kad Krismas.



Aku sigi rindu bemain enggau camera. Tu gamal heart bokeh ari bintang atas kayu Krismas taun tu! Cute, kan?



Ni gambar kayu Krismas ti terang agi deh? Endang sengaja ngambi gambar enda terang laban ti ka meda heart bokeh!



Tu Santa's sleigh ti digantung ba jendela. Gagit amat bala anak ngantung Santa's sleigh enggau angels dua iku ba jendela. Nadai pesen bukai, endang baka taun ke udah!

Ila bekunsi ke gambar bukai, au!

Monday, December 05, 2011

Cherita Pun Bulan Dua Belas

Hari beganti minggu, minggu beganti bulan, bulan beganti taun. Nyau enda berasai, meda nyau udah bulan dua belas, taun pen nyau ka abis!


Musim gugur

Hari ba menua kami ditu udah mupuk chelap taja agi musim gugur. Aku enda sedar penyelap hari demalam, tekenyit pagi tadi meda rumput burak laban embun meku. Nadai penyadi meh kantuk entekai - mati magang laban penyelap hari. Sahari tu aku sempat ngumpul entekai puda, ambi ke lauk.


Makai ais krim mochi

Hari enam tu kemari aku ngintu hari pengada. Lembau nyebut penyampau umur ... enti gawa for Malaysia, berapa taun aja agi tinggal udah tau penchen! Kami menyanak nganjung diri makai lemai ba restoran Jepun enda jauh ari rumah kami. Bala anak nemu endar madah ngagai tokey neo kami ngintu hari pengada aku. Udah kami tembu makai, mupuk kami ... berapa singkang aja ba luar restoran ninga tokey neo ngangau, ngasuh kami tama makai ais krim mochi! Lapa deh, nadai ka muai peluang, beguai kami menyanak tama baru!


Prujek Ngait

Meda hari nyau mupuk chelap ngerajin ka diri aku begaga ke scarf enggau tupi. Naka iya ke ditemu aku laban ti enda entu nemu iga ngait. Pattern mayuh alai bulih, nyamai ngiga iya ke muntang digaga alu iya ke jampat tembu. Tau dikenyadi sida scarf enggau tupi digaga!


Christmas Mood

Gagit amat bala anak ngias Christmas tree taun tu. Aku mina ngantung api, semua utai bukai digantung bala anak magang.  Tau endar saduai dikenyadi taun tu!  Kayu Christmas, baka selama ulih kami meli ari Boys Scouts.

Lemai hari enam tu tadi kami menyanak sempat meda Christmas Parade ba menua Galt ditu. Lebuh kami datai ba simpang ti alai kami selalu meda parade, parade pan udah mansa! Nyau meh kami ngipa parade nya nikal ke alai sida berengkah. Nyu nadai orang agi meda ba pengujung parade. Hari chelap amat lemai nya, bala orang mayuh udah ngipa tumu maya sida baru berengkah. Enda ga lebu nganti, puas ati bala anak lemai nya.

Bah naka tu aja sekali tu! Arapka tulang enda malas update blog tu ila! mrgreen

Saturday, November 05, 2011

Quince

Ok, udah agi cherita buak entekai! Agi mayuh buah entekai aku dia tang sekali tu aku ka bekunsi cherita pasal buah quince. Gamal buah tu baka pear enggau epul, tang isi iya kering agi ari buah dua igi nya. Bau iya manah amat, nyu ka bau epul. Quince enggai nyadi di empa baka nya aja laban enda entu nyamai tambah mega kering. Bisi hari tingkil ngeli batu!



Sepun tu aja pun quince ke bisi ditanam kami. Taja enda entu diintu, ninting taun iya bebuah. Ulat enda ga ngachau iya. Taun tu bekareh aku ngiga resipi laban sayau amat meda buah tebasau ngapa. Taun ke udah endang diteju buruk dia meh buah quince aku nya.



Buah quince enti udah dipanduk tau bebali curak iya. Curak iya ke bendar burak baka buah pear. Peda pemanah gamal buah nya udah iya dipanduk. Ditu aku ngaga quince paste - baka jam tang tebal sereta rangkai agi ari jam asai iya. Nyamai di empa enggau cheese tauka di empa enggau ruti. Asai iya manis enggau masam laban bisi digulai enggau lemon maya ke manduk iya.



Udah ke ngaga paste aku alu nguji ngaga jam. Buah quince diparut udah nya dipanduk enggau ai, gula enggau ai lemon. Panduk datai ke gamal iya baka jam, enti kelalu rangkai pedis ga iya disapu atas ruti paun! Amat nyamai endar jam buah quince!



Sekeda ke udah dipanduk aku kutai digaga aku ke tarte, baka pie. Baru iya meh aku tu nguji ngaga utai baka tu! Kulit pie nya ngena ke endang udah digaga - meli ari supermarket. Pama endar ga penaymai tarte tu!



Digaga ke crumble ga nyamai agi sepi aku! Buah quince ke udah dipanduk nya enggau ti udah di sirap dikena ngaga crumble. Kebuah iya nyamai agi laban utai ke ditabur atas buah quince nya walnut, oats, gula, tepung cinnamon enggau tepung. Mmmmmmm!



Mmmmmmm! Ka endar Doug nyebut nya nyamai amat lebuh ke makai crumble nya tadi! Baru taun tu meh aku belajar ngaga crumble. Enda pedis ngaga tu nya ti ngasuh gagit amat. Crumble ba gambar tu baru ke dua kali aku ngaga iya. Google aja recipe crumble ... muntang. Nadai buah quince, pear, epul enggau buah bukai tau magang dikena ngaga crumble.

Anang nitik liur meda gambar dibantai aku sekali tu, au! mrgreen

Tuesday, October 04, 2011

Cherita Makai Entekai



Sebedau Doug jadi enggau aku, iya mina nemu makai pie entekai (pumpkin pie). Ku iya, indai iya enda kala manduk entekai ke lauk. Nya meh ku iya, enti nemu entekai ngenyamai nya diempa ke lauk, lapa enggai manduk entekai ke lauk kelia!



Tu gamal entekai panggang - di isi enggau asi ti udah digulai enggau manuk pepat, enggau utai bukai ti ngasuh iya nyamai alu di panggang. Munyi ku pangan aku siku, isi entekai dikaus enggau sudu alu diempa enggau asi ti endang udah dalam buah nya tadi.

Ukai main ga pengering kulit entekai! Nyu ngena geraji letrik nyayat entekai tu! Nya ti bisi dipeda menyana gamal bekau entekai ditetak. Enti ngena duku nadai jalai ngalus nya gamal entekai ditetak!



Ngelama tu aku enda nemu entekai puda tau dipanduk ke lauk. Semadi dipadah pangan aku siku - amat nyamai endar ga entekai puda! Manis endar isi iya. Ba gambar tu, entekai puda digulai aku enggau kuntum morning glory. Nyamai amat!



Entekai puda digulai enggau kantuk iya enda ibuh disebut. Endang gerenti nyamai! Nya pangan aku siku da madah buah entekai tu baka buah nangka. Tau diempa puda, tengan mansau enggau udah mansau. Enti udah munyi nya, enda meh aku kiruh nganti iya mansau iga enti ka digaga ke lauk!

Amat enda lebu bekebun entekai taun tu!

Thursday, September 22, 2011

Tomato & Entekai



Amat enda alah empa pemayuh tomato kami taun tu! Bansa ke ba gambar aku tu enda ngemayuh bansa iya ke panjai. Enti iya segala baka tu nyamai amat dikena ngaga lauk di isi sida manuk pepat tauka sebarang dagin bukai. Kami duai Doug mina makai tomato berisi ke dagin manuk kulok tu demalam. Enda ibuh makai asi laban tu aja udah kenyang perut!

Lemai tu makai sardin ikan alu di gulai enggau tomato mega. Nadai lauk bukai kami duai Doug lemai tu - ikan sardin gulai tomato enggau lauk entekai. Ituk endar aku nyebut pemanis entekai aku nya. Amat enda lebu mai leka ari Miri taun nyin kemari!

Enti tulang rajin, ukai nya nadai resipi ti beguna ke tomato! Tang nya meh tulang ke buruk! mrgreen

Wednesday, September 21, 2011

Entekai



Galak amat entekai di tanam kami taun tu! Agi mayuh iya ke benung mansau ba randau pun entekai ba kebun kami dia.

Amat enda alah empa meh pemayuh entekai kami tu ila! Nya meh aku begiga ka resipi kena ngabis ke entekai. Ukai enda gaga agi ati meda kuih bingka entekai nyadi kemari! Belauk ke entekai enda ibuh disebut - nyu beturut hari ke makai lauk entekai! Kami duai Doug sama rindu makai entekai, apa agi entekai nya manis amat. Iya ke manis nya endang ari leka dibai ari menua.

Ku Doug, sebedau iya jadi ke aku endang amat enda kala makai lauk entekai. Mina entekai ba pumpkin pie enggau pumpkin soup aja! Ukai main agi iya besebut ke penyamai lauk entekai ke dipanduk aku! biggrin

Au meh, belauk entekai belama meh kitai seagi entekai nya bisi!

Tuesday, September 13, 2011

Pengawa Hari Enam



Maya bala nembiak kemisi musim panas tu tadi, suah endar aku nyebut ka mai bala bejalai ba Consumnes River Preserve. Tang alu ga enda! Nya meh hari enam tu kemari aku mai bala bejalai kin. Hari manah amat ga lemai nya, enda entu angat alu bisi endar asai angin muput.

Sida burung bangau, sida itit endang semampai bisi dia. Musim gugur tu lagi baru meda sida ansa enggau itit rami agi dia. Iya ke dianti aku ninting taun iya nya burung Sandhill Cranes. Rindu amat aku meda burung tu!

Umbas iya ga pengelama kami dia, kiraka mupuk petang hari kami ti pulai ari nya. Kapa agi ngira berapi udah kitai ti pulai bejalai! Nyau kami menyanak nganjung diri makai ba restoran Cina. Dulu aku telipun ngasuh sida nyendia manuk guring ke aku! Enti ngudar lauk nya maya ke udah din, lubah endar lauk nya datai laban ukai nya jampat nguring manuk!

Au, nya meh pengawa kami menyanak hari enam tu tadi! mrgreen

Tuesday, September 06, 2011

Gred Tiga



Sahari tu hari keterubah Denice saduai Duncan niki ngagai Gred tiga. Lama endar saduai udah nganti hari tu! Gagit amat orang ka nurun sekula! Aku pan gagit saduai berengkah sekula sahari tu. Lebih tiga bulan saduai kemisi musim panas. Lelak rah rah belara ke saduai! redface



Tengah hari tu tadi, baka taun ke udah, aku nulung ngemata bala nembiak maya sida bemain udah ke makai tengah hari. Sekula nya sigi enda besai, nya meh aku berati ke mua nembaik ke baru ngambika ulih ngingat gamal sida. Taun dulu, enda aku tingat ke nama semua nembiak dia, nya meh taun tu aku deka nguji ngingat semua nama sida.

Enda meh aku ulih bejaga jauh malam agi enggai ke pedis dani pagi siti. Demalam puas aku ninduk ke diri - kelalu tumu, enggai mata dibai tinduk tumu! Enti enda chukup tinduk, mood ga enda manah, alu ga nganu orang! twisted

Arap ke taun tu, taun ti mai berkat ke saduai. Amen!

Monday, September 05, 2011

Tomato Chutney


Tomato Chutney

Mina dua pun tomato ditanam taun tu tang buah iya, akai enda alah diempa! Bendar meh aku ngiga resipi ti beguna ke tomato!

Demalam manduk dagin gulai tomato enggau bawang. Tengah hari tadi belauk ke kubis diguring enggau tomato enggau undang kering. Lemai tu aku nguji resipi ala pemakai India - tomato chutney!

Pagila ka manduk kacang dal enggau tomato, alu ka mega manggang tomato bepuak ke dagin pepat! Enti enda alah ila dijembui tomato, tauka digaga jus! Kapa enda berentak makai tomato!

Sunday, September 04, 2011

Asil Kebun



Gaga amat bala anak meda buah semangka udah mansau alu tau diambi sahari tu! Tiga igi buah semangka ke udah mansau; nya meh Daddy madah ke Denice iya enda tau enda makai buah semangka nya ninting hari! Enggai ke tebasau enti enda diempa!

Sida buah pear enggau epul endang utai tanam lama. Buah pear ke kuning bulat, alu enda mayuh ti tau diempau. Pear ka sebengkah nya baru enda empa ulat. Buah cantaloupe ga sebengkah diempa indu utai ... begedi endar meda nyu buruk magang magang cantaloupe diempa indu utai! Lebu amat nanam iya taun tu!

Sida entimun ditanam enda alah diempa. Nyu diberi Doug ke bala ti enggau iya gawa. Tomato galak nya ga, nyu rebah dan laban buah ngemayuh nya. Dawai ti kena ngetan pun tomato alu enda enda dibeli maya ke baru nanam iya suba!



Bendar ngabis entekai tu ila! Galak amat! Sepun ari entekai tu bansa ke manis - leka endang dibai aku ari Miri. Enda aku ngadang buah nya besai amat! Besai agi ari buah bul! Aku meda kantuk entekai nyu geram diri ga meda ... ka diulih ke lauk! Berapa kali aku udah ngambi kantuk iya. Meda buah udah mayuh amat, bisi ati aku ngambi siti ke puda, gulai enggau kantuk iya. Nyamai iya ke puda digulai enggau kantuk ku pangan aku siku ti berasal ari Kuching. Enda ibuh dipunsi kulit buah entekai puda nya ku iya.

Ila meh aku nguji!

Friday, September 02, 2011

Brus Gigi



Naka pengaga Duncan ninga diri menang cabutan brus gigi Sonicare ari klinik gigi alai iya ti nuchi gigi iya minggu nyin kemari. Tiap bulan klinik tu bisi meri siti brus gigi bakatu ngagai nembiak ti bisi ke klinik gigi bulan nya. "It's my lucky day!" ku iya kemari ninga rita nya.

Pagi tu tadi kin meh kami tiga menyanak ngambi brus gigi nya. Begambar indah ba klinik laban bulan tu gambar iya ga digantung ba dinding. Gambar baruh sepiak kiba, gambar Duncan nunjuk nembiak ti menang cabutan bulan tujuh tu kemari.

Manah endar ga Duncan enda takut betemu enggau lutur gigi. Denice, puas ngumbuk baru ka. Tiga kali nganjung diri ngagai klinik gigi (sama klinik alai Duncan), udah nya nikal enda nyadi laban kelalu balat takut. Nyu ngiga klinik bukai, klinik ti teleba agi ngadu gigi bala nembiak ti kelalu balat takut nya baru ka. Alu dia meh alai nganjung iya betemu lutur gigi laban iya kiraka teleba ba klinik nya. Sida ba klinik nya nemu endar ngasuh nembiak enda takut. Nemu amat sida ngadu klinik nya. Bakaka dalam restoran gamal chara sida ngerias klinik nya. Ni enda bala nembiak ti takut nyu nemu rilek mimit ga meda tempat nya enda tak baka klinik gigi. Manah amat ga bisi utai baka tu ba menua ditu.

Au, naka tu aja cherita pasal brus gigi enggau klinik gigi sekali tu! mrgreen



Wednesday, August 31, 2011

Nadai Karan


Tumu pagi tadi bala anak ngetuk pintu alu nanya, "What can we do?" Orang buhing meh nya laban enda ulih meda tv laban ti nadai karan. Sepemanjai kemisi musim panas saduai endang masau jam meda tv enggau bemain komputa besahari sahari.

Tiang karan ba pun jalai benung diganti nya kebuah karan ngagai rumah kami enggau rumah orang berimbai kami nadai sahari tu. Ari pukul 8.00 pagi tadi udah nadai karan ... kenu pukul 4.00 lemai baru besambung baru, tang udah pukul 4.00 jam diatu alu ga bedau.

Radio agi ga ulih didinga laban ti tau ngena bateri bemain radio. Komputa aku ulih ga bejalai laban bisi tablet pc ti tan amat bateri, alu modem ngena ari hand phone. Nya pan nyu abis bateri ba hand phone ... baru ga 2 jam ngena! Amat enda berapa! Nyau meh nganjung ngagai kerita ngambika ulih ngechas .. ninjik ga maya ti ngechas modem nya ulih bejalai, ulih ga be-internet!

Ninjik ga hari sahari tu enda entu angat iga, agi ulih ditat taja kipas enda bepusin, air-cond enda bejalai. Enti nya angat agi ari nya ... apu, sigi mindah aku, nadai aku ka ngenat hari angat ba rumah!



BBQ alai manduk ai, manduk telu, maggie mee enggau ngangat asi sahari tu laban dapur kami dapur karan. Nya ga siti penyamai ngembuan utai baka tu! Enda ibuh kiruh nganjung diri makai ba restoran laban dapur ti nadai karan!

Bah, nya iya karan baru bisi! Alu beguai bala anak masang tv enggau masang komputa!

Monday, August 29, 2011

Skirt



Puas endar asai ati aku meda skirt ke digaga aku ke Denice menyana amat gamal! Aku amat enda kala ngaga gari ke anak aku empu. Ngaga panggal, ngaga karung panggal, ngaga pua tampung ... nya aja meh utai ti dijait aku ke anak aku! Baju gaun diri empu endang kala aku ngaga tang kada bisi meniga taun aku nadai nyait gari diri empu.

Ba sekula bala anak pemanjai pakaian bala nembiak indu enggai enda baruh ari pala patung. Enda ngawa nya panjai, tang penyalah iya kedai ti nadai nyual pakaian sekula ke panjai! Abis alai ngiga, nadai tetemu! Ba internet mina saiz nembiak ke tuai agi bisi skirt panjai tang saiz bala sida Denice nadai bulih. Dua iti uniform (jumpers) baru udah dibeli aku, nyu meli saiz jauh besai agi ari tubuh iya laban ti ka ngulih ke pemanjai! Nyu enggai enda di adu ga iya ke baru dibeli nya. Ni alah tudah Denice nyu rigang rigang ngena baju sekula nya ila!

Amat enda puas endar ati aku laban tu. Endang ari taun dulu aku udah gut gut laban kedai ti di recommend sekula alai meli uniform nadai nyual uniform panjai. Taun ke udah, ka pan enda ngena uniform naka pala patung tudah Denice. Ninjik ga sekula enda terit meresa pemanjai skirt bala nembiak indu taun tu tadi!

Nya kebuah hari lima tu kemari aku bisi meli kain kena ngaga skirt ke Denice. Ukai nya pedis enti amat udah ga ngaga, ku aku bejaku kediri! Aku endang udah berati ke stail sekeda skirt sekula ba kedai. Ngiga stail ke nyamai agi digaga meh aku tu tadi. Ninjik mega Denice bisi siti skirt ti tau alai aku nunda saiz.

Nah, diatu kiraka udah nemu ngaga skirt uniform, kapa kiruh meli saiz besai agi ari tubuh anak dudi ila! Murah sereta ngam uniform gaga diri empu! wink

Sunday, August 28, 2011

Ikan Emas



Tu meh penyadi ikan emas ti melepung dalam tangki ikan pagi tadi. Mina dua iku agi tinggal dalam tangki nya. Sigi nadai mayuh ikan emas ti ditupi, alu iya ke mati sahari tu iya ke besai sekali.

Sinu meh bala anak meda siku ari ikan tupi saduai udah mati. Nya meh Daddy alu ngasuh saduai numbak lubang alai ngubur ikan nya tadi. Mabu endar lubang ke ditumbak, ba tanah ngimbai mua pintu rumah kami.

Dibungkus enggau tisu tudah ikan, udah nya disimpan dalam lubang. Batu kena saduai ngelai alai ikan nya dikubur. Enggai enda dianjung enggau sembiang ga ikan nya tadi!

Menyana meh ikan nya dianjung ngagai serega ikan di langit din! mrgreen

Friday, August 26, 2011

Hurricane Irene



Munyi ku kaban kitai, alhamdulillah, kami ke diau di sepiak kiba/tebing barat benua Amerika nadai enggau orang begau tegal Hurricane Irene. Seleka ujan deh nadai udah nyepi kami. Semina pun bulan enam kutai ti bisi ujan mimit tang sida ke diau tunga menua bebukit ba California bisi ga nyepi ujan maya musim panas tu. Munyi ku aku tadi, ba endur bukai seleka ujan nadai meh udah turun.

Berita ba TV, nadai cherita bukai, cherita Irene aja. Baka ke enda kala kena pangka kabut besai! Sekeda mensia sigi enda ninga ke jaku pesan perintah .. tinggal tebing tasik .. giga alai ti selamat agi! Agi meh bala enggai mindah. Enti amat kena pangka hurricane tebing tasik ti alai mensia ti enggai mindah, nadai nganjung diri nyelemat kita, ku perintah. Kapa deh.

Semua flight ngagai tempat ti diadang kena pansa Irene dikinsil bepun ari pagi hari enam datai ke hari satu minggu baru. Ba New York city, train baruh tanah pan kinsil. Besedia meh sida - takut karan nadai, takut bah, takut tiang karan tumbang, pun kayu tumbang, rumah orang tekebu ...

Tu meh cherita semadi nadai aku sekali tu! mrgreen


Thursday, August 25, 2011

Musim Panas



Enti dibanding enggau taun ke udah, musim panas taun tu, kelebih agi ba menua alai aku diau, enda ngangat taun ke udah. Sepemanjai bulan lapan tu pengangat hari ba kami ditu nadai udah manggai 38 °C. Enti nitih musim panas ke udah bulan lapan endang bisi enda kurang ari 5 hari beturut turut pengangat hari lebih ari 38 °C.

Dalam bulan tujuh nyin kemari bisi berapa hari aja pengangat hari lebih ari 38 °C. Nya meh ti ngasuh aku rindu amat meda hari ba kami ditu enda ngangat taun ke udah. Ma lemai hari, bisi endar alai nganjung diri duduk ba luar rilek baruh pun kayu tauka baruh payung.

Tang sida geng ke diau di Houston, Texas, lain ga hari. Benung kemarau sida din .. lebih 40 hari beturut turut pengangat hari lebih ari 40 °C! Amat parai diau ba menua Texas enti nadai air-cond! Mina lemai kemari enggau pagi tu bala bisi madah bisi ujan labuh ba Houston. Kada enda tempias ujan dibai Hurricane Irene? Sinu ninga bala sebana ke kebun bunga abis layu gasak hari kelalu angat.

Kami ke diau ba Sacramento Valley di California ditu endang beterima kasih hari enda ngangat taun ke udah! Selalu endar angin tasik bisi muput alu datai ba kami ditu, nya ti ngasuh hari kami ditu enda angat. Tang ba alai bukai ti jauh ari tasik, sigi angat pan din.



Bulan tujuh tu kemari, kami menyanak bisi nemuai ke San Francisco laban ti bisi enggau orang begempuru ke Bersih 2.0! Anang enda enggau orang ngeruh ai! Laban San Francisco ti ngimbai tasik asaika ukai musim panas menua nya dia. Nyu bejaket jaket bala kami ti begempuru enda jauh ari Golden Gate Bridge! Chelap!

Bah, naka tu aja cherita ti ulih dikunsi enggau kita sekali tu! mrgreen
Related Posts Plugin for WordPress, Blogger...