Wednesday, August 31, 2011

Nadai Karan


Tumu pagi tadi bala anak ngetuk pintu alu nanya, "What can we do?" Orang buhing meh nya laban enda ulih meda tv laban ti nadai karan. Sepemanjai kemisi musim panas saduai endang masau jam meda tv enggau bemain komputa besahari sahari.

Tiang karan ba pun jalai benung diganti nya kebuah karan ngagai rumah kami enggau rumah orang berimbai kami nadai sahari tu. Ari pukul 8.00 pagi tadi udah nadai karan ... kenu pukul 4.00 lemai baru besambung baru, tang udah pukul 4.00 jam diatu alu ga bedau.

Radio agi ga ulih didinga laban ti tau ngena bateri bemain radio. Komputa aku ulih ga bejalai laban bisi tablet pc ti tan amat bateri, alu modem ngena ari hand phone. Nya pan nyu abis bateri ba hand phone ... baru ga 2 jam ngena! Amat enda berapa! Nyau meh nganjung ngagai kerita ngambika ulih ngechas .. ninjik ga maya ti ngechas modem nya ulih bejalai, ulih ga be-internet!

Ninjik ga hari sahari tu enda entu angat iga, agi ulih ditat taja kipas enda bepusin, air-cond enda bejalai. Enti nya angat agi ari nya ... apu, sigi mindah aku, nadai aku ka ngenat hari angat ba rumah!



BBQ alai manduk ai, manduk telu, maggie mee enggau ngangat asi sahari tu laban dapur kami dapur karan. Nya ga siti penyamai ngembuan utai baka tu! Enda ibuh kiruh nganjung diri makai ba restoran laban dapur ti nadai karan!

Bah, nya iya karan baru bisi! Alu beguai bala anak masang tv enggau masang komputa!

Monday, August 29, 2011

Skirt



Puas endar asai ati aku meda skirt ke digaga aku ke Denice menyana amat gamal! Aku amat enda kala ngaga gari ke anak aku empu. Ngaga panggal, ngaga karung panggal, ngaga pua tampung ... nya aja meh utai ti dijait aku ke anak aku! Baju gaun diri empu endang kala aku ngaga tang kada bisi meniga taun aku nadai nyait gari diri empu.

Ba sekula bala anak pemanjai pakaian bala nembiak indu enggai enda baruh ari pala patung. Enda ngawa nya panjai, tang penyalah iya kedai ti nadai nyual pakaian sekula ke panjai! Abis alai ngiga, nadai tetemu! Ba internet mina saiz nembiak ke tuai agi bisi skirt panjai tang saiz bala sida Denice nadai bulih. Dua iti uniform (jumpers) baru udah dibeli aku, nyu meli saiz jauh besai agi ari tubuh iya laban ti ka ngulih ke pemanjai! Nyu enggai enda di adu ga iya ke baru dibeli nya. Ni alah tudah Denice nyu rigang rigang ngena baju sekula nya ila!

Amat enda puas endar ati aku laban tu. Endang ari taun dulu aku udah gut gut laban kedai ti di recommend sekula alai meli uniform nadai nyual uniform panjai. Taun ke udah, ka pan enda ngena uniform naka pala patung tudah Denice. Ninjik ga sekula enda terit meresa pemanjai skirt bala nembiak indu taun tu tadi!

Nya kebuah hari lima tu kemari aku bisi meli kain kena ngaga skirt ke Denice. Ukai nya pedis enti amat udah ga ngaga, ku aku bejaku kediri! Aku endang udah berati ke stail sekeda skirt sekula ba kedai. Ngiga stail ke nyamai agi digaga meh aku tu tadi. Ninjik mega Denice bisi siti skirt ti tau alai aku nunda saiz.

Nah, diatu kiraka udah nemu ngaga skirt uniform, kapa kiruh meli saiz besai agi ari tubuh anak dudi ila! Murah sereta ngam uniform gaga diri empu! wink

Sunday, August 28, 2011

Ikan Emas



Tu meh penyadi ikan emas ti melepung dalam tangki ikan pagi tadi. Mina dua iku agi tinggal dalam tangki nya. Sigi nadai mayuh ikan emas ti ditupi, alu iya ke mati sahari tu iya ke besai sekali.

Sinu meh bala anak meda siku ari ikan tupi saduai udah mati. Nya meh Daddy alu ngasuh saduai numbak lubang alai ngubur ikan nya tadi. Mabu endar lubang ke ditumbak, ba tanah ngimbai mua pintu rumah kami.

Dibungkus enggau tisu tudah ikan, udah nya disimpan dalam lubang. Batu kena saduai ngelai alai ikan nya dikubur. Enggai enda dianjung enggau sembiang ga ikan nya tadi!

Menyana meh ikan nya dianjung ngagai serega ikan di langit din! mrgreen

Friday, August 26, 2011

Hurricane Irene



Munyi ku kaban kitai, alhamdulillah, kami ke diau di sepiak kiba/tebing barat benua Amerika nadai enggau orang begau tegal Hurricane Irene. Seleka ujan deh nadai udah nyepi kami. Semina pun bulan enam kutai ti bisi ujan mimit tang sida ke diau tunga menua bebukit ba California bisi ga nyepi ujan maya musim panas tu. Munyi ku aku tadi, ba endur bukai seleka ujan nadai meh udah turun.

Berita ba TV, nadai cherita bukai, cherita Irene aja. Baka ke enda kala kena pangka kabut besai! Sekeda mensia sigi enda ninga ke jaku pesan perintah .. tinggal tebing tasik .. giga alai ti selamat agi! Agi meh bala enggai mindah. Enti amat kena pangka hurricane tebing tasik ti alai mensia ti enggai mindah, nadai nganjung diri nyelemat kita, ku perintah. Kapa deh.

Semua flight ngagai tempat ti diadang kena pansa Irene dikinsil bepun ari pagi hari enam datai ke hari satu minggu baru. Ba New York city, train baruh tanah pan kinsil. Besedia meh sida - takut karan nadai, takut bah, takut tiang karan tumbang, pun kayu tumbang, rumah orang tekebu ...

Tu meh cherita semadi nadai aku sekali tu! mrgreen


Thursday, August 25, 2011

Musim Panas



Enti dibanding enggau taun ke udah, musim panas taun tu, kelebih agi ba menua alai aku diau, enda ngangat taun ke udah. Sepemanjai bulan lapan tu pengangat hari ba kami ditu nadai udah manggai 38 °C. Enti nitih musim panas ke udah bulan lapan endang bisi enda kurang ari 5 hari beturut turut pengangat hari lebih ari 38 °C.

Dalam bulan tujuh nyin kemari bisi berapa hari aja pengangat hari lebih ari 38 °C. Nya meh ti ngasuh aku rindu amat meda hari ba kami ditu enda ngangat taun ke udah. Ma lemai hari, bisi endar alai nganjung diri duduk ba luar rilek baruh pun kayu tauka baruh payung.

Tang sida geng ke diau di Houston, Texas, lain ga hari. Benung kemarau sida din .. lebih 40 hari beturut turut pengangat hari lebih ari 40 °C! Amat parai diau ba menua Texas enti nadai air-cond! Mina lemai kemari enggau pagi tu bala bisi madah bisi ujan labuh ba Houston. Kada enda tempias ujan dibai Hurricane Irene? Sinu ninga bala sebana ke kebun bunga abis layu gasak hari kelalu angat.

Kami ke diau ba Sacramento Valley di California ditu endang beterima kasih hari enda ngangat taun ke udah! Selalu endar angin tasik bisi muput alu datai ba kami ditu, nya ti ngasuh hari kami ditu enda angat. Tang ba alai bukai ti jauh ari tasik, sigi angat pan din.



Bulan tujuh tu kemari, kami menyanak bisi nemuai ke San Francisco laban ti bisi enggau orang begempuru ke Bersih 2.0! Anang enda enggau orang ngeruh ai! Laban San Francisco ti ngimbai tasik asaika ukai musim panas menua nya dia. Nyu bejaket jaket bala kami ti begempuru enda jauh ari Golden Gate Bridge! Chelap!

Bah, naka tu aja cherita ti ulih dikunsi enggau kita sekali tu! mrgreen

Wednesday, August 24, 2011

Lauk Iban



Tu ukai keterubah iya aku bisi bekunsi cherita pemakai kitai Iban ba blog aku tu. Nya meh bisi sekali siku ti bisi macha blog aku ninggal komen madah diri rindu nguji pemakai ba menua alai iya nemuai. Reti nya tadi iya madah kapa kiruh ngiga lauk kitai Iban, empa aja pemakai orang ditu!

Aku endang rindu pan nguji pemakai bansa orang bukai, pemakai menua ti alai aku melancung! Ni iya dia ka diuji aku magang asal utai di-idang nya ukai dagin ukui tauka dagin ular tauka sida indu utai guring! Eeek, agi ngelisi aku meda sida buntak guring dijual bakaka nyual kacang kuda agi angat di menua Cambodia!

Ba dapur/rumah diri empu nadai meh aku tan makai pemakai bansa ribai ninting hari! Kitai ga endang Iban, tuai diri makai pemakai Iban tauka pemakai Malaysia, enggai nyadi nyawa mina dibai makai menua orang ti alai kitai diau! Ngumba kitai ku bala bakih dimenua!

Nya meh bekareh ngiga sida kantuk entekai, kantuk peria, petai, tubu, enchalu, kasam janik ... ukai madah pemakai orang ditu enda nyamai ... nyawa ti udah telaba makai pemakai asal kitai!

Ninjik endar ga ba menua California sida sayur ti dikerindu kitai mayuh bisi dijual ditu! Mina sida sayur babas baka sida rambai, sida miding ti nadai. Tang ba menua ti bisi ujan lebat baka di Washington state, di Oregon, di Florida endang bisi tumbuh sida rambai, sida miding. Nemu ga bala ribai makai mina chara sida manduk aja lain ari enggi kitai.

Orang ti enggau aku begulai ninjik ga enda milih, barang lauk di-idang endang diempa magang. Nya meh iya madah kasam janik (kasam gaga aku bulan satu nyin kemari) diguring enggau tubu apin lama tu tadi nyamai amat. Enti udah munyi nya ngaga kasam baru meh aku tu ila! Mina bala anak aja ti bisi milih laban ti enda entu ka makai dagin tauka sayur. Arapka udah sida besai agi ila, enda entu milih agi. Iya ke indu udah nemu makai sida sayur kai lan enggau bok choy. Iya ke laki nya agi milih.

Bah, nyu lapar diri asai nyawa bai nyerita pasal pemakai! Sup kasam janik gulai enggau entimun betu ... *meliur*

Tuesday, August 23, 2011

Avila & Port San Luis



Maya kami menyanak ti bisi nemuai ke Los Osos pun bulan tu tadi, kami bisi limpang ke Avila enggau Port San Luis. Tempat dua iti tu enda jauh ari Los Osos, mina kami ti lama nadai bejalai kin. Enti bala anak nemu dia bisi pantai, tentu saduai kiak kiak minta bai kin!



Pantai ba Avila enda entu besai iga enti dibanding enggau iya ke ba Pismo Beach. Maya kami ke Avila enggau Port San Luis hari pan udah lemai. Ka ngambar mata panas padam kenu, tang ni nya mata panas bisi dipeda! Lindung bukit!



Taja pia, rindu ga meda burung tasik, meda bot ke ba ai, enggau meda menua dia. Amat lama endar kami nadai kia. Selalu endar ga simpang nuju tempat tu dipansa ma nemuai ngagai sida entua aku, tang aku ti nadai bisi ati kin laban agi ingat menua nya mit!



Bisi orang mela ikan ba jeti tu peda aku. Alai mela ikan endang bisi disedia dia ni enda nyamai ma datai dia udah ke berikan. Engka sida tu raban orang ti baru pulai berikan. Berebut bala burung tasik nganti sida perut ikan, iku ikan dipalung orang ke tasik!



Ngena endar ga ba Port San Luis agi meruan restoran pemakai tasik dikumbai Fat Cat. Enda besai restoran nya tang kiraka rami ga orang makai dia lemai nya. Udah kami ti bejalai sebelah jeti enggau berati ke bot ti bisi dia, kami alu nganjung diri makai. Siti aja lah, pemakai tasik orang ditu enda baka pemakai tasik kitai di menua Malaysia din! Alah chara sida ribai manduk pemakai tasik ari kitai dimenua din! Engka nyawa udah tuai tu milih amat kini! mrgreen



Rindu endar ga aku meda bulan enggau kelemayang iya atas ai lebuhka pansut ari restoran! Ninjik ga bisi mai tripod! Puas ga ati taja enda tepeda ke mata panas padam lemai nya!



Udah kami pulai ari Port San Luis, kami alu ngetu ba Avila. Nyu sunyi pasar Avila laban jam udah lalu pukul 9.00 malam maya kami ke datai dia. Lemai nya hari bisi chelap mimit tang bala anak kiak kiak minta beli ais krim. Nadai irau ke hari chelap pan saduai ma udah ka makai ais krim!

Dudi ila ma kami bisi nemuai ke Los Osos, tau limpang ke Avila enggau Port San Luis baru!

Monday, August 22, 2011

Bunga Morning Glory



Aku enda nemu nama bunga morning glory dalam jaku Iban tauka dalam jaku Melayu. Taun tu taun ke tiga tauka taun ke empat aku udah nanam bunga morning glory tu. Taun nyin kemari, tulang malas amat, alu diteju layu sebelah pagar enggau bunga bukai alai iya bebelit. Nya meh ngemayuh leka tuai labuh ke tanah! Nyu dichabut sekeda ke tumbuh taun tu laban ti enggai meda kelalu mayuh. Datai ke diatu agi meh iya baru nyumbuk pansut ari tanah!!

Ma udah musim chelap mati magang pun morning glory. Iya ke layu nya ke enggai nyadi enda diberesi ari sida pagar enggau bunga bukai. Jai amat gamal ma udah layu.



Sapa bala kita nemu kumtum morning glory tu tau diempa? Aku baru diatu ke nemu! Nya pan semadi pangan siku ti berasal ari Kuching ti madah. "Panduk iya baka kitai ke manduk sayur," ku iya. "Panduk enggau belacan tau, enggau bawang putih enggau oyster sauce tau, gulai enggau utai bukai tau," ku iya. "Semadi enggi nuan nya mayuh uji panduk," ku iya madah ke aku!

Nya meh aku alu nguji. Tiga kali aku udah manduk kuntum morning glory tu! Amat nyamai bunga tu! Iya ke keterubah, guring aku enggau pusu enggau belachan. Bisi asai terung pipit manis sepi aku. Kedua kali digulai aku chabi gadung enggau sida belachan mega. Alu iya ketiga kali di gulai aku enggau kantuk entekai. Akai, nyamai amat, enda milih kati nuan manduk iya!

Enti kita bisi tetemuka kuntum morning glory, anang enda nguji! Leka tuai morning glory anang makai, tau mabuk laban iya! mrgreen

Au, naka tu aja cherita aku sekali tu!

Sunday, August 21, 2011

Cherita Ular

Sapa enda kala ninga pasal ular rattle snake? Bisa pantuk ular tu! Nya meh nyu geli diri aku lebuhka ninga entua indu aku madah iya bisi meda ular tu ngerayap lari ba mua barn kami di Los Osos din. Maya kami ke nemuai ke Los Osos bulan enam nyin kemari, dulu meh aku ngasuh Doug meresa sebelah babas mua barn. Nadai aku ka pansut ari kerita! Tang sekumbang kami ke din maya nya suba nadai meda rattle snake nya ga kami. "Engka salah ular peda indai aku", ku Doug.



Ujung minggu tu kemari bisi nemuai ke Los Osos baru kami. Agi aku ingat ke cherita ular entua aku! Pagi siti, Doug rauh rauh ngasuh Duncan ngambi pistol iya. "Bisi rattle snake ba mua kelebat belakang ditu", ku iya nyerauh. "Bai kamera nuan!" ngasuh aku turun ngambar iya!

Aieee, nyeregu diri bulu aku meda ular nya begulung ba mua kelebat ba panas! Kapa aku nganjung diri semak ngambar ular nya! Enda besai ular nya, tang ngenang ke ular nya ular bisa ..... eeeekk! "Gambar aku nimbak ular nya," ku Doug ga!



Enda tak alu mati ga ular ditimbak iya nya. Agi ngeliat, agi tau engkebut. Tang nadai jalai iya ulih mantuk. Tulang iya udah patah kena timbak. Udah iya mati amat, nyau meh Doug ngeliti kulit ular nya. Iya sigi landik ngeliti kulit ular laban sekali suba iya kala nimbak rattle snake ti bisi mantuk ukui iya. Nyeh .. nya meh pengujung ular nya tadi!

Bala pangan ba Facebook ngumba endar ga, ngasuh aku manduk dagin ular nya! Peeeiii, kapa aku! Guring, ku siku. Panduk kacang ma, ku siku ga. Panduk enggau lia enggau arak! Kapa aku!! Diberi kami ngagai pangan Doug dagin ular nya. Iya ka manduk ku pangan iya.



Malam nya bisi bejalai ngagai sida entua aku kami menyanak. Nama utai dibai pulai ari nyin? Container siti ti ngundan ular rattle snake!! eek Nya enggi menyadi Doug - ular ke diberi pangan iya, ular ti mati kena langgar. Ninga kami menyanak bisi ka nemuai ke Los Osos, beguai iya nganjung ular iya nya ngagai rumah indai iya. Menyadi Doug ngasuh iya ngeliti kulit ular nya ke iya! Akai, dua malam ular nya disimpan dalam peti ais. Dulu aku ngasuh Doug nyimpan container nya dalam beg plastik. Sapa kitai ka tekenyit meda ular tiap kali kitai ngebak peti ais?!

Nyau limpang dulu ga Doug ngeliti ke kulit ular tu sebedau kami ninggal ke Los Osos hari satu tu kemari. Aku ti enda nyangka Denice nya enda takut! Dia meh iya ngemata daddy ngeliti ke kulit ular. Udah ular nya dikeliti dulu iya nyengkau megai kulit nya! Eeechak!

Udah nya alu di pin Doug ba papan siti kulit nya, ngambika ulih rangkai alu di tinggal di Los Osos din. Tinggi alai iya manggai papan nya enggaika dikereja sida chit ti mayuh amat ba barn nya maya kami nadai dia. Enggi iya dibai iya pulai, tang siti ga ulah Doug nya. Tak dipanggai iya atas beg enggau perengka kami ba belakang kerita. Nyerauh tekenyit aku lebuh ngebak pintu but kerita meda kulit ular! eek

Au, naka tu aja cherita ular aku sekali tu! Arapka kita teperindang! mrgreen



Saturday, August 20, 2011

Camping 2011



Maya musim panas taun tu, kami menyanak bisi niri ke kemah ba belakang rumah ... camping kenu! Ku kawan aku siku, nya camping "city slickers style" - stail orang ba nengri, ku iya!

Kati ku enda munyi nya? Dia kitai ka nganjung diri ke jamban, pulai ga kitai tama ke rumah. Karan bisi ga disambung ke dalam kemah nya. Bisi lah alai bala anak meda tv! Api elektrik bisi ga dalam kemah nya. Siang hari pulai ga ke rumah laban angat enti diau ba kemah nya!

Doug mina 2 malam aja enggau kami tinduk dia, laban ti ka ngiga alai nyamai agi alai tinduk maya hari ti gawa. Malam keterubah irau mimit aku ninga angin, enggaika tekebu kemah! Doug madah diri bemimpi kami ngetan ke kemah laban angin kelalu bangat! Nyu bemimpi iya ke ninga angin! Akai, enda jenak aku tinduk dalam kemah malam nya! Malam siti baru aku jenak laban ti udah lelak bekau ti enda entu tinduk malam ke dulu!

Aku mina sanggup tinduk empat malam aja dalam kemah nya. Enda tan agi belakang aku bai tinduk atas tilam berisi ke angin! Iya ga tilam nya enda rata ... enda aku nemu madah ke gamal tilam nya!

Bala anak ka meh tinduk kediri dalam kemah nya tang aku ke enda berani ngasuh saduai bemalam kediri ba luar! Ni alah ditaban orang saduai, ku aku!

Seminggu kemah nya diteju ba belakang rumah. Diatu udah meh iya disimpan. Agi bisi hari bekemah enti agi ka laban hari ba California lubah chelap ari tempat bukai. Bala nembiak berengkah sekula kena 6 hb sembilan tu ila. Meda baka ila!
Related Posts Plugin for WordPress, Blogger...