Sekeda Cherita Sekumbang di Menua

Amat enda berasai endar, genap sebulan kami tiga menyanak udah di Miri. Bala anak pan udah mupuk madah diri enda betah ke daddy saduai.

Taun tu bala anak bisi peluang belajar nyemerai. Ipar aku bisi introduce siku orang ti endang ngajar orang belajar nyemerai ba kolam di Miri din enggau ba kolam KRP di Lutong.



Tu meh gamal bala anak belajar ba hari keterubah saduai belajar nyemerai. Pengelama belajar tu semina lapan kali aja. Nya meh enti nunda penyampau kali udah belajar, kiraka tembu meh pelajar saduai, tang Denice agi enda entu nemu nyemerai. Nya aku ngasuh instructor nya nambah pelajar saduai. Hari satu tu lagi nyambung pelajar meh saduai.



Laban kami ti ukai member ba KRP, ipar aku ngulu kami kia enti bala anak belajar nyemerai ba kolam KRP. Sekali, udah bekau saduai badu belajar, anak orang putih siku bisi mai canoe kena bemain dalam kolam. Apa agi Duncan, alu iya dulu ka tama dalam canoe orang! Ninjik ga nembiak nya sigi ka bemain enggau sida tiga (nyengkaum cousin saduai). Rindang diri sida empat bemain ba kolam nembiak mit!



Maya apai enggau indai (iya mina ngibun apai aku) enda "betuchi" ba dialysis center di Miri din, kami empat makai breakfast ba kedai kupi belama. Ba kedai kupi di Lutong dia meh alai kami makai. Udah makai breakfast, bala anak bemain ba park ngimbai sungai Miri belakang pasar Lutong, semadi ke nganti indai aku meli sayur ba market.



Nyau ka ninting hari bala anak minta anjung ngagai rumah petunggal saduai. Enti nadai pengawa bukai endang dia selalu meh kami tiga menyanak semadi ke nganti jam ngambi apai enggau indai aku pulai ari dialysis center. Kekadang pansut makai tengah hari ga bala kami, tang selalu ke agi, makai ba rumah ipar aku. Tu gambar bala anak ba Permy Mall udah ke makai ba Sugar Bun.



Bejaku pasal mall, nyau tekenyit diri aku meda pemayuh kedai enggau mall digaga ba menua Lutong tu! Maya aku ke bisi pulai dalam taun 2010, bedau Permy mall ba Pujut 7 nya digaga, nya kebuah aku tegenung lebuh aku ditanya indu Cina siku enti jalai ari E Mart ba Tudan din terus ke Permy Mall. Permy Mall? Baru iya ninga nama nya!

Berunding ga aku, sapa orang ti suping ba Mall di Lutong tu ila? Ngemayuh nya mall, tang tubuh mensia nadai ga tak menambah lebih! Tang enti mall ba Lutong nya ngemanah mall ba Bintang Plaza tauka ba Imperial Mall, amat tau enda ibuh berebut enggau orang ba pasar Miri din ga aku! Nah, endang enda jauh ari rumah apai aku ga mall ba Lutong nya! Gambar simpang Lutong tu diambi ari sadau rumah apai aku!

Au, naka tu aja cherita aku sekali tu! Ila nyambung baru! Agi mayuh cherita ti deka dikunsi ditu!

Ngirup Teh

Nitihka utai dibacha aku, ngirup teh oolong tau ngasuh tekanan darah tinggi turun. Lama udah aku nemu pasal pemanah teh oolong, nya meh kebuah aku mupuk ngirup teh oolong suba. Mina siti aja penyalah - perut aku enda tan dibai ngirup teh! Enda milih bansa teh, ka iya oolong tauka Lipton tauka teh pait. Enti naka ngirup teh Cina lebuhka makai ba restoran Cina enda ga ngawa iga. Ninting hari ti enda ulih dibai.

Teh enggau kupi sigi pemakai ti ngundan asid (acidic). Enti pasal pemakai ti tinggi asid perut aku sigi enda tan. Bepedi perut gasak pemakai tu! Kupi, mina sechangkir sahari ti ulih diirup. Asid dalam teh bisa agi ba perut aku. Nya meh, tegal ti begaga sida karipap, sida scone, sida muffin, sida jam tart, sida sardine puff kena ngansing sida tea set, ngaga teh aku  ngambika bisi digambar lalu bisi dipeda lawa agi utai digambar! Amat lawa ga gambar aku tu neh laban ti bisi enggau teh dalam changkir!

Perut oh perut, amat enda tan agi udah dibai ngirup teh ngenyuah nya!

Scones

Sekali kutai aku udah ngaga scone tang ngena chara ke muntang - ngena tepung scone ke dalam kutak. Sekali tu aku nunda recipe ari internet.  Naka pemuntang ngaga scone!  Mata enda ngaga ngelama tu!

Ngelama tu ma tenguk, meli, laban ti ngumbai diri enda nemu ngaga. Iya ga resipi ke dipeda aku ngelama tu ngena perengka ti nadai dikembuan aku ba rumah.  Resipi iya ke ditunda aku sahari tu, pemadu muntang!  Mina buah ke digulai aku kelalu mimit.  Duncan nyau nanya nama kebuah buah nya enda mayuh?  Saduai Denice selalu milih ma kek tauka roti paun ti digaga aku bisi dichampur mayuh utai.  Nya kebuah sengaja enda nyampur buah mayuh sekali tu.  Engka tak nyamai meh buah kismis enggau cranberry ke dichampur ba scone nya sekali tu sepi iya!

Kuan teh ba gambar tu utai diberi mentua aku.  Tiga set pinggai mangkuk enggau sida changkir teh ke udah diberi iya ngagai aku nadai nyengkaum kuan teh.  Nanya belama aku, engka nya iya meli ke aku siti!  Bansa ke manah diberi iya nya (Royal Albert), sida pirin enggau changkir meli kediri empu nuan, ku iya madah ke aku.  Taun nyin kemari iya ke meri kuan teh nya, lalu baru diatu aku ke meli pirin enggau changkir!  Meli ke set 5 iti aja, ngambika bisi kena ngambar sida bingka tauka kek tauka scone.

Ukai enggai aku meli kuan ti sama bansa set ke diberi iya tang nya meh laban nya pattern lama, pedis digiga.  Bisi aku ngiga tang nadai meda alai ti bisi nyual.  Sayau amat.

Bah, nama utai diempa kita kena ngirup lemai sahari tu? Scone mega?

Lagu Burung

Meda hari enda entu chelap iga pagi tadi, nyau aku nepas debu ari kerusi malas aku alu nganchau cushion. Ahhhh, rindu amat duduk ba luar, ninga burung belagu sambil be-internet ngena tablet duduk ba patio! Ngelama tu hari agi chelap maya pagi hari, nadai aku ka duduk ba luar ngenat chelap!

Lemai tu tadi, lebuhka mai Sandie (ukui aku) bejalai sebelah tanah, aku bisi meda burung Western Bluebird enggau burung Wren. Aku nadai kala ninga burung Bluebird belagu, tang burung Wren nyu chapuh diri iya belagu ba atas tugung dan kayu. Udahka nganjung ukui, ngambi kamera aku ngiga burung ke dipeda aku tadi. Nya ke bisi gambar dikunsi ditu. Aku bisi ninga sereta meda burung Mockingbird mega, tang lebuhka meda aku mansang, nyau ga iya terbai lari.

Aku sigi rindu ngambar burung mina musim chelap tu tadi hari selalu ujan, nya kebuah aku lembau amat pansut ngintai sida burung. Meda baka hari tu ila .. engka tau bai pansut telescope kena ngambar burung. Enda burung takut meda aku ari jauh!

Naka tu aja cherita semadi nadai aku sekali tu!

Cherita Masak

Lama udah aku nadai bekunsi cherita pasal masak masak neh! Tu meh sekeda utai ti bisi dipanduk aku apin lama tu tadi.  Lebuhka meda gambar utai ke udah dipanduk bala pangan, tauka meda resipi ba internet nemu tenguk ga nyawa!  Ka pan enda manduk ke diri empu laban nadai endur semak ti tau alai makai pama nyawa udah tenguk!

Aku sigi rindu makai pemakai orang menua India.  Bisi indai tuai tambi ti diau ba menua California ditu bisi website alai iya bekunsi video enggau resipi pemakai India.  Rindu diri ga aku meda video iya lalu bisi ga nguji sekeda resipi iya.  Gambar lauk enggau roti chapati nya lauk buah terung.  Nyamai amat dipanduk chara nya sepi aku!

Aku kiraka kurang makai sida dagin manuk tauka chapi tauka janik diatu - takutka kolesterol tinggi kenu.  Aku endang diasuh lutur makai ubat kolesterol tang sengaja (nemu ke diri!) ngetu laban asaika bisi nganu tubuh ubat nya.  Nya meh aku bekareh nagang diri makai sida dagin! Gambar kway tiaw sup enggau char siew nya kena lawa aja.  Udah mangkuk kway tiaw nya digambar, char siew nya alu diengkah ba mangkuk Doug!  Tu meh siti kebuah aku rindu makai pemakai India - tebal agi masakan vegetarian pemakai orang India.

Sekumbang aku kurang agi makai lauk ti ngundan dagin, belemak, beguring, bisi endar turun berat tubuh.  Rindu amat meda berat tubuh turun!   Amat irau endar ati aku kutai meda berat tubuh majak niki!  Sigi amat ka niki ga berat tubuh pama udah manggai umur baka enggi aku tu!!   Enti enda tegal irau ke kolesterol tinggi sigi betukar saiz meh sida pakaian!!  Ngiga saiz iya ke besai agi!

Char kueh kak, bingka ubi enggau bacon and cheese muffin masakan bukai ba gambar aku tu.  Aku bisi ngaga roti paun kutai.  Amat lama udah aku enda ngaga - tegal penyakit sebengkah ga nya, tang meda bisi endar udah insur penyakit nya, belabuh baru aku ngaga roti paun.  Makai sigi tau tang nya meh anang enda nemu nagang diri.  Agi ka idup, wai!  

Ok, nya aja cherita aku sekali tu!

Ngaga Ruffled Scarf

Tu meh pengawa ti ngasuh aku rindang diri diatu!  Ruffled scarf!  Ditu aku mina mandang 4 iti scarf ke udah digaga aku.  Kada enda bisi 10 iti ke udah tembu dia!

Maya ke baru berengkah kutai, datai ke dua iti tembu dalam sahari!  Ukai madah diri landik ngaga scarf, tang  laban pattern scarf tu muntang amat, nya ti ulih tembu 2 iti dalam sahari.  Ubung tu baka gamal ribin,  alu aku mina ngait ubung nya ngasuh iya beringkat ringkat.  Amat nadai mayuh macham chara ngaga scarf tu!

Nadai meh aku ngena scarf ngemayuh nya!  Sigi ka diberi ngagai pangan meh sekeda scarf nya.  Tiga iku udah minta meda pemanah gamal scarf nya!

Lebuhka duduk meda TV, ngait ga aku maya iklan pansut.  Amat buring endar ga nganti iklan tembu, manah ngait neh! 

Bunga Tulip

Gaga amat aku meda bunga tulip ke ditanam aku idup alu bebunga! Bulan sebelas taun nyin tadi aku ke meli sepaket bulb tulip ari Walmart. Tang nya meh laban kebun bunga bedau dikemas ..bunga gladiola layu, morning glory layu, kebun repa laban bunga African Daisy, rumput ... alu enda enda ditanam. Iya ke bendar bulb tulip patut ti tanam tengan musim chelap, laban bulb nya enggai entu tumbuh manah enti hari enda chelap iga.

Taja bunga tulip ke ditanam aku tumbuh, pelaba aku, mansang sereta sihat agi gamal iya enti iya ditanam ari bulan dua belas kemari. Kiraka tau dikenyadi meh tulip aku nya laban ti baru iya nanam! Enggi orang semak kami ditu galak endar gamal, lalu bunga iya besai ari enggi aku!

Kiraka mereti agi meh aku pasal nanam bunga tulip tu ila laban ti udah meda gamal iya ke ditanam aku sekali tu.  Ila tumu agi aku meli bulb tulip ke manah, alu anang enda ngemas kebun tumu ngambika bisi alai nanam iya ke baru dalam bulan dua belas!  Amat rindu endar ga meda bunga tulip!

Ujung Minggu Musim Easter

Ujung minggu tu kemari kami menyanak bisi nemuai ke Los Osos. Bala anak berengkah kemisi seminggu musim Easter ga ujung minggu nya. Kami menyanak sigi rindu nemuai kin taja burit asaika kempis bai duduk 5 jam setengah nepan kerita.

Gaga amat bala anak diberi ini saduai sebakul siku sida ruti enggau cokelat.  Saduai ke gap endar gamal ba gambar atas laban ti ka nurun sembiang.  Aki ini saduai datai ngambi saduai laban kami duai Doug enggai enggau.  Ka relek aja hari minggu nya, tang maya tengah hari betemu ba restoran ga kami.

 

Tu neh gamal utai ke diorder aku ba restoran Vietnamese tengah hari nya.  Salad buah rungan puda enggau undang.  Nyamai ga asaika salad nya.  Tang enda bulih 2 jam udah nya engkeriuk baru perut aku!  Enda berapa endar ga nya!  Enda lama perut aku nginjin sida salad buah rungan puda!!


 

Tu siti kebuah aku gagit amat ka nemuai ke Los Osos ujung minggu tu kemari!  Ngambar sida bunga babas ba bukit di Los Osos din.  Akai, tak geram diri aku meda pemanah bunga babas!  Endang dianti aku ninting taun sida bunga babas ti tumbuh maya musim bunga ba menua kami ditu.


 

Sapa kitai enda rindu meda pemanah gamal bunga baka tu?  Bunga tu mina pansut maya pun musim bunga. Udah nya nadai meda sida agi.  Nya meh enda tau dibuai peluang nemuai ke Los Osos maya musim bunga!

Au, naka tu aja cherita aku sekali tu.  Minta ampun laban buruk endar tulang update blog!

Olympus Trip 35

Tiga kali aku meli kamera Olympus Trip 35 (kamera taun tujuh puluhan), baru bulih iya ke menyana.  Siti dianjung aku pulai ngagai orang ke nyual nya ngagai aku.  Kati enda nganjung nya pulai, bisi siti utai ti alai filem begulung dalam kamera, tak nadai dia. Dini kamera nya ulih dikena?  Duit aku dipulai orang ke nyual, tang ungkus aku ngepos kamera nya pulai ngagai iya ditanggung aku.

Iya kedua, lens barrel kamera tak gerah diri.  Maya aku ngachit kamera, shutter blades ba kamera tak enda mindah! Sapa kitai ulih ngena kamera nya!  Tang orang ke nyual nya nadai  mayuh macham.  Dipulai iya duit aku, mina ungkus iya ngepos kamera nya aja diambi iya alu kamera ti jai nya di simpan aku.  Nadai guna ga nganjung pulai, ukai nya tau dikena!  Ka ngerepair, ukai nya nemu aku ngerepair!


 

Manah amat gambar diambi kamera Olympus Trip 35.  Laban ti baru belajar chara ngena iya bisi meh sekeda gambar enda entu terang.  Rindu diri aku ngena kamera tu.  Flash ari kamera Minolta Hi-matic F tau dikena ba kamera tu .. nya ti ngasuh aku balat agi rindu!

Taja tu kamera digaga dalam taun tujuh puluhan, agi tau endar dikena.  Ku siku juru-gambar benama Ken Rockwell, enti bisi electromagnetic pulse (EMP) attack, kamera dslr kemaya hari tu sigi rusak magang, tang kamera Olympus Trip 35 tu agi tau dikena!  Nah, nya ti ngasuh aku gagit amat ngiga kamera tu kutai!

Sandie

Naka pengaga Duncan saduai Denice mai Sandie pulai ari rumah orang ke empu iya! Indai tuai orang ke empu Sandie enda ulih ngintu iya agi, nya kebuah diberi ngagai barangsapa ti ka ngambi iya.

Hari minggu nyin kemari kami tepeda ke notis ba bulletin board gereja pasal orang ti ngiga barangsapa ti ka ngiru ukui ari iya. Tekala nya Doug telipun orang ke empu ukui nanya enti ukui nya apin diambi orang. Lemai nya alu mupuk sida tiga menyanak ngabas ukui alu madah ka mai ukui nya pulai. Tang indai tuai orang ke empu nya madah Sandie ka dibai iya betuchuk dulu udah nya baru kami tau ngambi iya.

Tengah hari tadi meh Sandie nya diambi alu dibai pulai. Bendar amat Duncan ngenan ukui - ukai iya ngiring ukui, nyau ukui ti ngirit iya!! Amat besai sereta kering endar ga ukui nya!

Kasih tudah mayau aku, nyu merengung sereta nyeregu bulu iya meda ukui ba mua pintu!  Ku orang ke empu Sandie, sigi pama Sandie nya, ka endar begagai ke mayau!  Apu, enti udah munyi nya enda tau dilepas ari kandang ngelingi belakang rumah kami meh Sandie nya.  Ni alah mayau aku enda ulih pansut.

Au, Denice gaga mai Sandie pulai tang iya agi takut ke ukui.  Enda milih jelu endang takut ke semua jelu.  Mayau kami nya semadi udah puas begulai enggau iya baru iya enda takut.  Enti nya mayau orang bukai anang ngumbai iya ka semak enggau mayau orang!

Kasih amat tudah Sandie. Iya teleba dibai ke dalam rumah.  Nadai kami tu ka mai ukui nya begulai enggau kami dalam rumah!  Nyu nyalak ba mua pintu tadi laban ti ka tama.  Kasih tedah.  Arapka enda nyalak meh malam lagi laban ti enggai ba luar.

Rusa

Bulan nyin kemari kami menyanak bisi nemuai ngagai menua sida entua aku. Tiap kali kami kin kami menyanak endang bemalam ba langkau kami empu ba Los Osos. Alai langkau kami nya endang ba countryside - tentu bisi jelu babas enti nya ba countryside neh! 

Peda gamal rusa ba tisi pagar kuda nyin!! Nadai kitai Iban tau meda rusa baka nya alu enda mikir lauk dagin rusa! Amat geram endar ati meda pemayuh rusa baka segau ba menua nya! Nya meh lebuh malam hari maya kami pulai beganjuh enda tau enda bejaga mai kerita. Enggaika ngelanggar rusa ti benung engkejuk meraka jalai! Tau bebadi kitai enti belanggar enggau rusa!

Bisi meh ati nimbak rusa, tang nya meh enda tau sebarang ga nimbak.  Enggai enda ngambi lisin dulu ga baru tau nimbak.  Nama nimbak lagi, enda ga tau nimbak rusa indu laban sida bisi beranak mit.  Tambah mega enti nimbak siku rusa, nadai jalai aku tu dianjung mela rusa!   Iisshh, nadai aku tu nemu mela jelu babas!!



Peda baka nya aja meh sida rusa.  Baka mayau aku ti ngemata ke kuda dalam kandang sida!  Au, mayau aku nya endang dibai belama lebuhka nemuai ke Los Osos.  Nyau teleba iya dibai nepan kerita.  Mina udah datai din lagi enda tau pansut, enggaika enda nemu pulai!   Kasih tedah dikurung dalam langkau.

Bah, naka tu aja cherita semadi nadai aku sekali tu!

Rindang Laban Kamera Lama

Amat rindang endar aku bemain enggau kamera lama! Sekeda kamera tu di beri entua aku, sekeda dibeli aku ari ebay. Berapa iti kamera filem dikembuan aku diatu? Anang nanya laban nadai udah ditiap! Enggai niap laban enggai ngira penyampau duit udah dikena meli ayam tu!

Nadai rega kamera lama ke udah dibeli aku nya mar iga tang nya meh mimit ditu mimit din, tau endar penyampau semua iya udah nya!!



Tu meh gamal aku bemain enggau kamera lama!  Keterubah iya ngambar rumah lama nyin, meda tampak endar rumah nya ba chermin kedai dia aku alu ngambar diri empu!

Ni enggi kita?  Agi bisi disimpan kamera filem kita?

Hari Valentine 2012

Selamat Hari Valentine!

Tumu kami tiga menyanak nurun sekula pagi tu laban ti ka limpang ngagai supermarket dulu. Meli chocolate ke diberi ngagai cikgu! Kemari maya Doug ngetu ba Costco nadai ingat ngasuh iya meli Valentine chocolate. Mina ngasuh meli sida ruti paun enggau sida ikan.

Doug sigi enggai enggau orang berebut meli bunga maya Hari Valentine. Hari lima kemari iya udah meli bunga rose ke aku! Pansut makai ba restoran kena ngintu Hari Valentine? Kapa iya enggau orang berebut, tengah hari hari lima nyin kemari ga iya mai aku makai sushi!

Lemai kemari kelimpah ari mai sida ruti paun enggau ikan, mai kek Valentine orang.  Gaga amat bala anak makai kek.  Aku laban ti enda tau makai utai manis, anang enda aja enggau nyepi kek.  Bala anak tumu udah nerima kad enggau cheque ari aki ini saduai.  Naka pengaga orang nerima cheque! Ukai anchi anchi penyampau ba cheque diterima ari aki enggau ini saduai!

Bah, nama cherita kita ti bisi enggau ngintu Hari Valentine?   Ketawa diri ga aku ninga sida ulamak di Malaysia madah haram bala Muslim ngerami ke Hari Valentine!  Au, anang ga ngereja utai  haram enti agama udah ngajar nya haram neh!  :-)

Bunga

Mmmmmmmm. Amat enda berapa amat neh, nadai udah di update blog tu sekumbang pun bulan satu kutai!  Minta ampun laban tulang buruk!



Pun kayu sebelah parking lot pasar ba menua kami ditu udah mupuk bebunga. Tekenyit diri aku meda laban pun buah apai tuai orang seberai kami mina sepun aja udah bebunga. Aku sigi rindu amat ngambar pun kayu ti bebunga, nya meh nyau ngetu limpang ngambar bunga!

Pun kayu ba gambar atas nya ba belakang rumah orang - di pansa lebuh ke nurun sembiang kemari.  Isa ngetu maya pulai sembiang ngambar bunga pun kayu tu!  Bala anak asuh pansut ari kerita ngambika bisi posing ke aku!   Ninjik ga orang ke empu pun kayu nya enda meda ulah kami menyanak laban lindung pagar batu ke tinggi!



Amat enda teranti endar asai aku ke pun buah apai tuai orang seberai kami bebunga! Nyu bejelangkit pagar iya aku ila tama ngagai kebun laban ti ka ngambar close up!  Apai tuai orang nya sigi enda ibuh ke aku tama ngagai kebun iya mina aku ngintai maya iya nadai bejalai sebelah kebun iya laban ti enggai ngerandau iya!  :-)

Kiraka mupuk angat meh hari kami diatu lalu siang pan mupuk panjai agi.  Nitihka kalendar sigi agi musim chelap ba menua kami tu.  Ba menua bebukit din bisi salji laban dua hari tu bisi ujan enggau hari ba bukit din agi chelap.

Bah, naka tu aja cherita sekali tu.  Ila nguji update suah agi.  Ukai nadai utai dikerandau tang nya meh alah laban tulang ke buruk!

Selamat Taun Baru 2012

Bala temuai  nyambut Hari Krismas enggau kami sebilik & dibai raun meda Sacramento

Aku nadai enggau orang begau ngangkat gelas ai pengayu malam 31hb Disember tu kemari.  Tumu nganjung diri tinduk laban ti rungguk .  Nyawa semadi ulih dibai bejaku.  Aku ka nelipun indai aku di Miri meri jaku Selamat Taun Baru deh enda ulih.  Amat ngumba endar ga tubuh enggai enda rungguk maya ujung taun!

Raun ke Jackson enggau Placerville

Siang hari 31hb Disember, kami menyanak bisi mai temuai kami ari Vietnam meda menua Placerville.  Udah ke puas musin pasar Placerville kami bisi ngetu makai malam ba Oz Korean Barbecue di Sacramento.  Nyawa aku endang ari pagi udah raguk, tang isi aku bedau asai nyilu.  Bisi endar nyawa dianjung makai Korean Barbecue, ah. :-) Bendar ngulam kimchi!

San Francisco

Hari siti udah Hari Krismas, bala temuai dibai kami raun meda menua San Francisco.  Tebal amat kabus sahari nya.  Golden Gate Bridge lindung laban kabus.  Asa ati  bala ti ka ngambar Golden Gate.

Rajin amat saduai melaki bini besaup nulung aku berapi! Posing dulu sebedau mupuk.

Sahari tu udah mupuk bala temuai - sembilan malam sida begulai enggau kami.  Gaga amat bala anak bisi kawan baru enggau bemain.  Enggai pulai pulai anak kawan aku ke biak.  Iya enggai pulai ke Vietnam ku iya, agi ka diau enggau kami bemain Wii.  Sinu amat Duncan saduai Denice meda bala kawan baru udah mupuk pulai.  Arapka dudi hari ulih betemu baru di Vietnam tauka di Malaysia tauka ba US ditu.

Naka tu aja cherita aku kena 1hb Januari dalam taun baru 2012.  Arapka kita semua lantang, gerai enggau diberkat Allah Taala belimpah limpah dalam taun baru tu.  Selamat Taun Baru 2012!