Ai Pengayu

Taja kami sebilik enda ulih pulai ka menoa ngintu gawai taun tu, kami duai Doug sempat ngetoast pangan diri ngena ai pengayu. :-)

Ai pengayu tu digaga pangan aku dalam taun 2003 kutai maya iya ti ngintu aku beranak. Pangan aku tu indu china tang iya landik endar ngaga tuak. Tuak tu bisi dichampur iya beras mirah mimit nya gamal iya nyau baka brandy. Ngelama tu tuak nya dikena aku mandok manok. Pama ga pemisa iya! Heheh

Ngirup tuak enggau belauk ka tulang babi! Sayau babi nya ukai babi pansuh! Enda ka nyamai agi enti nya babi pansuh!

Sekali agi, selamat hari gawai ngagai bala kita ti macha blog tu.

Main Ai

Selamat Gawai Dayak

Selamat Gawai Dayak ngagai samoa bala dayak ti ngintu hari besai tu. Kami menyanak taun tu enda ulih enggau bala kaban ngintu gawai laban ti enda pulai ka menoa.

Bala kita ma makai serta ngirup maya tu ila, anang enda nyangkung kami neh! :-)

Tu sekeda gambar di ambi aku maya Doug keterubah iya di bai pulai ka rumah panjai ngintu gawai dalam taun 2000. Rumah panjai apai indai aku ba Nanga Drau, Krian, Saratok.

Bala anak mit enggau pekit kumang. Gambar kiba, Melanie, anak menyadi aku. Gambar ba kanan, anak mit ba kanan, Valerie, akak Melanie.

Bala indu dara ngepan bejalai ba ruai.

Doug enggau orang miring ba tiang pengingat.

Doug enggau orang pekit nyumbit. Bala ketawa meda chara iya megai sumpit, baka ti megai senapang. Sebedau tu iya enda kala megai sumpit. Enti pasal nimbak ngena senapang iya sigi landik, tang nyumpit ... heheh. Siti pen nadai kena target! Haha.

Sekali agi, Selamat Hari Gawai, gayu guru, lantang senang, nguan menoa.

Tiga Taun

Hari minggu tu tadi, Denice ngintu hari pengada iya ka tiga. Pagi nya kami menyanak bisi nurun sembiang, udah tembu sembiang kami ngetu ba supermarket meli birthday cake. :-) Ko jako ka ngaga kek ka iya tang meda hari nyau udah laun, enggai kiroh agi, beli aja.

Kasih tudah saduai hari pengada nadai dirami ngena party. Mina kami sebilik aja. Bala orang diau semak kami nadai beranak mit.

Berendam

Minggu nyin kemari kami bisi ngasoh orang nambah tapak semin ba depan rumah kami. Pengawa tu bedau entu tembu tang senentang ti udah tembu, bala anak udah tau bemain dia.

Hari kami ditu majak panas lalu pengawa orang menoa ditu ma hari panas orang ditu beremdam ba ai tauka bemain sebelah ai. Kami bisi meli pool alai anak beremdam ngenat hari panas. Umbas iya ga pemesai pool nya laban kami besai tuai tu pen ulih tama kia! :-) Mina ai ti ditimbun ba pool nya agi chelap ... ni enda chelap datai ari baroh tanah din. Tudah Duncan bekarauh nyabak alu enggai tama kedalam ai chelap. Puas ngumbok baru iya tama, nya pen enda lama, begetar pansut ari ai! :-) Denice nadai mayoh macham beguai tama ka dalam pool.

Tapak semin benong ti tampong.

Tiga hari udah semin di adu, bala anak ulih bemain dia.

Cherita Makai

Kena ngeramai Hari Indai tu tadi kami menyanak keterubah iya nganjong diri ngagai restoran cina ti dikerindu aku tang mina ngasa ka ati aja ... nadai alai agi! Penuh endar bala orang makai dia. Laban ka bisi wedding reception .... nadai entu endor agi ka bala bukai. Enggai nganti dia, nya kami alu nganjong diri ka restoran Mexican.

Aku madah ngagai Doug aku mina ka makai steak enti enda jadi makai ba restoran cina! Heheh.

Bandera steak nama steak di order aku. Nyamai! :-)

Margarita swirl ai di order aku. :-)

Tacos ikan, pilihan Doug. Bala anak mina mutik utai dempa kami.

Kad Ari Anak

Bala anak pulai ari pre-school mai kad Mother's Day. :-) Cute endar ga utai di gaga sida - ditulong bala sida pengajar.

Selamat Hari Indai

Selamat Hari Indai

Mak,

Arap ka sahari tu nuan diberkat enggau

Segala utai ti badas

Baka ka patut nuan diberkat.

Mak,

Nuan semampai dikenang

serta

Semampai dikesayau.

Video Clips Radja

Kutai aku bisi macha post Poison pasal iya ti rindu ninga kumpulan ari Indonesia dikumbai Radja. Ingin ati aku ka ninga lagu ari kumpulan tu laban aku sigi rindu ninga kumpulan Peter Pan. Mag bisi meh nyebut diri iya rindu ninga lagu ari kumpulan Radja.

Kepuas aku bepeda ka video ba You Tube bisi aku tetemu ka sekeda video clip ari kumpulan Radja. Tu iya tiga iti video clip ari kumpulan Radja. Manah ga lagu Radja dinga aku tang nyawa penyanyi utama Peter Pan manah agi dinga aku.

Sayau ba US ditu nadai bisi MTV Asia. Enti bisi nemu meh aku sapa orang tauka kumpulan tengah hangat ba Malaysia/Indonesia/Singapore din.

Macham macham utai ulih ditemu ba internet diatu! Heheh.


Radja: Benci Bilang Cinta



Radja: Jujur



Radja: Tulus

Karaoke Vietnam

Encha tu meh gamal orang Vietnam bekaraoke! Hahaha, actually tu orang mabuk ngaga diri bekaraoke. Dinga nuan munyi leka jako sida? Enti nya ngena microphone, kati enda sendat rekong/seput ninga utai munyi nya maya kitai makai?!



Tang enti nyawa munyi penyanyi tu, sigi rindu ga kitai ninga! Heheh.

Makai Malam

Demalam kami menyanak bisi ngetu makai ba restoran Vietnam udah kami pulai shopping. Asa asa ati aku laban restoran tu diatu diempu orang baru.

Ukai mina nya, menu iya nadai mayoh macham tambah mega bisi karaoke dia. Sendat seput aku ninga orang belagu jako Vietnam ngena nyawa ti nadai endar di anjong! Enti sida ti udah dudok dia dulu ari kami belagu maya aku baru tama kia, engka nikal aku enda nyadi makai dia. Tang laban ti udah dudok, udah ngorder enggai nyadi aku ninggal restoran nya ... enggai ngaga hal.

Nasit endar utai diorder aku umbas iya ga asai iya. Enti enda, lebu endar asai ngetu makai dia. Enda kala aku makai ba restoran bisi karaoke ... selalu iya enti ba restoran-bar endang bisi ga sekeda bisi karaoke tang selalu iya karaoke start udah pukul sembilan malam enda maya orang benong makai. Teringat endar aku ka maya aku gawa ba Vietnam kelia. Endang asai aku agi ba Vietnam din leboh aku ninga orang ti bekaraoke jako Vietnam! :-)

Sigi enda aku nganjong diri pulai makai ba restoran nya ila! Naka iya meh nya!

Gas

Ba endor kami diau nadai bisi gas tauka ai. Mina bisi karan, enggau talipon. Tu meh gaya kami meli gas. Truck gas datai ngisi gas ba tangki gas kami.

Tangki ti bediri, nya tangki ai. Ai kami datai ari telaga. Telaga?! Heheh, au telaga, tang ukai baka telaga di temu kitai ba menoa Sarawak din. Telaga kami nya 260 kaki penalam iya. Ai di pump ngena pump kedalam tangki, so enti nadai karan, ai ba tangki tau abis!

Ko kawan aku ari Sarawak ti datai apin lama tu tadi, "Nama kita enda nyimpan ai ujan dalam tangki?" Ditu mina musim chelap aja bisi ujan, sepemanjai taun nadai entu ujan, enti bisi pen enda bangat.

Enda baka diau ba ulu din pendiau kami ditu? Heheh. Tu meh gaya iya diau ba "country side".

Sonora

Hari enam nyin kemari kami menyanak bisi ka Sonora. Kebuah kami kin laban Doug bisi meli tiang layar ( ka kapal layar) ari orang ti diau ba Sonora. Penyauh Sonora ari rumah kami bisi 70 batu.

Bala anak gagit ka mindah!

Bemain ayun ba rumah orang ti di gagai kami.

Tu gamal rumah orang ti alai kami meli tiang layar nya. Rumah nya apin tembu di gaga tang manah amat peda aku. Rindu endar meda stail rumah orang nya, nyau ka baka log cabin stail iya. Tambah mega pun kayu besai besai ngimbai rumah orang nya. Ko orang ti empu rumah nya endang selalu bisi rusa datai kia, datai ka utai tanam iya enda tan laban sida daun iya dempa rusa! :-) Enti kitai Iban meda rusa, isshh, lama udah di timbak ka empa! Hahaha.

Tulips ba kebun bungai orang nya.

Tu gamal tiang layar atas truck.