Thursday, April 30, 2009

Belajar Bahasa Arab

Sapa bala kita nemu bejaku Bahasa Arab? Ibankiih, nuan nemu? Meda nuan ka udah gawa ba menoa Lebanon, nya kebuah nanya.

Pagi tadi aku bisi ngorder CD kena belajar Bahasa Arab. Huh? Bahasa Arab? Nama kebuah enda ka belajar jaku Mandarin, tauka jaku Peranchis, tauka jaku Jipun? mrgreen Ka meh aku belajar jaku tiga bengkah nya tang ka diatu aku ka belajar jaku Arab. Leboh aku berati ka jaku Arab mayuh ga leka jaku dikelala aku laban jaku Melayu mayuh nginjau ari jaku Arab.

Agi aku Pom Satu kelia, aku bisi belajar Jawi mimit. Tang nadai entu masuk untak, nyu abis salah tangkir urup Jawi!! Pelaba aku enti aku belajar tulis Jawi diatu, jampat agi aku nangkap laban nyu mereti agi chara urup nya besambung. Pelaba aku meh!

Sapa kala ninga nama Father Zakaria Botros? Enti enda kala, taip aja nama iya ba YouTube. Mayuh video jaku Arab dikeluar sida Father Zakaria dia nadai dialih bahasa. Aku ka ninga semua jaku ajar iya dia kelebih agi iya ka negu pasal agama rasmi menua kitai.

Uji berunding. Enti aku nemu jaku Arab, alu ulih nyalin (ngaga subtitle) video ti ngundan jaku ajar Father Zakaria ngagai jaku rasmi menua kitai .....


Puteri's Signature

Wednesday, April 29, 2009

Van

Pagi kemari leboh aku ka nyetart kerita ba parking lot supermarket ...kehhh, kehhh, kehhh, keeehhh, keeehhhh... munyi kerita. Issshhh, enda berapa ga tu. Tutup swis, uji baru ... keehhh, keeehhhh, keeehhh. Akai! Bisi sepuluh kali aku nguji nyetart nya baru ka start. Nyu betelipun ngagai Doug dulu nanya kebuah kerita iya nya enggai start.

Bisi lah hal enggau ignition, ko Doug. Ma angat alu enggai start iya. Maya aku ka nganjung anak ke sekula nadai ga beleman kerita nya start. Dah pansut ari supermarket, enggai enda ngaga hal ga iya.

Lemai nya, Doug alu mansut ka van besai kami (utai diberi entua aku). Berapa bulan enda disimpan dalam shed, nyu kamah, ni ka dibalut pukat emplawa agi! Bendar meh saduai Cory betuchi ka van nya kemari.

Pagi tadi, serta enchelak mata, Duncan alu bejako, "Mommy you are going to send us to school in the big van."

"I think we are going to walk to school, Duncan, I do not know how to drive that big van." Ngasoh gaga agi ninga ka bejalai ka sekula. Cheyy, gamal aku bejalai sebatu setengah?

Aku sigi jarang pen driba van nya. Doug nyu mesan, swing wide ma bilok, ko iya. Aku enda memunyi. Parai enti kerita dibai belantak tauka laboh ke parit! Udah ga sebuah agi bedau diadu udah ka dibai belantak enggau tiang lampu! redface

Ka ke pasar minggu pagi tadi, enda nyadi. Enggai begelut enggau urang mayuh berebut ka tempat parking. Enti mai van mit aku, enda ngawa.

Apin lama aku datai ba menoa tu suba, kami duai Doug raun meda menoa mai van nya. Maya nya endang agi enggi sida entua aku. Udah nya maya pangan aku datai nemuai, ngena van nya ga kami raun meda menoa sebelah New Mexico, Nevada, Colorado, Utah enggau California. Dua taun tu tadi, meda van nya jarang dikena sida entua aku alu meri nya ngagai kami. Sapa enggai nerima kerita diberi urang, eh!

Bisi endar ga van nya dibai meda menoa leboh bala pangan ka nemuai ari Malaysia. Bulan empat taun nyin suba, kami raun ka Disneyland. Sigi lantang pen penudok dalam van nya, laban ka besai buka. Lantang kaki unjur. Like sitting in first class, ko kawan aku leboh ka mai iya enggau bini iya ke Disneyland.

Hari lima tu lagi kami ke Los Osos baru. Van nya meh dikena laban van aku nadai ulih dibai kini kini. Van Doug enda ibuh kira, sigi enggai mai kelalu jauh, enggai ka bisi hal sebelah jalai lagi.

Bah, naka tu aja cherita sekali tu.

Puteri's Signature

Tuesday, April 28, 2009

Ladybird a.k.a. lady bugs

Kati ko kitai ngumbai "Ladybird" ba jaku Iban? Puas aku ngingat enda ga tingat ka nama indu utai tu. Agi aku mit suba, indai aku bisi betanam ka sida buah terong. Indu utai ladybird ka endar makai daun terong, alu aku ka endar begumpul ka indu utai tu.

Bala anak aku bakanya mega. Enda tau meda ladybird alu ka begumpul ka iya. Mula-mula dalam butul urang nyimpan indu utai tu. Rumput meh disampan dalam butul nya ngambi ka bisi utai dempa sida ladybird ko saduai.

Ujung minggu tu tadi, saduai bendar begumpul ka ladybird. Aku pen enda nemu dini alai saduai tetemu ka ladybird ngemayuh nya.


Nah, tu gamal beg alai nyimpan ladybird. Apu, luput ladybird simpan dalam beg plastik nya, ko aku manjong.

Sahari tu agi idup pen sida ladybird dalam beg nya. Nyu tiga hari sida udah dalam beg nya, alu demalam udah dibai ke luar. Kapa sida pansut, ko Duncan. Tang leboh iya pulai sekula tadi, tak nadai dah pansut siko ladybird ari beg nya.

"Those lady bugs are having too much fun in the baggie, and they don't want to come out!" ko Duncan.

Engka enda sedar zip beg nya udah dibuka. Mesai ni aja untak indu ladybird nya?! mrgreen

Puteri's Signature

Monday, April 27, 2009

Bar-be-cue

Fire up the grill!

Lemai kemari keterubah iya taun tu kami betunu. Cory madah ka diri endang "expert" pasal bar-be-cue, alu lemai hari enam iya bisi meli sida pah manuk. Aku tu meh tukang marinate sida pah manuk nya. Aku bisi mega meli sida dagin chapi enggau hot dogs kena nambah utai ka dibeli Cory.

Berapa bulan enda dapur bar-be-cue enda dikena. Nyu balut sida pukat emplawa. Nasib ga hari kemari nadai agi angin. Enti bisi angin chelap nadai aku tu ka nganjung diri dudok ba luar makai!

Amat pama endar ga gamal utai ka ditunu Cory. Nadai entu arok. Dagin chapi enda kelalu rangkai, pah manuk lembut. Hot dog nadai aku nyepi ... bala anak ka makai nya.

Aku bisi mega mandok dua macham lauk sayur .. taugeh guring enggau undang champur brocolli, snow peas, carrots enggau kulat. Asi nadai aku nyendia, mina bisi manggang biscuits (bread rolls) ka dempa enggau sida dagin tunu.

Denice saduai Duncan berebut dudok berimbai enggau Cory. Maya hari gambar tu diambi kira ka pukul 6.45 lemai. Hari diatu mupok petang urung pukul 7.30 malam. Bala anak ma dikangau tama ka rumah selalu komplen laban saduai ngumbai hari agi tumu! Agi ka bemain ba luar din.

Enda ka lawa asai dudok ba luar enti dudok ba patio furniture bakaka diayan aku ditu kutai? mrgreen

Puteri's Signature

Sunday, April 26, 2009

53

Lemai kemari kami duai Doug bisi pansut alu nganjung diri makai ba restoran dikumbai School Street Bistro ba Lodi. Bala anak tinggal laban bisi Cory nulung berati ka saduai.

Kami jarang makai ba restoran tu laban rega pemakai dia mar. Tang kemari endang sengaja makai dia laban Doug ngintu hari pengada iya. Bisi ga tegal kitai sanggup ngeluar duit lebih!

Tu meh gamal sulu ati aku ba hari pengada iya ka 53! " I'm married to an old man", ko aku beduan iya. Gambar ba sepiak kanan nya gambar dikirum iya ke aku lebuh baru bekelala kelia. Maya iya agi slim enggau sigat agi! mrgreen

Aku ngorder steak, alu Doug ngorder pasta. Enda entu nyamai pasta nya ko Doug. Aku puas ati makai steak aku, alu bisi mega ngorder dessert. Aku enda terabis ka dessert aku laban udah kelalu kenyang tambah mega dessert chocolate enggau ice-cream nya kelalu manis. Doug meh tukang sapu pemakai ka enda alah dempa aku.

Badu makai kami duai alu shopping ba Walmart. Endang baka selama, ma udah tama kedai kami alu ngati kediri. Aku sigi enggai dititih iya ma shopping! Issshhh.

Happy birthday, sweetie!

Puteri's Signature

Saturday, April 25, 2009

Bahasa Iban

Sahari aku gaga amat ati laban siku pengajar Iban bisi ninggal komen ba post lama ... komen ka munyi tu:
Rindu ninga pengeras bala kitai ke di menua tasik ke deka nemu agi ngena jaku Iban. Tau kita nemuai ngagai laman tu http://apps2.emoe.gov.my/bpk/ [klik -- laman baru tebuka ... klik ba Modul P&P .... klik ba apak Bahasa Iban ... bisi tebuka laman baru Jaku Iban ---- ba kolum HOME ia kita bisi meda mayuh elemen siti ari elemen nya Jalai Jaku -- klik nya ... kita tau download Sistem Jaku Iban (dalam PDF)]. Sistem Jaku Iban nya meh ke diakena nembiak dalam sekula kediatu. Selamat ngerembai lalu belajarka jaku kitai. Kita tau ngirumka kereban ke bukai ngagai aku nengah biaubalai@live.com. Pengajar Iban
Aku endang lama udah begigaka alai aku tau belajarka sereta ngena Bahasa Iban enggau betul. Aku sigi nadai kala ngambi mata pelajar Bahasa Iban, lalu spiling Iban ke dikena aku (pedis amat ngelengka spiling tu!) nunda spiling ke dikena ba Bup Kudus. Ba aku ditu, Bup Kudus meh naka iya bup dalam jaku Iban.

Aku nadai ngembuan bup dalam jaku Iban bukai. Bula munyi jaku, agi aku ba sekula primary kelia, aku enda tebaika diri bejaku Iban enggau bala classmate Iban. Aku mina bejaku melayu Sarawak tauka jaku English enggau bala pangan sekelas. Kebuah baka nya, laban aku malu, maluka diri enda ngelandik anak Iban bukai, alu munyi jaku Iban (Iban Saratok) dikena aku enda sebaka enggau munyi jaku Iban (tebal agi ari Bahagian 3) bala anembiak bukai.

 Apin lama tu tadi aku bisi bekunsi enggau petunggal aku, Lyana, ke diau di menua Peranchis. Aku madah ke iya, nyelai amat, sekumbang aku diau ba menua tasik, Bahasa Iban aku nyau makin manah!

Sekumbang aku betuliska blog ngena jaku Iban, alu sekumbang aku bepangan enggau blogger Iban bukai, chara aku nulis jaku Iban pan tampak endar bisi insur. Aku selalu beratika leka jaku dikena bala blogger Iban bukai ti lebih landik ngena jaku Iban. Pia mega, lebuh aku ninga radio Iban ari internet, aku selalu beratika jaku dikena sida DJ enggau beratika susun ayat ba berita Iban. 

 Aku mai blogger Iban bukai sama-sama nulis ngagai Pengajar Iban nyema kitai bisi tanya pasal chara ngena Bahasa Iban enggau betul. Iya udah ninggalka email address alu aram meh kitai sama-sama ngemansangka penemu kitai pasal ngena jako Iban enggau betul. 

P.S. Diatu aku ka ngiga dictionary Iban!

Er, nama reti leka jaku "kereban"?




Friday, April 24, 2009

Terong

Terong. Buah terong ti ko aku nya. Ukai bungai terong. Ukai pantang bungai terong. mrgreen

Siti ari buah terong ka dibeli aku ba pasar minggu kutai udah dipandok alu dempa demalam. Aku jarang meli bansa terong mesai tu tang laban ka nguji resipi, Eggplant Parmigiana, nya kebuah meli terong bansa nya.


Peda pemesai terong nya! 28 cm! Terong bansa tu meh dikena orang ngaga tempura terong. Asai terong ka panjai nya ga asai iya.

Tu resipi Eggplant Parmigiana. Mayoh ngena cheese nya kebuah sebedau berengkah makai aku nelan 3 leka Lactase Enzyme. Taja pia, perut aku bendar amat bemunyi demalam! confused Isssh, enda berapa. Sorry gambar resipi nya enda entu terang tang tau ga dikenyadi enti ka nguji resipi tu. Klik gambar ngambi ka besai agi.

Nah, tu gamal iya udah dipanggang. Bisi sirap terong dibaroh cheese enggau pasta sauce nya!! Ukai pemakai kitai Iban tang enggai enda nguji. Baru iya aku nguji resipi tu, alu bendar Doug muji ngicha ka mandok resipi tu baru ila!

Limpang mimit cherita. Doug nanya, patut ka enda iya mantang diri ngena motif baka bungai terong. Issh, kiroh, ko aku. Enti umur agi biak enda ga ngawa. Isssshhh.

Puteri's Signature

Thursday, April 23, 2009

Bungkus

Pagi tadi beguai aku pansut leboh ka ninga horn van ari pos opis ba luar rumah. Aku bisi ngorder utai ari ebay enggau Amazon, alu enda teranti ka utai ka diorder datai. Ngam-ngam ka order ari dua iti tempat tu datai sereta taja enda sama hari maya ka order.

Nah, tu gamal utai dibeli aku ari Amazon! Enti aku ngiga sebelah kedai cina di Sacramento ditu tentu bulih samoa utai kena ngurut kaki tu tang laban ka enggai kiroh ngiga, order aja ari Amazon! Pia nulis blog post tu, pia ga ngansar kaki ba roller! mrgreen

Siti agi utai diorder aku ari Amazon iya nya bup pasal pemakai orang ka nerima dialysis. Manah endar ga bup tu laban iya ngajar nama pemakai ka patut ditagang alu ni ka tau dempa orang ka nerima dialysis. Nitih ka lutor ka nulis bup tu, enggai nyadi enda bepenti enti ka idup lama enggau enti ka bulih pengidup ka bekualiti leboh ka ngetat penyakit. Sinu endar aku ngenang apai aku, udah ga sakit, milih utai dempa agi nya! sad

Menyadi aku siko minta beli tutup laptop iya ka udah patah hinge. Iya ka madah ni bagi laptop cover ti dikedeka, alu madah alai tau ngorder ba ebay. Aku tu mina ngorder aja alu tukang mai leboh ka pulai ka Miri bulan enam tu ila. Enda berapa endar ga model Acer tu, jampat patah hinge.

Bekenang pasal bebeli ka utai ari internet, laban ka suah endar ngorder utai online, lumur kad kredit lantang ngingat! Enti nuan nanya aku lumur IC baru aku, enda aku nemu! Lumur hand phone diri empu kekadang nemu enda ingat! Ngingat 16 iti lumur kredit kad tak nadai beleman! Tanda selalu ngisi billing information leboh ka meli utai online meh nya! mrgreen

Puteri's Signature

Wednesday, April 22, 2009

Pasar minggu

Pagi tadi aku bisi nurun ka pasar minggu. Ka ngiga sida lauk, kenu. Rami endar orang ba pasar pagi tadi, nyu nadai alai parking endor aku selalu parking. Aku mina laun mimit ari selama tang udah mayoh bala mensia dia.

Maya hari agi chelap enggau selalu ujan kutai, nadai entu mayoh orang suping dia. Engka bala enggai ngelaban chelap enggau ujan! Bala orang ka bejual pen enda mayoh.

Balat ga pengangat hari pagi tadi sepi aku. Nyu mantik isi! Ni enda berasai angat, udah berapa bulan kami ngetat ka chelap. Nyu tekenyit asai isi nyepi angat gasak mata panas! mrgreen

Bendar bepusin meda sida sayur nadai ka bisi meda utai ka narit ati. Ujung-ujung pulai mina mai terong enggau lia, alu meli ikan ka udah pandok ari gerai bala Vietnamese. Datai dirumah, nyungkit asi alu makai. Jam baru ga pukul sepuloh setengah pagi! Tumu lunch sahari tu!

Aku bisi mega ngetu ba gerai sida tambi ka nyual pua enggau kain jendela. Lama udah ngiga kain jendela ka besai buka ti umbas ba jendela ruang tamu, alu baru tetemu ka iya tambah mega murah. Ngelama tu nadai kala nyenguk gerai tambi tu! Meda nya murah, meli aku se-set. Ko tambi nya madah ka aku, beli aja, ma enda manah peda nuan bai pulai, tau ditukar. Asal aja mai pulai dalam tiga minggu, ko iya ga. Kapa aku kiroh, ma udah begantong teju dia meh! Tang umbas iya ga pemanah curtain nya .. ngipak ka rega iya lah.

Sayau endar ga pasar minggu kami ditu nadai orang bejual ka sida mee kolok! Enti bisi, alu dudok dia meh aku makai sebedau aku musin pasar nya!

Puteri's Signature

Tuesday, April 21, 2009

Nyengula Anak

Pagi kemari kami duai Doug bisi temu janji enggau administrator Galt Christian School. Bulan sembilan tu ila Denice saduai Duncan masuk 1st Grade (Darjah 1) alu aku ka nganjong saduai besekula ba sekula tu. Penyauh sekula tu kira ka 2 batu ari rumah kami, enda jauh alu nadai nengah jalai besai.

Ukai nadai sekula perintah ditu, tambah mega free, tang aku ka ngasoh saduai belajar ba sekula ti beberat ka pengarap enggau penemu kitai Kristian. Aku enggai anak aku diajar penemu ti beberat ka humanism, tauka di brainwash enggau radical homosexual agenda, tauka diajar radical environmentalism maya sida agi mit alu apin nemu mutus runding diri empu. (Sorry, enda tegiga ka jako Iban kena nerang sekeda jako tu!)

Anak aku diatu belajar ba tadika ba gereja Assembly of God enda jauh ari rumah kami ditu. Aku rindu amat meda penemu saduai pasal pengarap. Sebedau makai, sembiang dulu. Sebedau tindok, sembiang dulu. Enti tedani laban ngigau Duncan minta disembiang ngambi ka bemimpi utai manah aja.

Ba dunya moden tu mayoh endar penguji. Utai ka dipelajar anak kitai ukai semina datai ari apai indai. Ni ka ari pangan, ni ka ari pengajar sida, ni ka ari TV. Sigi digiga apai indai penemu enggau perangai ti manah, ti meransang, ti sinu ka pemedis enggau penusah orang, ti enda beberat ka hal diri empu aja ari anak sida.

Munyi ko jako pepatah Melayu, "Bila hendak melentur buluh, biarlah dari rebung." Taja pia, nadai gerenti anak kitai nyadi mensia ka menyana! Udah sida besai lagi sida mutus runding ka diri empu, jai tauka manah. Tang enti sida udah diajar ari mit, the chances of them growing into responsible and caring adults are greater.

Kelimpah ari nya, kitai mina ulih besampi ka sida, minta sida dilindung ari pengawa ti jai alu diberkat Tuhan enggau samoa utai ti badas.

Puteri's Signature

Monday, April 20, 2009

Angat Hari!

Hari kami ditu nyau mupok angat.

Hari enam enggau hari minggu tu tadi, keterubah iya aku pansut enda bekena ka jeket leboh pagi hari enggau malam hari. Kemari, keterubah iya aku ngena baju t-shirt enda belengan, alu bekena ka baju pandak lengan leboh ka tindok malam. Ngelama tu aku ngena baju tindok digaga ari fleece.

Peda gamal hari kami sahari tu! Angat agi ari hari di Miri din! Hari nyu udah pukul 6.25 lemai tang pengangat agi 33 Celsius. Nitih ka ramalan cuaca nya, hari angat tu mina meniga hari tu agi udah nya pengangat iya baka ka patut maya musim bunga. Ba menoa California ditu, taja hari angat amat leboh siang hari, tang ma udah malam jampat ga hari nya chelap laban nadai entu bisi awan ba langit din.

Taja diatu udah musim bunga sekeda bala kitai ka diau di menoa Canada din, baka endor sida Cuthess enggau David Rangga, tak agi chelap amat din. Ba Thunder Bay alai David Rangga tak agi bisi salji!! Enda tan aku enti musim chelap ngemanjai nya!

Bala anak nyu bemain ai meda hari nya angat sahari tu. Peda saduai betuchi ka bisin alai saduai ka berendam. Kemari, Denice nyu chelum gamal isi bai bemain ai ba panas terit.

Meda hari nyau mupok angat, aku ngasoh Doug ngechek air-cond ba samoa kerita kami. Parai enti bejalai jauh maya hari angat enti air-con rusak!! Asai ka diau dalam oven! Dua minggu tu ila, kami ka ke Los Osos baru, alu van ti ka dikena udah rusak air-cond. Aku enda sanggup nepan van nya enti air-cond enda bejalai. Ka ringat alu ka nganu orang ma udah angat! mrgreen

Puteri's Signature

Sunday, April 19, 2009

Thrift Store

Demalam kami menyanak bisi suping ba Big Valley Thrift. Aku ka ngiga vest sweater ka apai aku laban ba kedai endor aku selalu meli sida gari nadai agi tegiga ka gari kena musim chelap. Aku mina tetemu ka dua iti saiz ka tau dikena apai aku. Saiz besai agi ari nya mayoh endar ga dia. Aku bisi mega meli 3 pasang seluar jeans kena Duncan saduai Denice. Agi manah endar ga jeans nya. Iya ka dikena Duncan nyu abis belubang sebelah pala patung!

Doug bisi tetemu ka shop vaccuum, ka dibai ka Los Osos ila. Denice saduai Duncan orang tukang angkat ngagai van. Udah nya alu ngeso ka muscles saduai ... ngumba! Kering meh saduai nya!

Maya aku pulai ka Miri taun nyin kemari aku ka mai sekeda rekod lama aku pulai ka California tang alu nadai temu alai indai aku nyimpan! (Enda ngawa lah enti kita ka anembiak enda nemu nama utai ka rekod, ti ko aku ditu!!) Doug bisi record player diberi indai iya maya birthday iya taun nyin kemari tang alu nadai udah dimain laban ka nadai rekod. Nya meh kemari aku sempat meli dua iti rekod Barry Manilow enggau siti rekod Krismas. Mina ga 99 cents siti.

Pagi tadi aku alu main siti ari rekod Barry Manilow nya. Lagu keterubah iya, Even Now, manah endar ga didinga, tang datai ba lagu kedua, adui alu sangkut!! mrgreen Maya aku ka nyimpan rekod nya kedalam player nadai ga aku meda sida scratch. Debu, kini? Heheh.

Kami menyanak sigi rindu endar suping ba thrift store. One man's trash is another man's treasure, enda pia?

Puteri's Signature

Saturday, April 18, 2009

Kerita

Bisi meda kerita baru ari Proton? MPV Exora? Bisi meda?

Ee, boleh tahan ga gamal iya, eh! Rega pen kira ok, enti dibanding enggau kerita import sebansa enggau nya. Enti aku ngiga kerita di Malaysia din, endang model baka tu meh digiga aku. Baka enggi aku ditu, iya ka dibai aku belantak enggau tiang lampu kutai.

Nah enda sinu kita meda gamal kerita aku tu? sad Nyu nadai agi moa! Ka diadu/direpair, kenu, alu ga bedau. Spare part kena nganti ka ngerimping alu ga bedau dibeli. Ukai ngiga spare part baru, ngiga ari kerita ka sama model .. ari kerita orang ka enda diguna agi. Murah agi chara baka tu ari ka nganti ngena spare parts ka brand new. Kerita udah lama, enda iboh ngena parts ka baru.

Kerita aku nya baru udah dibai ka belakang rumah, alai Doug enggau Cory ka be-mekanik ila. Ka meli kerita spare, ukai kerita baru lah, er, enggai ga nambah penyampau kerita ka endang udah mayoh sebelah tanah kami ditu! Berapa buah enda dia, ragau-ragau nadai ulih dikena ba California ditu, laban ka enda pass smog test. neutral

Bisi ka empu kerita buruk kita dia? mrgreen

Puteri's Signature

Related Posts Plugin for WordPress, Blogger...