Kelas Pengerai

Taun nyin kemari aku bisi enggau orang sakit belakang (lower back). Akai, nya baru pedis! Ma udah dudok alu angkat, gamal aku ka angkat nya tadi, nyu baka ini tuai orang ka bungkok!

Leboh ka betemu lutor, aku diberi ubat kena ngetat pemedis, diberi ubat ti tau nulong aku tindok, alu diasoh enggau kelas Back Care. Huh. Bisi tiga belas iko kami ba kelas nya sahari nya.

Tu meh siti utai ka manah ba menoa kami ditu. Sida lutor ukai mina meresa enggau meri ubat kena ngubat penyakit kitai, tang alu ngasoh kitai enggau kelas alai kitai tau belajar pasal penyakit kitai nya tadi enggau chara kitai tau nulong ngintu diri empu ti ngembuan penyakit nya.

Maya aku ka ngandung ka Duncan suba aku bisi ngembuan penyakit gestational diabetes - kencing manis - lalu bisi diasoh enggau kelas ti ngajar pasal ngintu pemakai (nutrition class). Berapa kali enda aku betemu enggau nutritionist maya nya suba.

Pagi tadi aku bisi ka klinik, ngambi ubat. Udah ka ngambi ubat ba pharmacy dia, aku bisi ngetu ba opis Health Education, begiga ka pamphlet pasal pemakai orang ka rusak buah pinggang. Nadai bisi tetemu ka pamphlet baka nya, tang aku bisi meda siti pamphlet dikumbai Foot Owner's Manual alu ngambi siti. Maklum lah, laban benong ngetat pedis kaki!

Apai aku diatu udah rusak buah pinggang alu tiga kali seminggu nganjong diri nerima dialysis. Leboh aku bejako enggau indai aku hari minggu nyin tadi dia iya madah pasal pemakai ti patut ditagang apai aku. Nitih utai ka dipadah misi - anang makai mayoh, anang ngirup ai mayoh, anang makai dagin mayoh. Siti utai ti ngasoh aku tekenyit leboh indai aku nyerita pasal nagang diri leboh ka makai .... semadi meda apai aku nya Iban, nya misi ka madah. Enti orang ka sakit nya bansa cina, enggai iya madah ko iya.

Apu! Patut ka nya?!

Nya meh ko indai aku leboh aku bejako enggau iya baru demalam, cina ka dudok sepiak apai aku maya ka nganti nerima dialysis hari satu tu tadi nyu makai dua bungkus asi tapau! Iya ka bendar, pesakit nya enda tau makai mayoh, lebih agi sebedau nerima dialysis sahari nya!! Iya ka patut, makai udah ka nerima dialysis.

Akai! Nya meh aku demalam tak enggai tindok mata leboh ka ngenang apai aku. Ukai indai aku tu orang ka nemu macha tauka mereti pasal ngintu diet orang ka sakit! Bendar meh aku sahari tu be-google ka diet orang ka nerima dialysis, belajar pasal pemakai ti bisi sodium, potassium enggau phosphorus. Ni bansa ka kurang tiga bengkah mineral tu, alu ni ka ngundan mayoh agi mineral tu. Orang ka nerima dialysis enda tau kurang makai pemakai ti tinggi protein, tang pemakai ti tinggi protein ngundan phosphorus ka tinggi mega. Phosphorus enda manah ba orang ka udah rusak buah pinggang.

Bingung aku ngenang nya. Kati ko tudah indai aku nemu utai tu enti enda dipadah? Enti enda diajar nutritionist? Nya meh tadi aku bisi meli siti bup dikumbai The Guide to Nutrition and diet for Dialysis Patients ari Amazon. Aku ka ngecheck mega, bisi ka enda kelas nutrition ka orang rusak buah pinggang ba endor aku ngambi kelas Back Care aku suba. Aku ka enggau orang belajar dia.

Bulan enam tu lagi, leboh anak aku kemisi musim panas, bisi kami menyanak pulai ka Miri ... aku ka nyadi nutritionist apai aku!