Macha Bup Kudus Mark 15

Sahari tu, beserimbai enggau Good Friday, aku deka mai kitai sama berati ka Mark 15, cherita pasal Jesus kena regang.

Mark 15 ngena jako Bahasa Indonesia tau dibacha ditu, alu enti sekeda nemu macha Bahasa Arab ditu alai tau macha iya.

Mark 15

Tumu pagi sida tuai imam baum beguai-guai di endor nya, pengajar Adat enggau samoa kaban Kunsil, mutus ka runding sida. Sida nanchang Jesus ngena rantai, mai sereta nyerah ka iya ngagai Pilate. Ko Pilate nanya iya, "Kati nuan amat rajah orang Judah?"

Disaut Jesus, "Munyi ti udah disebut nuan nya meh."

Sida tuai imam nekan ka Jesus ngereja mayoh bengkah penyalah, nya alai Pilate nanya iya baru. "Kati nuan enda nyaut? Peda nuan pemanyoh penyalah nuan disebut sida!"

Jesus mengkang enggai nyaut saleka jako, lalu Pilate tekenyit bendar ati.


Jesus kena ukum bunoh
Genap kali Gawai Paska Pilate selalu ngelepas ka siko orang tutup ti dipinta orang mayoh. Leboh maya nya bisi siko orang tutp ti benama Barabas, ditutup sama begulai enggau orang ti munoh orang leboh sida ngelaban perintah. Leboh orang mayoh begempuru belaboh deka minta Pilate ngereja utai ti selalu diberi iya, ko iya nanya sida, "Kati kita ngasoh aku ngelepas ka rajah orang Judah ka kita?" Iya nemu kebuah sida tuai imam nyerah ka Jesus ngagai iya, laban sida begedi ati ngagai iya.

Tang sida tuai imam ngansak orang mayoh, minta Pilate ngelepas ka Barabas. Pilate agi bejako baru enggau orang mayoh, ko iya, "Enti munyi nya, kati ko aku enggau iya ti dikumbai kita rajah orang Judah?"

Ko sida nyat enggau nyawa ti inggar, "Awak ka iya direganng!"

Nama kebuah, lalu nama penyalah ti udah digaga iya? ko Pilate nanya sida. Ko sida nyaut inggar agi, "Awak ka iya diregang!"

Pilate deka ngenyamai ka ati orang mayoh, nya alai iya ngelepas ka Barabas. Udah nya iya ngasoh Jesus disipat sereta nyerah ka iya ngagai sida awak ka iya diregang.



Soldadu beduan Jesus
Sida soldadu mai Jesus ngagai tengah laman (iya nya ba istana gabenor) lalu ngempuru ka samoa bala sida. Sida ngari Jesus ngena baju panjai ti digaga ari kain unggu, ngaga makota ari pating kayu ti beduri, lalu ditangkup ka sida ba pala iya. Udah nya sida nabi iya, ko sida, "Gayu Rajah orang Judah!"

Sida malu pala iya ngena tungkat, ngeludah iya, besugang lalu meremi ka diri ba moa iya. Udah sida tembu beduan iya, sida muka gari iya lalu ngasoh iya begari ngena gari diri empu. Udah nya sida mai iya pansut awak ka diregang.


Jesus diregang
Benong di rantu jalai sida betemu enggau siko lelaki ti benama Simon ari menoa Sairin, mansang ka dalam nengri ari menoa atas, lalu sida mejal iya ngesan regang Jesus. (Simon nya apai aleksander saduai Rupus). Sida mai Jesus ngagai endor siti ti dikumbai Golgota, reti nya "Endor Keruntok Pala." Dia sida nguji meri iya ai anggor ti digulai mor, tang Jesus enggai ngirup iya. Nya alai sida ngeregang ka iya lalu bedua gari iya ngena jalai bechabut undi, kena nentu ka bagi ti di-ambi siko-siko. Maya sida ngerengang iya pukol sembilan pagi. Pelekat ti madah ka penyalah iya bisi mega ditulis munyi tu: "Rajah orang Judah." Sida mega ngeregang duai iko penyamun sama enggau Jesus, siko muak ka kanan, lalu siko muak ari kiba iya. (Nya dikena ngamat ka jako ti udah ditulis dalam Bup Kudus, munyi tu: "Iya disengkaum enggau orang ti bedosa.")

Orang mayoh ti mansa ngilik ka pala sida lalu mechat Jesus, ko sida, "Cheh! Nuan ti ngumbai diri deka ngeruboh Rumah Sembiang udah nya niri ka iya baru dalam kandang tiga hari! Diatu, nurun ari regang lalu lepas ka diri empu!"

Baka nya mega sida tuai imam enggau pengajar Adat, ngelese Jesus, ko sida bejako enggau pangan, "Iya ulih ngidup ka orang, tang enda ulih ngidup ka diri empu! Awak ka kitai meda Kristus, rajah orang Israel, nurun ari regang diatu, lalu kitai deka arap ka iya!" Lalu saduai ti sama diregang begulai enggau Jesus mechat iya mega.


Pemati Jesus
Tengah hari nya samoa menoa diia petang magang, dalam pengelama tiga jam. Pukol tiga ngalih hari, Jesus ngangau enggau nyawa ti inggar, ko iya: "Eloi, Eloi, lama sabaktani?" reti nya "Allah Taala aku, Allah Taala aku, nama kebuah nuan ninggal ka aku?"

Sekeda orang ti bediri dia ninga iya, lalu ko sida, "Dinga, iya ngangau ka Elijah!" Siko ari sida belanda, ngambi bungai karang, direndam ba ai anggor ti kurang manah, lalu di-engkah iya ba puting sengkuit ti dituat ka iya ngagai mulut Jesus. Lalu ko iya, "Nganti dulu! Awak ka kitai meda, enti Elijah bisi datai mai iya nurun ari regang!"

Enggau nyawa ti inggar Jesus mutus ka seput.

Kain ti digantong dalam Rumah Sembiang charik belah dua, ari atas datai ka baroh. Pemesai soldadu, ti bediri betapak enggau regang nya, meda gaya Jesus ngangau lalu mutus ka seput, ko iya, "Iya tu tentu amat anak Allah Taala!"

Sekeda sida ti indu bisi dia, ngemata ka iya ari jauh. Sama bisi enggau sida dia, iya nya maria Magdalin, Maria indai James saduai Joses ti biak, enggau Salomi. Sida udah nitih ka Jesus leboh iya agi di Galili lalu nulong iya. Mayoh mega indu bukai bisi dia, sidda ti udah datai ka Jerusalem sama enggau iya.


Bangkai Jesus dikubor
Leboh hari nyau ka lemai, Josep orang ari Arimatia pen lalu datai. Iya kaban Kunsil ti dibasa orang, lalu udah nganti penati Perintah Allah Taala. hari nya maya Hari Besedia (iya nya sahari apin Hari Sabat); nya alai Josep enggau ati ti berani betemu enggau Pilate lalu minta bangkai Jesus. Pilate tekenyit bendar ati ninga Jesus udah mati. Iya ngangau ka tuai soldadu iya, nanya ka pengelama Jesus udah mati. Udah iya ninga berita ari tuai soldadu, Pilate ngasoh Josep ngambi bangkai Jesus.

Josep mai salambar kain linin, ngulih ka bangkai Jesus ari regang sereta dibalut iya ngena kain nya, lalu nyimpan iya dalam kubor iya empu, ti udah ditebok ari batu. Udah nya iya maring ka sigi batu ti besai kena nutup moa penama ngagai kubor nya. Maria Magdalini saduai Maria indai Joses ngemata ka iya, lalu saduai meda endor orang ngengkah bangkai Jesus.