Penusah Sarawak

Agi nampung cheritaka tulis aku kemari .. Bisi bala kita meda program ba AlJazeera pasal 12 iti empang ai ti deka digaga perintah menoa Sarawak? Enti kita apin meda ditu enggau ditu alai meda video nya.

Bisi kita ninga James Masing nerang ka kebuah kitai ba Sarawak beguna ka karan 600% lebih ari ka diguna kitai? Malu endar aku ninga bansa kitai bejako nyukong pengawa perintah ti ukai semina ngeruntoh pendiau bala orang menoa petisir tang mai pengaya enggau untung ngagai bala ka endang megai perintah menoa kitai.


Iban baka James Masing enggau Iban baka sida ka ngangkat Taib (peda gambar), sida tu meh ngemeli kitai bansa Iban. Kati enda ngaga jako munyi nya? Ni, bisi kitai ninga sida mantah pengawa kempeni ti ngerampas tanah pegai Iban enggau bansa bukai ka diau ba menoa petisir? Ni, bisi kitai ninga sida mantah pengawa perintah ka ngeruboh rumah panjai kitai Iban? Ni nya kala ninga sida mantah! Iya ga sida ka megai perintah!

Bala Penan ka diau ba rumah panjai ka dipeda ba gambar atas, deka diampuh enggau ai laban kena meri jalai empang ai digaga. Sapa bala Penan ka meda tanah alai bekebun, tanah alai ngasu, tanah alai ngiga pemakai, diampuh enggau ai? Sapa bala Penan ka pindah ngagai tempat ka diberi perintah alu mina nerima tanah se-hectare aja? Kapa utai ngemesai nya?

Bala ka udah dipindah maya empang Batang Ai enggau empang Bakun digaga, nama penguntung sida? Tau nyabut bulu mata, ka sema!

Rumah Jamilah Taib, di Canada, berega CAN$ $9,609,000.

Tang bala ka megai kuasa, enggau bala bini anak, kaban belayan diau ba rumah nyu baka rumah alai sida Queen diau! Kitai Iban, kitai Bidayuh, kitai Penan, diasoh pindah, dirampas tanah, diruboh rumah panjai ...

Sapa empu menoa, sapa megai perintah, sapa kena tekan? Sapa empu undi? Kena undi kitai ngambika pendiau kitai, bansa kitai badu agi dikemeli orang ka tama ka pangkat enggau pengeraja diri empu!

Penusah Iban

Aku baru udah bepeda ka video ba DayakNationTV, bepeda ka gaya kitai Iban diperinsa ka perintah, bepeda ka gaya kitai Iban mina peli-peli mata meda temuda dirampas perintah, enggau rumah panjai diruntuh perintah.

Gambar diambi ari DayakNation.com

Ni meh maya kitai Iban ulih ngetan ka tanah enggau pesaka diri empu ari dirampas ulih perintah enggau ulih kempeni ti udah dikemendarka perintah ngerampas reta nya ari kitai?

Nitihka dipadah Cobbold John ari Dayak Nation, tu meh baru iya meda penyukong ti ukai ari BN lebih mayoh ari penyukong BN maya orang ka nganjong nama/calon ti ka bediri ba pengawa pilih mit ba Batang Ai tu tadi.

Enti berita nya amat, teperansang amat meh aku. Lama endar aku udah nganti bala Iban ngubah ka penemu sida alu badu agi milih orang ka semina bejako tauka besemaya meri pemansang ka menoa pegai Iban tang nadai kala mai pemansang ka udah disemaya.

Kitai Iban enda ibuh beguna ka aktivis baka Harrison Ngau, laban nyadi aktivis mina ngasuh kitai kena tan perintah dibaroh undang-undang ISA. Lebih tampak kitai tu udah fed-up, kitai enggai agi dikemeli ka orang ti bejako ngena dilah dua chabang - lebih manah kitai mandang ka pengeransi enggau pengeringat kitai ngena jalai undi.

Kitai Iban patut ngangkat ka sida Iban ti amat-amat beberat ka pemansang bansa kitai Iban, ukai orang Iban ti mina ka ngemansang ka diri empu, tauka mina ka ngisi periok diri empu leboh ka diberi kuasa megai perintah.

Badu agi kitai ngundi calon ti bediri ngari ka BN laban endang udah ditemu barangsapa ti bediri ngari perintah BN enda ulih nulong kitai Iban, kelebih agi Iban ka diau di menoa petisir. Aku sigi alit ati - diberi duit RM20 - 50 alu enda nyadi milih pengari ari parti pembakang. Murah endar rega undi kitai nya!

Sepengelama aku udah enggau orang ngundi, endang nadai kala enggau orang ngundi parti BN. Endang temu calon ka diundi aku nadai jalai menang, enggai meh enda ngundi calon aku nya. Kebuah iya? Awak ka perintah nemu enda samoa orang setuju ka pengawa ti dikerja sida!

Tukar perintah kitai! Badu agi kitai dikemeli ka perintah ti barangmaya tau ngerampas tanah pesaka kitai, ngeruntuh rumah panjai kitai alu nadai peduli pasal peneka kitai! Umbas!

Gambar diambi anak

Ma ka begambar anang ngasoh anak nyadi tukang gambar. Anak ka enda kala megai kamera tauka ngambi gambar ngena kamera meh ko aku tu.

Berapa iti enda gambar diambi Duncan tang mina dua iti aja tau dikena. Iya ka bukai ngambi sida lantai, ni ka kabur, ni ka bisi tunjuk jari ayan ba gambar, ni ka pala nadai dipeda etc.

Ukai main kitai be-eksersais nunda WiiFit, siap enggau outfit kena eksersais .... hmm. Ngena tripod aja, ko Doug. Nadai anak nemu ngambi gambar ka nuan!

Ngerepair Kerita

Doug saduai Cory nguji ngerepair kerita ka dibai aku belantak enggau tiang lampu pagi kemari!

Nadai endar ga gamal bumper ka dilantak ba simen ti melit tiang lampu. Bumper udah dipangkong Doug mimit, enda tampak penyik baka kemari.

Taja gamal bumper enda balat penyik, air-con condenser enggau utai bukai berimbai dia bela keremping.

Penyik enggau kerimping meh utai dia. Meda baka enti samoa utai ti kerimping tau diadu saduai Doug enggau Cory. Radiator bisi buchur mimit, alu enti enda ulih direpair, enggai enda diganti ga.

Kerita Doug meh kena aku nganjong bala anak nurun sekula minggu tu ila. Ka pen enda mai pick-up truck kena Doug nurun kerja. Tang enda jauh iya mai truck nya, naka Park and Ride, bisi empat batu ari rumah kami. Ari Park and Ride sida nepan van pool ti disedia kempeni alai sida gawa.

Aku beduan Doug aku ka meli kerita baru. Oh, ko iya, enti kerita nya enda lebih ari 15 taun umur iya, kira ka agi baru meh kerita nya. Peiii!

Pedis Dada

Kemari, ukai main agi aku be-eksersais ngena Wii Fit. Pagi sekali, malam sekali. Tang sahari tu asai ka nadai dianjong tubuh be-eksersais.

Pagi tadi, udah aku nganjong bala anak ka sekula, aku ngelantak tiang lampu. Tiang lampu endang nyengenda bediri ba car park depan sekula. Tang leboh aku ka musin kerita, alu mansang ke depan, enda bula, tak nadai meda tiang lampu ba depan kerita! Bedegum utai di dinga.

Huh? Nama utai dilantak aku? Tak nadai meda utai! Ni nya ulih meda utai. Mata panas nachak mata, lindong ari apartment berimbai enggau car park, dia ga.

Akai, balat tu, ko aku bejako kediri. Endang dipelaba aku ngerising moa kerita. Surut aku mimit, udah nya pansut. Aiee, nadai ga meda bonnet nya ngerising! Malik ka baroh, nya baru meda bumper pinyik, ai gadung nitik. Ahhh, bisi lah radiator nya kena.

Dada pedis, enda berasai. Chermin mata pelanting ari moa, enda sedar. Amat kuat pangka kerita enggau tiang lampu nya! Nasib air bag enda alu tebuka. Enti iya tebuka, apu balat aku bebadi gasak air bag nya. Aku nadai terunding ka air bag, mina leboh Doug nyebut pasal air bag baru aku tingat ka air bag nya enda tebuka. Orang tubuh mit tau bebadi laban pangka air bag.

Beguai aku mai kerita pulai, takut ka ai radiator alu abis nitik! Datai rumah alu telipun Doug.

Diatu aku ngetat dada pedis - asai ka kena guyat dada enggau tulang kerigai. Nadai tubuh tu ulih dibai eksersais sahari tu! Amat beterima kasih ka Tuhan, laban nadai bebadi. Kerita tau direpair tauka diganti. Amat ko Doug, "I'm glad you are not hurt. The lamp post can be replaced, and the car can be fixed."

Oh, tiang lampu nya dibalut enggau simen, bisi dua kaki peninggi simen ka melit kaki tiang lampu. Ka bendar simen nya ka dilantak aku. Enti tak ngelantak tiang lampu, sigi tumbang pen tiang lampu nya!

Akai, sigi kesal endar gasak eksiden tumu pagi tu!

Video Chat

Sekumbang Lyana udah bisi netbook, kami duai bisi bevideo chat enggau pangan diri. Rindu endar ga beluyar betunga moa, bepeda ka pangan diri leboh ka lekik lekik ketawa. Ngelama tu endang selalu ga kami duai beluyar ngena telipun.

Kami duai ka mai barangsapa bala kita ke ka enggau kami video conferencing. Tang enti ngenang jam, tusah endar ga, laban kitai diau ba menoa ukai sama time zone.

Lyana selalu mai aku bevideo chat enggau iya leboh jam nyu udah jauh malam ba menoa Peranchis din, tang ba menoa kami ditu jam kira ka pukul 2 lemai. Ma ujung minggu bisi ga betemu pangan diri maya laun malam jam kami, alu tumu pagi jam sida.

Bah, anang enda madah ma ulih bevideo chat enggau kami duai!

Kasut

Enti dibanding enggau sekeda orang, penyampau kasut aku kira ka enda mayoh. Nadai kebuah bekasut mayoh laban nadai entu tunga ngansing!

Maya musim chelap, enggai nyadi enda ngena stukin enggau kasut but. Kaki enda tan chelap.

Maya musim panas, bala sida slipar enggau sandal manah agi dikena laban hari kami ditu balat endar angat. Nadai kala kitai di Malaysia ngasai pengangat menoa kami ditu. Ma sukat ka angat, datai 40 darjah celcius! Angus gamal isi ma udah bejembui ba panas!

Ma nurun sembiang kasut ka manah agi diansing (sepiak kiba). Ma enggai besandal kasut Sketchers berwarna coklat diansing. Ka biru nya, kasut diberi entua aku. Taja baka gamal kasut kena sida nunyah nyual sayur, bejenama ga iya - Calvin Klein.

Enti pansut ngansing sida baju gaun, slipar ka bisi tumit mimit ga dikena. Iya ka bendar, kaki enda tan ngena kasut betumit tinggi. Endang selalu mai slipar spare dalam kerita.

Ko jako ka eksersais sebelah jalai seberai rumah. Enda ibuh juging pen, bejalai pama meh tang datai ka diatu kasut tu alu apin diansing! Agi beresi dalam kutak!

Nah, tu iya tag aku. Ka meda enggi kita agi!

Ayam Baru - Wii

Tengah minggu nyin kemari aku bisi ngorder Nintendo Wii, siap enggau Wii Fit, enggau dua iti game ka bala anak.

Lemai kemari leboh kami datai ba rumah ari menoa sida entua aku, dia aku meda kutak ari Amazon dugau dugau ba driveway. Mali meh postman nganjung nya ka moa pintu kin, ko aku mutap kediri.

Kebuah meli Wii laban ka besenam ngena Wii Fit nunda sida Mama Doyee. Mula-mula ka meli treadmill, tang Doug complain, ragak alu nadai alai nyimpan tambah mega kada enda dua tiga kali dikena udah nya nadai kala dikena agi! Meda orang udah complain, nah manah agi meli Nintendo Wii! Kapa nganti orang meli ka aku!

Tang kemari asa aja ati laban mina Wii console enggau game bala anak aja datai. Wii Fit dipost kediri ngena UPS, alu disemaya datai 26 March tu lagi. Enda berapa, jampat agi utai dikirum ngena Pejabat Pos datai! Iya sama hari ga utai nya dikirum!

Pagi tadi nyau meh aku masang Wii alu bemain bowling enggau tennis ngena Wii Sports. Lekik lekik kediri bemain! Udah nya, aku bisi ngorder siti da game Wii, My Fitness Coach. Meda nya mayoh bala ka udah besenam ngena My Fitness Coach muji pemanah senaman nya alu tekuing ga ati. Ko jako ka ngorder bup siti aja ari Amazon ... kala meli utai kurang ari $25 aku?! Mesti lah meli lebih ari $25 ngambi ka bulih free shipping! Lebu mayar shipping! Manah agi duit nya dikena meli utai bukai!

Ila bekunsi baru, ma bisi meda insur tubuh dibai besenam enggau Wii Fit tauka enggau My Fitness Coach!

Update: Ragok

Demalam jenak aku tindok. Nyu udah dini hari baru aku berengkah batuk baru.

Hari lima nyin kemari aku nadai ngudar ubat batuk ari klinik taja aku nadai entu tindok malam hari empat. Nyu nesal diri laban malam hari lima nyu buntau gasak batuk semalam malam.

Leboh kami ka datai ba rumah sida entua aku lemai hari enam tu tadi, aku alu madah diri bisi ngetu ba farmasi meli ubah batuk. Ubat batuk ka dibeli over the counter* sigi enda ngasi ba aku, tang laban ka nadai ubat batuk nya pen dikenyadi. Eh, ko entua aku, aku bisi ubat batuk ka bisi codeine! Bah, giga dia, ko aku. Nyu diberap aku entua aku, laban gaga meda ubat batuk ka bisi codeine nya! Endang sebaka ubat batuk ka selalu dipinta aku ari lutor ma bisi sakit batuk. Ubat tu baru ngasi ba aku.

Nya meh dempa aku demalam - sekali maya jam pukul 5 lemai, udah nya empa baru jam pukul 10 malam. Patut jenak tindok demalam, nyu enggai enchelak asai mata pagi tadi!

*Ba menoa kami ditu, ma lutor enda nulis prescription, sigi enda ulih meli ubat baka ubat ka bisi codeine. Di Malaysia din, kenu enda meh ulih, tang bala farmasi, ni ka dipinta nuan, beri sida meh!

Meda Tanah

Tanah ka dipeda kami kemari, tanah bebukit. Bisi 20-30 minit kini ari pasar ka semak sekali. Manah ga alai nya, tang sunyi. Baka aku ti rindu alai ka sunyi, tau endar alai nya endor aku diau.


Enda nemu meh, enti bulih loan ari bank, alu enti nadai penanggul, endang bisi endar ati Doug meli tanah nya. Pemesai iya 40 acre, alu rega iya pen umbas iya ga ngira ekonomi kemaya hari tu.

Saduai dua iko tu, beranda kin, beranda kitu, endang puas endar bemain ba tempat nya kemari.Orang ka nyewa rumah ba tanah iya bisi nupi ukui enggau kuda. Rindang endar saduai meda jelu dua bansa tu.

Pagi hari satu tu lagi, Doug saduai menyadi iya betemu baru enggau realtor. Mayoh meh utai agi dikerandau ... ukai reti iya alu madah diri tebeli ka tanah ba rega dipinta orang ka nyual ...

Udah ngalih hari pagila, mupok kami pulai ka Galt. Lembau ngenang dudok ngelama 6 jam dalam kerita, nyu pedis tulang tungking!

Meli Rumah

Sapa meli rumah? Ukai aku, oiii!

Sapa kala meli rumah, alu rumah ka dibeli nya dianjong ngena trailer? Nah, ba menoa kami ditu, rumah tau dibeli alu dianjong ngena trailer! Rumah bansa tu dikumbai modular home.

Tu meh dipansa kami siang tadi maya kami ba rantau jalai ngagai menoa sida entua aku.


Rumah ka dibai trailer dua iti tu dibagi dua. Maya orang masang rumah tu lagi, baru dua piak tu ditampil ngambi ka nyadi sebuah rumah. Iya ka dibai trailer tu saiz double wide. Enti iya single wide, mina beguna ka sebuah trailer aja. Triple wide bisi meh. Iya ka besai sekali quadruple wide. Hehe, nya baru bendar nganjong, nyu empat buah trailer dikena mai rumah nya!

Diatu chukop macham stail bisi, manah endar peda aku. Muntang alu jampat dipasang laban utai nya endang udah sedia, mina ka dianjong alu disambung ba endor alai ka ngengkah iya. Tang orang ka meli modular home, enggai enda udah nyendia tapak alai iya - mesti ka bisi alai ai ari dapur enggau bilik mandi pansut, paip disambung ngagai lubang tangki jamban - ukai bakanya.

Kami diatu benong bemalam ba rumah entua aku. Udah ngalih hari hari satu tu lagi baru kami pulai. Kebuah kami kitu laban Doug ka betemu enggau menyadi iya alu saduai bepeda ka sebidang tanah ti ka dijual orang enda jauh ari rumah menyadi iya nya. Kira ka meli kenu, tang ngira ngelun duit ari bank, lembau ngenang.

Ila nampung cherita!

Hari Keterubah Musim Bunga

Sahari tu, 20 hb March, hari keterubah musim bunga. Ba California ditu, musim bunga endang tumu datai enti dibanding enggau menoa ka chelap agi. Ba menoa ka chelap endar, taja kalenda madah musim bunga udah berengkah ukai reti iya salji enda tau ngenyit nurun!

Musim tu meh maya iya dikerinda bala mayoh laban hari nadai entu chelap, mata panas pen terang manchar, daun ba pun kayu pen nyu udah nyumbok, pun buah pen udah bebunga magang tang ka bala ka bisi pollen allergies maya tu endang maya ti merinsa ba sida - gatal rekung, sendat idung, meresin ..

Aku berati ka bunga gladiola ba kebun mit depan rumah aku. Rindu endar aku meda gladiola udah nyumbok ari tanah alu enda teranti maya iya bebunga ila. Aku rindu meda sida kesulai, enggau indu utai bukai nutu sida bunga ba kebun aku. Taun tu aku bisi orang nulong aku bekebun, alu bisi ati ka nanam sida tomato, semengka, entimun, jagung, enggau chukop macham bunga bukai ti tau narit sida kesulai enggau burung (hummingbird) sebelah kebun aku.

Bah, kati enggau bala kita? Bisi betanam betupi? Kelebih agi maya ekonomi enda regas diatu?

Ragok

Aku baru udah bejako enggau lutur ba telipun. Pagi tadi, leboh aku bejako, ninga nyawa diri nyu ragok munyi. Penyakit aku tu bepun lemai hari tiga, udah bekau aku ka makai itit panggang. Aie, nyelai tu, ko aku meda rekong aku berasai gatal alu batuk. Enda patut minyak ari itit panggang ngasoh aku batuk, ko aku bejako kediri. Nadai ga makai itit maya iya kelalu angat!

Pagi siti, aku nyepi dak ba rekong nyu tebal, rekong pen pedis. Ooo, sakit tu. Pagi tu nyawa pen dah ragok. Nya kebuah aku telipun ka klinik ka ngaga appointment betemu lutur pagila, kenu, tang diasoh bejako enggau lutur dulu.

Nitih ka lutur, mayoh orang benong sakit baka enggi aku tu. Virus, ko iya, alu penyakit nya enda ulih diubat enggau antibiotics. Aku endang enggai endar makai antibiotics, ngasoh nyawa enggai makai, perut ka chirit.

Tat aja, ko lutur, anang udu bejako ngambi ka batang rekong ulih rest, makai ubat ibuprofen 600 mg empat kali sahari, engkurup enggau ai garam .... Enti munyi nya, enda iboh meh aku betemu enggau lutur. Ibuprofen agi ga bisi ba rumah, diambi maya ka pedis belakang bulan tiga taun dulu - apin ga ubat nya expire!

Tengah hari tu tadi, sepatut iya aku enggau group kami Bible Study ba gereja. Kinsil, madah diri enda ulih nurun laban rekong ragok, tambah mega bisi batuk. Enggai nyadi orang bukai kena rampit penyakit lagi!

Arap ka penyakit tu jampat gerai meh, lembau ngenang diri enda entu ulih tindok gasak batuk leboh malam hari!

Cherita Masak Masak

Siti ari pemakaika dikerindu aku iya nya itit panggang. Itit panggang ka selalu dibeli aku ari SF Supermarket enda jauh ari kami ditu, ba nyawa aku, iya ka pemadu nyamai ti kala disepi aku!

Tang kemari aku nguji manggang itit nunda resipi pangan aku, Lesley. Tak nyamai endar gamal itit panggang ba blog iya. Tambah mega chara manggang itit nya nadai mayoh macham.


Nah, tu penyadi iti panggang aku. Nyamai gamal iya? Iya ka bendar, itit tu patut dipanggang lama mimit. Agi mirah ba tulang. Nadai ngawa, simpan aja dalam oven maya ka ngangat iya alu mansau manah meh iya!

Ba nyawa aku, asai itit panggang aku nya alah ari ka digaga cina ba SF Supermarket. Huh, nganti aku belajar ari cina ba supermarket dia ila! Hehe, enti sida ngasoh aku tama ka dalam dapur sida lah!


Lesley endang sigi landik amat berapi, alu siti agi resipi ka diuji aku pagi tadi iya nya sardine puff ngena roti canai. Taja sardine puff tu manah gamal dipeda, iya ka bendar sardine melut mimit ari kulit iya!! Kelalu mayoh di-isi! Tang amat muntang ga ngena roti canai ngaga sardine puff. Tau digaga baru nya ila, ma bisi meli roti canai ari SF Supermarket.

Turkey pot pie tu digaga aku minggu nyin kemari. Aku tetemu resipi ka muntang amat ba bup mit siti, bup ka ulih aku meli ari library (clearance). Pot pie nyamai digaga alu tau disimpan dalam freezer nganti maya ti ka makai iya.

Enggai nyadi becherita pasal makai enti ka tubuh mengkang slim! Ila nyerita pasal diri ti ka keep fit!

St Patrick's Day

Sahari tu aku bekena ka baju enggau antin gadung laban ka enggai enda enggau orang ngeroh ka ai ngintu St. Patrick's Day. Tu meh maya orang bekena ka utai kaler gadung .. gari, barang kemas, tupi, pemakai pen dichelup gadung. Sapa kala ngirup beer gadung? Di Sacramento lemai tu lagi bisi parade alu bisi mega block party.


Bala anak nurun sekula bekena ka baju gadung mega. Ba sekula din, sida di-idang waffle dichelup gadung alu ngirup tusu dititik chelup pemakai gadung. Laban saduai ka laun datai ba sekula, enda ampit enggau orang makai scrambled egg gadung.

Corned beef enggau kubis, St. Patrick's Day 2008

Taun tu aku enda nyendia corned beef enggau kubis. Lembau asai tulang. Kemari aku bisi ngasuh Doug meli itit laban ka nguji ngaga itit panggang nunda resipi pangan aku, Lesley. Nyamai meh tak meli itit ka endang udah dipanggang tang enggai enda belajar manggang itit ka diri empu.

Apu, nyau lapar perut aku bejako pasal pemakai!! Jam diatu 11.55 a.m., patut perut nyau lapar!

Muzik ba blog

Ok, ka bala kita ka bisi ngengkah muzik baka Imeem, MyFlashFetish, MixPod tauka sebarang muzik playlist ba blog kita, anang ringat, au?

Aku sigi enda rindu ninga muzik tak ngenyit bebunyi leboh aku nyengok blog kita. Nyu puas begiga alai player laban ti ka madam iya. Enti alai iya ba atas, nyamai dipeda, enda ga entu ngawa. Enda jauh alai nginsut cursor kena nutup muzik nya! Keda nyu dibaroh din alai!

Tu cadangan aku ka bala kita, kita ka iboh ka penemu aku lah. Nya blog kita, naka ati kita enggau iya meh. Tang pelaba aku, ukai siko aku ka enda rindu ninga muzik bemain ba blog leboh ka ngabas blog bala kaban.

Aku bisi meh ngengkah Radio Kitai ba blog aku, tang code iya udah diadu aku ngambi ka enda otomatik bemain ma orang ngetu ba blog aku. Enti bala ka ninga, klik ga Play button. Kebuah aku ngengkah Radio Kitai dia, awak ka aku empu enda kiroh beklik ka Winamp leboh ka ninga radio Iban.

Tu meh cadangan aku. Ubahka code muzik player kita ngambi ka iya enda otomatik bemain. Engka keda enda nemu ngubah, tu meh chara iya. Perati ka code nya alu, giga "autostart" enggau "Loop".

autostart="1" tauka autostart="true", Loop="true"

Tukar "1" ngagai "0" alu "true" ngagai "false", Loop="false"

Ubah alu Save. Udah nya enda muzik nya atomatik bemain ma page kita nya dibuka enti code nya udah ditukar.

Besame Mucho, kena merindang kita. Klik Play button ma ka ninga, enti enda nadai meh iya memunyi!

Ulah Anak

Saduai dua iko tu sigi rindu endar betepan ka kutak, bakul tauka sebarang utai ti ulih alai saduai tama.

Gari ka udah ditikal, diambi pansut ngambi ka saduai ulih nepan dia. Rindang endar saduai bemain enggau bakul nya!

Maya Duncan baru umur dua taun, ka endar iya bemain enggau sida periuk ini iya ba Miri din. Datai ka besurung sida periuk alu dudok dalam periuk. Duduk dalam lachi ga siti utai ti dikerindu iya maya umur nya suba. Nyu ditanchang aki iya sida handle lachi kena nagang iya ari duduk dalam lachi!

Daddy udah bejanji enggau saduai - ka ngaga playhouse alai saduai bemain ba luar din. Cory (goose whisperer) nya meh tukang gaga nya ila. Daddy ka ngorder plan ngambi ka nyamai nemu pekekas, enggau penyampau pekekas dikena ngaga rumah nya ila.

Bisi hari saduai enggau Daddy camping dalam nya ila!

Bubur

Selalu iya pagi hari enam, ma tulang enda buruk, aku mandok asi bubur. Nya meh dipandok aku pagi tadi, asi bubur champur enggau babi pepat.

Utai bukai kena ngembal asi bubur nya, enda tau enda, ikan pusu guring, teluk guring enggau kacang masin. Tang pagi tu, aku ngasoh Doug ngerebus teluk masin .. teluk ansa digaga iya nyadi teluk masin taun dulu.

Ikan pusu ka diguring semadi nadai, nyu sedak ikan pusu ka agi dalam peket! Tang bala anak sigi rindu makai pala ikan pusu!

Sayau nadai agi Bovril laban nya ka ngasoh iya nyamai agi ba nyawa aku!

Eksersais

Kemari aku bisi ngetu ba Dollar Tree udah akuka pulai makai tengah hari enggau sekeda bala indu ari gereja kami ditu.

Kepuas aku musin kedai, dia aku tepeda ka DVD eksersais. Aku alu te-ingat ka post Mama Doyee madah ka diri iya Gerubi Tuai ketegal iya ka ka enggau orang kip pit (keep fit! )

Nadai gaga ga kitai enda enggau orang ngemiak ka diri, Mama Doyee! Enti enda diatu kemaya agi?

Meda rega DVD nya mina $1.00 siti, meli aku dua iti. Iiissshh, gambar ba kulit DVD nya enda ipak isi DVD! Asa asa ati meda video indu sexy ngulu ka work out! Gamal indu ka ngulu eksersais ba video nya baka ka diambi dalam taun lapan puluhan! Patut DVD nya murah! Haha. Video lama! Workout nya pen enda interesting!

Sapa kitai enggai tubuh ngesexy indu ba kulit DVD tu?!

Ba TV kami ditu mayoh endar channel orang besenam. Tang ma aku meda program tu, mata aku aja eksersais, tubuh enda engkebut ari kerusi! Ni tubuh ka slim!

Enti pasal eksersais, aku tu panas panas tai ayam! Suba ka enggau orang tai chi, kenu. Berapa iti enda video tai chi aku dia! Bisi dua tiga kali kini betai chi nunga TV! Udah nya ka enggau orang poco poco. Bekareh masang YouTube poco poco, alu bepoco nunga YouTube ba flat screen TV aku. Neh, baka tai chi nya tadi ga pengujung iya! Udah nya, ka enggau orang jazzercise laban pangan aku siko enggau orang alu mai aku. Datai ka diatu alu ga bedau ngerijista diri ba gym!

Perut nyu makin bunchit, er ... rindu agi eksersais mata nunga kumputa!