Keterubah iya aku enggau orang beforum tak rindu endar asai, lebih agi enggau bala orang ari Malaysia ti diau sebelah dunya. Chukop macam utai ti di kerandau, mayoh utai di pelajar tauka ka di temu ari ti begulai enggau orang ba forum.
Tengok ga asai ati ka ngiga bala Iban enggau berandau. Engka tak bisi ga bala Iban beforum tang maya nya nadai nemu sapa bisi ngatur forum. Udah bekau aku tetemu ka James, nya aku lalu meda bisi 3 iti forum alai bala Iban begempuru. Gagit endar ati terubah iya aku bekelala enggau bala ba forum tu. Tang siti utai lain dipeda aku ba forum Iban ari forum bukai ti endor aku udah enggau beforum.
Di peda aku bala nembiak Iban nadai mayoh utai berat dikerandau. Bisi meh berapa iko ti rindu berandau pasal politik tang ke bukai nadai bisi pengerindu, engka enda entu nemu kati ko enggau orang berandau pasal politik meh nya.
Batang randau ti dikerindu nembiak Iban, randau pasal bujang dara, randau pasal main bul, bisi meh randau bukai, randau ngerichau bisi meh nya dia. Baka sekeda ti rindu endar mantai ka randau pasal seks. Enti orang ti baru nyengok ba forum nya, kumbai orang ooh .. orang ditu rindu berandau ka utai baka nya neh .. laban datai ka 10 lambar enti enda lebih, pemanjai randau nya enti udah pasal seks.
Engka laban ti umur udah tuai meh nya, nya kebuah ti enda rindu meda randau baka nya. Ba penemu aku, nadai mai penguntong randau baka nya. Mina ngasoh sekeda ti nadai nemu malu jegak enda tentu pasal ... Enti sekeda ti rindu macha pasal pengawa seks orang bukai, patut nanya diri, nama kebuah ka macha utai baka nya? Bala ti mantai randau baka nya ukai nya nembiak umur 13 tauka 14 taun. Enti nembiak umur baka nya, enda iran aku laban ti baru iya ngasai ka tubuh diri angkat bujang serta dara. Tu bala udah lebih 20 taun umur... maya aku ngerara, wah, ringat sekeda, abis utai bukai dibangkit. Nya sigi ulah orang ti pandak runding ba penemu aku, bedau nemu sapa ti enggau ringat nya tadi, biak ka, tuai ka, nemu agi pasal topik nya ka, nya enggai laun nimbak serta nuduh utai mapap.
Ukai enggai, batang randau ti tebal agi nadai mai penguntong ti ngasoh aku lubah agi diatu ka beforum ba forum Iban. Nadai randau ti ngerindu ati aku dia. Mina ngabas serta merati ka ulah bala nembiak. Nama kebuah aku empu enda mantai randau ti ngerindu ati aku empu? Ukai nadai udah kala mantai, tang nya meh, nadai orang ti ka dibai berandau pasal utai ti lebih agi bisi reti. Nadai ko enggau meh, mensia ukai nya sama, pengerindu siko siko ukai nya sama.
Enda ngawa, diatu aku rindu agi betulis ka blog. Jako Iban aku pen nyau mansang pama meh! Heheh. Sekumbang ti udah betulis ka blog, mayoh endar ga orang ti udah enggau bekelala. Rindu agi bekelala enggau bala ti bisi blog, laban kitai sama meda, tiap iko ti bisi blog, mesti bisi utai ti ngerindu di tulis dia! Enda pia, Cuthess, Encha, Dara, Chris, Grace, Desmond, James, Bobby, Jerry, Vavai, Vynne etc? Heheh.
Aku pen rindu endar meda jako Iban di kerembai sertai di kemesai ba dunya blog. Enti di banding enggau bansa bukai amat lubah kitai. Blog dalam jako Tagalog bejumbuh dia peda aku, jako bansa bukai enda kira agi. Nya meh, kedung sekeda kitai bisi pengerindu nulis blog ngena jako bansa Iban aram meh kitai majak ka pengawa tu.
Apuuu....now i am being challenged to beloyar jako Iban...alah endar laban Puteri enggau Gerubi Tuai asai aku... aduh aduh.... apin pandai, eh bedau pandai aku, enda pia... empai pandai aku...hehehe
ReplyDeleteya meh puteri..betul ko nuan aku ka endar meda bansa kitai iban mansang baka bansa bukai lebih agi dalam dunia IT tok..laban kebalat agi dipeda aku maioh agi bansa bukai..aku taja enda tentu betul spelling jako iban bantai ke aja nadai ngawa neh puteri kitai belajar ari kesilapan kawan aku sama enggau ngajar suba madah enti ka pandai belajar ari utai ke salah retinya mula ari zero(0)..aku pen bisi ga ngabas forum iban nya meh aku meda utai dikerandau enda tentu narit ati enggai aku nyamai agi nulis blog..
ReplyDeleteia lah...
ReplyDeleteenda kala enggau orang berforum.
tang rindu maca forum.just maca aja
amat ko nuan...aku sokong!
Kala nyengok ruang forum Iban tang sekali aja udah nya ngetu. Nama kebuah? Kelalu maioh cerita petenah, nyadong laya, berandau ka skandal artis, etc. Tang nadai substance ti ulih ngemansang ka bansa diri ikerandau ka dia...
ReplyDeleteNyamai agi nyadong penemu diri ba blog diri empu.
Hai Puteri,
ReplyDeleteRindu endar aku macha utai ke ditulis nuan ditu. Amai munyi ko nuan, embiak kitai bangsa, minat agi bejako tauka nulis utai ka enda entu temu tuku ari ka berandau ke utai ke lebih berat agi. Nadai kitai nemu nama kebuah iya nyadi bakanya, kadang-kadang bisi ga siko dua iya ka nulis utai ka endang sigi patut dipejurai ka, tang iya semina nangka nya aja, nadai agi orang bukai ka nampung.
Helo...hihihi...em enda listed nama aku ne???? ringat tuk.....hahaha nadaila....betundi aja....amat munyi ko dik nya lam forum iban nya ta utai ti sengapa, mapap ke mayuh agi.....hihihi....engku...udah aku nguji ka ngena jaku iban lam blog aku tang bangat enggai nyadi sepi aku, ta nyelai asai ia..... bulan 4 tuk ila engka aku start ngaga special post lam bahasa iban laban ka nganti diri bulih kerja.....
ReplyDelete