Cherita lemai 30 hari bulan dua belas

Dua iti ari empat iti DVDs ka diorder aku kutai udah datai.

Sahari tu aku nadai hari meda videos nya laban ti ka bekemas. Pagila kami menyanak mupuk ngagai Los Osos, tunga menua sida entua aku. Baka selama kami driba kin alu penyauh menua nya ari rumah kami kira ka 6 jam nepan kerita.

Entua indu aku bisi nyebut pasal makai ba restoran kena ngintu taun baru. Nadai program bukai kami malam 31hb. Meda tv enda ga ulih laban menua alai barn kami ba Los Osos bebukit alu enda entu ngangkap channel TV enti enda ngena antenna TV ka tinggi tauka ngena satellite. Berapa kali udah nyebut ka mai satellite receiver tang Doug lembau amat bejelangkit masang satellite dish. Ukai nadai satellite dish lama ti tau dipasang alu ditinggal din. Ka pan enda meda video aja kena ngerindang diri empu!

Lelengau amat aku ka sida apai indai enggau bala menyadi enggau ipar aku maya dia taun. Sida selalu bebarbecue malam 31hb. Selalu iya ba rumah apai aku. Indai aku tukang nyendia api kena orang betunu, alu sida ka datai mai sida sayap manuk enggau sida babi ti ka ditunu. Enti kami enda mindah, betunu meh kami menyanak alu bisi nunu merchun mimit alu ngirup ai pengayu! Agi bisi ai pengayu dibai ari Sarikei taun nyin kemari!

Bah, nama program bala kita ti nganti taun baru?

Selamat taun baru 2010 nuju kita semua! Arapka ba taun baru tu kita bulih berkat, pengerai enggau pengelikun dalam semua pengawa.

Alau ... Part II

Lemai kemari aku nerima call ari apai aku. Maklum lah diatu orang mina nekan nama aku ba contact list iya alu datai ba aku call orang! Tang baru nyebut "Alau, apai nuan tu!" phone call alu putus. Kebuah iya putus bateri ba phone iya mati. Dua kali orang nguji call tang alu ga enda besambung. Pengujung iya aku call iya balit.

Paduhal orang minta beli bateri kena nganti enggi iya ka jai! Ku iya, di Miri din nadai nyual bateri manah. Iya bisi udah meli tang enggai dichas ga bateri phone iya nya. Sahari tu telipun ga orang baru. Meda nya iya, aku alu call iya balit ba lumur rumah. Sekali tu iya ngasuh aku ngirum charger enggau bateri! Apu! Aku madah aku mina ngirum bateri laban charger nya ragak, alu enda ulih tama manah ba envelope. Aku enggai declare utai dalam envelope nya phone accessories! Ninga aku munyi nya, iya alu madah diri ka meli charger baru. Pagi tu ke pasar, ku iya. Engka tak charger jai. Dua kali ga iya udah nganti charger nya, ku iya.

Bateri ka diasuh orang meli baru udah diorder aku ari eBay. Murah, enda bulih $6 rega Motorola bateri nya. Tambah mega free shipping. Nya utai dikerindu aku.

Lebuhka begiga ka bateri ba eBay aku sempat ngiga ganti touch screen iPhone entua indu aku ka kerimpak. Labuh ba dapur alu kerimpak touch screen iPhone orang. Kapa orang kiruh nganti touch screen, biar iya meli baru! Doug orang tukang ngumpul ka kerimpak nya! Untung asai orang bulih iPhone, enda ngawa kerimpak, ku iya!

Meda nya bisi video ba YouTube ngajar chara nganti touch screen, alu tak enda pedis iga gamal chara nganti screen nya, meli meh aku siti. Doug orang nemu agi betukang ari aku! Kapa enda iya ngadu nya ila! Enti pasal jailbreaking iPhone, nya baru aku nemu!

Au, pulai ngagai cherita apai aku ti ka ke pasar meli charger baru .... anang meli phone baru ku aku madah ngagai iya. Nginjau ari bala menyadi aku ti bisi spare phone. Lagi aku mai ari tu phone ka nuan, ku aku madah ngagai iya. Mayuh spare ditu! Iya ka dikena iya diatu pan utai diberi aku. Rindu iya ngena phone nya laban enda canggih iga, tambah mega bansa flip phone. Orang tuai baka apai aku enda tau ngena utai kelalu canggih .. kompius orang!

Gaga amat orang ninga rita kami menyanak bisi pulai ke Miri baru musim panas 2010 tu ila.

Cherita Semadi Nadai Hari Minggu

Sahari tu kami menyanak enda nurun sembiang ... dani laun, perut lapar ... Utai ti digiga nyawa pagi tu roti canai enggau kari. Berengkah meh aku nyendia roti canai (di import ari Malaysia, jual ba frozen section ba supermarket), alu ngena kuah kari dalam tin Yeo's. Pama meh, semadi nadai! Kenyang ga perut!



Meda diri makai breakfast laun alu enda makai tengah hari. Tang lebuh perut engkeriuk tak tenguk ka babi panggang. Paduhal agi belala! Babi ka bisi dalam peti ais mina kerigai babi. Nya tau meh dipanggang!

Kena ngerindang bala anak tengah hari tu tadi, aku masang video lama My Little Pony ka saduai. Nyamai diatu laban bisi meli VCR/DVD combo baru kena nganti VCR lama ti udah rusak .. enda ga video lama tebasau enda dimain!

Berunding aku chara ngopy video Farewell to the King. Ni nya ulih enti enda ngena software baka TV tuner card tauka ngena video stabilizer/clarifier .... endo berapo! Aku alu ngabas Amazon, meda enti bisi wayang nya dalam DVD. Bisi! Nyau meh aku ngorder siti!! Siti aja penyalah, ku jaku ka meli siti DVD, tang pengujung iya 4 iti DVD , wayang lama magang dibeli! Siti ari cherita ka dibeli nya wayang cina lama.



Sapa kala ninga cherita One Armed Swordman? Ahhh, bala kita ka serambau enggau aku nemu kita cherita nya! Wang Yu nama pelakon cherita nya!

Naka tu aja cherita semadi nadai aku sekali tu!

Alau ....

Demalam aku bisi telipun ngagai menyadi aku di Miri din. Sida menyanak baru pindah ngagai rumah baru alu ba endur sida nya bedau bisi disambung tali telipun ari Telekom. Aku jarang ka nelipun lumur hand phone orang di Malaysia laban rega call nya dua kali ganda rega call ngagai lumur rumah. Ka pan enda call ngagai lumur hand phone iya laban ti ka bejaku enggau iya alu ka meri sida menyanak jaku Selamat Hari Krismas.

Ba pengujung randau kami duai aku alu ngasuh iya nyimpan lumur hand phone enggau lumur rumah aku ba hand phone iya. Aku madah ngagai iya enda mar call ari hand phone, alu enti bisi emergency anang nganti aku call sida ... sida tau meh call aku ari hand phone sida. Aku mesan ngagai iya ngasuh iya ngisi lumur aku ba hand phone apai aku mega.

Sebedau aku ngelengka call nya aku alu ngasuh iya nguji nelipun aku ngena hand phone iya. "Eeee, jampat ga iya connect neh!" ku iya, lebuh iya nguji nelipun aku ngena hand phone iya.

Aku tedani ari tinduk maya jam kiraka pukul 3.45 pagi! "Alau? Apai nuan tu!" ku munyi nyawa orang ba ujung telipun! Apu, enda nemu kitai tu tengah tinduk malam sida nya?! Kesal diri aku ninga hand phone aku memunyi tengah malam alu meda lumur incoming call nya ari Malaysia. Paduhal orang nguji call ngena hand phone! "Nyamai amat bakatu laban direct line," ku apai aku agi.

Enda lama kami berandau laban enggaika mar. Iya ngena Celcom, alu aku enda nemu ni pengemar overseas call ngena Celcom. Enti Digi nemu aku, amat enda mar. Mar agi local call! Enda lama udah aku ngelengka ka telipun, memunyi baru ga telipun aku nya! Ari Malaysia ga! Sekali tu ipar aku ka biak sekali. Rising rising orang ka bejaku ba telipun, orang sama nguji ngena hand phone ngaga overseas call! Rami amat munyi bala sida ba rumah apai aku lemai nya. Ngabang kedua kali ku apai aku maya kami ka berandau ba telipun.

Tiap kali aku pulai ka Miri, aku sigi madah ngagai bala menyadi, ngagai apai indai ... telipun ba rumah apai aku nya bisi IDD. Lumur hand phone enggau rumah aku endang bisi dilekat ba dinding ngimbai telipun. Ma bisi emergency, telipun aja, tauka barang maya ka bejaku enggau aku kena aja telipun ba rumah nya. Sekali pan nadai kala ngena. Berapa kali enda apai aku tu udah masuk spital taun nyin kemari enggau pun taun tu tadi, nadai meh orang madah ka aku.

Pelaba aku, diatu orang udah nemu ngena hand phone nelipun aku, engka bisi bala telipun ma bisi penusah ila!

Selamat Hari Krismas 2009!

Tumu mimit kami menyanak nurun sembiang Christmas Eve demalam laban kami duai Doug nulung sekeda orang bukai ngelaluka penatai orang ka bisi nurun sembiang pukul 7.00 malam nya. Rami amat orang peda aku tang taja pia, rami agi orang ka datai sembiang pukul 3.00 p.m. enggau pukul 5.00 p.m. lemai nitihka ditusui bini pastor.




Kami menyanak endang udah tumu makai sebedau kami nurun sembiang demalam, tang lebuh ka pulai sembiang tak lapar baru perut! Nya meh alu nunu garlic bread ti dempa enggau smoked salmon.

Krismas taun tu aku nadai manggang manuk kuluk. Agi bisi asai ba nyawa manuk kuluk ti dempa aku maya Thanksgiving bulan nyin tadi!

Kemari aku ngasuh Doug ngetu ba pasar meli kaki ketam, kerang, oysters enggau salmon steaks ... tang tengah hari Krismas tu, perut mina ka makai ketam enggau oysters! Berentak aku makai ketam enggau oysters! Oysters meli ka muntang, iya ka dalam butul. Doug udah tumu madah iya mogok enggai mela oysters ti agi dalam kerubung! Amat mayuh endar pengawa ngupak kerubung oysters!

Bisi mega nyendia crackers, cheese, enggau guocomole dip tang enda ditegu aku! Sida kerang enggau ikan salmon galau aja ... enda alah agi!




Kasih bala anak laban nadai mayuh presents taun tu. Mina dua iti siku ... iya ga aki-ini saduai enggau aunty saduai mina meri duit. Gaga saduai ngenang diri ka shopping milih ayam ka diri empu!

Arapka kita bulih berkat ari Tuhan kitai, ti ada ngambika ngelepas kitai mensia, musim Krismas taun tu!

Cherita Christmas Eve

Tu gamal prujek aku tengah hari kemari. Babi panggang! Resipi manggang babi tu nyamai ditunda. Enti kita ka nguji ngaga iya ditu alai resipi iya. Siti aja kurang babi ka dipanggang aku nya ... kulit iya enda chukup "rangup". Pelaba aku laban kulit iya enda chukup rangkai maya aku manggang iya. Taja pia, kiraka nyadi prujek aku nya!



Demalam kami menyanak bisi pansut meda lampu Kristmas ba rumah niang Judy Sassman. Judy udah ninggal kiraka 3 - 4 taun, nyu enda ingat agi aku. Taja iya nadai agi, bala anak enggau laki iya agi nyambung pengawa sida ka ngias rumah sida tiap Krismas. Siti utai ti narit temuai ngagai rumah sida tipa taun iya nya Memory Trees ti disedia sida alai orang mayuh tau nulis nama orang ka dikesayau sida ti udah ninggal ba ornament ti disedia sida. Tiap taun ornament nya deka digantung sida ba Memory Trees. Pun kayu ka besai sepiak kiba, ka bisi angel ba atas nya enggi Judy.




Chelap amat hari demalam. Bala anak enda nemu chelap labanka beranda kin kitu bemain ngelingi lampu Krismas dia. Mayuh orang datai dia demalam, alu nindik ga kami kia. Malam tu lampu nya deka dipadam pukul 8.00 malam laban ari 1hb Disember kutai lampu nya udah dipasang, alu tiap malam sida nganti orang ka datai nemuai ngagai sida.


Doug mina kereja setengah hari sahari tu. Ku iya, iya ka ngetu ba kedai meli sekeda present mit ka bala anak sebedau iya pulai. Lebuhka ngira utai ka udah dibeli, er, nadai endar ga! Kasih bala anak asa asa ngiga present mayuh baruh Christmas tree!

Kami nurun sembiang pukul 7.00 malam malam tu lagi. Kami "gawa" (greeters) ngelalu penatai orang ka bisi datai sembiang malam tu lagi.

Ka bala kita ka ngintu Krismas ... arap ka pengawa kita mujur alu ingat belama kebuah kitai ngintu pengerami tu.

Kristus Pengelepas kitai udah ada!

Lampu Krismas

Semadi nadai pengawa lalu meda hari nya manah, aku pansut ka luar demalam alu ngambar rumah kami ti dihias enggau lampu.

Lampu pelip ti begantung ba luar nya baru ujung minggu tu tadi masang. Duncan nyu ituk ngasuh Daddy ngantung lampu pelip nya. Enti dibanding enggau rumah orang bukai ngelingi kami ditu, semadi nadai enggi kami nya!

Mayuh endar rumah orang dipansa manah manah lampu Krismas, nya meh selalu nyebut ka raun lebuh malam hari alu ngambi gambar sekeda rumah nya, tang alu ga enda.

Bah, nurun sembiang tengah malam (Christmas Eve) bala kita? Kami menyanak nurun sembiang pukul 7.00 malam pagila (Christmas Eve). Jam nya ka nyamai agi mai anak mit sepi aku taja bisi dua iti service tumu agi ari nya. Udah nya bisi ga service pukul 11.00 pm. Ngena baju tinduk kita datai, ku sekeda ngenduan bala ka rindu nurun sembiang pukul 11.00 malam.






Jeles amat aku ninga Lyana enggau anak dara iya begaga ka biskit!! Aku tu ngelusu, alu naka iya biskit bisi, ulih meli magang.

Kemari Doug bisi mai sekutak biskit - biskit digaga colleague iya. Wahhhh, home-made cookies! Rindu endar aku nyepi cookies siku tu laban enda manis iga! Nya ka ngasuh aku begedi meli biskit ditu - kelalu manis! Ka tingkil asai ngeli ngenang pemanis biskit.

Enda nemu bisi enda tulang dianjung ngaga biskit sahari tu. Er, benung manggang babi!


Merry Christmas!

Meda video & meda bup resipi

Ari kemari bala anak kiak kiak ngasuh Daddy masang dvd player ka baru dibeli. Nadai hari, ku Daddy nganu saduai.

Pagi tadi nyu aku tukang pasang - nasib ga nadai pedis! Aku tu ukai bansa ti ka bepeda ka manual sebedau masang utai, tang nasib ga manual nya bisi gambar, alu nadai mayuh utai disambung!

Saduai tu enda milih utai dipeda, video ka dikerindu tau berapa kali meda, enda nemu leju.

Udah nya aku alu masang DVD player/recorder & VHS combo ba tv ba ruang tamu. Tu nyamai agi masang. Siti aja HDMI cable ti dikena. Udah nya kena ngetest main cherita kartun Zorro (VHS) ka bala anak. Gaga orang. Beturut iti video dipeda!



Lebuhka enda enggau bala anak meda video, bepeda ka bup resipi ka dibeli aku kemari. Akai, rindu amat meda gambar utai dempa dia!! Besemangat asai ka nguji! Tak enda pedis gamal manduk utai dia!

Tang ukai resipi ba bup nya ti ka diuji aku dulu. Aku ngasuh Doug ngetu ba supermarket cina lemai tu tadi, meli babi kena ngaga babi panggang. Lemai tu tadi aku bisi tetemu ka resipi babi panggang, baka babi panggang ka selalu dipeda kitai begantung ba kedai kupi cina! Nah, pagila baru aku ngaga babi panggang nya!

Bah, udah lapar asai perut aku ... ka makai agi!

Tengukka dim sum

Ari hari enam kemari aku udah madah ngagai Doug - hari satu tu lagi, kitai ka Rice Bowl makai dim sum, au? Bala anembiak sekula udah berengkah chuti Christmas alu sahari tu endang hari Doug diau.

Mupuk meh kami menyanak ka Rice Bowl. Kami enda kala nganjung diri makai dim sum ba Rice Bowl enti enda ujung minggu. Sunyi amat restoran nya enti dibanding pagi hari minggu. Tang restoran nya endang bisi nyendia dim sum tiap tiap pagi.

Masuk endar Duncan makai pulut (gulai lap chong, babi pepat, kulat) dibungkus enggau daun lotus. Denice mina nyeput mimit tu, mimit nya. Milih endar. Agi belala amat ka asi pulut nya, nyu ngorder ka dibai pulai!

Pulai ari restoran kami menyanak limpang ba Costco sebedau pulai ka rumah. Nadai entu utai digiga tang ma udah tama kia, endang sigi bisi mai utai pulai. Nama utai dibai? Smoked salmon sebungkus, dua butul Nutella, setin Tang, sebuah dvd player ka bala anak laban iya ka ba bilik sida udah jai, alu siti dvd player/writer and VHS player combo ka aku. Er, lama udah plan ka meli siti, alu lebuh meda rega tak betul sahari alu mai siti pulai. Bisi cherita lama ba VHS ti ka di copy ngagai dvd. VHS player kami endang lama udah jai. Doug mina mut mut aja.

Siti aja utai diketenguk aku tang enda tegiga aku ditu enti aku empu enda ngaga. Kek buah. Bansa ka digaga ipar aku siku. Siku nya sigi landik amat ngaga kek buah. Kek buah ditu, chiss, enda nyamai! Ka pan aku ngaga tang nadai resipi, tambah mega enda kala ngaga. Enggai masau jam alu enggai frust ma utai digaga enda nyadi!

Ujan enggau be-embun hari ba rantau jalai maya kami pulai tadi. Nasib ga enda jau iga pejalai. Enti ngenang lembau amat nengah jalai besai enti hari jai.

Bah, udah besedia amat bala kita ti ngintu Krismas taun tu?

Anak, Daddy, Mayau

Bala sida Lyana, sida Lysther, sida Cuthess, nyu bebungkur ngetat diri chelap gasak salji tebal ba meua sida din. Ba menua kami ditu, bala anak nyu bemain ba luar bakaka ukai muusim chelap. Enti nitihka kalender sigi agi musim gugur pan ditu. Pagila, 21hb Disember, baru iya berengkah musim chelap. Sahari tu, enda entu chelap hari nya meh bala anak bemain ka basikal, bemain ka scooter, enggau bemain enggau wagon saduai ba luar din.



Gambar Duncan enggau mayau tu diambi aku ujung minggu nyin tadi. Iya sigi rindu endar beberap ka mayau tang mayau enggai entu diberap iya laban kelalu kasar. Suma ulih diberap Duncan pemesai enggau pemerat mayau kami nya diatu.

Kemari kami duai Duncan meda gambar mayau maya iya baru diambi kami bulan enam tu suba. "I miss the small Nikki", ku Duncan. Lebuh kami pulai ari Miri bulan lapan tu tadi, mayau pan nyu enda dikelala agi pemesai iya. Diatu enda ibuh sebut agi, kira ka udah full grown. Taja pia, agi mansang iya nya.

Denice enda ibuh dianti begambar enggau mayau. Agi takut. Ma meda mayau dalam rumah, beguai orang niki kerusi. Anang ngangau iya duduk ba mija makai seagi mayau nya ba dapur. Endang agi engkutung duduk ba kerusi sofa orang takut ka mayau!

Naka tu aja cherita sekali tu. Have a good week!

Christmas Bags

Tiap taun gereja kami nyendiaka Christmas Bags ti diberi ngagai bala indu (enggau anak sida) ka diau/belindung ba Medows Depot.

Medows Depot, enda jauh ari gereja kami, iya nya siti alai (non profit) bala indu enggau anak sida ti kena dera tauka tasah tau belindung semadi ka nganti pengidup sida berubah nyadi menyana agi.

Aku empu nadai kala kia tang menua nya endang selalu dipansa. Sinu endar ga ninga sekeda kitai indu ti tepaksa belindung ba endur baka nya laban pengidup sida nadai temu tunga laban ka kena perinsa tauka endang nadai alai diau labanka kena buru laki sida ... Tempat nya endang alai sida diau sementara aja. Sida diperansang ngambi kursus enggau ngiga kerja ngambi ka ulih bediri ba kaki diri empu baru alu enda bepanggai ba tulung orang agi.

Utai ka disimpan kami ba bag Krismas iya nya utai baka shampoo, pencuci pinggai mangkuk, sabun, berus gigi, ubat gigi, bup tulis, stukin ... nadai tak berega iga tang semadi nulung mimit meh iya.

Puji Tuhan laban enti dibanding enggau pengidup bala sida ka diau ba Medows Depot kitai tu sigi kaya amat.

Christmas Carolling

Rajin amat pengajar sida Denice saduai Duncan. Tiap iku nembiak ba kelas sida bisi nerima stukin dihias enggau gambar, alu di-isi enggau ornaments digaga bala nembiak, enggau sekeda present mit. Aku sempat ngambar bala nembiak lebuh ka datai ba sekula tadi.

Bala nembiak nadai program bukai sahari tu, mina carolling, meda video, enggau Christmas lunch. Minggu baru berengkah chuti sida datai ka 3hb Januari taun baru tu ila.



Bendar kami bejalai ari sekula ngagai tempat endur kami carolling. Baru iya meh aku bejalai ngemendar nya ba menua Galt ditu!

Keterubah iya kami ngetu ba Agnes', rumah orang tuai, udah nya bejalai ka Heritage Mobile Estates, alu ka penudi endar ngetu ba Golden Living Center (nursing home).

Hari pagi tu be-embun tang enda chelap iga. Rindu ga enggau bala anembiak carolling. Sinu aku meda bala orang tuai ka diau ba nursing homes ... arap ka teperindang alu diberkat lebuh ninga bala anembiak mai lagu Krismas.

Sigi beberkat amat kitai enti kitai bepengerai alu begulai enggau kaban belayan kitai ti dikesayau musim Krismas tu.

Jingle Bells

Sahari tu tema ba sekula sida Duncan & Denice iya nya Jingle Bells. Bekareh meh aku ngiga bells kemari kena aku ngias saduai sahari tu. Bisi meda tenggak bells? Ahh, nya utai digaga Mami saduai!

Topi Elf nya ulih meli. Kebuah milih topi nya laban bisi bell begantung ba ujung topi nya.

Tema hari satu tu tadi, Hat Day, hari dua, Red and Green, hari tiga, Sports, hari empat (sahari tu) Jingle Bells, enggau pagila, Snow Day. Gaga endar bala anembiak laban sida tau enda ibuh ngena school uniform. Minggu nyin lagi chuti bala anembiak sampai 3hb Januari taun nyin lagi.

Aku pan enda teranti ka bala nembiak chuti - lelak udah, nyu lembau asai dani tumu tiap pagi!

Burung Bangau

Sandhill Cranes (Grus canadensis)

Ensanus lebuh aku nurun ngambi anak pulai sekula aku tepedaka sida burung bangau (sandhill cranes) ba padang semak simpang rumah aku.

Sereta aku datai ba rumah aku alu ngambi camera alu mupuk ka simpang ngambar sida bangau. Bala anak nganti dalam kerita dipark ba mua gate padang alai burung bangau. Sayau amat aku enda ulih ngambar sida bangau semak agi ... takut bangau meda aku, tambah mega ni alah trespassing ba tanah orang!

Pagi tadi aku meda agi dia sida burung bangau. Geram aku meda! It's at times like these that I wished I had a much better camera! One that can zoom in a lot closer! Geram!

Gamal Hari

Tu meh gamal hari kami pagi tadi. Gambar diatas diambi urung pukul 8.00 - 9.00 pagi. Taja gamal hari nya bakanya, hari enda entu chelap iga enti dibanding enggau hari seminggu ka udah.

Ku Virginia, maya iya ka datai ngambi quilt iya pagi tadi, hari ba alai iya din nadai bisi embun, nya ti ngasuh iya tekenyit lebuh ka datai ba menua kami ditu meda embun ngenebal nya.



Lebuh aku datai ba rumah udah ka nganjung anak nurun sekula/suping ba supermarket, aku meda 2 iku burung hummingbird betitih ka pangan diri. Beguai meh aku nganjung sida handbag enggau barang ka dibeli ari supermarket tama ka dalam rumah alu ngurung mayau aku ti nganti ba mua pintu. Kutai burung lari meda mayau aku nya.

Hummingbird ka indu enda takut meda aku, tang ka lelaki ... terbai tunga aku sekejap udah nya beguai terbai lari. Ni nya ulih digambar. Iya ka laki terang agi curak bulu iya, nya ti ngasuh aku geram labanka enda ulih ngambar nya.

Diatu jam udah ngalih hari, mata panas pan nyu udah pansut - embun pan udah mupuk lesap.

Busy!

Busy apa?! Busy ngadu quilt Virginia, kenu. Sebedau Thanksgiving tadi Virginia, indai tuai orang, udah nganjung quilt iya ngagai aku. Tang aku ka kiruh enda tentu pasal alu enda diadu quilt iya nya. Hari tiga tu tadi iya bisi telipun nanya pasal quilt iya. Kasih tudah, nganti senganti ...

Dia aku alu madah ngagai iya hari satu tu ila iya tau ngambi quilt iya nya. Nya ti ngasuh aku berumban sahari tu ngadu quilt nya ka iya. Nasib ga demalam kami udah nurun sembiang (laban bisi Children's Christmas program), alu sahari tu ulih lah nembu quilt Virginia.

Kiruh ku jaku, sempat limpang ngaga antin sepasang, edit gambar, upload gambar ngagai Facebook ... aku tu mudah distracted! Kelalu mayuh utai ti tau ngerindang ati!

Dua iti lagu Krismas

Keterubah iya aku ninga lagu "Mary, did you know" dinanyi ulih Kenny Rogers enggau Wynona Judd.

Leka lagu nya ditulis Mark Lowry, alu muzik iya ditulis Buddy Greene. Aku rindu ninga lagu tu laban leka lagu nya besai endar reti ba aku, tambah muzik iya manah amat didinga aku. Ba video tu Mark Lowry empu mai lagu nya, alu David Phelps, siku ari penyanyi back up.




Lagu O Holy Night lagu iya ka pemadu dikerindu aku ari semua lagu Krismas! Aku rindu amat lagu tu dibai David Phelps. Munyi ku orang kemaya hari tu ,nyawa siku tu "power" amat!



Merry Christmas, everybody!

School Christmas Program 2009

Demalam sekula bala anak bisi ngatur Christmas Program. Laban sekula sida nya mit, tiap iku nembiak bisi enggau program nya.

Bala sida nembiak Gred 1, anang enda enggau ngeruh ai aja .. sekeda nyu ngeriut mua .. belagu pan enda .. semadi aja jenuh bediri ba pentas! Duncan naka lagu ka temu iya bisi mulut engkebut, ni ka enda temu leka enda memunyi iya. Umbas iya ga pemanjai program sida nya demalam.

Siti aja hal demalam .. microphone enda berapa; kadang kadang dinga kadang kadang enda nyawa bala nembiak ti belagu solo. Dua iku nembiak dia landik endar dinga aku, bisi endar bakat belagu.

Principal sekula sida nyadi conductor musical nya demalam. Principal sida nya sigi bisi music degree, endang landik.

Aku nesal enda mai kamera ka manah agi. Udah mupuk baru tingat kamera manah enda dibai. Nya mata bala nyu baka mata batu! Sekeda apai indai ti gagit amat, tumu datai laban ka duduk ba mua alu ngambi video. Manah amat ga pikir baka nya! Enggi kami video recorder bisi tang enda dibai laban bateri enda entu manah agi. Taun nyin ila lah ...

Ujung minggu tu lagi gereja kami bisi ngatur krismas program bala nembiak Sunday School. Denice saduai Duncan nadai enggau orang laban aku ka enggai kiruh nganjung saduai enggau orang pritis!