Thanksgiving 2008

Thanksgiving taun tu aku manggang manok kulok nitih resipi china - ngena kicap, oyster sauce, 5-spice, enggau gula. Bisi ga dianjong manok kulok aku taun tu! Mina siti aja ti bisi ngasoh geli ati.

Manok kulok dipanggang semalam-malam ngambi temu mansau ma udah pagi hari. Tang pagi siti dani, ni nadai entu bebau manok kulok dalam oven? Enda patut! Pintu oven dikebak, talam alai manok kulok dipanggang diangkat pansut, bungkus aluminium foil diangkat - jeng, jeng, jeng! Nama manok kulok nya tak agi puchat deh? Heheh, paduhal apin mansau! Oven diset ba 170F enda chukop angat! Ko pangan aku ka madah ka aku, enggi iya dipanggang ngena temperature 150F, mansau manah ga. Engka oven aku sigi enda manah agi, kini. Nyau meh manok kulok nya dipanggang baru, sekali tu enda bebungkus agi. Maya iya nyau udah mansau manah gamal iya nya baru ngebab atas manok kulok nya mimit enggai ka angus.


Dua jam aja, manok kulok tu mansau manah. Nah, enda stidi gamal iya? Nyamai ko entua laki aku!

Entua laki aku nyirap (carve, ko orang ditu) manok kulok. Siti aja utai aku nadai nyedia kena makai manok kulok tu. Cranberry sauce. Meda tu dipanggang stail china, nadai nguna cranberry sauce kenu. Enda puas ati entua indu aku laban nadai cranberry sauce kena iya makai manok kulok iya! Hehe, hari siti iya meli berapa tin enda cranberry sauce! Agi mayoh teda manok kulok. Bisi dikena makai malam, tengah hari ari siti ... datai ka pagi tu, dempa enggau roti paun - digaga ka sandwich.


Aku bisi mega manggang leg of lamb. Ooooii, nya baru sedap! Aku sigi rindu endar makai lamb!

Green bean casserole.

Turkey stuffing, nitih resipi Jamie Oliver. Nyamai!

Enda alah agi, ko entua aku!

Entua indu beambi ka video. Ba sepiak kanan nya anak menyadi Doug. Siko tu anak tunggal, nadai menyadi bukai, alu diau enggau sida entua aku.

Nya iya, sempat ngerias diri anak dara aku tu! Lipstick nyu abis nyau dibai makai manok kulok. Minta dichelup baru - ini iya ka rajin nyelup ginchu nya ka iya!

Hari siti, dikumbai orang ditu Black Friday. Bala ka rajin endang udah tumu bebaris ba moa pintu kedai ka paling favorite, ngambi ka ampit meli utai ti on sale. Sekeda endang ari pagi hari empat (Thanksgiving) udah camping depan kedai - takut enda ampit utai ti dikedeka ati. Doug enggau apai indai iya pukul enam pagi mupok. Aku nitih dudi, urung pukul 10.30 a.m. baka nya. Kapa enggau orang berebut tumu! Agi ka tindok leka mata!

Aku mina meli sida gari enggau sepasang kasut but (another one, oi!). Oh, bisi mega meli pua, enggau dua keping DVDs. Hari siti (hari enam) nurun baru aku shopping laban agi bisi sale, tang enda ngemurah rega utai maya hari lima. Mina meli gari aja aku. Enda lama udah datai rumah, nurun baru enggau Doug. Sekali tu kami duai meli flat screen monitor 19", alu meli Epson all-in-one printer (ulih print, copy enggau scan). Ka meli laser jet, tang iya ka manah kelalu mar ga. Bedau sanggup ka ngeluar duit ngemayoh nya! Tadi aku browsing sekeda websites ngiga desktop pc, engka bisi rega ti tau narit ati. Isssshhhh. Tentu lah bisi! Pagila (hari Satu) dikumbai orang Cyber Monday, maya orang bebeli ka utai online udah ka shopping ba pasar! Sekeda websites endang udah sale berengkah hari tu.

Nagang diri, oi, enggai ka puas mayar bil kredit kad ma udah datai lagi! Enggai ngutang ari kredit kad company! Ma bil datai, bayar abis!

Sahari tu aku udah ngantung Christmas wreath ba pintu enggau atas fireplace. Lampu pelip, apin laban nadai entu hari! Sekeda jiran aku ditu, udah bepasang ka lampu pelip ngelingi rumah sida. Christmas tree pen udah dijual, tang apin ka meli. Engka ari dua tu lagi.

Naka tu cherita aku sekali tu.