Makai tengah hari ba Secret Recipe

Tengah hari tadi aku bisi betemu enggau Indu Rumah Panjai, anak iya Daphne, Sebugey, enggau Andan ba restoran Secret Recipe. Kami duai Indu Rumah Panjai nadai betemu enggau pangan diri tiga puluh taun! Sereta kami badu besekula ba Tanjung suba, kami alu nadai kala betemu enggau pangan diri. Gaga amat aku macha mesej ari iya kemari madahka diri bisi nurun ari Bintulu alu mai aku, Andan enggau Sebugey betemu enggau iya.

Daphne, Indu Rumah Panjai enggau Sebugey

Andan laun mimit datai labanka ngambi anak iya pulai sekula dulu. Dulu meh kami empat begambar!   Udah Andan datai aku ngenduan iya pasal uban iya ti nadai ayan agi!  Lawa gamal buk kitai!

Andan seduai Sebugey nadai ngorder utai makai, mina ngorder utai di irup aja. Engka lapar meh Sebugey laban udah kami badu ba Secret Recipe iya alu mai kami ngagai tempat siti makai rujak enggau cendul.

Perut agi kenyang ni nya bisi dianjung makai rujak! Makai ga tang enda ngemendar enti perut agi lapar! Daphne enda enggau kami laban udah maya iya pulai kereja.

Diatu laban ti udah nemu bekuntik enggau pangan diri, nadai gaga enda betemu baru dudi ila maya aku bisi pulai kemisi. Enda pia? Terima kasih ngagai Indu Rumah Panjai enggau Sebugey ti chia kami makai sahari tu!

Pengawa kemari

Pagi kemari kami tiga menyanak bisi dichia geng aku siku ti benama Mui Foon makai pagi ba Sun city Food Court. Mui Foon bisi mega manggil kawan kami dua iku da enggau makai pagi sahari nya. Baru iya aku tu makai ba Sun City. Ngelama tu aku muti ninga pasal tempat tu tang enda kala makai dia.

Aku milih mee guring basah tomato, alu bala anak milih toast. Mayuh endar pemakai ti bisi dijual dia. Pagila aku ka mai apai indai aku kia, awak ka sida nguji pemakai dia. Tentu rindu sida meda pemayuh pemakai ti bisi dia!

Udah bekau kami makai pagi, kami tiga enggau Kheng Hua alu bejalai ba pasar Miri. Kheng Hua endang pangan lama aku, alu maya aku beranak ka Duncan suba endang iya dipanggil aku ngintu aku. Bisi ngelima minggu penglama iya enggau aku maya nya suba.

Lebuh ka suping ba Mega Mall, Duncan alu madah diri ka bira. Isssh, enda berapa amat, nindik ga bisi Mega Hotel ngimbai dia. Kapa ngena jamban awam ka kamah, ngena jamban hotel ka manah nya meh Duncan!

Sebedau kami empat pulai kami ngetu makai suntung kangkung enggau makai chendul dulu. Tepantup asai nyawa makai sida rujak enggau chendul!

Kami menyanak ngetu ba rumah Kheng Hua enda lama sebedau kami pulai. Aku ngambi peluang ngasuh Kheng Hua "ngurut" tubuh aku ngena chara "kua sa" .... "kaus" ko jaku kitai Iban. Ba senentang ti pedis, engkakai meh aku! Nyamai endar asai aku tinduk demalam, engka laban ti udah dikaus!

Bala anak bekereja ka sida ruti, gula batu, buah, ..... barang utai dempa ti ayan ba rumah Kheng Hua, endang disapu saduai!

Nah, nya meh pengawa kami menyanak kemari. Sahari tu nadai prugrim, mina betelipun enggau Douglas, laban pagila iya angkat mupok kitu. Malam hari lima lagi baru iya datai di Miri.

Birthday Buffet

Lemai hari enam tu kemari, aku bisi dipanggil ngagai buffet dinner ba Marriot ulih pangan aku, Jackie, ti ngintu hari pengada iya ka 50.

Nadai mayuh orang dipanggil iya, mina 11 iko kami indu, udah nya alu sida Jackie sebilik - bala menyadi iya, apai indai iya, laki enggau anak iya dua iko.

Lawa amat kami ti tiki orang enggau bunga okid ti ditanchang ba lengan! Enggi aku tak enggai inggap ba lengan aku!

Aku baru bekelala enggau indu ari sepiak kanan nya. Nama iya Christina, alu aku saru keterubah aku meda iya, kumbai aku menyadi iya, Florence. Malik ka kanan, nama nyin Florence deh?

Siko ari geng laun datai, nadai meh iya ampit ba gambar tu. Rindu amat aku begulai makai enggau geng lama aku. Mina tiga iko aja ari sida tu ti enda dikelala aku endar. Nah, aku siko meh ti ukai cina dia!

Aku, sereta meda oyster, aisey, alu nya dulu diembal aku! Enggai dipeda orang rangka mina ngambi tiga iti aja dulu. Tang udah tembu nya ngambi baru enam iti! Nya baru buffet!!

Sida menyadi Jackie, bisi ngudar kek birthday ka iya. Manah amat gamal kek nya alu dianjung chef nya empu. Jackie bisi nyendia white wine kena kami ngetoast iya malam nya. Jaku toast diberi laki iya ... sentimental tudah tuai malam nya.

Aku ka meh ngaga party besai kena ngintu hari pengada aku ka 50. Enda lama agi, oi.

Nyamai asai isi

Nyamai endar asai isi udah pulai beurut! Enti nunda ati, endang sekali seminggu nganjung diri beurut! Akai, amat nyamai endar asai tubuh udah beurut!

Sekali tu ipar aku enggau aku beurut ba Thai Massage and Spa, endur aku beurut kutai. "Nyamai asai iya?" ko aku nanya ipar aku. "Nyamai agi ari urut Malang?"

"Nyamai, ah," ko iya ga. Endang ari suba aku madah diri enggai diurut Malang. Malang tu tukang urut ti buta. Kumbai enda meda iya, taja iya buta?! Jari iya meh nyadi mata iya!

Sekali tu aku diurut tukei neo nya empu, indu Thai. Enti dibanding enggau urut indu Melayu ti ngurut aku kutai, kering agi jari indu Melayu nya. Taja pia, nyamai ga asai diurut tukei neo nya empu.

Aku nanya ipar aku enti iya ka enggau aku baru minggu nyin ila. Udah nyepi penyamai isi, sapa ka madah diri enggai!

6 taun

Kena 20hb tujuh tu tadi Duncan nyambut hari pengada iya ka enam. Hari minggu nyin tadi, ko jaku, ka ngangau bala petunggal iya sama enggau iya ngintu hari pengada iya tang laban saduai Denice agi enda entu pengerai pengawa birthday nya dipostpone.

Lemai kemari kami bisi ngintu mimit hari pengada iya. Nadai orang bukai dikangau mina bala sida petunggal iya ka diau semak ditu aja.

Kek hari pengada ulih aku meli ari Flora Bakery. Nadai ngudar kek spesil, meli ka endang udah bisi dia! Lengis kek dempa bala nembiak!

Tu gamal orang enda teranti ka nyepu dian ba kek, laban ti ka jampat makai. "Is it time to cut the cake?" Kasih tudah nyu nganti udah badu makai baru mantai cake. "The cake is so delicious", ko Duncan. Endang sengaja meli iya ka mit, awak ka jampat abis!

Uncle Dick bisi meri iya remote controlled truck that has music and can dance. Nyu ka bekunsi ayam iya enggau sida cousin iya diatu. Bisi ga chan cousin Jeremy enggau Natalie bayam enggau remote controlled truck iya enda lama.

Pemakai dempa kami malam nya ulih aku ngudar ari kedai Wong. Mina janik aja dipanggang aku empu. Nadai mayuh macham lauk diudar tang bisi endar ga laluh. Nyu ngasuh bala sida ipar mai pulai keda lauk.

Taun dulu nadai ga Daddy ditu ngintu birthday Duncan enggau iya. Tang lebuh kami ngintu birthday Denice bulan lima tu tadi, endang bisi nyangkung Duncan. Manah Denice taun tu enda nanya ni present ka iya lebuh ka ngintu birthday Duncan! Nyu mereti agi tedah!

Chuchur Pisang

Kemari indai aku bisi ngaga chuchur pisang ngena pisang bugis ka diberi orang sebarai kami. Tak agi belala asai, chuchur udah abis! Mina 6 leka aja pisang dikena ngaga chuchur.

Meda agi bisi 5 leka pisang sahari tu, aku alu ngasuh indai aku ngaga chuchur nya baru, kena ngirup kupi lemai hari. Akai, betangkap makai chuchur tu lagi! "Uji nanya Mr Fam enti agi bisi pisang iya. Madah diri ka meli neh", ko indai aku. "Nyin iya beketuk ka utai ba mua rumah iya."

Nyau aku pansut alu ngangau iya ari sepiak pagar kami. Hehehe, bekareh tudah Mr Fam ngiga pisang ka mansau agi diberi ngagai aku. Nadai aku madah diri ka meli, mina nanya enti agi bisi pisang laban agi belala makai chuchur pisang!

Kapa aku malu minta pisang!

Wifi booster pansut baru

Sekumbang aku tetemu/tingat ka User ID enggau password ba account deconnexion lama aku, aku selalu nguji ngena internet connection ari free wifi tu.

Wifi signal diterima ari built-in wifi ba netbook aku mina ulih nerima dua bar ari deconnexion. Kekadang ulih kekadang enda ulih log on ba deconnexion ngena signal dua bar aja. Lebuh maya iya ka, ulih ga aku ninga live-stream internet radio ari station ti dikerindu aku ari California.

Enti aku ngena Celcom Broadband menyadi aku, internet radio sigi enda entu ulih didinga. Putus putus utai didinga, manah agi enda ibuh!

Tang asai ka lama udah aku enda ninga talk radio alu lelengau meh asai ati ka ninga sekeda program ti dikerindu aku.

Hari enam tu kemari, maya aku bisi ngetu ba farmasi di Boulevard Mall, aku alu niki katas ngagai kedai computer laban ti ka ngiga wifi adapter. Bisi tetemu siti ti enda mar iga, alu meli usb cable pemanjai 5 metre kena nyambung wifi adapter awak ka ulih diengkah ba wifi booster digaga diri empu.

Nah, wifi booster digaga ari senduk belubang lubang endang agi bisi, nadai lah ibuh mungkal ngaga baru! Ba sadau din, sigi dilekat ba tiang alai iya digantung taun nyin kemari. Manah endar signal diterima ari sadau din ... 4 bar.

Ba baruh (patio, gambar atas) mina dua bar aja ulih diterima enti digantung ba pagar. Lemai tu tadi aku nguji ngantung iya ba dinding baruh alai ti nerima signal kuat ba sadau din. Ta da! Empat bar signal ulih diterima iya.



Ukai enda gaga agi ati laban ti ulih nerima penguat signal 4 bar ari patio! Ditu meh aku betulis ka post tu, belaban enggau nyamuk!

Siti aja utai ti enda dikerindu aku ngena free wifi tu. Ma sekat orang mayuh ngena, nemu nyau connection. Kemari tekenyit aku meda mesej pasal aku udah ngena ungkup ti dikemendar. Aeeee, enda lah aku nemu bisi limit ... berapa kali aja tau connect dalam sahari! Enti munyi nya, anang log out!! Tang enti nemu drop connection kediri empu ..... ka pen enda nguji log in baru!

Nasib ga bisi Celcom Broadband enti enda ulih connect agi ba deconnexion!

Postpone

Ko jako ka ngintu hari pengada Duncan lemai tu lagi ba rumah aki iya di Lutong ditu. Tang Duncan saduai Denice agi enda entu pengerai, enggai entu makai alu agi bisi angat tubuh.

Ka pen enda, pengawa nya dipostpone. Enda besai pengawa ti ka diatur ... betunu sida janik mimit, ngudar pemakai ari kedai kupi Wong, meli kek, ngangau sida menyadi, ipar, anak anak sida ....

Aku enggai meda bala anak mit begulai baka nya enti siko agi bisi angat tubuh. Enggaika nyangkit sida bukai ka gerai.

Engka endang musim orang ka endar renga diatu, laban kami sebilik udah berapa iko ka bepakai ka sida Panadol laban asai ka bisi nyilu tubuh, pedis pala ... beguai makai ubat ngichaka penyakit enda nyadi!

Arap ka bala kita bukai ngintu diri, jampat makai ubat ma ngasai tubuh enda entu nyamai! Sigi begedi amat aku ngenat ka penyakit!

Makai malam enggau geng lama

Tu gamal utai dempa aku demalam! Seddddaaaaappppp! Mix seafood grill betambah nyamai laban orang ke enggau makai malam tadi iya nya empat iko kawan lama.

Ari kiba, Hamiah (betudung), Aminah (baju burak), Nadzirah (baju mirah), aku, udah nya alu Jane. Penudi endar aku betemu enggau Hamiah, taun nyin kemari laban aku bisi ngorder cup cakes (kena party sekula sida Duncan) ari bakery menyadi iya ba Pujut 7. Pengelama aku nadai betemu enggau Aminah iya nya 17 taun. Maya nya iya baru ngandung anak iya ka tuai sekali. Tiap kali aku pulai ka Miri iya nadai di Miri laban ti nitih laki iya gawa di Singapore alu diatu benong gawa di Oman. Taja aku selalu berandau enggau Nadzirah ba telipun penudi endar aku betemu enggau iya iya nya dalam taun 2004 ba rumah iya di Indiana, maya umur Duncan baru setaun sebulan. Kami duai Jane endang selalu betemu tiap kali aku pulai ka Miri.

Aminah, Nadzirah enggau aku dulu datai ba restoran laban aku ti nyadi driba kami tiga. Kami tiga endang sekelas ari Pom 1 datai ka Pom 5. Kami duai Aminah endang kaki meda wayang. Enti bisi wayang cina ti dikerindu bisi bemain ba panggung, beguai guai kami duai pulai sekula ngambi ka enda laun datai ba panggung. Ukai nya tak semak iga sekula St. Columba ari panggung (alai Yu Lan Plaza diatu) ... bejalai kaki agi nya!

Kami duai Nadzirah endang ari sekula primary ti begulai datai ka Pom 6. Diatu, kami sama diau ba US .. sayau endang semak pangan diri!

Amat gaga endar kami ulih betemu enggau pangan diri. Aku bisi mai dua iti gambar disimpan dalam photo gallery ba iPhone aku. Siti gambar kami duai Aminah enggau tiga iko classmate bukai maya kami ba Pom 5. Alu siti gambar kami tiga Nadzirah, enggau Jane enggau enam iko kawan bukai maya kami ti ba Pom 6 di Tanjung Lobang kelia.

Rindu endar bekenang sekeda ulah kami agi ba sekula sikinderi kelia. Nyu besebut ka pasal aku ngentun bok Joe Lim (Joe Moto di Miri), segenggam bok Joe tingkil! Kami duai Joe tak baka mayau enggau ukui, tak selalu bepalu ka pangan diri!

Panjai umur tedah Joe, laban tak bisi timbul iya enggau bini anak iya lebuh kami ti agi dudok berandau ba restoran.

Baru besebut pasal sapa orang ka chia malam nya, alu datai waitress siko madah Joe udah mayar bill kami! Nya meh kami alu ketawa! Baka ti ngangau semengat Joe ngasuh iya datai ngambi ka chia kami lebuh kami ka besebut pasal iya! Mina Hamiah ti enda enggau kami besekula ba St. Columba kelia. Baru malam tadi meh saduai Joe bekelala enggau pangan diri.

Malam nya, maya Joe enggau bala iya mupok, iya alu madah, "See you all here again next year!"

"Insha Allah", ko Hamiah.

Tabin

Nya gamal orang tabin (pala dibap enggau towel mit basah) ngenatka diri alu enda tau enda nunga TV udah ka pansut ari bilik tinduk. Lemai kemari isi Duncan angat sepi aku. Meda nya baka nya diberi aku ubat. Bisi turun pengangat isi tang nya meh 4 jam udah nya angat baru. Dempa ga ubat baru, empat jam udah nya empa ga baru.

Endang sigi gaya iya, dua tiga hari baru penyakit nya gerai amat amat. Denice mina batuk aja. Kutai maya kami ka bejalai ngagai Jane, anak iya tabin meh sahari nya alu diau enda nurun sekula. Menyadi aku ka tuai madah diri angat isi enggau batuk batuk meh dua hari tu tadi.

Arapka penyakit nya penyakit tabin ka "biasa" meh! Lembau diquarantine orang enti nya lebih ari nya!!

Duplicate Error

Taun nyin kemari aku bisi ngerijista akaun enggau Deconnexion (free wifi) laban ti nadai entu internet connection ba rumah apai aku. Tang aku ti enda ingat ka User ID enggau password dikena aku maya nya suba alu sekumbang aku udah datai di Miri sekali tu aku enda ulih access free wifi ka bisi di menua Miri ditu! Nindik ga menyadi aku bisi Celcom Broadband ti ulih dikena aku ngelama tu.

Bekareh aku nguji muka akaun baru tang nya meh, tusah amat muka registration page ba Deconnexion ... selalu aja error, engka heavy traffic. Maya ka ulih muka page, alu bisi nerima message Duplicate Error udah ka ngisi registration form dia. Berapa kali enda aku nerima message nya, alu baru sahari tu aku mereti nama reti message nya! Paduhal info ka diberi endang udah bisi ba system sida ... ni nya enda duplicate!!

Bendar meh aku nguji sida ID enggau password ti selalu dikena aku ma ngerijista diri ba sekeda laman web. Ta da!! Kepuas nguji, alu bulih! Small letter 'p' made all the difference! Nya meh aku alu beguai ngerikod User ID enggau password, enggai ka enda ingat baru ila! Nyu ka nginjau tingki indai aku da kena muka akaun baru!

Nah, diatu enda ka nyamai enti ba endur semak hotspot Deconnexion! Irau meh ati aku enggai ka datai ba Kuching ila, alu nadai bisi bulih free internet connection. Tang ko geng ti nulong reserve hotel di Kuching, sigi bisi free wifi ba hotel nya. Thank goodness for that! Enda lah bekareh berangkut ka netbook ngiga sida Starbucks tauka KFC kena aku update blog!

Suping ba Imperial Mall

Pagi tadi kami tiga menyanak bisi ngetu ba Imperial Mall udah ka nyangkai apai enggau indai aku ba Miri Dialysis Centre. Kebuah ke Imperial Mall laban ti deka ngambi cermin mata ka diputong aku minggu nyin tadi lebuh ka bisi kin enggau Nadzirah saduai Ramzi.

Jam kami datai ba Mall baru udah pukul sepuluh pagi, alu bisi sekeda kedai apin buka. Meda kedai cermin mata nya apin buka kami alu shopping ba Boulevard supermarket dia. Aku semadi amat shopping mai anak dua iku nya. Taja pia, bulih ga aku dua pasang baju! Bendar sida anak muji baju siti laban ka bisi marik! Nemu endar ga bala anak, sama rindu ka utai bemarik!

Kemari bisi meh kami shopping mai indai aku tang ba Boulevard Mall. Sama ga Boulevard supermarket alai shopping tang nadai bulih utai aku dia kemari laban temu berara ka anak! Mina indai aku aja bulih dua pasang baju.

Pasal cermin mata baru nya, er, nadai meh frame iya begaya bakaka dikena orang kemaya hari tu! Ukai enggai laban mayuh pesen baru nya mit cermin.


Kami ti ngembuan mata tuai tu enggai enda besai mimit cermin iya ngambika ulih meda jauh enggau semak enggau lantang agi! Dua pasang udah cermin mata diputong tang asaika enda puas ati ngena. Enda ulih dikena lama, mina maya ka gawa laban cermin ari sepiak kanan asaika enda betul utai dipeda! Ngarap ka cermin baru tu manah agi ari ka lama. Bansa lens dikena pen lain ari ka suba, alu degree ba cermin sepiak kanan tinggi mimit. Sepi aku, nyamai agi ari ka lama cermin aku sekali tu laban nadai meda distortion ari sepiak kanan.

Ka pen enda becermin mata, iya ga sigi udah tuai!

Betemu enggau Flo saduai Andan

Tengah hari tu tadi aku sempat betemu enggau Flo saduai Andan. Nah, berapa iko kita nemu Flo bisi pulai ka menua taun tu?

Sahari tu Flo bisi nurun ari Bintulu enggau apai, indai enggau menyadi lelaki iya siko. Udah sida datai ba Miri sida dulu ngetu ba rumah aunty Flo ba Luak. Ninga sida nya ka ke Luak dulu aku alu bejalai ngagai kawan aku, Jane, ti diau ba Luak mega, udah ka nyangkai sida apai indai aku ba Miri Dialysis Centre.

Ba rumah Jane meh alai aku ngasuh Flo betemu enggau aku. Apai indai Flo, aunty iya enggau menyadi iya alu mupok ngati ka program sida empu, udah ka nyangkai Flo ba rumah Jane.

Ari rumah Jane, kami duai Flo alu mupok ka Boulevard Mall laban udah besemaya enggau Andan betemu enggau iya ba Food Court din.

Ukai nya kala betemu kami tiga, tang ngelala gamal pangan diri ari gambar. Andan endang sigi udah nganti kami ba Food Court dudok semak mua tangga.

Nadai ga ninga Andan nyebut asai ka bemimpi ti ulih betemu enggau pangan diri! Flo ka madah Andan ti bisi nyebut jako munyi nya enti iya ulih betemu enggau Flo!

Kira sejam kami ka dudok berandau ba Food Court. Enda nyamai berandau laban Denice saduai Duncan enggai jenuh. Maya kami ka dudok ngirup sereta makai dia, sempat ga nganjung sms ngagai Lyana madah ka kami dudok betunga mua enggau pangan diri. Numpang gaga meh iya! Gaga ka kami ti ulih betemu!

Enda lama udah bekau bala Flo datai, kami alu mupok. Sempat ga begambar enggau besebut bala kaban ka bisi dikelala apai Flo sebedau kami mupok. Aku baru sahari tu nemu apai Flo nya ari Saratok alu ngelala sida apai Lyana enggau sida petunggal apai aku. Small world!

Aku endang gaga sereta rindu amat ulih betemu enggau bala ti dikelala ari pengawa blogging tu! Asai ka bula kitai tau bekelala ari pengawa blogging!