Roti Canai Sardin

Nya gamal pinggai orang bekau makai roti canai sardin ... tembu roti canai siti, agi belala asai nyawa, nyau ngangat siti agi!

Nya kebuah gamal pinggai nya enda beresi iga! Maya pinggai agi beresi, nyawa kelalu lapar, perut bepedik, nya kebuah nadai limpang ngambar.

Enda nemu kebuah nyawa tak tengukka roti canai sardin pagi tadi. Nindik ga bisi setin sardin dalam sip ba dapur. Engka laban nadai kari manuk dalam tin meh kena makai roti canai, nya kebuah ngiga utai bukai kena makai. Heheh, tepantup amat asai nyawa. Amat lama udah enda makai roti canai sardin!

Gila Bulan Bulan Empat

Demalam, lebuhka nyenguk luar ba pintu belakang aku tepeda ka bulan baruh amat tungaka mua timur. Tekenyit aku meda terang nya gamal bulan laban hari bemua amat maya siang hari nya.

Apin lama ari nya aku bisi meda gambar bulan ti diambi James ba blog iya. "Nadai bulan nya ayan malam tu ditu, tebal awan ba langit din", ku aku bejaku dalam ati.

Nya meh rindu endar ati aku lebuhka meda bulan terang laban ti ngumbai nadai ayan bulan malam nya, alu rauh rauh ngasuh Doug ngiga tripod. "Dini alai tripod nya?" ku orang mut mut.

"Aieee, ukai nuan nyimpan nya kutai? Uji giga ba bilik bejait aku dia!" ku aku ga.

Kapa aku nganti orang ngiga tripod, alu pansut ngena kasut but. Nyu tepuruk ba lubang tisi pagar! Petang ba luar nya bah! Nasib ga enda rebah! Pei, pechuma kamera bai labuh enti rebah!

Orang ka dianti ngiga tripod nyu ringat diri meda pintu enda ditikup! "Chelap luar dia, nama pintu enda ditikup?"

Nadai meh orang ka diasuh ngiga tripod nya tadi tetemu ka tripod. Isssh, nyau meh aku manggai lengan enggau jari ti megai kamera ba slide swing set bala anak.

Nah, tu asil orang ka gila bulan!

P.S. Iya ka bendar bulan penuh kena 27 hb April. Malam 28hb April agi dipeda penuh tang nama iya ka bendar Waning Gibbous.

Ngiga Sayur

Pagi tadi beguai guai aku ka pasar laban meda pemalat mua hari. Berapa minggu enda aku nadai ka pasar laban ngumba endar hari selalu ujan maya hari pasar minggu.

Sepuluh taun aku udah diau ba menua Galt ditu, baru iya meh taun tu ujan ngemalat nya dalam bulan empat. Ba bukit din, tak agi besalji hari!

Taja mua hari ngemalat nya pagi tadi ujan ka turun enda bangat. Tekenyit aku ninga guntur lebuhka gawa ngadu quilt orang pagi tadi. Ngetu ka enda, ku aku nanya diri empu. Ukai nama takut ka nadai karan, takut ka kena pangka kilat ... enggaika pechuma mesin rusak!

Pagi tadi kelimpah ari meli sida kantuk peria, kangkung enggau sebansa sayur kailan, aku bisi mega meli dua igi pisang tanduk enggau buah anggur. Agi ka asai nyawa makai chuchur pisang!

Belauk ka kantuk peria meh lemai tu! Sida kangkung galau ka pagila!

Update:



Nah, tu iya gamal lauk kantuk peria nitih stail Coki - diguring enggau pusu, bawang enggau 2 igi chabi padi tutuk!

Cherita Semadi Nadai 27/4

Lebuhka datai ba hotel di San Ramon hari lima nyin kemari aku bisi meda jelu ti baka ansa makai rumput ba mua hotel. Eeee, ni kamera?

Nadai sempat aku ngambar ansa ti dipeda aku lemai nya. Hari siti, bisi aku pansut ngiga sida ansa. Berapa iku enda dipeda aku benung makai rumput ba luar hotel. Ansa ari Canada, ku Doug. Nyamai amat sida, ngetu ba tempat ti bisi pemakai, enggau ba menua ti enda chelap baka di Canada din maya musim chelap.

Pelaba aku alu enda pulai ka Canada agi meh sida ansa tu. Ukai enda lelak terbai pulai ka Canada ari California!



Tu sekeda gamal wind turbines ti dipansa ba Highway 580. Menua nya dia bisi dipansa angin tasik, nya kebuah wind turbines tu di engkah ba bukit dia. Enggai nyadi diengkah ba menua ti jarang dipuput angin!

Naka tu aja cherita semadi nadai aku sekali tu!

Lumur 54

Tu meh utai ti ngasuh aku lembau amat update blog demalam. Berapa jam enda back up data ba iPhone, udah nya restore setting.

Maya ka ba San Ramon, jam lah iPhone aku nya ... tegal bateri nyu ka abis laban bala anak bepeda ka video ari YouTube. Jam ba Apple logo screen. Begedi amat aku laban tepaksa di restore ngagai factory setting udah nya alu nyau meh unlock enggau jailbreak ba iphone nya. Frust menonggeng! Sekeda applications ka dibeli ba AppStore pan lesap laban enda kena backup ... Bedau temu maya bala ka nemu hack iPhone mansut ka chara kena jailbreak enggau unlock iPhone latest firmware. Arrrrggghhhh!!

*Sori ngagai bala kita ka enda nemu ulu ili cherita iPhone!



Maya kami datai ba Marriot, San Ramon, alai Lions Club District 4-C5 Convention orang benung makai. Asa asa meh kami ka enggau orang makai laban sigi bisi tiket kena enggau makai malam nya, tang nadai alai agi. Nadai penuduk! Tau ka utai bakanya nyadi?! Nyu nganjung diri makai ba restoran kami menyanak. Udah aku kenyang makai, kapa aku agi ka enggau orang rami!

Ngantuk mata laban perut kelalu kenyang! Udah badu makai orang rami bekaraoke, ba fancy dress ... Udah nya pukul 10 p.m. bisi berapa iti tempat orang ngatur pemakai enggau ngirup (ai bisa) laban ti ka ngulih undi bala.



Rindu amat aku meda Maharlika Lions Club .. bala Filipino tebal agi member kelab nya. Rami sida enggau orang convention ujung minggu tu tadi. Aku bisi komplen ba siku ari sida pasal ti enda ampit makai malam kami ka datai. Eee, enda patut nya, ku siku, ila aku ngeriput ngagai secretary ti ngatur pengawa tu. Iya ari kelab kami, ku iya. Riput meh, ku aku dalam ati din!



Malam hari enam bisi Governor's Ball. Akai orang ngena baju kot, ngena baju belabuchi, baju gaun bare-back ... aku? Apalah, slipar nadai tunjik, tanchut chelum sengapa, baju bisi ga marik mimit. Akai, enda nemu bisi formal dinner ba convention nya! Enti nemu kapa ninggal slipar tunjik, baju gaun belabuchi?! Ukai nadai! Nindik ga Doug bisi mai neck tie enggau baju smart mimit!

Pagi hari minggu, lembau aku dani tumu enggau orang breakfast. Kami duai Duncan agi belala tinduk. Mina Denice aja rajin dani tumu laban ti ka enggau Daddy.

Program convention badu pukul 11.00 pagi nya. Kami alu bekemas alu nganjung perengka ngagai kerita. Udah abis utai diangkut, mupuk kami.

Penyauh San Ramon ari Galt kiraka 1 jam 15 minit. Meda udah ngalih hari, perut lapar laban ti nadai makai breakfast ngetu ba Tracy. Engka tak bisi restoran Vietnam dia, ku aku. Amat bisi!



Tu gamal orang dibai makai ba restoran Pho Saigon beserimbai enggai hari pengada orang ka 54.

Enti makai ba restoran Asia aku tukang ngorder. Ngorder kerang kepang (mussels) enggau deep fried cat fish. Sedap amat! Bala anak mina makai mee enggau won ton sup. Nadai saduai ka dibai makai pemakai kami! Milih amat!

Nya meh pengawa kami ujung minggu tu tadi.

Kasih tudah mayau diambi pagi tadi ari Vet. Ligau ligau meda rumah, bakaka enda ngelala! Nyelai ga mayau, jampat endar enda ingat. Enggai dipegai aku, engka ringat laban ditinggal ba tempat nyelai enggau orang ti enda dikelala!

Convention

Tu gamal mayau aku disimpan dalam sangkar. Iya dianjung aku ngagai vet lemai tu tadi laban vet semak kami ditu bisi servis boarding. Iya enda ulih dibai kami mindah sekali tu alu enggai ga ngiruh kawan aku Kathy merati sereta meri iya makai lebuh kami ka mindah. Nyamai meh nganjung ngagai tempat boarding.

Lemai tu kami menyanak ka San Ramon (semak San Francisco) laban Doug enggau orang Lions Club Convention ujung minggu tu. Aku kiraka enggau ga tang meda gaya enti rajin enggau semua program maya convention tu lagi! Ni alah bala anak buring nganti convention tembu!



Meda kami mindah datai ka hari minggu tu lagi, beguai aku ngaga kek pisang tu. Enggaika buruk pisang ti udah mansau amat enti nganti pulai ari convention hari minggu tu lagi. Kurang manis kek aku sekali tu!

Ma udah datai ba San Ramon tu lagi, nyambung cherita!

Quilt Indai Katie

Katie saduai indai iya datai nganjung quilt nya kiraka 3 minggu nyin kemari. Kasih tedah tuai, lama nganti aku nembu ka nya! Baru kemari aku telipun ngagai Katie madah quilt indai iya udah tembu.

Tu keterubah iya Katie enggau indai iya nganjung quilt ngagai aku. Saduai baru nemu bisi orang ba Galt ditu tau ngadu quilt. Nya pan semadi dipadah kawan aku siku. Aku madah ngagai saduai bulan lima tu lagi ngetu aku laban ti ka kemisi. Enti agi bisi quilt nganti udah pulai kemisi ila meh aku ngadu ka saduai.

Quilt tu baru kedua diadu aku taun tu. Dulu agi ari nya enggi uchu kawan aku siku benama Kathy.

Maya hari agi chelap baka tu sigi lembau amat aku gawa ba bilik endur mesin quilting aku nya. Kelalu chelap! Ma udah lama enda gawa dia, nemu lembau asai tulang ka berengkah baru!

Nunga Dinding

Tu meh gamal orang kena ukum. Nunga dinding. Semua sida tu sekelas enggau Duncan. Sepiak kiba nya Duncan, lebuhka kena ukum kemari. Sida bukai nya ensanus kena ukum.

Alu enda enggau orang bemain meh Duncan laban ti kena ukum bediri nunga dinding kemari. Lebuh aku datai dia iya endang udah bediri nunga dinding. Bedau aku nanya, dulu iya madah iya kena ukum 10 minit nunga dinding. Tang lebuh aku nanya pengajar ti ngemata bala nembiak dia, 15 minit ukum iya ku pengajar. Nya aku madah ngagai pengajar, 10 minit ku iya madah ka aku. Tegal ti ngemula ka nuan, tambah 5 minit ukum nya, ku pengajar.

Nah, asai iya! Nya meh alu enda ampit enggau orang bemain. Nadai agi awak alai bemain laban abis dikena bediri nunga dinding!

Sigi terit ukum ba sekula sida nya!

Bulih Part 2

Amat bulih meh aku suping hari minggu tu tadi. Berentak aku manduk enggau makai utai ka diulih!

Pagi hari manduk bubur cha cha ngena ubi randau enggau keladi ka dibeli hari nya. Enda makai tengah hari aku - terus makai bubur cha cha. Enda ibuh nganti jam pukul tiga tauka pukul empat lemai makai bubur cha cha.

Makai malam belauk ka buah entekai enggau dagin digulai enggau kuah satay Brahim's. Lichin pinggai Doug malam nya! Udah nya alu makai tofu fa. Mmmmmmm!




Pagi tu tak agi belala asai nyawa ka makai kway tiaw guring. Ni nya bisi agi. Nguring mee meh aku. Nya pan ngena mee ari paket mee segera! Tau dikenyadi amat!

Puas ga asai perut makai mee angat. Ngumba endar ga hari sahari tu. Ujan sereta chelap. Ni enda laju kayuh lebuh makai pagi tu tadi!

Bulih!

Lemai kemari kami menyanak bisi nurun suping. Keterubah iya ngetu ba thrift store ti selalu alai kami suping. Udah nya ngagai supermarket cina ba seberai jalai. Nyengkau menyengkau meh aku laban lama udah enda ngetu dia.



Meli tugeh, lap chong, daun bawang, enggau mee kway tiau .... nah, tu meh gamal kway tiaw digaga aku empu. Udah tembu diguring ... eeeee, uji tak bisi kerang tadi! Nyampau meh bisi kerang fresh ba menua kami ditu!



Naka pengaga aku meda dua macham kuah Brahim's! Kuah satay, enggau kuah rendang! Aku endang selalu meli Brahim's ma bisi pulai ka menua. Siti aja utai ti digiga alu nadai kala meda .. mee Maggi! Iya ka kala dipeda aku, iya nya mee Maggi Marsala. Amat enda berapa! Nya mee ti dikerindu orang India!

****

Ku Sebugey, enti aku jadi ka Atak (tukey mee di menua din), tiap hari meh aku makai mee kolok enggau kway tiaw dipanduk menyadi indu iya! Peeeiii! Sebugey ka jual mahal enggai ka Atak suba. Kasih tudah Atak datai ka diatu agi bujang tegal ka frust Sebugey enggai ka iya!

Main Ai

Meda diri bepeluh mimit lebuhka pulai ari Burger King, saduai alu kiak kiak madah diri angat alu madah diri ka bemain enggau sprinkler.

"Agi chelap ai nya", ku aku madah ka saduai. Orang kiak kiak madah nadai ai nya chelap. Ok, alai meh.

Kada bisi setengah jam saduai ka bemain ai. Kumbai enda agi chelap ai nya! Getar getar Duncan minta towel madah diri chelap! Nehhh!

Pemakai Thai

Demalam kami duai Doug nganjung diri makai ba restoran Thai meda bala anak nadai enggau kami duai. Bala anak udah diambi indai classmate saduai, diambi bemain ba rumah classmate.

Taun nyin kemari kami ka makai dia. Iya selalu ga dipansa tang nadai ati ka ngetu dia. Mar pemakai dia (enti dibanding enggau restoran bukai lah), tambah mega mimit. Enda ipak rega, ku aku. Enti makai ba restoran Cina selalu bisi dibai pulai utai dempa.



Aku ngorder lamb. Nyamai amat, mina kurang mansau aja isi dalam. Tak gelik aku makai dagin enda entu mansau! Ikan mata ba sushi aja ulih dempa aku enda mansau!




Doug ngorder pad thai, mee stail panduk Thai meh nya. Udah tembu makai entree, alu ngorder pulut chelum gulai enggau ais krim.

"Here's the black rice and ice kim," ku indu Thai ti nganjung pemakai nya.

"Ice kim?" ku Doug sambil senyum.

"Ham and chi," ku aku ga, nunda indu ari Cambodia ti alai kami selalu meli donut suba. Engka dilah orang ari meua sepiak nyin ka pedis nyebut jaku ti bisi munyi "S" ba ujung enggau jaku ti bisi munyi "R".

Lama kami duai Doug nadai udah bedating bakanya. Tiap lemai hari lima dulu bala anak nagih keluar makai enggau suping. Rindu ga sekali sekala pansut enda mai anak!

Nulung Ngemata

Tengah hari tadi aku bisi nulung bala pengajar ngemataka bala nembiak. Bala sida ba Gred Satu selalu dulu ari nembiak bukai pansut ari dewan makai. Nya kebuah sida empat tu tau meda bup ba tengah padang.



Orang bukai bemain, saduai dua iku tu kena ngukum - diasuh belanda nitih garis ba padang. Duncan diasuh belanda 10 minit, iya ka indu 15 minit. Tegal enda ninga perintah pengajar meh nya!

Berapa iku enda bala nembiak ka tuai agi bediri nunga dinding sahari tu. Sekeda bediri nunga dinding 5 minit aja, sekeda 10 minit, iya ka balat agi 15 minit. Sekeda tegal ngelanggar perintah pengajar, sekeda tegal ti enda tembu homework.



Udah tembu belanda 10 minit, Duncan alu nganjung diri bemain enggau sida indu ka besai agi. Siku tu sigi rindu amat bemain enggau bala indu ka besai agi. Ngumba endar!



Siku ka kena ukum belanda 15 minit enda abis ukum nya tadi. Mua kena pangka bul bala ka bemain semak dia. Denice alu enda nyadi bemain laban ti sinu meda siku nya alu dia meh iya bediri ngibun iya.

Lemai tu Duncan saduai Denice udah diambi indai siku ti kena pangka bul tadi. Play date. Lantang meh kami duai Doug malam tu ... dinner enggau suping nadai anak ngiruh kami!

Heart Shaped Bokeh

Ulih meda heart-shaped bokeh?

Keterubah iya mina ngambar sida pun kayu kena nguji ngaga heart-shaped bokeh. Bokeh manah dipeda tang sida pun kayu nadai nyengala dipeda. Kabur magang. Ujung ujung mayau dikangau asuh nyadi model!

Ngena ga nya laban mayau aku tu sigi bajik alu nemu amat pusing ka aku!

Ditu alai aku belajar ngaga heart-shaped bokeh enti kita ka nguji. Anang enda nguji, wai!



Bekareh aku mansutka Christmas Angel ti selalu digantung ba jendela maya Christmas laban ti ka meda heart-shaped bokeh bekaler!