Cherita Makai

Lemai kami ka datai ba Kuching (lemai hari lima) kutai aku bisi ngangau sekeda kawan enggau kaban makai ba Top Spot ba Taman Kereta.

Rindu endar beserumpu enggau pangan ti lama udah enda enggau betemu. Mina siti aja la komplen ... kasih bala nembiak ... nadai entu ngorder utai ti dikedeka sida!! Sori laban ti enda chukup berati ka selera sida.

Pagi hari enam, kami diambi Fr Trevor awak ka kami ulih enggau orang rami ba parish sale St. Faith. Rindu amat aku sahari nya laban bisi ga betemu enggau siko dua orang ka dikelala aku. Enti perut enda udah kenyang (breakfast ba hotel) mayuh endar pemakai dijual ba sale nya ti bisi narit ati!

Tengah hari hari enam nya mega, aku bisi ngangau sekeda blogger Iban ti diau di Kuching begulai enggau aku ngirup teh ba restoran ba Grand Margherita. Ko jako tujuh iko kami ti ulih datai tang tegal sekeda penanggul mina empat iko aja ulih datai sahari nya - Lyana, Chris, Coki enggau aku empu aja. Rindu endar ga ulih betemu enggau Coki saduai Chris. Lyana enda ibuh laban ti endang kaban aku alu selalu bechatting enggau iya ba Google Chat!

Aku sigi rindu amat ninga Chris nyerita ulah sekeda bala student ti diajar iya ... bisi ngeli digumpul ... nya ti ngasuh aku geli amat ati! Tanya Chris empu, nama reti jako nya!

Malam ka sama, kami menyanak bisi dikangau sida Lyana sebilik enggau sida begempuru ba rumah menyadi iya. Rindu amat ga begulai enggau bala kaban. Duncan enda ibuh sebut agi laban mayuh anak mit enggau iya bemain malam nya.

Busy amat program hari enam nya, neh!

Lemai hari minggu kami menyanak bisi dikangau Lee Ching aka Indai Starz saduai Fr Ronnie makai lemai ba flat sida ba St. Thomas dia. Sida bisi mega ngangau Fr Trevor sebilik enggau makai. Kami duai Mildred, bini Fr. Trevor, endang lama udah bekawan. Fr Trevor enggau Fr Ronnie, endang lama udah enggau aku bekelala mega. Bendar kami becherita lemai nya, cherita ti ngasuh rising rising ketawa.

Hari satu, kami menyanak mupok ka KL. Malam kami ka datai ba KL kami dikangau makai malam ba rumah kawan lama aku, Margaret, ba rumah iya di One Utama. Rindu amat aku malam nya laban kawan lama aku siko ti benama Ai Ming bisi mega datai. Bisi empat taun aku nadai betemu enggau Ai Ming. Denice saduai Duncan sigi gaga amat betemu baru enggau anak Margaret. Nyu ga bemalam dia pen saduai!

Hari siti kami dibai Margaret raun pulai hari ngagai Malacca. Ila nyerita pasal kami ka raun nya!

Tu pengawa bala anak enggau Daddy. Enda tau meda swimming pool. Bala anak endang hari hari nagih minta bai ka swimming pool. Aku, sekali pen nadai enggau orang. Ngerendam kaki ba ai pen enda!