Picnic

Pukul sebelas lalu pagi tadi, kami menyanak bisi nurun enggau orang bepiknik ba Rancho Seco Park. Piknik tu diatur tiap taun ulih kempeni sida Doug. Kami endang sengaja nurun laun laban bala agi lembau laban jet lag.

Bala anak tindok diri dalam kerita maya kami ka mansang. Pulai baka nya!

Duncan sereta meda utai ka alai anak mit tau bemain alu madah diri enda lapar .. enggai makai ko iya. Ko aku, ma enda makai, enda tau bemain laban nadai tulang dianjung bemain laban enda makai. Ka pen enda, alu enggau orang bebaris minta tri-tip sandwiches.

Kami tiga makai sandwiches, tang Duncan mina makai chips. Bisi ga pemakai bukai disedia dia, baka nachos, manuk guring, burger enggau hot dog. Ai butul, beer, ais krim, ai manis pen bisi. Mija enggau kerusi pen bisi disedia. Bala mina datai aja.

Lama endar kami nadai ngagai Rancho Seco Park. Tempat tu sigi popular alai orang nginti, bemalam ngena RV, camping, nyemerai, bekayuh ngena kayak tauka canoe alu tau mega mai kapal layar mit.

Nasib ga hari sahari tu nadai entu angat iga alu bisi angin mimit. Tang laban ti agi lelak kami mina enda lama enggau orang. Enggau orang bebeli ka raffle tiket pen enda. Bemain BINGO pen enda. Kira ka mina dua jam aja kami dia. Datai dirumah, kami alu nganjung diri tindok!

Agi jet lag!