Demalam sekula bala anak bisi ngatur Science Faire. Taun tu keterubah iya saduai enggau orang ba Science Faire laban pengawa tu diatur dua taun sekali.
Nama saduai aja lekat ba prujik saduai - iya ke bendar idea enggau orang ti ngereja pengawa nya Daddy! Tang ukai saduai siku ti bakanya, tebal agi bala nembiak endang apai indai ti nulung ngaga prujik. Dini bala sida ti agi mit nemu utai pasal science iga! Nulis sereta ngupy utai ti udah ditulis apai sida aja meh sida ke mit agi.
Denice enggau Duncan bekunsi ke siti prujik. Daddy saduai endang udah dulu mandang ke experiment ti dikena saduai ba Science Faire nya. Maya kami nerima berita pasal tiap iku nembiak enda tau enda nganjung siti prujik ngagai Science Faire tu, dia aku alu ngasuh saduai ngena experiment ke udah dipandang Daddy. Kebuah iya saduai endang udah nemu pasal experiment nya, tambah mega nemu ga nerang pasal experiment nya enti orang nanya.
Nama deh, bulih First Prize ke sida dalam Gred 2 prujik saduai. Amat geli ati aku ngenang! Rindu ga aku meda prujik bala nembiak bukai. Orang ke udah kala enggau Science Faire nemu meh nyendia prujik ... gambar, display board orang bekaler kaler ... taun bukai ila meh ngaga prujik ti lebih agi "menarik"! Kiraka udah pama bisi bulih First Prize!
No comments:
Post a Comment