Selamat Taun Baru 2007

Selamat Taun Baru nuju samoa bala kita sebilik.

Arap kitai bela diberkat Allah Taala enggau pengelantang, pengerai enggau samoa utai badas dalam taun baru tu.

Selamat Taun Baru 2007!

Raun ka KL

Pun bulan tu tadi aku enggau pangan aku benama Jane bisi ke KL. Tuju kebendar kin, iya nya nganjong diri shopping. Apu bendar kami shopping! :-) Ari pagi datai ka malam, empat hari beturut turut! Tang taja pia nadai mayoh endor kami ti shopping. Heheh.

Kati ko enda ngumbai bendar? Datai ka pedis kaki, nyau sempat nganjong diri beurut tubuh sereta beurut kaki kena chara reflexology. Nyau engkakai bala kena urut!

Kami duai Jane bemalam enggau pangan kami ti benama Esther. Maya kami ba iya enggai enda mayoh ulah ka lift ba apartment iya. Sekumbang kami din berapa kali enda lift nya enda bejalai. Udah ga kami lelak bekau pulai shopping, bai niki tangga agi! Nasit nya naka tingkat 7, ukai tingkat 22! Peninggi apartment endor Esther diau iya nya 22 tingkat.

Maya kami duai Jane ba KL bisi ga kami sempat betemu enggau kawan lama kami din. Siko endang coursemate kami kelia ba UiTM. Diatu iya megai pangkat Colonel ba TUDM. Siko agi indu cina, endor kami selalu bemalam maya ujung minggu maya kami agi belajar ba UiTM kelia. Indu cina nya apin lama udah belaki, sempat ga kami betemu enggau laki iya. Di belanja saduai makai ba restoran cina ba SS2 ba Petaling Jaya din. Dua kali ngoder ikan patin stim! Agi belala! Heheh.

Rindu endar meda decorations Christmas ba shopping malls di KL din. Asai ka ukai ba menoa Malaysia laban enti ngenang, Malaysia di kumbai orang menoa Islam.

Agi belala endar kami duai Jane shopping di KL sereta begulai enggau Esther. Tang ngenang bala anak di tinggal enggau aki ini, enggai nyadi kelalu lama ninggal sida! Tambah mega apai aku sakit maya nya, masuk spital sahari udah aku pulai ari KL! :-(

Ila ma Doug datai ngambi kami pulai ka US bisi kami menyanak ngetu ba KL 3 malam sebedau kami berangkat ka US. Tau disambung baru pengawa shopping nya! Heheh.

Cherita Bulan Sebelas

Apu bulan tu alu bedau bisi entry baru! Heheh.

Nadai entu bisi cherita nya lah nadai bisi nulis post baru. Tambah mega bala anak endang enggai jauh ari aku. Kini kini aku mindah dalam rumah, ditith saduai ... datai ka tama enggau aku ka dalam bilik mandi!

Ujong bulan nyin tadi bisi ga aku enggau orang ari Good Shepherd Church, Lutong, ngerami ka gereja nya genap 7 taun nyadi parish sereta ngerami ka Bishop Made Katib ti ka pincin. Rindu endar aku meda pemansang gereja Good Shepherd. Mayoh endar main sida anembiak enggau sida besai tuai kena merindang bala ti bisi datai pengerami malam nya.

~~~~

Maya aku di KL kutai aku bisi meli marik. Tang nya lah tusah endar nusok marik laban bala anak ka endar ngachau. Nadai ulih dudok manah aku, saduai alu ka enggau bejengkau ka marik! Nadai mayoh utai digaga aku. Tang rindu endar ga meda utai ti ulih digaga. Aku bisi tetemu ka marik dikumbai melon quartz. Rindu endar meda tenggak ti udah tembu digaga ngena batu nya.

~~~~

Aku bisi mega mai pattern baju enggau kain ari California. Aku minta tulong pangan aku siko ti landik bejait. Baju siti digaga aku tak enda manah gamal maya dikena. Ko kawan aku nya, jait ba senentang perut enggau punggung kelalu sendat nya lah enda manah dipeda ari belakang! Heheh. Indai aku bisi injin jait lama tang aku enda rindu ngena nya. Bekareh aku meli injin jait Singer bansa ka mit ti ulih dibai mindah kin kitu.


~~~~

Siti aja utai enda ngelantang ati aku sekali tu. Apai aku enda entu pengerai. Kasih aku meda iya. Ujong taun dulu iya bisi kena tan ba spital laban penyakit kencing manis. Udah bekau nya pengerai enda baka sebedau nya. Diatu iya enda ulih bejelai jauh, kaki enda entu ulih nyingkang jauh. Iya madah ka diri selalu pedis pala. Ko iya, sigi baka injin nyau udah enda manah agi. Majak jai, ko iya.

~~~~

Duncan nemu lelengau ka rumah kami di California din. Ma iya enda lantang ati, iya selalu nyebut ka pulai. Kadang kadang iya nemu ngiga daddy iya. Madah ka diri ka pulai enggau daddy. Kasih tudah. Denice nadai kala besebut ka utai baka nya. Mina iya selalu mansut ka pemingking iya! Stress endar ma ninga anak nyabak sereta ngingkak minta utai!

~~~~~

Bisi kita macha pasal orang ka begau pasal cherita bansa kaban kitai ti masuk kristian? Heheh. Aku enda ketinggalan nitih cherita baka nya. Bisi mega enggau orang ngeroh ai ba blog sekeda bansa orang nya ti bejai ka bansa diri ti masuk kristian. Bejai ka pengarap dipegai kitai tu meh sida dia.

Aku bisi meda video kesaksian siko lelaki bansa M ti udah nyadi kristian. Lelaki tu bekunsi ka kesaksian (testimony) iya ba siti gereja ba Kuching. Enda aku nemu gereja ni nya tang mayoh bala Iban ba gereja nya. Rindu endar aku ninga kesaksian iya. Bisi endar meri peransang ngagai kitai ti lama udah megai pengarap kristian.

~~~~~~

Pun bulan baru tu ila aku ka ke KL. Siko pangan lama aku enggau aku kin ila. Kami duai alu bemalam ba pangan kami ba KL din, pangan ti alai kami menyanak selalu sangkai ma ka KL. I need some R & R! Without the kids! Heheh. Mujor endar laban Doug mereti sereta setuju ka pengawa aku tu.

Naka tu aja sekali tu.

Cherita Ari Miri

Balat ga pengangat hari ditu! Heheh, lama udah enda nyepi pengangat ba menoa asal eh. Enti nadai air-con tak merinsa endar tindok malam.

Tudah anak endang basah pala laban peluh. Malam tindok enda bepua taja bisi air-con ba bilik. Aku bebungkur lah tindok dalam bilik air-con. Kena sakit batuk enggau chelap angat aku berapa hari udah datai ba Miri. Tang diatu tau dikumbai udah gerai sakit batuk. Mina batuk mimit aja tang nyawa agi raguk.

Doug mina seminggu aja di Miri. Enda sempat iya ngena jamban duduk ti digaga ba bilik mandi baroh kami ditu. Itu orang putih tidak pandai pangsai pakai jamban Iban, ko apai aku madah ka cina ti ngadu jamban nya! Heheh. Jamban duduk ba sadau agi tau dikena tang nya meh, nyau kiroh niki tiap kali ka ngena jamban. Hari Doug datai ba California din, jamban pen tembu digaga ditu.

Aku alu ngasoh cina ti ngaga jamban nya ngechat dapur enggau bilik tindok ti alai kami menyanak. Dinding bilik tindok nya nadai temu gamal agi bekau menyadi aku enggau sida menyanak diau dia suba. Tiap kali kami datai, besebut ka ngechat dinding tang selalu enda sempat, tang sekali tu hari kedua kami datai aku alu ngiga orang ngadu samoa utai ti patut diadu.

Aku bisi meli katil beringkat ka bala anak. Tang nya meh, laban katil nya tinggi nyau datai jari Duncan kipas angin ba ceiling! Enggai enda nukar ga kipas angin nya. Ni alah pala Duncan kena kipas angin! Udah ga Duncan endang sigi rindu bejelangkit ka utai! Doug meh tukang tukar kipas angin.

Sahari tu aku kiroh niki bank, tiga bengkah bank. Nutup account, nginsil standing instruction etc. Tusah endar ga bisi bank account ditu, laban enti enda dikena nyau nyadi inactive. Manah agi tutup, enda agi kiroh.

Naka tu aja dulu. Ila nyambung baru cherita.

Udah Bekemas!

Kami menyanak angkat lemai pagila. Kami ngena kereta ka San Francisco, udah nya kereta ditinggal ba hotel. Hotel nya endang bisi nyendia bas kena mai bala ka padang bilun. Maya Doug pulai nganjong kami ila baru iya bemalam ba hotel nya, enti enda bakanya enda ulih ninggal kereta ba hotel parking lot. Manah ga baka nya laban iya murah agi ari ka mayar parking ba parking lot ba padang bilun San Francisco.

Ati sigi rindu ngenang diri ka pulai tang leboh ngenang bala anak ti lelak nganti ti ka angkat nepan bilun, amat lembau endar. Tetap bekerauh bala anak laban lelak, ngiga tusu .... akai endang stress aku! Bilun kami angkat pukul 1.30 pagi kena 4 October.

Kami ngena Cathay Pacific lalu betukar bilun ba Hong Kong. Ba Hong Kong, nganti empat jam sebedau bilun kami angkat ka Kuala Lumpur. Taja lama nganti ba Hong Kong, jam kami datai ba KLIA baka ti ngena MAS. Kami diadang datai pukul 12.30 tengah hari kena 5 October.

Ba KL kami bemalam dua malam ba hotel sebedau kami pindah ka rumah pangan aku. Pangan aku enda ulih ditepat sebedau nya laban ipar iya agi dia, mina pulai ka Miri kena hari enam nya.

Rindu endar asai ati ngenang ka sida pemakai ti bisi maya bulan puasa tu! Heheh, peda aku hotel endor kami diau bisi Buffet Buka Puasa. Mali enda makai dia, eh, enggai ka puni! Hahaha.

Nganti udah di Malaysia ila, baru bisi hari nulis entry baru ba blog tu! Anti perkembangan terkini ari Malaysia! Heheh.

Kisah Malang Mag

Enti kita bisi macha blog Mag, tentu kita nemu sida sebilik udah pindah ari Texas ka Utah. Pagi tu tadi aku bisi chat enggau Mag, alu dia iya bisi madah ka perengka sida ti dibai dalam truck (rented moving truck) abis kena churi orang ... enggau truck nya sekali!

Sinu amat aku ninga Mag becherita pasal nasit sida sebilik. Pagila sida pindah ngagai rumah sewa ari hotel, tang nya meh perengka ti dibai ari Texas nadai agi kena ngemenoh ka rumah. Sida pinggai mangkuk, periok pen lengis. Enda iboh sebut sida kerusi mija. Endang lengis, nunda ka jako Mag.

Truck ti dichuri ditemu polis ba siti tempat- endang ditinggal sida penchuri ba siti tempat. Tang nya meh nadai utai agi, kosong. Nasit endar ga kereta ti ditarit belakang truck enda ulih dibai pencuri laban bateri kereta nya mati. Enti bateri nya idup tentu kereta nya pen lengis.

Amat sinu ngenang nasit sida Mag. Tang bisi endar ga ati bala ti gawa enggau Larry (laki Mag) tetarit ninga cherita sida, alu bisi meri sida gift cards. Bisi ga utai ulih dibeli ngena gift cards ti diterima ari pangan ti kerja enggau Larry. Lempong ga mimit penusah sida sebilik laban tulong orang.

Kita tau macha cherita pasal kisah malang sida Mag ditu tauka meda video berita ditu. Endang pansut ba TV enggau radio meh cherita perengka sida Mag ti kena churi.

Promo

Sahari tu aku ka promote dua iti blog . Keterubah iya blog Entayang. Entayang endang ukai orang baru iya betulis ka blog tang baru diatu numboh blog ngena jako Iban.

Aku endang sigi ngelala Entayang ari iya agi mit suba. Tang aku lama udah enda meda iya laban sida sebilik pindah ka Kuching, tambah mega aku mindah kin kitu. Tekenyit aku meda gamal iya diatu ... udah besai serta dara endar! Heheh, nyau ka belaki da pen!

Au ah, belaki ka orang bansa ribai ari Australia meh Entayang taun baru tu ila. Manah endar awak ka darah kitai Iban bisi bechampur enggau bansa orang bukai. Ila kitai meda, tinggi besai bala anak Iban! Heheh.

Abas meh blog Entayang ngambi ka bela nemu pendiau kitai Iban ba menoa Australia.

Blog kedua iya nya dikumbai Mr Manager. Aku endang lama udah bekelala enggau Vernon a.k.a. Mr Manager. Tang nya meh laban sida sebilik pindah ka Kuching udah bekau apai iya pencen ari Shell ba Lutong suba, nya kebuah lama enda betemu. Ngelama tu aku endang nemu iya bisi account ba Myspace tang laban aku ti nadai account Myspace, enda ulih ninggal komen dia.

Pagi tu tadi aku nitih link Mr Manager ba blog Entayang, nya ti ngasoh rindu endar asai ati laban bisi ulih ninggal ka pesan ba chatbox Mr Manager alu bisi nerima balas ari iya. Gaga amat ati laban amat lama endar kami ti nadai betemu.

Kelia maya agi di Miri din, kami endang sama bisi enggau orang belagu ba choir St Columba's church enggau Good Shepherd Church di Lutong. Tambah mega, maya Christmas kami bisi enggau Christian ari church bukai belagu maya Christmas Festival. Nya Vernon nanya aku enti aku agi ingat belagu ngena part alto. Heheh, agi ingat alto part sekeda christmas carol aja.

Vernon sigi landik endar pasal muzik .. bemain ka piano, organ enggau cello. Tambah mega nemu conduct choir enggau pemain muzik. Bisi sekali iya datai ka rumah aku ba Lutong din, konon ka meri aku voice training. Heheh, nadai ulih diajar laban ti lekik lekik ketawa! Haha, kada Vernon ingat ka nya?!

Enti kita ka nemu pasal pendiau selebriti Malaysia anang enda ngabas blog Mr Manager. Vernon bekelala endar bala sida selebriti Malaysia. Engka kita enda nemu, Vernon meh manager penyanyi tebilang Ning Baizura.

Oooiii, kitai mina meda ba tv tauka macha ba news pasal persanding Siti, tang Vernon endang bisi kena undang! Peda gambar ba blog iya!

Vernon, it's great to meet you again! Entayang, pajak ka dia betulis ka blog ngena jako Iban!

Pulai

Ati gaga amat ngingat ka diri ka betemu enggau apai indai, bala menyadi enggau sida ipar. Tang ma ngenang ka ngemas sida beg lembau endar tulang. Barang ti ka dibai pulai ka Miri alu bedau di kemas!

Ujung minggu tu ila, sida entua aku bisi ka datai. Sebedau sida datai tentu lah rumah mesti dikemas dulu ... sida bilik mandi dituchi, bilik tinduk dikemas. Bilik mandi dikena bala anak, amat enda temu gamal .. bekerak, ni bala ayam sebelah bilik mandi!

Lebih setahun sida anak enda dibai nepan bilun. Enda aku nemu ulah saduai ila. Sebedau mupok aku udah stress diri ngenang ngintu saduai iya. Ka laki nya pedis .. iya ga bansa ka enggai jenuh, rindu "ngeluyar" orang. Endang begagai meh kami ila sebelah bilun!

Rindu asai ati ka shopping ba KL ila! Heheh, aku ka ke Petaling Street, ngiga marik batu dibai orang ari Nepal. Rega batu ti dijual pen umbas iya ga.

Udah kami ba KL kami alu ka Kuching. Bala kaban ba Kuching apin kala betemu enggau sida anak aku, nya meh ka mai sida ka Kuching. Siko uncle aku ba Kuching dia enda kala betemu enggau Doug, nya lah ka ngetu ba Kuching sekali tu.

Gagit endar ati ngingat ka pemakai ba Malaysia din. Tengok endar. Taja diri empu nemu berapi lauk dempa kitai orang Malaysia tang enda meh senyamai pandok orang bukai! Heheh.

Kami menyanak angkat ari California kena 4 October, pukul 1.30 pagi. Akai, tetap cranky bala anak jam nya ila!

KL, Kuching, Miri, here we come! :-)

Video Ansa Mangah

Duncan enggau Denice takut ka ansa.

Ansa Mangah 2

Lemai kemari tudah Duncan kena pantuk ansa. Duncan sigi enda nemu takut ka ansa. Endang selalu dipelut ka iya ma ansa ka ngagai iya. Enda nemu meh kemari, leboh iya bejalai nuju ayun iya, ansa laki alu datai belanda ngagai iya lalu mantuk iya! Bakal meh pah tudah Duncan laban kena pantuk ansa nya. "Goose eat me!" ko iya nyerita ngagai aku. "No, goose bit you", ko aku. "No, goose eat me!" Heheh. Kasih tudah nyabak laban kena pantuk.

Denice enda iboh sebut. Sigi takut endar iya ka sida ansa. Endang selalu nyabak rauh rauh ma sida ansa mansang nuju iya. Belalai belakang Duncan meh iya ma meda ansa semak dia.

Ansa kami nya sigi mangah. Kitai selalu meda ukoi nyalak serta begagai ka kereta. Enggi kami, ansa ti begagai ka kereta! Hahaha. Gamal nuan ko aku, ma iya ngagai kereta aku leboh aku pansut ari driveway kami. Tadi aku meda ansa laki (apai ansa) ka mantuk kereta orang seberai kami, udah nya alu ngagai kereta nya. Endang baka ulah ukoi!

Persandingan Siti

Aisey, amat ketinggalan endar aku. Aku enda sedar Siti udah bersanding. Semadi meh macha komen ari Cuthess ba entry pasal Siti ka dulu ari tu. Bekareh meh aku begiga ka gambar ba internet pasal Siti ti udah bersanding.

Tang nadai problem laban ba YouTube mayoh endar video clip pasal persandingan Siti! Heheh, reti nya sempat ga aku meda Siti ti udah nyadi bini Datuk K.

Apu, amat besai endar belanja Siti ti nikah tu. Ko berita, tiara ti dikena Siti udah berega RM2 juta! Iisssh, amat beduit ka Siti enggau Datuk K tu?! Sejuta dah kitai enda kala meda, enda ibuh sebut ngena tiara berega RM 2 juta! Ni iya rega baju ti kena Siti bersanding, berapa kali tukar nya? Datuk K segak gamal ngena tuxedo tang maya iya ngena baju Melayu tuai endar gamal iya ... amat enda padan endar gamal bebini indu biak.

Kepuas aku bepeda ka sida video pasal Siti ti bersanding tetemu ka siti video ti benama Lelaki Duda. Tune lagu tu nunda tune lagu "Gadis Melayu". Siapa bilang lelaki duda tak menawan, ko munyi leka lagu tu. Leka lagu tu becherita pasal duda ti udah menawan hati Siti. Oiii, hormat sikit lah, Datin Siti nama orang diatu! Heheh.

Merdeka

Ni bala kita ka diau ba Kuching, bisi enggau orang begau be tisi sungai Sarawak? Meda pengerami Hari Merdeka ba Kuching dia?

Aku ampit pen meda mimit pengerami ba tebing sungai Sarawak. :-) Pagi kemari (iya ga kami laun 15 jam ari jam Malaysia) tumu aku masang komputer. Nasib endar ga tak mujur livestream ari RTM ba internet pagi nya.

Laban nya tumu pagi enda entu ulih meda sampai pengujung program nya laban ti kiroh nyendia ka bala anak ka nurun sekula. Tang aku sempat meda penatai Perdana Menteri ba endor orang ka ngerami program malam nya. Sempat meh aku meda Ning Baizura belagu.

Aku ditu laban ti nadai begulai enggau orang Malaysia bukai, nadai kiroh ngintu ari Merdeka. Engka dudi ila tau ga aku ngantong bendera Malaysia maya 31 Ogos. Alu apin meli bendera Malaysia!

Bah, sapa nuan Anonymous, ti bisi ninggal komen ba blog aku tu? Dini alai nuan ba California ditu? Anang enda madah ka diri awak ka aku tau bekelala enggau nuan! :-) Siko Iban nadai meh aku udah tetemu ba California tu. Enda patut nadai, tang nya meh, sigi pedis kitai nemu sapa kitai ti datai ari Sarawak ti bisi diau ba menoa tu kelebih agi kitai Iban, enti kitai enda begiga ka pangan diri.

Anang malu, aram meh kitai bekelala enggau pangan diri!

Duit

Tengah hari kemari leboh aku pansut ari supermarket, dia aku tepeda ka apai tuai siko bediri depan newspaper vending machine (enda nemu jako Iban kena madah utai tu!).

Keterubah iya kumbai aku iya enda chukop duit shiling kena meli newspaper. Aku alu ngetu, engka enti amat enda chukop duit, lagi aku meri iya duit kena meli newspaper.

Paduhal apai tuai tu enda ngelala ni bagi nickle enggau ni bagi dime. Aku alu ketawa laban aku datai ka diatu agi meh saru. Iya ga orang ditu duit 10 sen dikumbai dime , duit 5 sen dikumbai nickle, lalu duit 25 sen dikumbai quater. Saiz ka 5 sen nya besai ari iya ka 10 sen. Nya nyau nambah ka penyaru!

Rega newspaper ti ka dibeli apai tu iya nya 35 sen. Iya tau nyimpan 1 quarter, enggau 2 nickle ka dalam vending machine. Sigi bisi iya duit nickle tang iya ka enda ngelala .. ko iya asai ka enda chukop duit nickle kena disimpan ka dalam mesin newspaper nya tadi. Nyau meh aku nulong iya nyimpan duit ka dalam mesin newspaper nya tadi.

Kebuah apai tuai tu enda ngelala bagi duit laban iya datai ari England. Ari slang jako iya aku nemu iya endang ukai asal orang ditu. Tang enggai enda nanya ga aku. Nya aku madah ka iya, aku tujuh taun udah diau ba menoa tu agi meh tau saru. Iya alu madah ka diri iya baru dua taun udah diau ba menoa Amerika.

Alu panjai meh cherita kami duai. Penyaku endar apai tuai tu. Ko iya, iya pindah ka Amerika nitih anak iya (anak iya endang lama udah diau ba Amerika) maya umur iya 85 taun. Dia kitai tau ngira, umur apai tuai nya diatu 87 taun. Agi chergas endar iya laban iya bejalai kaki pulai ngagai rumah anak iya.

Aku ka ketawa ngenang diri ka becherita enggau apai tuai tu. Balat endar tempias ... heheh, moa aku dua kali kena sembur ai liur iya! Bendar ngetat diri enda ngelap moa!

Nikah Siti

Bisi bala kita enggau orang begau ka Siti nikah? Bisi meda tv siaran langsung? Aku enda nemu Siti udah nikah semadi tepeda ba The Star online.

Glamor endar gamal Siti, orang sigi bajik. Tang pesen baju kena iya nikah nya enda berapa peda aku. Nama hal betudung baka nya? Tiara dudok atas tudung? Oiii, sigi enggai aku meda pesen baka nya! Haha, enti orang sigi betudung ka pen enda laban ti enggai tinggal betiara maya nikah, tang Siti ti ukai bansa indu ka betudung ... issshhh.

Datuk K tu sigi lelaki ti untung jadi ka indu dara baka Siti. Lelaki bepangkat, beduit, issshhh, sapa bala selebriti ti enggai lelaki baka nya? Lebih tuai enggau lebih jai gamal ari Datuk K pen laku! Enda iboh ka Datuk K nya janda, udah beranak empat. Enda ngawa laki iya tuai, engka ba runding Siti, iya ga ukai nadai Viagra ba farmasi!

Gago aja hal orang, eh! Hahah!

Lauk Tengah hari

Err, semadi nadai entu cherita ... becherita pasal pemakai aja lah! Heheh.

Tengah hari tu tadi kami makai belauk ka kangkong enggau ikan kembong guring. Ngelama tu aku enda nemu ikan nya ikan kembong. Sigi kala aku meda ikan nya dijual ba supermarket china kami ditu. Nya meh semadi pangan aku ba Indiana nyebut iya bisi tetemu ka ikan kembong. Nya baru aku berati ka sida ikan ba supermarket nya leboh kami menyanak ka shopping dia lemai kemari. Gaga meh aku tu tadi nemu nya ikan kembong! Amat lama endar ga nadai udah makai ikan kembong guring!

~~~~

Sekeda bala ba Comeherelah bisi bekenang pasal panggal guling. Ko siko, bisi orang nyual panggal guling ba menoa ditu kini? Dia siko alu volunteer nyait karong panggal ka siko ka ngiga panggal guling. Reti nya tadi siko ti ngiga panggal nya mina ngisi karong nya aja. Tang ditu ka pedis ngiga kapok kena ngisi panggal. Enti amat ka sigi bisi ga orang nyual tang nya meh enggai enda ngudar ari internet. Kiroh endar ga nya. Ka pen enda ngena polyester filling aja meh kena ngisi panggal guling.

Kemari leboh kami ka shopping ba supermarket china, dia aku tepeda ka panggal guling dijual dia. Geli meh ati laban baru udah kami ti bekenang ka panggal guling. Tang panggal guling ka dijual nya kelalu besai peda aku .. rindu agi aku beberap ka panggal guling ka kurus! Heheh.

~~~~

Kita endang nemu aku sigi rindu ninga lagu Iban, enggau WaiFM ari IOR FM. Tang kadang kadang server alai IOR FM bisi mugok mimit ... nadai ulih ninga lagu Iban.

Kepuas aku begiga ka radio stesen internet ari Malaysia dia aku tetemu ka Kiss Radio FM. Rindu endar ga ninga lagu dimain ba stesen tu. Lagu ka dimain ba radio tu lagu Melayu ari Singapore, Indonesia enggau Malaysia. Kelimpah ari nya, lagu industan pen bisi ditebah ba radio tu. Mina lagu ti enda ulih dikelaung, lagu nasyid! Sigi baka iya radio ari Malaysia neh!

Nya lah leboh makai belauk ka kangkong enggau ikan kembong guring tengah hari tu tadi, tak bisi endar nyawa dianjong laban bisi lagu Melayu bemain ba belakang! Heheh.

Goyang Bali

Apai Salleh nanya ni iya Mas Idayu enggau lagu iya Goyang Bali? Heheh, Apai Salleh lebih nemu pasal lagu dangdut ari aku! Tu iya Mas Idayu mai lagu ti di pinta.



Ba lagu siti tu, Mas Idayu betanda nunda gaya sida industan. Arap ka kitai bela teperindang! :-)

Kenyang!

Lemai tu kami menyanak makai belauk ka kari dagin, tugey guring bechampur enggau ikan masin but. Ikan masin but? Au ah, bisi tulih ka ikan masin ba supermarket cina kami ditu. Naka pengaga ati tetemu ka ikan masin but (salted mackerel in oil).

Enda beresai nembu ka asi sepinggai! Nyuap menyuap! Heheh. Ko aku madah ka Doug, asai ka makai dirumah indai aku din. Kipas bepusin, enggau lagu Iban bemain ba belakang. Heheh.

Dia aku alu bekenang ka dua iko pangan aku ditu ti belaki ka bansa ribai mega. Siko ari saduai, laki iya tak sigi enda makai lauk pandok stail Malaysia. Ka siko pama agi mina enda entu ka makai lap chong, enggau enggai makai pau. Ko aku madah ka Doug, endang beterima kasih amat aku laban iya enda milih. Belachan, ikan masin, lauk pedas, buah rian endang sigi ka magang.

Bah kati pemakai kita ti bebini ka indu ribai deh, Aki Gerubi? Bisi kala belauk ka ikan masin, kari dangin, enggau makai tugey guring? Kada ka indu ribai ka ngenat rumah bebau ikan masin but ti udah diguring?! Haha.

~~~~

Agi bekenang ka ikan masin but .... maya aku ngirum care package ngagai Mag kutai, aku bisi ngirum sebutul ikan masin nya. Kari dagin ti dipandok aku lemai tu tadi, ngena kari ti dikirum Mag .. kari ari Thailand. Nyamai ga dipandok enggau dagin.

Aku bisi mega ngirum tiga butul ikan masin but ngagai pangan aku (indu melayu - classmate ari Miri) ba Indiana. Iya madah nadai tetemu ka ikan masin nya ba endor iya diau din. Nya ko iya, lama udah enda makai ngenyamai asi chelap di-empa enggau ikan masin but guring! Lichin periok asi ko iya!

Pagila aku deka ngirum dua butul ngagai pangan aku (indu Iban, pangan lama ari Miri) ba Maryland. Lemai tu tadi aku bisi betelipon enggau iya, dia iya bisi bekenang ka lauk babi di stim enggau ikan masin baka ka ti pandok kedai Wong ba Lutong din. Haha, tengok aku ninga nya, bisi meh hari tu ila nguji mandok ikan masin enggau babi.

Iiisshh, amat kenyang makai lemai tu tadi! Amat asai ka makai ba rumah indai aku di Miri din. Haha, laban ka bisi lagu Iban bemain ba computer ari IOR FM. (Laptop aku sigi ba dapur alai iya!)

Tujuh Taun

Dua lunsin bunga rose.

Mango cheese cake.

Kad anniversary.

Makai dim sum pagi hari minggu.

Tu meh sekeda utai kena ngingat hari kami duai Doug jadi melaki bini. :-)

Happy Anniversary, sweetie!

Dangdut

Lagu dangdut dua iti tu dituju ka aku ngagai Apai Salleh. Lagu dangdut ka keterubah iya nya ari Malaysia dibai Amelina enggau Iwan. Iya kedua, dibai penyanyi Indonesia benama Inul Daratista. Apuuuuu .. balat endar goyang punggung siko tu! :-) Sangka aku nadai berani penyanyi ari Malaysia ngemalat nya begoyang ka punggung sida!






Engka sekeda kita agi ka meda burit Inul Daratista, tu iya siti agi video clip iya! Heheh.

Cherita Ujung Bulan

Ujung Bulan

Laban kami ti enda enggau orang gawa ba opis, kami mina nemu hari tang enda nemu hari bulan! Tak tekenyit maya meda calendar .. apu 31 haribulan tujuh sahari tu pia? :-o

~~~~~~

Nadai Angat Agi

Hari kami diatu udah mupok manah, nadai agi ngangat hari ke kutai. Sahari tu udah hari ketiga pengangat hari enda lebih ari 34 C. Lebuh aku dreba nengah jalai tengah hari tu tadi dia aku berati ka sekeda bungai ti ditanam nisi jalai abis mati laban panas ti bisa bedau lama tu tadi.

~~~~~~

Meda Wayang

Lemai kemari kami duai Doug bisi nganjong diri meda wayang. Enda aku ingat ni penudi kali kami duai bisi meda wayang ba panggung! Too long! :-)

Antara Pirates of the Carribbean II enggau Superman Returns ... ni ka dipeda? Hehe, tentu lah pilihan aku! Aku sigi rindu meda cherita Smallville ba TV (tang lama udah enda meda), tambah mega aku ka meda gamal pelakon ti nganti Christopher Reeves. Sigi sigat ga pelakon baru tu ... mina siti aja .. ka lembut mimit aja gamal iya! Heheh. Rindu ga aku meda cherita tu; rindu amat meda special effects kelebih agi special effects ba scene Superman ti nyelama bilun ti laboh ari langit.

~~~~~~

Makai Malam

Udah pulai meda wayang kami alu makai ba Logan's .. aku makai steak, lama udah tengok ka makai steak! Doug makai burger.

Ni bala anak? Ehhh, tinggal lah .. bisi ngaji baby sitter nyaga anak awak ka kami ulih keluar dating - meda wayang enggau dinner.

Nya lah ma ka keluar, anak ditinggal, enda besai endar belanja. Mesti ka ngira upah baby-sitter ga dalam belanja keluar dating.

~~~~~~

Main Marik

Seminggu minggu tu tadi aku kiroh begaga ka tenggak marik. Sekali tu aku ngaga tenggak marik ngena tali (satin cord). Tali nya ditachang (chinese knotting). Kelia aku endang bisi belajar ngaga tenggak ngena porcelain beads enggau satin cord, tang nyau enda ingat agi.

Bekareh begiga ba internet alai belajar chara nanchang satin cord; bisi ga tetemu ka sekeda. Laban ti enda puas endar ati, dia aku bisi ngorder 2 iti bup ari Amazon (Chinese Knotting by Lydia Chen, enggau Chinese Knots for Beaded Jewelry by Suzen Millodot). Rindu endar aku laban bup nya datai dalam 5 hari ... bisi endar alai ngulih chunto kena ngaga tenggak! :-) Ila lah aku ngeso gambar .. nganti bisi kelima iti tenggak udah tembu ila, baru ngambi gambar.

Red Wagon

Tu gamal video diambi aku lemai tadi. Heheh, baru iya nguji ngena video function ba digital camera.

Maya aku ngambi video nya jam udah pukul 8.15 malam tang hari agi terang. Nya lah maya musim panas bala anak enggai tindok tumu, agi ka bemain laban hari agi terang.

Agi angat hari kami sahari tu .. kelalu angat, 45 C. Sekejap aja bala anak bemain ba luar dah bepeluh. Ukai mina angat, humid mega.

Tiga Taun

Selamat Hari Pengada, Duncan

~~~~~~~



Birthday boy and his birthday cake.

Ramalan Cuaca

Hari majak angat sepemanjai minggu tu!

Angat!

Naka iya pengangat hari kami sahari tu.... 42 celcius. Aku mina bediri ba moa pintu enda lama, ngangau bala anak tama. Taja ari angat endar saduai ka bemain ba luar ... bala anembiak sigi tan tang kitai besai tuai takut nyepi utai pengangat nya, asai ka diau dalam oven!

Enti enda pasal bisi air-con sigi enda tan diau ba menoa angat baka tu. Sigi pindah aku enti nadai air-con, ngiga rumah enda jauh ari tasik. Ditu enti semak tasik, sigi nyamai hari, jarang angat endar.

Rumah sida entua aku enda jauh ari tasik, nya meh ma pagi hari, tebal embun. Ma malam chelap endar asai ka ukai musim panas; jauh endar beda pengangat iya ari endor kami diau ba Galt ditu.

Ma bala kita ka nemuai ngagai menoa kami ba California ditu anang datai musim panas .. enda tan bejalai musim panas. Aku enda kala pen nyepi pengangat baka ba ditu di Malaysia din.

Heheh, semadi nadai cherita meh, laban bisi aku udah nulis pasal hari angat ditu bedau lama tu tadi!

Pengawa Ujung Minggu

Yee Haw!

Ujung minggu tu tadi kami menyanak bisi ka Nipomo/Santa Maria ngagai sida entua aku. Lemai hari kami datai kami bisi bejalai ngagai sida ipar aku. Dia kami dibai ipar aku nepan keldai iya .. heheh, maklum lah sigi enda kala nepan kuda tauka keldai ... nepan gajah kala aku! Rindu bala anak dibai nepan keldai. Ipar aku nya sigi rindu nupi kuda enggau keldai.

Yee haw, ko daddy saduai Denice!

Gamal orang baru iya nepan jelu dikumbai keldai!

~~~~~~

Party

Kebuah kebendar kami ka Nipomo iya nya ngintu hari pengada (belated birthday party) Doug. Apai indai iya bisi ngatur siti party ka iya, ngangau bala pangan enggau kaban. Manah endar ga party nya ... utai dempa umbas iya, bisi ngundang 2 iko penyanyi kena merindang bala ti bisi datai.

Sekeda pangan Doug ti dibisi datai, tujuh taun aku nadai betemu enggau sida, mina maya kami ti ngintu party kami ti baru jadi melaki bini suba kami ti bisi betemu.

~~~~~~

James Dean Memorial



Sapa kitai enda kala ninga nama James Dean? James Dean sigi pelakon lima-puluhan ti tebilang. Tu meh gamal memorial James Dean ba Cholame. Tiap kali kami ka Nipomo kami endang mansa menoa tu. James Dean mati semak ditu, kira 900 ila ari pun kayu tu. Tempat tu endang selalu bisi tourist lebih agi tourist ari menoa Jepun.

~~~~~~

Dreba Palau

Kami selalu ngetu ba siti tempat dikumbai Avenal leboh kami ka serta pulai ari Nipomo. Leboh kami ninggal Avenal dia Doug meda sebuah kereta laju nitih kami ari belakang, dreba ba tengah jalai. Udah nya iya alu overtake kami nye ka ngindas kami da. Apu, sigi mabuk dreba nya ... ma ba tengah ma ba tisi jalai, dreba enggau naka pengelaju iya.

Doug alu ngasoh aku manggil 911. Aku nadai kala pen manggil 911 (nadai kebuah ga ngelama tu!) tang meda dreba nya mai kereta iya enggau naka pengelaju, mai kereta kidu kidu belah jalai, enggai ga kami meda orang bukai bebadi laban iya.

Engka bisi lebih 20 batu udah nya baru kami bisi meda kereta orang mabuk nya ba tisi jalai, ditan polis. Tempik jari kami duai Doug meda iya ditan polis. Enti enda amat bisi bebadi orang laban iya.

July 4th

Sahari tu kami di America ngintu Independence Day. Chara orang ditu ngintu hari tu, bar-be-que ba luar, picnic, udah hari petang bemain ka bunga api. Tiga hari beturut turut Doug enggau bala Lions Club bejual ka bunga api kena sida ngumpul fund sida. Kami bisi meh ka enggau orang betunu ka bunga api malam tu lagi! :-)

Kelly Clarkson mai lagu America the Beautiful. Video tu direkod dalam taun 2003.

Berita Dalam Gambar

Galt Festival Parade

Kami enda sempat meda sida ti dulu mansa laban temu shopping ba supermarket berimbai dia. Malam nya bisi main bunga api (fireworks display) ba Veterans Field, Galt tang kami nadai enggau orang laban hari mupok petang pukul sembilan malam, maya anak tindok.

~~~~~

Bemain Bunga Api

Hari enam tu tadi, kami bisi dipanggil ngagai birthday party pangan aku. Bisi bemain enggau bunga api kena ngeramai ka birthday. Duncan keterubah iya takut meda api, puas ngumbok ka ga iya nguji.

~~~~~

Dreba Kereta

Naka pengaga Duncan ulih dreba kereta ti bejalai ngena bateri. Kereta ulih daddy iya mutik ba tisi jalai! Heheh, beli ka bateri baru, agi ka bejalai kereta nya.

~~~~~

Ansa

Sida anak ansa bemain baruh pun buah.

~~~~~

Bungai pun dragon fruit

Dragon fruit kami selalu bebunga tang enda kala nyadi buah. Bisi ngelima iti bunga iya dia.

~~~~~

Cherita Makai

Demalam kami nguji restoran Pick Up Stix ... pemakai orang Asia. Aku ngoder mee besambal chabi .. nyamai! Sirut sirut idung!

Pagi tadi aku nguji ngaga kuih mua chee. Mag bisi ngirum aku tepung pulut dua bungkus. Nya bisi endar kena ngaga kuih mua chee. Ngena microwave, chara muntang! Nyadi ga!

~~~~~

Langit

Gambar langit ba Lodi leboh nganti Doug pansut ari Walmart, lemai hari satu tu tadi.

~~~~~

Buah Plum

Pun buah kami taun tu enda entu nyadi laban enda dijarau maya musim chelap tu tadi. Tang pun plum pama ga agi ari sida bukai. Buah apple ba pun mit mit. :-( Buah apricot mina siti dua. Mina quince aja galak. Sida bukai nadai bebuah.