Gila Bulan Hari Gawai

Apin pukul 5.00 pagi bala udah dani, nya kebuah sempat pansut ngambar bulan. Bulan ukai sebarang bulan, bulan pagi Hari Gawai.

Selamat Hari Gawai Gayu Guru Gerai Nyamai ngagai bala kitai semua. Ngajih ka taun tu kita bulih berkat lebih agi ari taun ka udah. Oooohaa!

Selamat Ngintu Ari Gawai

Lagu Gawai kena merindang bala kita ti bisi sangkai.

Mupuk

Nya meh gamal kami menyanak nganti ti ka check-in ba San Francisco International Airport.

Lelak endar asai laban pukul 1.30 pagi lagi baru bilun nya angkat.

Agi panjai pejalai. Bah, ila nyambung cherita!

Gila Bulan: Bulan Purnama

Bulan penuh kena malam 27 May, 2010.

Menyampah!

Begedi amat! Demalam computer aku kena attack malicious malware!

Masau jam aja lemai kemari laban tepaksa clean up pc! Browser enda ulih dibuka, anti-virus software kena disable, alu malware nya insist kitai meli product iya kena clean up pc! Nyu download malware removal software ngena computer siti da, install ba infected pc alu clean up. Nasib ga mujur!

Udah nya pagi tu aku meda semua links ka diklik ba Google kebukai hari tunga. Paduhal kena google redirect virus! Menyampah amat! Nadai kala kena attack baka tu sepengelama aku tu udah be-internet!

Baru lemai tu ulih diremove google redirect virus nya. Nyu bebacha ba internet dulu chara muai virus nya. Nasib ga Doug paham ... aku empu enda nemu laban chara muai nyu bekerituk ba registry din. Enda aku berani negu utai dia!

Bah, dah berangkat bala kita ti pulai ka menua maya Gawai tu? Kami menyanak udah besikap ka beg, nganti ti ka mupuk aja!

Standby: Gari

Pagi tadi aku bisi nurun suping - meli gari ti tau dikena di menua tu lagi. Gagit amat asai ka ngena gari pandak lengan tauka gari nadai lengan. Gagit mega ka ngena tanchut naka betis.

Kiraka nyu enggai agi meh asai ngena gari belapis. Hari kami ditu dua tiga hari manah amat, udah nya mupuk ga chelap baru. Ni enda nyu enda teranti asai ka ngena gari mipau agi!

Gari ka bemarik marik enda ibuh sebut - sigi rindu ngena!

Standby

Perengka wifi udah disedia.

Sekali tu aku mai yagi antenna kelimpah ari wifi adapter enggau cable ti tau dikena nangkap signal free wifi ari rumah apai aku di Miri din. Mangkuk alai wifi adapter endang ditinggal di Miri din. Nya nyadi back up enggai ka yagi antenna tu lawa gamal aja tang enda kuat nangkap signal.

Demalam kami duai Doug mai netbook aku pansut nguji antenna. Bisi ga nangkap wifi orang semak kami ditu tang nadai bar.

Arap ka signal gain ari yagi antenna aku nya kuat agi ari wifi adapter ti dikena aku taun nyin kemari!

Limpang bemain enggau kamera

Kenu ka ngemas rumah, nginjin enggau nerika gari, tang nemu limpang bemain enggau kamera enggau lens. Bemain alu pansut ngambar utai nguji lens ti dipasang ba kamera!

Utai dalam rumah agi bereba, tang gambar diambi pagi tadi, ukai main agi!

Taun nyin kemari aku bisi meli macro lens ti tau dipasang ba lens kamera Fujifilm aku. Tadi aku nguji bala sida step up step down rings, bisi ga ngam alu tau dipasang ba manual lens kamera baru aku.



Ulat bulu ti ngerayap ba pun bunga tu mit amat tang tau endar dipeda ngena macro lens nya.



Peda pemanah kaler ulat bulu tu! Baka daun cactus gamal tubuh iya!



Indu utai ti nutu bunga tu mesai kutu, tang nyu mesai indu gerinang gamal dipeda ngena macro lens.

Nah, rindu agi begambar ka utai ari ngemas rumah enggau nyikap beg ti ka dibai pulai kemisi!

Sunset lemai kemari

Lebuh kami ka pulai ari rumah Keli, hari pan mupuk petang. Laun selaun mata panas padam diatu. Jam udah pukul 8.00 lemai, mata panas apin turun iga.



Nadai gaga enda ngetu tisi jalai meh lebuhka meda mata panas benung padam ari belakang kebun anggur! Ukai nya selalu bisi mansa kebun anggur maya mata panas benung padam!




Meda langit agi orange udah ka datai semak rumah, limpang ga awakka aku ulih ngambar langit udah bekau mata pansa padam. Nasib ga driba nadai mayuh jaku!

Nyambut Hari Pengada

Sahari tu kami ka Chuck E. Cheese ba Sacramento laban orang ti nyambut birthday kemari ka ngintu birthday iya din. Kami tu baru iya nganjung diri ka Chuck E. Cheese. Bala anak endang lama udah besebut ka kin laban ti meda advertisement ba TV.

Tempat nya restoran tang chukup macham main dia - ukai free, enggai enda bebeli ka token kena main utai dia. Baka arcade gamal utai nya dia, endang alai bala nembiak selalu ngintu birthday. Berapa iti enda grup orang bisi ngintu birthday dia sahari tu.

Kami mina manggil siku aja ari classmate Denice, laban indai Keli udah berapa kali mai Denice saduai Duncan ka rumah sida awakka saduai ulih bemain enggau Keli. Jilis amat bala classmate bukai laban Denice enggai enda madah ngagai bala bukai Keli bisi dipanggil. "Not fair, we want to go too", ku dua iku nembiak madah ka aku hari lima nyin kemari. Kasih amat aku ninga saduai nya. Aku nadai entu hari ka ngatur party laban mayuh kerja. Ka mai nembiak ngemayuh nyu kiruh endar ga. Iya ka bendar pengawa sahari tu ukai party .. kiraka mai Denice pansut makai, udah nya mai Keli mega.

Udah nya kiraka early birthday treat ka Duncan laban birthday iya ila kami tiga menyanak di Miri din. Nadai meh Daddy ulih enggau ngintu birthday din laban Daddy mina datai ujung bulan tujuh.

Gaga saduai sama bela nerima kad enggau duit ari ini saduai. Enti siku aja nerima, nyabak orang ti enda nerima. Tumu meh orang ti ngintu hari pengada 20hb tujuh tu ila nerima kad iya!

Naka tu aja cherita hari enam sekali tu.

Parents Chapel

Sahari tu kami duai Doug enggau apai indai nembiak sekula bukai sembiang dikumbai Parents Chapel ba sekula bala anak. Ba sekula nya, tiap hari lima sida endang bisi chapel. Minggu nyin ila minggu ka penudi sebedau kemisi musim panas. Parents Chapel kiraka penudi iya sida ngatur sembiang taun tu.

Denice enggau siku nembiak nerima kad Hari Pengada. Sahari tu endang hari pengada Denice ke tujuh.



Tu meh gamal kad diterima orang. Kerunyuk laban dilipat alu disimpan dalam kuchik.



Tiap iti kelas bisi mansutka program ti berindik ari cherita Bup Kudus. Bala sida Gred Satu mandang ka penemu sida pasal Catechism. Rindu ninga bala sida nyaut tanya ari pengajar sida pasal utai ti dipelajar ba Catechism.




Aku bisi ampit nerima sijil penghargaan, tegal diri ti selalu nulung ngemata bala nembiak lebuh lunch break. Bisi bala indai bukai nerima siji baka nya mega laban tulung sida ka sekula nya.

Seminggu aja agi, kemisi bala nembiak. Lemai hari penudi sekula kami tiga menyanak pan angkat pulai ka menua.

Agi Gila Bulan 2: First Quarter Moon

Aku pansut baru malam tu mai kamera ngambar bulan. Phasa bulan malam tu First Quarter. Er, enda nemu nyalin ngagai jaku Iban! Ahh, bulan sesuku keterubah?

Aku bisi download Moon Phase application ba iPhone. Ari nya aku ka nemu nama phasa bulan ninting malam. Malam tu terang amat langit, nadai meda awan ba senentang bulan.

Agi Gila Bulan

Aku prust amat demalam meda Idol aku Casey James tekeluar ari American Idol. Udah pansut result madah Lee DeWyze enggau Crystal Bowersox masuk final, aku alu pansut. Ngiga butul spray ti ditinggal ba luar alu ngangau mayau aku ngasuh iya tama. Maya nya meh aku meda bulan atas langit muak ka barat. Manah amat gamal bulan nya laban awan ngelingi bulan baka gamal halo.

Alu tama baru meh aku ngiga tripod enggau ngambi kamera.

Tu meh gamal bulan diambi aku demalam. Enda mayuh gambar ulih diambi laban awan alu mansa bulan. Petang magang gambar diambi lebuh bulan dilindung awan taja bulan agi ulih dipeda mata.

Naka tu aja cherita gila bulan aku sekali tu. Malam 27 hari bulan lima tu lagi, pansut baru aku ngambar bulan laban maya nya bulan penuh.

Ikan enggau salad buah

Aku meli majalah tu laban gambar ba kulit iya. Lapar diri aku meda nya laban jam endang udah ngalih hari maya ka suping hari minggu tu kemari. Gamal chara manduk ikan ba gambar nya tak muntang aja, lalu lebuh ka nyilak majalah mayuh ga resipi bukai ti muntang aja gamal nyendia.




Kemari aku ngasuh Doug ngetu ba supermarket lebuhka pulai gawa. Meli strawberi, avocado, enggau mango, ku aku. Tomato udah bisi.

Buah ti udah disirap digulai enggau olive oil mimit, gula, enggau daun basil. Nya meh utai dibubuh atas ikan salmon ti udah dipanggang.

Mmmmmmm!

School Field Trip

Pama ga tubuh aku bepeluh sahari tu bai bejalai sebelah Consumnes River Preserve. Ukai bejalai rindu diri, tang enggau ngulu bala pengajar enggau apai indai nembiak bukai, mai bala nembiak ari Grade 1 - Grade 3 meda menua.



Cikgu sida Duncan abis tesat. Ukai nya bebelit ngagai menua nya tang laban sida ti enda kala. Pelaba aku kami tiga menyanak aja udah kala kia. Nya meh grup kami dulu datai taja kami ukai dulu angkat ari sekula.

Maya kami ti angkat ari sekula jam udah lalu pukul 11.30 pagi. Nembiak ti sama nepan kerita enggau aku kiak kiak madah diri lapar. Bekal endang dibai, udah datai din makai dulu bala sebedau bejalai.



Aku dudi belama laban ti selalu ngetu ngambar utai! Ngumba endar ga bala nembiak ngelaju nya ga pejalai sida.





Bala nembiak diasuh pejam enda lama ngambi ka ngulih ninga burung, engkatak enggau indu utai dia. Enti enda diasuh diau jenuh, nadai ninga utai mina ninga nyawa sida ka inggar!




Rindu endar aku meda jelu chichak tu! Bisi kaler turquoise ba tubuh iya!



Aku nadai meda burung ai bukai, mina siku tu aja. Bisi ga meda ansa enggau burung bangau terbai tang nadai meda sida atas tauka dalam ai.

Diatu aku ngenang sayau amat asai aku nadai kin maya bulan dua tauka bulan tiga nyin kemari. Paya dia nyu rangkai nya kebuah nadai entu mayuh burung ai. Lebuh ka meda awan tebal ba langit, bisi endar ati ka kin baru sebedau mata panas padam lemai tu tadi, tang enggai nyadi enda meda American Idol laban program start maya mata panas padam!

Belajar Ngaga Background

Demalam enggau sahari tu aku nguji ngaga background ti tau dikena enggau Blogger Minima template - ngaga background ngena Bunga Terong, beserimbai enggau Gawai Dayak.

Enti kita ka ngena copy code dibaruh alu paste ba Widget/Gadget HTML/Javascript ba Layout.

Demo 2 column Minima template tau dipeda ditu. Tu code iya enti kita ka ngena.

<style type="text/css">body {background-image: url("http://img686.imageshack.us/img686/5702/bungaiterong22column.jpg"); background-position: center; background-repeat: no-repeat; background-attachment: fixed; }</style>


Anang enda nguji! Nguji ngena demo blog pama meh!

Photography Workshop

Nama professional photographer ti meri workshop nya kemari Michael Collett ari Sacramento. Iya ka tinggi enggau kulit chelum nya. Workshop nya free, laban utai diatur Galt Library alu dispunsa Friends of Galt Library.



Nembiak siku tu datai enggau apai iya. Nadai kala nulak maya aku minta iya nyadi model aku! Tu kami nguji ngena reflector digaga ari kertas aluminium ti dilekat ngena cellotape ba cardboard. Enda ibuh meli perengka mar, ku Michael .. reflector ulih digaga dikediri empu ngena kertas aluminium!




Tu nembiak nya tadi .. lelaki nya, ukai indu! Aku ti ngumbai iya indu meda bok iya panjai! Keterubah iya pansut keluar kami ngambar utai sebelah tanah library. Ba pengujung workshop kami bekunsi ka gambar ti diambi kami, bala kami ti bisi mai cable kamera .. sekeda nadai mai, nadai meh ngayan gambar diambi sahari nya.




Tu maya kami nguji ngena reflector digaga ari kertas aluminium kena machar mua iya ari ayung diri empu. Mata panas endang ari belakang iya. Terang mua iya laban reflector nya.

Siku tu kala gawa di Kuching dalam taun 70an suba. Gawa enggau lutur ti ngaga research pasal penyakit goiter. Kami duai berandau udah badu workshop tang nadai nanya nama pangan diri!

Bala kami agi belala alu nanya enti library ulih ngatur Immediate Photography Workshop. Ku Michael Collett kiraka bisi nyengkaum immediate skills meh workshop saharinya. Nya aku nanya, Advanced Intermediate, tau? Ku librarian ti ngatur pengawa saharinya, nganti iya nanya bala spunsa dulu, alu enti nyadi ujung bulan lapan ila.

Gaga meh kami ninga Michael Collett madah iya ka ngajar chara ngambi portrait ba workshop nyin ila.

Dua Minggu

Mina dua minggu agi tinggal sebedau kami tiga menyanak angkat kemisi ka menua. Tengah hari tadi aku bisi nelipun China Airlines, ngatur penuduk kami lebuh kami pulai ari Malaysia bulan lapan nyin ila. Taun dulu Doug duduk kediri, aku enggau saduai dua iku nya kediri ga. Geram diri aku meda Doug bekuruh, alu aku siku ti kiruh laban bala anak!

Nya kebuah enggai enda tumu ngatur penuduk kami dalam bilun tu ila! Iya ga tikit nya dua kali booking laban ti enda sereta angkat. Mina pulai aja sereta.

Dua taun ka udah kami ngena Cathay Pacific, alu ngetu ba Hong Kong. Taun tu tikit Cathay Pacific mar agi ari tambang tikit bilun bukai. China Airlines jauh murah. Kapa masau duit! Manah dikena bebeli ka utai di Malaysia!

China Airlines, kempeni bilun ari Taiwan, alu ngetu ba Taipei meh kami menyanak alu tukar bilun dia. Ku aku madah ngagai pangan aku siku, aku enda takut nepan bilun ari Taiwan, enti ari menua China empu nya baru aku ka bisi takut mimit! Bilun ari US enda ibuh sebut, sigi enggai aku ngena. Kelalu mayuh orang jai ka ngachau!

Bala anak nemu lelengau ka daddy laban kami dua bulan udah di menua baru Doug datai. Sekali tu, ku aku madah ka saduai, suah agi aku mai kita ka swimming pool, alu suah agi kitai bejalai ngagai bala petunggal nuan. Gaga meh orang ninga nya!

Spring Program

Lemai tu tadi aku bisi enggau meda Spring Program ba sekula bala anak. Keterubah iya kumbai aku program sengapa, enda nemu nya musical! Bala anak nadai ga nyebut sida iya bisi pritis belagu enggau ngingat ka ayat bup kudus kena program orang malam tu.

Issssh, paduhal baka program musim Krismas tu tadi. Rindu amat ninga bala nembiak belagu enggau bemain instrument chimes (munyi bell). Nya ga pemanah iya sekula mit - tiap iku nembiak enggau magang, ukai mina sida ka landik aja. Pia mega, aku geli ati meda ulah sekeda nembiak ari Gred Satu. Ni ka kasak kasak, ni ka nayuk apai indai, ni ka betelai ba pending pangan diri.

Mina sekali tu nadai bisi di idang pemakai ringan udah tembu program. Kami tiga menyanak alu terus pulai. Doug enda ulih enggau kami laban ti ngulu meeting Lions Clubs.

Sempat limpang enda lama laban meda sunset ngemanah nya muak ka barat sebedau masuk simpang jalai ngagai rumah kami.



Mata panas padam dipeda ari tisi jalai kebun orang.