Tinggal Bulu

Nadai bukai pengujung ansa ti mina tinggal bulu tu. Enti aku enda bejalai ka belakang lemai tu tadi, enda meh aku sedar siku ari ansa aku tu udah nyadi pemakai jelu liar.

Pagi tadi dua kali aku ngemba ansa ti bejalai ba porch depan rumah. Maya ka ngemba enda ga aku tak ngitung berapa iku ansa ka diemba aku nya. Nemu aku nya ukai tujuh iku. Bisi dua iku ti selalu duduk atas sarang ngintu teluk laban ti benung beteluk.

Udahka meda bulu ansa nya baru aku nguji ngitung penyampau ansa ti benung makai rumput enda jauh ari aku. Lima iku aja. Tujuh iku semua sida. Engka siku benung duduk atas sarang iya. Enggai ga aku ngiga alai sarang, enggaika diserang ansa. Nya pan nyu bebai ka kayu, lebuhka bejalai ka belakang, kena malu ansa enti sida nyerang aku.



Mayau aku tu baka anak ukui. Enda tau meda aku bejalai sebelah tanah dia. Sigi nitih alu nganti meh iya dia. Issh, begedi aku ngenang jelu ti makai ansa aku nya!



Kebuah aku bejalai ka belakang rumah laban ti ka ngambar sida indu utai nutu bunga babas. Tang nyu nadai mood agi aku, ngenang ansa aku ti mina tinggal bulu ba tanah dia. Baru ga dua minggu nyin kemari aku nyebut ngagai Doug, kiraka selamat meh ansa kitai taun tu. Nah, kelalu tumu bejaku. Pun taun nyin kemari tiga iku ansa nyau dempa ukui kampung.



Udah nya aku alu bejalai ka mua rumah meda sida pagar ti nyu rebah. Ni enda ukui kampung ulih tama!

Ba mua rumah enda lama ga aku duduk nunga bunga lavender ngemata sereta ngambar indu manyi ti nutu bunga nya. Kesulai nadai ga bisi inggap dia maya aku ka duduk dia.

Ujung minggu tu lagi mindah ga kami menyanak. Akai, tusah ati ngenang sida ansa enggaika nyadi mangsa ukui kampung! Ni alah pulai ari camping trip mina meda bulu ansa aja betabur sebelah tanah!