Gambar Camping

Tu sekeda gambar maya kami ka camping. 3g connection ba desert, sigi enda berapa. Bisi dua kali post aku kiraka nyau ... successful upload, kenu, tang nadai meda utai ba blog. Muai jam aja!



Hari sigi udah petang lebuh kami ka datai ba alai becamping. Bisi sida lampu pichit enggau lampu gas bala ka udah datai dulu ari kami, enda ga tak gawa dalam petang.



Doug enggau saduai tu orang ka tinduk dalam tent. Pagi siti, komplen orang madah inggar tent nya bekebu dalam angin. Ngumba endar ga angin sepengelama kami dia, bangat amat.




Enggai entu tinduk mata aku malam keterubah. Chelap, angin inggar alu irau ka bala anak dalam tent enggaika tak chelap sida dalam nyin. Meda mata enggai tinduk, pansut aku ngipa mata hari tumbuh.




Baru iya meh aku tu ngipa sereta ngambar mata hari tumbuh! Berapa lama enda udah nadai kala meda mata hari tumbuh. Tambah mega nadai alai meda biew mata hari tumbuh ti manah.




Tu gamal tent alai orang tinduk. Malam kedua tinduk enggau aku dalam van saduai, laban aku enggaika tent nya tekebu gasak pemalat angin. Tang ku Doug, bisi ngetu angin malam nya.



Siku nyu bebai ka BBQ grill kena berapi. Endang chukup perengka dibai camping. Kami bisi ga mai stove mit, tang laban angin kelalu balat, nyamai agi ngena grill nya laban bisi utai kena ngelindung api.




Gamal saduai tinduk tengah hari dalam van. Tent enda ulih alai tinduk laban angat. Penuduk belakang van nya ulih dianchau. Pemesai buka van nya mimit aja lebih ari peninggi aku. Endang unjur manah meh aku gali dia.




Tu gamal agu kami duai Dencie. Van dipindah nya kebuah agu nya ba tengah padang. Nadai meh aku tu ka ngena agu nadai alai belindung! Sigi tisi van, ukai sepiak orang begumpul alai ngengkah iya!




Kawan kami siku tu, ngajar Denice saduai Duncan main backgammon. Denice takut ninga munyi letup senapang nya kebuah bekena ka utai nutup pending.




Sigi enda teranti siku ka mit nya megai senapang. Peda gamal orang! Apai iya nya sigi ngajar iya chara megai enggau ngena senapang enggau selamat.



Siku ka kurus tinggi tu gap amat - bakaka ka nurun sembiang, ku bala ngenduan iya. Ni enda ulih gap, orang bisi camper, bisi alai mandi, bisi jamban ... ulih meh iya pansut ari camper iya bepekaian gap! Orang ga bujang! Duda, lerrrr.




Iya ka baju mirah nya jauh penatai - ari Seattle, Washington. Driba pick up truck diri empu laban ti enggai enda enggau geng bukai camping. Tujuh belas jam, ku iya. Nadai ngetu. Tann amat. Bini iya enggai enggau sekali tu. Nya meh aku siku aja bini orang ka bisi enggau.



Nasib nya ukai bear season! Kasih tudah sida bear nyadi target! Siku tu sigi buyan amat, takut ninga utai meletup. Mina pansut udah orang badu betimbak ka utai.



Gamal mata hari padam lebuh lemai hari ba Mojave Desert. Sayau amat nadai awan .... rindu agi meda langit mirah enti bisi awan ba langit.



Chelap amat ga hari lemai nya gasak angin ti balat. Bekindu nunga api meh sida udah bekau makai lemai. Aku enggai enggau duduk ba luar dia ngelaban angin. Kelalu chelap!




Tu meh gamal alai kami camping. Kawan siku bisi mai dune buggy. Iya mai aku niki bukit awakka aku ulih ngambar biew ari bukit. Ngumba endar ga bateri ba kamera alu mati. Tak bedau abis utai digambar! Spare bateri tinggal dalam van.




Micey Hill dipeda ari atas bukit. Siku ka mai aku niki bukit nya ka ngiga sarang tekura. Bisi meda bekau tekura tang nadai meda siku ... kerubung tekura deh nadai meda!



Udah badu makai pagi hari minggu, mupuk bekemas bala. Peda gamal utai diangkut siku tu! Basikal dah bisi! Go kart, bisi! Semua masuk truck! Kebuah mai basikal nya ngambika ulih nganjung diri jauh agi ngiga "agu".




Bendera nadai kala kurang ma sida tu camping. Mina sekali tu bendera mit.

Sayau amat gamal rumput ti dipuput angin enda ulih dipeda ba gambar. Baka gelumbang gamal rumput nya, ku Duncan. Bisi aku ngambi video. Nganti udah diupload ka YouTube, ila bekunsi enggau kita.

Maya kami angkat ari Mojave pulai ka Galt, kami menyanak suah ngetu. Ngetu makai, ngena jamban, and most importantly, ngetu awakka aku ulih ngambar utai tauka tempat ti dipansa!