Bejalai ba Consumnes River Preserve

Lemai tu tadi, apin mata panas padam, kami bisi bejalai ngagai Consumnes River Preserve. Bejalai sambil begambar ka utai meh kebuah kebendar kami kin. Aku mina sekali aja udah kin suba, nya pan nganjung diri enggau orang bekayuh ka perau ba sebelah sungai dia.

Lemai tu tadi kami mina bejalai niti sungai enggau niti paya. Mayuh endar indu tawir/kelentit terbai dia, tang siku pan nadai meh inggap ba daun ka dipansa kami.

Udah kami datai ba endur parking kereta aku alu nyemberai jalai laban mayuh endar ansa enggau itit didinga aku. Aku ngasuh Doug enggau bala anak nganti aku ba pun Wetland Trail. Aku enggai ngasuh sida enggau enggai ka begau sida ansa enggau itit ti ka digambar aku. Tang lebuh sida ansa enggau itit meda aku, alu terbai meh sida. Kapa sida nganti aku ngambar sida!!

Manah endar jalai ka udah disedia. Mayuh endar utai ulih digambar sebelah jalai nya. Bala sida ansa enggau itit bisi didinga bemain ba sungai tang enda ulih dipeda laban kena lindung sida pun kayu enggau babas. Sayau amat nadai ulih ngambar sida.

Rumput tu dikumbai "cat-tails" ... iku mayau. Mayuh endar tumbuh sebelah paya dia. Maya musim panas enda entu basah paya nya dia .. bisi ga alu nya ka endur sida burung bangau, itit, ansa enggau burung ai bukai bemain.

Aus enggau lelak saduai. Butul ai sigi bisi dalam kerita tang saduai ka enda mai pansut! Tambah mega bisi renga mimit tedah saduai, engka nya ti ngasuh jampat lelak.

Maya kami ka pulai ari Consumnes River Preserve mata panas pan mupuk padam. Sempat ga aku ngambar mata panas ka padam. Siti aja ti ngasuh enda rindu .... tiang telekomunikasi tak segenda bediri ngimba mata panas ka turun! Enda berapa!

Ila aku mantai gambar bukai ka diambi aku ba Consumnes River Preserve ba photoblog aku. Abas la ... Ka tinduk agi aku diatu!