Enda ibuh jauh nganjung diri bemain sled, ba belakang rumah udah chukup!
Video dua iti tu diambi lemai kami ka datai ba South Lake Tahoe. Anak orang ka nyewa rumah (weekend rental aja) ba belakang rumah pangan aku meh enggau bemain.
Sebedau kami mupuk tengah hari tu tadi, Duncan saduai Denice sempat bemain salji enda lama. Salji mupuk turun maya jam pukul sepuluh pagi. Denice enda lama aja bemain ba luar laban takut ka ukui jiran bisi datai nutu saduai bemain dia.
Maya kami angkat ari rumah pangan aku ba South Lake Tahoe benung salji turun bangat. Tayar van kami endang udah dipasang enggau rantai malam siti laban enti salji tebal ba tanah pedis masang rantai. Tang salji nadai entu turun demalam.
Irau ati aku nengah jalai bebukit lebuh salji benung turun. Tang kerita bela enda laju laban enda tau lebih ari 25 batu sejam pengelaju ma tayar dipasang enggau rantai.
Rantai ba tayar tau dibuka udah bukit tinggi ditengah. Bisi tanda madah senentang rantai tayar tau dibuka.
Ba baruh bukit hari mina ujan ... ujan batu (hail), keba! Bisi setengah jam sebedau kami datai ba rumah ujan pan ngetu.
Rindu amat ngenang pengawa ujung minggu tu tadi! Duncan nyu nyabak diri ngenangka pengerindu iya bemain ba snow. Agi belala, tedah!
No comments:
Post a Comment