Chelap Kaki

Sida Lyana, sida Flo besebana ka menua sida chelap sereta dilamun salji. Chelap alu pedis mai kerita ma jalai alun dilamun salji, ku saduai.

Ba endur kami ditu nadai salji. Di bukit din baru bisi salji tang taja nadai salji chelap ga isi, kelebih agi sida kaki. Bestukin enggau beselipar meh kaki nya tang agi meh chelap kelebih enti enda dibai engkebut duduk nunga computer!

Kepuas ngenat kaki diri chelap alu terunding ka meli kasut but ga ati. Ukai kasut ka dikena dalam rumah, bansa ka tau dikena lebuh bejalai pansut ngelaban chelap.

Ujung minggu 16-18 hb Januari tu lagi kami menyanak nemuai ka South Lake Tahoe. Aku bisi bekelala enggau indu Cina ari Kuching ka diau din. Iya ngasuh kami menyanak nemuai ngagai iya alu lebuh kami ka din iya bisi kangau sekeda bala kawan iya enggau kami makai malam lemai kami ka datai nya. Gaga amat iya ninga aku ka datai alu berambih makai pemakai kitai ari Malaysia. Ngaga kari manuk, dagin rendang, laksa Sarawak, babi panggang, ku iya.

Menua South Lake Tahoe tu ba bukit din, kiraka 2 jam ari rumah kami. Ba bukit din endang selalu turun salji. Nya meh kami maya ka kin ila enda tau enda mai rantai ti tau dibelit ba taya kerita laban enti hari besalji, semua taya kerita enda tau enda dipasang enggau rantai enti kerita nya endang nadai udah dipasang snow tires. Laban menua din bebukit, lichin meh jalai lebuh ka bisi snow, nya kebuah taya kerita mesti dipasang snow tires tauka dibelit enggau rantai.

Au, pulai ngagai cherita kasut but tu tadi, ngorder sepasang meh aku. Ukai nadai kasut but tang sengaja ngiga bansa ka tebal agi alu digaga ngena bulu kambin. Kaki aku sigi enda tan ngelaban chelap. Penat alu asai ka dituchuk jarum pemedis iya gasak chelap. Mayuh macham stail enggau peninggi kasut but ba Amazon tang aku enggai bansa ka regup regup ma dikena! Laban kaki kitai mit enggai nyadi ngena sekeda stail!

Arap ka datai sebedau kami mupuk meh kasut aku nya! Ari minggu nyin kemari udah ka meli, alu ga enda. Arap ka enda lebu meh!