Ngintu Hari Gawai di California

Tuak bisi. Janik tunu bisi. Lagu gawai enggau muzik tabuh enggau sape pen bisi. Bah, nadai utai dianti agi! Aram ngintu hari gawai!

Nya meh pengawa kami sebilik lemai tadi. Pagi tadi kami menyanak berumban ka supermarket udah ka badu sembiang, alu meli janik, manuk, enggau ubi kentang kena ngintu malam 31hb May. Datai dirumah aku pen bebela, manduk kari manuk, manduk asi pulut sereta meruk janik ti ka ditunu.

Tuak tu diberi Grace taun nyin kemari alu tu meh diirup lebuh ka makai lemai tu tadi. Tau endar dikenyadi tuak tu! Terima kasih ngagai Grace saduai indai iya laban ka udah meri tuak nya. Kami enda nganti tengah malam pen lebuh ka ngirup ai pengayu, laban di menua din udah 1 hb Jun!

Nah, bisi endar janik tunu kami taun tu! Tak baru berengkah Cory nunu, gas pen alu abis!! Enda berapa. Doug pen alu mupuk ngisi tong gas. Ni nya ulih dianti, jam udah pukul enam lemai. Asi pulut udah mansau. Kari manuk pen udah mansau.

Lampang janik alu bai tama baru, alu simpan dalam oven ngambi ka ulih ditunu (broil) dalam oven dulu, semadi nganti Doug datai mai tong gas ka udah diisi.

Oooohh haaa! Cory saduai Doug ngangkat ka gelas ai pengayu. Baru iya meh tudah Cory ensepi ai tuak sereta ensepi janik tunu stail kitai Iban. Baru iya meh iya ensepi janik dichal dalam kichap digulai chabi enggau ai limau.

Lebuh ka makai kami diperindang enggau lagu gawai sereta muzik tabuh enggau sape. Bisi endar mood gawai kami ditu!

Selamat ngintu hari gawai, gayu guru, gerai nyamai ngagai bala kita ka bisi sangkai ba ruai aku tu!

Selamat Hari Gawai Dayak

Selamat Hari Gawai, gayu guru, gerai nyamai,
lantang senang, dalam semua pengawa
ngagai bala kita sebilik.

*****

Ma ngirup tuak enggau makai sida janik tunu, anang enda ingat ka bala kami ka enda
ampit enggau kita begawai ba menua.

* Gambar  kumang gawai diangkat ari blog Sebugey. Anang nganu, au? *

Scrapbooking

Kepuas aku begiga enggau bepeda ka gambar seminggu minggu tu, nyu terunding ga pasal prujek scrapbook ka enda dikerja. Ungkus perengka kena ngaga scrapbook nyu beratus, tang prujek alu enda mansang ari tiga empat lambar scrapbook Duncan!

Sahari tu tak rajin asai, alu beserungkai ka beg alai perengka kena ngaga scrapbook, alu mungkal ngaga scrapbook ka Denice. Denice nyu besai diri, scrapbook alu enda enda digaga. Gambar udah ga dituchi .... tulang aja buruk!

Gaga amat Denice meda scrapbook iya alu nanya enti bup nya tau dibai ka sekula ngambi ka cikgu iya ulih meda. Er, nganti udah tembu meh dulu! Baru ga meniga empat lambar ka udah tembu!

Sekeda perengka dikena ngaga scrapbook nyu nadai temu alai agi. Dini enda alai! Beg ngemesai nya alai nyimpan perengka tang lebuhka ngena suba enda disimpan ba tempat endang alai nyimpan. Pengujung iya nadai temu tunga agi.

Ujung minggu tu bala ba menua kiruh nyendia Hari Gawai, tang aku udah besemaya ka ngadu scrapbook Duncan enggau Denice! Enda sinu kita ka aku?

Enda Engkebut

Aku ketawa macha komen Benjamin Ujang, madah ka diri nepan helicopter bakaka ditepan Duncan ba gambar kutai, tang helicopter nya enda terangkat. Iya kelalu berat ko iya!

Duncan saduai Denice enda tau mansa utai baka tu. Nyu ditarit ma mansa labanka enggai masau jam nganti saduai betepan ka utai nya. Lagi ma kitai ngasuh nepan, agi belala, alu enggai turun!

Endang ari suba Duncan angan angan mai kerita enggau mai tractor. Kadang kadang bisi ga diberi chan lebuh Daddy nginjin rumput. Bisi ga Daddy ngasuh maut steering wheel mimit.

Nya lah kunchi enda tau ditinggal dalam kerita enggaika tak distart injin alu mupuk mai kerita lagi!

Lauk Iban

Pagi tadi aku bisi nurun ka pasar laban agi belala ka makai lauk daun peria. Naka pengaga ati lebuh ka milih daun peria aku tepedaka daun ubi! Baru iya meh musim tu aku meda daun ubi! Minggu nyin kemari apin bisi.

Udah datai ba rumah aku alu mela daun ubi. Daun ubi ditutuk, udah nya diguring enggau ikan pusu, lia, bawang, chabi enggau serai ti udah mega ditutuk.

Tumu aku makai sahari tu! Jam baru pukul sepuluh setengah pagi, aku udah tembu makai!

Lemai tu lagi, baru aku mela daun peria. Enggai nyadi ga digalau datai pagila. Layu diri daun peria! Kangkung enda ngawa, tan disimpan dalam peti ais.

Lyana enggau Alice ti diau di menua Peranchis din .... anang jeles, au!

Ngiga Gambar

Pagi kemari aku begigaka gambar Denice saduai Duncan ... gambar ka diambi taun nyin tadi enggau gambar ka diambi pun taun tu. Aku ka milih sekeda gambar ngambika bisi dituchi alu bisi mega dibai ke sekula kena sida ngaga prujek badu sekula ba kindergarten bulan enam tu lagi.

Lebuhka meda gambar nyu bejaku kediri ujung iya. "Huh, mayuh endar ga gambar tu nadai kala dibantai. Manah endar ga sekeda gambar tu neh!"

Gambar ngambi mengambi tang nadai kala dituchi. Dia meh iya dalam hard drive ba komputer. Ni ka diback-up ba CDs agi.

Aku tu pasal ngaga Memory Books sigi malas endar. Albums mayuh endar. Perengka kena ngerias album mayuh endar. Tulang aja malas. Nadai bisi minat bakaka minat ngaga marik tauka minat nulis blog!

Apa nama tempat ba depan Tanahmas di Sibu? Gambar kami di Sibu lebuh ka nemuai kin taun nyin tadi.


Bala anak enda tau mansa utai baka tu. Enda tau enda nepan. Apa nama shopping complex belakang Tanahmas di Sibu din? Dia meh alai saduai tu bemain.

Tu gambar diambi ba wat Phra Buddha Bharameedharm Chamruslok di Kota Bharu maya kami ka nemuai kin taun nyin tadi. Ngelama tu aku enda nemu ngemayuh nya sida wat Buddha di menua Kelantan! Sapa kitai enda nemu menua Kelantan dipegai PAS? Nya meh aku tekenyit lebuhka meda pemayuh wat Buddha ba menua nya.

Ba sekula sida Denice tiap musim bunga enggau tiap musim gugur sida begambar. Gambar tu diambi bulan empat tu tadi alu tu meh keterubah iya sida begambar ba luar. Rindu meda gambar sida ba luar ari ka baka dalam studio.

Anak bujang aku. Sigi pedis ngambar siku tu laban enggai jenuh. Lebuh aku meda gambar ka diambi tukang gambar, enggi Duncan mayuh agi ari enggi Denice. Enggi Denice nadai mayuh chara posing laban ka nadai mayuh macham lebuhka digambar.

Bulan sebelas nyin tadi aku bisi meli printer baru, alu printer tu manah dikena print gambar. Nyamai ga baka nya laban kitai tau nuchi gambar ti diguna aja. Enda alah nuchi semua gambar ka diambi. Kelalu mayuh!

Memorial Day BBQ

Lemai tu tadi kami bisi ngatur bbq mimit meda nya agi bisi sida buah semengka, buah nenas enggau hot dog teda bbq maya camping hari enam nyin tadi. Tambah mega maya kami ke pasar ngalih hari tu tadi aku bisi meli bun kena makai enggau hot dog.


Cory enggai enda meli jagung, avocado enggau ice cream ninga kami nya ngatur bbq. Iya tukang tunu, sekali tu ngena bbq set iya ka mit. Kiruh masang grill besai ku iya.

Kasih tudah Cory, nyu sirut sirut lebuh kami ka mangkil sida jagung enggau makai hot dog. "Iya renga nuan?" ko aku nanya iya.

"Nadai ah", ko iya ga. Iya ke bendar iya sinu ati ngenang bini iya laban tu keterubah iya nyambut Memorial Day nadai begulai enggau bini iya. Sinu ga aku ninga.

"Kami bisi deh," ko aku ga. Ni nya ka sama, neh! Kasih tudah.

Denice sigi dulu reserve kerusi ngimbai iya ka Daddy enggau Cory. Aku tu sigi enda laku, endang enggai orang dudok berimbai enggau aku, lebih agi ba restoran. Nyu belaya dulu, baru bala ka dudok ngimbai aku!

Aku tu jarang pansut ba gambar laban selalu nyadi tukang gambar. Sekali tu aku sengaja minta ambi gambar enggau Duncan laban Duncan madah bup (memory book) ka digaga iya maya sida graduate ari kindergarten tu lagi pasal iya enggau Mommy iya. Enggi Denice pasal iya enggau Daddy iya alu iya endang mayuh udah gambar enggau Daddy iya.

Lebuh kami ka rindang makai hot dog enggau jagung, kami sigi ingat kebuah sahari tu orang diau. Siti ari jaku ka selalu disebut lebuhka ngingat sida ka udah ngelengkaka nyawa diri ngetan menua iya nya, "Freedom is not free."

Sigi amat, "Freedom is not free."

Memorial Day Poem

Memorial Day Poem
Kelly Strong

I watched the flag pass by one day,
It fluttered in the breeze.
A young Marine saluted it,
And then he stood at ease..

I looked at him in uniform
So young, so tall, so proud,
With hair cut square and eyes alert
He’d stand out in any crowd.

I thought how many men like him
Had fallen through the years.
How many died on foreign soil
How many mothers’ tears?

How many pilots’ planes shot down?
How many died at sea
How many foxholes were soldiers’ graves?
No, freedom isn’t free.

I heard the sound of Taps one night,
When everything was still,
I listened to the bugler play
And felt a sudden chill.

I wondered just how many times
That Taps had meant “Amen,”
When a flag had draped a coffin.
Of a brother or a friend.

I thought of all the children,
Of the mothers and the wives,
Of fathers, sons and husbands
With interrupted lives.

I thought about a graveyard
At the bottom of the sea
Of unmarked graves in Arlington.
No, freedom isn’t free.

Memorial Day Weekend Camping

Bala anak gaga amat ulih bemalam dalam tent demalam laban lama endar saduai udah nganti Daddy mai saduai camping.

Hari lemai kemari kira ka chelap laban bisi angin. Aku mina pansut enggau sida makai ba luar. Enggai ngelaban angin kelalu lama!

Cory bisi nunu manok enggau hot dog. Aku mina nyendia ka buah nenas enggau semengka ka empa enggau manok.

Denice saduai Duncan enda teranti ka hari petang laban nitih perintah Daddy, udah petang hari baru tau nunu marshmallow. Marshmallow meh diengkah ujung kayu alu ditunu. Udah nya diempa enggau ruti enggau sekeping cokelat ... digaga baka sandwich. Enda tingatka nama sandwich nya!

Maya sida empat tama ke dalam tent aku nadai meda sida. Enggai kiruh pansut dalam petang ngambar sida empat besekut dalam tent siti! Ko Doug pagi tadi, iya enda jenak tinduk, laban kelalu sekut begulai enggau anak dua piak iya.

Sigi asai kitai roughing it out, ko aku. Umur udah tuai enggai entu nyadi sebarang utai alai gali, pedis isi, ko iya agi.

Suping & Camping

Hari satu tu ila, kami ngintu Memorial Day alu hari nya orang diau, nadai kereja nadai sekula. Ujung minggu tu dikumbai Memorial Day weekend. Orang ka rajin suping tu meh maya iya ngiga sale - sale kerita, sale tilam, sale perabot, alu kedai kedai bukai pen bisi ngatur sale.

Kami duai Denice nurun ke Joann laban ka meli kain fleece ti tau dikena nyadi pua. Duncan udah madah ni bagi pattern ti dikedeka iya laban bisi meda gambar ba sales flyer ari Joann.

Gambar kartun Care Bears enggi Denice alu gambar api, enggi Duncan.

Meda nya Memorial Weekend aku bisi mega meli bendera enggau tiang ba Joann laban bendera ka lama udah charik , alu tiang iya bisi patah. Datai di rumah, Doug mina nukar tiang iya, bendera ka charik teju iya begantung dia.

Malam tu lagi sida tiga menyanak enggau Cory ka camping dibelakang rumah kami. Aku enggai enggau, enggai merinsa ka diri!! Kapa aku buntau gasak sida ansa inggar tengah malam!

Endang lama udah besebut pasal camping, ari maya ka agi chelap kutai. Aku ka enda ngasuh meda hari agi chelap. Perengka ka dikena camping nya enggi Cory. Enggi bala anak enggau Doug mina ga sleeping bag aja.

Ka bebarbecue meh ulah sida malam lagi, nunu marshmallow ba camp fire .... aku tu tukang gambar ma udah maya iya lagi. Enggai dibai orang camping!

"Lagi aku mai van besai nya ke belakang alu nuan tau tindok dalam van", ko Doug. Issh, lagi ma ka ke jamban nyu kiruh ga nganjung diri pulai ka rumah! Enggai!

Namahal?

Namahal sekeda orang madah Kris Allen menang American Idol laban evangelical Christians nyukung alu ngundi iya?



Ba penemu aku, nadai salah evangelical Christians nyukung orang dikerindu sida. Tang anang ngaga nya nyadi tegal Adam Lambert alah. Anang nyalah orang ka enda ngundi Adam Lambert, alu nuduh kebuah sida enda nyukung Adam ketegal iya nya gay!

Aku sigi nyangka bala ka nyukung Danny Gokey, tetap ngundi Kris Allen. Nya kebuah iya Kris Allen menang.



Taja Adam Lambert alah, iya sigi bisi class. Ari gaya iya kitai ulih meda iya amat amat gaga Kris menang. Nadai bisi ati dengki ulih dipeda ari gaya Adam Lambert. Iya endang nemu, menang tauka alah, udah gerenti iya bulih recording contract!

*****

Namahal aku enda nyukung Obama? Namahal aku enda ulih meda berita lemai ari NBC, CBS, ABC agi?

Saut tanya keterubah - I am a conservative and Obama is a liberal fascist. Aku enda ulih nerima tauka nyukung policy iya, policy baka nationized healthcare, nationalization of the auto industry, cap and trade, expanded government etc.

Saut tanya kedua: Ba Malaysia, kitai sigi nemu RTM stesen TV enggau stesen radio perintah alu enti sida ngemesai ka policy perintah tauka ngangkat sida YB ari BN, sigi enda heran kitai. Tang ditu tiga iti stesen TV ka disebut aku nya tadi stesen pribit tang chara sida nyukung Obama, bakaka stesen RTM nyukung sereta ngangkat YB ari BN.

Such bias and lopsided reporting, nadai ulih dipeda agi program berita sida.

No worries, laban mayuh tempat bukai alai aku bulih berita, berita ti enda ngasuh aku pedis ati alu niki darah lebuh ka ninga tauka macha!

Bacha article tu - The 10 punches Dick Cheney landed on Barack Obama's jaw - enti nganti network TV meri analysis baka tu pasal speech ka diberi Obama enggau Cheney kemari, sori lah, sigi nadai.

Namahal pala aku pedis pagi tu? Udah ga ngirup kupi!

Hari Pengada ke 6

Gamal birthday girl.

Baru ditungkun lilin, alu disepu Duncan!! Denice ka empu birthday, tang Duncan ampit nerima present mega. Enda tau laun siku tu, laban enti enda diberi sereta, ringat alu nyabak. Butterfly net, coloring books, DVD, enggau digital camera, present saduai.

Selemai lemai tu saduai begambar ka utai. Nadai temu gamal utai diambi! Kapa, ku Daddy, orang agi belajar.

Happy birthday, Denice! Tuhan merkat nuan enggau umur panjai!

Kris Allen, the new American Idol!

Congratulations Kris! Woohoo!



Kris enggau Adam belagu We are the Champions, diiring Queen. Woohoo!

No worries, Adam. Gerenti sukses dalam karier ka dipilih iya!

Kantuk peria

Pagi tadi aku bisi nurun ka pasar ngiga sida sayur ti tau narit ati. Sida sayur ka bisi endang baka sayur ka bisi maya dia taun. Sida kangkung, sida entimun, sida kubis, sida asparagus enggau mayuh macham sayur bukai. Aku ngiga sida daun ubi, tang apin bisi maya dia taun.

Bala ka rindu makai buah, diatu musim strawberi enggau cheri. Aku nadai meli taja rega iya murah. Sida buah limau endang selalu bisi, chukop macham bansa limau.

Lebuh aku berati ka sida sayur, bisi dua iku indu ari menua Pilipin bediri ngimbai aku milih kantuk peria. Aku enda nemu nya daun peria semadai nanya sida. Dia aku alu nanya chara sida manduk kantuk peria ... boil ko siku, empa baka salad tauka panduk champur kachang masin, alu enti digulai enggau smoked pig hock, nyamai ku iya agi. Hmmm.

"Enda pait sayur nya?" ko aku ga nanya iya.

"Pait, tang enda balat," ko iya nyaut. "Manah ka orang bisi penyakit kencing manis."

Pasal buah peria ti manah dempa orang sakit kencing manis, aku sigi nemu laban ka kala enggau orang sakit kencing manis. Ninga nya enda entu pait, aku alu meli sikat.

Datai dirumah, aku mela daun peria, alu manduk iya. Enggi aku diguring enggau bawang putih, kachang masin enggau sirap bacon.

Tumu aku makai sahari tu! Jam baru pukul 10 pagi aku udah tembu makai! Asi enda ibuh manduk laban bisi meli tapau belauk ikan enggau undang. Daun peria nya kena nambah lauk dua iti nya laban aku enggai enda bisi lauk sayur ma makai.

Kapa enda tumu makai laban tengah hari lagi aku nganjung Duncan ngagai speech therapy.

Bah, nama lauk kita tengah hari tu lagi?