Bukit ba Los Osos

Lemai hari enam tu tadi, Duncan ringat laban kami enggai dibai iya niki bukit. Ni bala ka dibai iya niki bukit laban embun tebal lemai nya.



Los Osos enda jauh ari tasik, alu ma angin tasik chelap angin angat ba atas bukit alu narit angin ka chelap tunga ka bukit. Peda amat embun tebal atas bukit. Tu meh gamal hari lemai hari enam tu tadi. Alai kami ka diau ba Los Osos atas bukit ba gambar atas sepiak kiba. Gambar bukit sepiak kanan nya lirit bukit sebarai bukit endur kami ka diau.

Uji berati ka tali karan ba gambar atas sepiak kiba. Nyu meretih utai didinga baruh tali karan nya. Tali karan nya endang meraka tanah sida entua aku. Karan nya datai ari Diablo Canyon Nuclear Power Plant, alai Doug kala gawa suba.



Tengah hari minggu, kami alu mai kerita niki bukit ka tinggi ba tanah sida entua aku di Los Osos labanka udah besemaya enggau Duncan. Peninggi bukit alai kami nya kira ka 1300 kaki. Gambar atas sepiak kiba biew Moro Bay ka dipeda ari atas bukit. Peda penebal enggau pemaruh embun laban ka tisi tasik amat amat. Mina tuchung Moro Rock ulih dipeda atas embun. (Moro rock is the core of a dead volcano.)




Gaga amat Denice sadua Duncan bemain atas bukit nya. Duncan enda ibuh kira, ni utai ulih ditiki, ditiki iya.



Daddy madah ka saduai ni gamal bekau tapa kaki rusa, alu ni bagi bekau tapa kaki coyote. Nya saduai bekangau ka aku ngasoh meda tapa kaki ka ditemu saduai.



Aku enda entu ulih ngambar sida bunga babas laban bisi angin. Nyu enda terang gambar ka diambi.

Engka laban ka puas beranda kin kitu ba atas bukit kemari, Duncan enda entu jenak tindok demalam. Berapa kali enda dani laban ka ngigau. Kira ka pukul 10 pagi tadi, cikgu iya bisi telipun, madah ka Duncan lembau alu ngali ka pala iya atas mija. Nya aku nanya cikgu iya sekalika iya nya bisi angat isi. Nadai, ko cikgu. Meda baka, enti tak agi lembau, lagi iya telipun baru ko cikgu. Ok lah enti munyi nya.

Naka tu aja cherita sekali tu.