Plet Taya

Hari udah petang alu jam pen nyu ka pukul sembilan malam maya kami ka datai ba rumah lemai tu tadi. Kami angkat ari Los Osos kira ka pukul dua lemai. Endang sigi maya kami selalu angkat ga nya laban enti datai ba rumah kira pukul 7.45 lemai umbas iya ga, ko kami.

Kebuah kami laun mimit sahari tu laban maya ka ngetu kemik ba Jack in the Box, kami meda taya depan sepiak kanan bisi kurang angin. Laban Doug ka bisi mai pum mit, alu dipum ba parking lot taya nya tadi.

Tang kira ka enda bulih tiga batu pejalai kami, meda kerita begegar alu taya kerita pen memunyi. Apu, taya ka baru dipum nya meh alu pechah tengah jalai. Beguai Doug parking tisi jalai. Ba jalai besai kami ditu endang besai alai ba tisi jalai, alai kitai tau ngetu enti kerita rusak tauka panchit taya.

Kami tiga menyanak beguai pansut. Takut diau dalam kerita laban baka besut kerita enggau trak ka mansa laju. Suah udah ninga rita orang kena lantak ba tisi jalai lebuh ka ngadu kerita.

Nyu ngerembang babas rangkai enggau beduri tudah kami ngelari ka diri ari tisi jalai. Abis tebak duri rumput sida kaki. Nindik ga ba baruh jalai nya bisi plywood alai kami tau bediri alu ngemata ka sida kerita enggau trak ka mansa. Ma besusun kerita mansa, manjung ngasuh Doug bejimat.


Nama rumput tu tumbleweed. Tu meh ka selalu dipeda bepusing ditiup angin ba wayang kuboi. Endang mayuh rumput tu ba tisi jalai sebelah California ditu.


Kira ka bisi 15-20 minit baka nya kami ka baka degir bediri ba tisi jalai nganti Doug ka nukar taya van, dia kami meda kerita polis datai. Alu nyamai asai ati meda iya. Iya nanya enti kami beguna ka tulong ... ngangau tow trak kah ... Enda ibuh ko Doug, bisi taya spare kena nganti taya ka pechah nya. Polis nya tadi alu parking belakang van, nulong ngemata ka kami. Bala orang ka mansa ma meda kerita polis ba tisi jalai nemu ga slow mimit.

Mata panas pen nyu ka padam. Jam maya nya udah pukul tujuh lemai. Lantang agi asai Doug nukar taya van nya laban kerita polis udah ngelindung iya ari kerita enggau trak ka mansa. Ni bisi nuan ngambar taya ka pechah nya, ko Doug nanya lebuh kami ka tama dalam van. Issh, sapa berani bediri lama tisi van, ko aku nyaut iya. Kerita polis nya endang nganti datai ka kami mupok baru iya ngelih kami.

Puji Tuhan laban kami selamat datai ba rumah lemai tu. Mina siti aja ngasuh aku mut mut. Laban ka laun datai ba rumah program ka diminat aku udah sejam berengkah. Mina ampit meda jam kedua program Dancing with the Stars!