Nginjin Rumput

Aku rindu amat berati ka daun ti baru nyumbuk ba pun kayu maya musim bunga tu. Mupuk bedaun magang sida pun kayu ti gugur daun maya musim gugur enggau musim chelap.

Rumput sebelah tanah pan galak amat. Din ditu injin rumput didinga laban tanah udah mupuk rangkai. Maya tanah agi latak kutai enggai nyadi ga mai injin rumput. Pagi tadi aku mai Dudette ngambar apai tuai orang sebarai kami nginjin rumput orang sepiak kami.

Mayau aku enggai enda enggau. Dia kitai begambar ka utai dia ga iya ngelindung biew kitai ti ngambar utai.

Ujung minggu tu tadi beturut hari Doug nginjin rumput ba belakang rumah kami. Kasih tudah bunga rumput kena injin. Ba mua rumah apin diinjin. Mina rumput nisi pagar udah dipanchit enggau rachun rumput.

Sahari tu bemua hari. Taja bemua ujan enda diadang turun. Manah ga nya laban ujung minggu tu ila Doug agi ka nginjin rumput.

Bah, naka tu aja cherita sahari tu!

Pisang Tanduk

Enti di menua din, sigi enda dipalik aku pisang tanduk ngenyaik nya gamal!

Tang nadai ku enggau, enti pisang tanduk dijual ba menua kami ditu enda chelum, enda buruk gamal, sigi enda mansau sereta enda manis pisang tanduk nya. Ka pan enda, pisang tanduk ngenyaik nya gamal dikenyadi!

Aku bisi ka pasar minggu pagi tadi. Tetengukka chuchur pisang nyawa lebuh meda pisang tanduk. Penyakit batuk agi, tang kapa enda dipajak bai makai chuchur pisang angat!

Ba pasar, aku bisi ngerandau indu ari Laos ti bedagang sayur. Nanya iya pasal kangkung enggau daun ubi. Kangkung nadai entu ka tumbuh ku iya laban hari agi chelap. Daun ubi apin maya iya bisi ku iya ga. Aku sempat nanya enti iya tau ngiga ka aku paung ubi! Ka nanam ba belakang rumah ku aku madah ka iya!


Bisi endar ati ka betanam ka sayur tang lebuhka ngingat diri nadai dirumah maya musim panas tu lagi, lembau ga ngenang.  Taun nyin kemari utai ka ditanam enda diintu Doug!  Nadai nyadi sida chabi enggau tomato!  Manah enda ibuh bekebun sayur!
 
* Sayau enda ingat mai Dudette ka pasar tadi!

Pemakai lebuh sakit

Nyelai endar ga nyawa kitai ti benung sakit. Chukup macham utai digiga!

Ka makai biskut manis, nyau ga aku ngasuh Doug ngetu ba kedai ngiga sugar free cookies ka aku. Udah nya tetenguk ka sausage muffin sandwich ari McDonalds; limpang ga Doug meli breakfast ka aku. Berapa hari beturut turut kami duai makai sausage muffin sandwich ari McD. Ngiga kway tiaw ga ulah nyawa, tang dini nya bisi alai nyual kway tiaw bakaka diguring cina di Malaysia din? Nakaka bisi chow fun, ku sida ditu. Nya meh dikenyadi!

Enti tak mungkal berapi kediri empu agi lembau asai tulang. Ni alah rengkung rengkung nunga utai dipanduk! Nya meh ensanus aku ngasuh Doug meli grated cheese (stok dalam peti ais udah abis) kena ngaga ham spinach quiche.

Nya meh pemakai malam ensanus. Nindik ga muntang ngaga quiche tu!

*Tetengukka wantan campur!

Dudette

Rindu amat aku begulai enggau Dudette. Taja aku apin lama udah bekelala enggau iya, iya nyamai dibai mindah. Kini kini kitai mai iya mindah iya nadai kala nulak.

Tambah mega iya nyamai dibeli ka utai. Asal tau dikena. Enda milih utai terpakai tauka enda.

Asil kereja iya pan manah. Rindu amat aku meda. Ingat gambar pun kayu ka bebunga ba depan rumah mekanik? Asil pengawa Dudette meh nya.



Kati gamal gambar bala anak tu? Asil kereja Dudette mega tu! Enda landik Dudette peda kita?

Hari Kedua Musim Bunga

Aku enda tingat kemari hari keterubah musim bunga. Semadi meda post Lyana!

Aku enggai enda mantai gambar pun kayu ti bebunga ba mua rumah mekanik alai kami duai Doug nganjung mini van aku. Maya kami duai Doug nganjung van aku kena hari lima tu tadi aku nadai mai kamera.

Rindu amat aku meda gamal bunga ba pun kayu tu. Lebuh ka ngambi van aku lemai kemari beguai aku nyengkau kamera. Sayau asai enti enda ngambar pun kayu ti bebunga tu!

Kamera "Baru"

Orang gago ka DSLR kamera sida. Aku ka meh enggau orang gago bayamka DSLR kamera tang nya meh enda tebeli!

Naka utai ti ulih dibeli aku iya nya kamera SLR lama. Wow, what great deals at Ebay! Enti kelia bisi utai baka Ebay lama meh aku tu udah bayam enggau kamera SLR!

Tu meh gamal kamera lama "baru" aku!



KONICA MINOLTA X-370 35MM SLR CAMERA BODY ONLY - $20.00
Minolta MD Rokkor-X 45mm F2 Lens, Rear Cap, UV Filter - $14.00
50mm f/1.7 Minolta MC Rokkor - PF Lens - $6.99
Minolta MD Rokkor-X 135mm f3.5 Telephoto Lens - $25.00

Film kamera la ... Sapa orang agi bekena ka film kamera?!

Heheh, agi mayuh orang ngena film kamera, you! Rami bala sida ba Flickr groups din. Aku ka meh join group ti ngembuan kamera Minolta X-370 ba Flickr din!

Siti pemanah ngena film. Bisi ga gambar dituchi alu disimpan dalam album! Beribu gambar ti udah diambi ngena kamera digital tang iya ka bisi dituchi? Er .... Jarang dituchi!

Bekareh meh aku tu belajar ngena kamera manual focus! Ma bisi menyana gamal gambar ti diambi ngena kamera lama "baru" aku tu, ila mantai. Bisi scanner kena scan gambar ngambika ulih diupload ditu!

Ubat Batuk

Nyu enggai agi ngenat batuk nya kebuah nelipun lutur minta ubat. Aku enggai makai ubat batuk sebarang laban enda ngasi iya ka dibeli ari kedai ubat. Asaika masau jam makai ubat ti enda ngasi!

Ubat batuk ti bisi ngundan codeine enda ulih dibeli ngapa enti lutur enda meri kemendar. Ngam ngam ga lebuh aku telipun ngagai opis lutur, lutur nya nadai gawa sahari nya. Tang siti pemanah sistem ba klinik endur aku berubat ditu. Mesej pasal aku ti minta ubat dianjung ngagai lutur ba rumah iya, alu enda lama udah nya lutur empu telipun ngagai aku.

Meda penyakit aku nya enda raya, tau ga iya mina meri prescription. Enti tak raya enggai enda betemu enggau iya ga. Ubat batuk ti bisi ngundan codeine enggau ubat spray ka dalam idung diberi iya ka aku. Lemai nya Doug (taja iya empu benung sakit!) diasuh aku ngambi ubat nya ari farmasi ba klinik.

Pama agi tinduk demalam, enda suah tedani laban batuk. Arapka diri jampat gerai meh. Ninjik ga nyawa agi masuk makai taja sakit! Manduk kari manuk laban tenguk lemai kemari!

Hari St. Patrick

Sahari tu Hari St. Patrick. Kena orang nyambut hari tu, orang bekena ka gari ti bisi churak gadung, enggau nyendia pemakai corn beef enggau kubis.

Pagi tadi, aku enda tingat ka sahari tu Hari St. Patrick. Enda meh aku ingat meri bala anak baju gadung kena nurun sekula. Ni enda nyu enda ingat laban mata enda chukup tinduk!

Lelak endar asai isi laban ti enda chukup tinduk. Semalam malam rengkung rengkung batuk! Rusuk nyu pedis asai laban dibai batuk.

Enti tak nyamai asai isi nyau aku bepanduk ka corn beef enggau kubis kena ngintu Hari St. Patrick. Ngelama tu endang selalu nyendia pemakai corn beef enggau kubis ba Hari St. Patrick. Lebuh ka sakit baka tu tak lembau endar asai tulang.

Eeee, ka gali! Lelak!

Menyampah!

Nama kebuah orang dagang ngengkah rega utai dijual RM 3.99 alu ukai RM 4.00 tauka Rm399.99 alu ukai RM400.00? Ahhh, kena ngumpan kitai ti meda lumur 3 mit agi ari lumur 4! Mesa ni aja 1 sen?

Apin lama tu tadi aku bisi ngorder utai ari Amazon. Kiraka mar meh utai dibeli aku nya. Baru iya aku meli utai ngemar nya ari Amazon. Seminggu udah aku meli utai nya, rega iya alu turun 10%. Pedis amat asai ati! Menyampah! Enti utai nya murah, mesa ni aja 10%? Tang enti rega utai nya semak seribu? Besai discount 10% nya! Sapa enggai nerima 10% discount?

Nyu mandam mija pemedis ati ngenang! Menyampah!*

*Lama udah enda ngena jaku laut tu!

Kena Rampit

Duncan saduai Denice orang dulu kena. Rengkung rengkung munyi orang ka batuk. Udah nya alu tabin Duncan. Empat hari iya enda nurun sekula minggu nyin tadi. Denice agi ulih nurun sekula laban nadai tabin. Mina diasuh cikgu ngulum gula batuk kena nagang batuk.

Doug enda ibuh sebut. Tiap kali bala anak sakit, iya enda tau enda kena rampit. Dua hari iya enda nurun kerja. Ngumbai diri udah pama agi asai, nurun iya kereja hari lima tu kemari. Bedau maya jam orang pulai kereja iya udah nganjung diri pulai laban agi sakit. Rengkung rengkung munyi batuk alu raguk meh nyawa iya.

Hari lima, aku ga ngasai rekung diri pedis. Sapa kitai enda kena rampit! Kiba kanan orang ti rengkung rengkung batuk! Sahari tu nyu suma ulih didinga lebuhka bejaku. Raguk. Merinsa ma nganu anak! Ka merak anak, nadai entu pansut utai diperak!

Makai ubat enggau ngirup ai memayuh meh pengawa. Kiraka enda raya meh penyakit bala kami laban nadai siku ka nganjung diri ka klinik. Tat aja alu bebungkur ma tubuh nyilu! Ngarapka diri jampat gerai.

Main Marik 3

Ka nulis pasal diri makai kasam babi gulai daun ubi (re Lysther!) enggai enda nganti diri udah datai di menua ila ga!

Naka cherita ka ulih ditusui sahari pasal diri agi begaga ka tenggak marik! Nah tu meh utai digaga aku demalam enggau sahari tu.

Rindu, eh, beserungkai sida marik - ngiga ni bagi ti ngam ba prujik siti siti!

Main Marik 2

Lama udah aku enda bemain enggau marik! Minggu nyin kemari aku bisi ngorder marik swarovski kena aku nembu sekeda prujik tenggak ti alu enda enda tembu.

Tang maya marik ka diorder datai hari enam tu tadi, sepeket ukai utai diorder aku. Chap iya betul tang utai dalam peket nya salah. Kaler salah, saiz salah. Pagi tadi telipun agu ngagai kempeni ti alai aku ngorder marik nya. Ku aku, nadai aku enggai ngambi marik nya asal duit lebih ka dibayar (rega marik nitih ka saiz) dipulai.

Manah amat customer service kempeni tu. Nadai ngawa, ku indu enggau aku bejaku. Enda ibuh dipulai marik nya, aku ngirum marik ka diorder nuan ... free. Free! Dua gali ganda penyampau ka diorder aku dikirum sida! Enda bulih 10 minit alu bisi aku nerima email madah ka marik nya udah dikirum. Udah nya nerima siti agi email - apology email. Rindu aku suping enggau kempeni baka tu!

Dua iti tenggak marik ti gaga aku sahari tu. Siti kena nganti tenggak ti diambi/beli Lyana. Siti, tenggak lama dirumpang alu diadu baru.

Kiraka berengkah baru main marik tu! Berapa macham marik diatu ngemenuh mija ... dia keyboard, dia ga marik enggau pekekas ti kena ngaga tenggak marik!

Bunga Rumput 2

Rindu amat aku meda pengalak bunga rumput tu ba belakang rumah aku! Maya musim chelap ba kami ditu endang galak amat sida rumput enggau babas. Tau alai rusa belalai, sema ka jaku!

Mayau sigi betitih ka aku lebuh aku bejalai sebelah tanah ngambar bunga rumput enggau ngambar indu penyengat ti nutu bunga rumput nya. Engkejuk meh iya lebuh nengah rumput ka tinggi.

Ngumba endar ga sida ansa, nyu meresih meda aku ba tanah alu ka nganu kitai! "Gamal, palu enggau kayu tu enti berani mansang," ku aku bejaku kediri! Enggai nyadi enda mai kayu pan laban udah sekali kena pantuk ansa! Sigi maya sida ka laki mangah laban sida ka indu benung beteluk.

Sahari tu kami menyanak enda nurun sembiang laban Duncan tabin. Relek ga mimit ujung minggu tu.

Scramble Teluk Ansa

Ansa indu kami benung beteluk. Enti dibanding enggau taun ka udah, kiraka enda entu mayuh teluk sida taun tu. Engka laban umur sida ka indu udah tuai.

Doug enggai agi nupi ansa, nya kebuah teluk digumpul ninting hari. Nyu enda alah dempa, sema ka jaku! Diberi ngagai bala kawan meh sekeda.

Pagi tadi aku ngerajin ka diri ngaga scramble teluk ansa. Teluk mit ba gambar nya teluk manuk; ngambi kita tau meda pemesai teluk ansa enti dibanding enggau teluk manuk. Siti aja utai ti ngasuh aku enda entu ka makai teluk ansa. Peda penebal enggau pemesai teluk mirah! Takut kolesterol niki gasak makai teluk nya selalu!

Tang enti udah discramble enggau undang, daun sup enggau cheese ... aisey, beresi ga chapak udah bekau makai!

Finally!

Gambar orang gaga ngeso diri bulih Student of the Month enggau bulih 100% ba Spelling Test.

Bulan nyin kemari sikok sikok orang nyabak laban enda ampit enggau orang ngena baju sengapa nurun sekula. Bala ka bulih Student of the Month tau enda ibuh ngena uniform nurun sekula sahari nya.

Tang sahari tu kena ukum orang. Bemain enggau betiki ka jamban ba sekula. Pengujung iya kasut sepiak labuh ka dalam jamban. Nemu meh orang ulah iya. Telipun Guru Besar, ngasuh aku nganjung kasut rangkai. Nyau ga aku mupuk ka sekula. Nyabak orang ti duduk ba opis Guru Besar. Badu enda meh sepiak kasut orang bau kesing laban ti udah labuh ka dalam jamban!

Nasib mina bulih warning sekali tu. Enti agi ila, kena sipat burit laban ngelaban perintah!

Sigi upah kitai manchal enggau enda ninga jaku meh enti kena sipat!

Her Serene Highness, Nikki

Nikki, Kumang Mayau, atas perabung berati ka ulah rayat iya ba baruh.




Nikki, Kumang Mayau, berati ka pemansang kebun buah iya.

Mayau aku endang udah nganti aku ba atas perabung pagi tadi; nganti aku pulai nganjung bala nembiak nurun sekula.

Udah aku ngelengka beg dalam rumah, aku alu nyengkau kamera laban ka ngambar sida bunga pun buah. Aku nadai berati chara mayau nya turun ari perabung. Mina meda iya enda juah ari belakang aku nitih aku nisi pagar kebun buah apai tuai orang seberai rumah kami. Burung ti chip chip ba kebun buah, nya utai ti diperati iya.

Manah amat gamal hari sahari tu. Bisi panas alu hari ti bemua mina ba tisi langit aja. Sahari tu nadai ujan ku ramalan cuaca. Rindu ninga nya laban nyu lelak meda tanah basah, ai betakung din ditu.

Bah, naka tu aja cherita sahari tu!

Buring

Buring amat.

Pagi tadi ngelaban ujan nganjung anak nurun sekula. Apin lama aku udah datai ba rumah, kerusi nunga pc apin angat, jaket apin di buka, memunyi telipun. Seketeri sekula telipun ngasuh aku ngambi Duncan pulai laban abi ba kaki (kelalu balat digaru laban gatal) sup alu belai. Minta aku mai iya ka klinik.

Nasib ga pagi nya lutur ulih betemu enggau Duncan. Kin meh aku nganjung Duncan. Udah betemu enggau lutur, ngambi ubat, alu pulai kami duai. Malas limpang ka bukai laban perut udah engkeriok maya nya! Udah ngalih tengah hari jam.




Udah makai, nadai bukai pengawa. Ngadu gambar enggau upload sekeda gambar ngagai photoblog baru aku.

Abas la ....

Lemai tu mupuk baru hari ujan udah bekau ti ngetu enda lama tadi. Mata panas bisi pansut maya iya ka ngetu tadi, alu hari pan enda chelap iga. Enda ibuh bekena ka jaket lebuh pansut ngambi Denice pulai sekula.

Buring amat. Ujan enggau beguntur hari ba luar dia.

Bisi Kabih

Ku sekeda orang, mayuh kitai lebuh ka ngiga bini tauka laki ngiga orang ka bisi kabih gamal kitai empu. Aku rindu endar beratika gambar kawin ti begantung ba kedai gambar. Endang amat, tebal agi gamal pengantin indu enggau pengantin laki bisi endar baka gamal pangan diri. Sekeda nyu baka gamal diri menyadi!

Bah, kati gamal kitai enggau gamal jelu ti ditupi kitai deh? Bisi kabih gamal jelu ti ditupi kitai?

Amat geli endar ati aku keterubah iya aku meda gambar baka tu! Nyu kelalu nya enti gamal mensia tau nyadi baka gamal jelu!


Kati gamal Anais (anak Lyana) enggau mayau iya, Calisto? Bisi kabih gamal pangan diri saduai iya?



Peda pemesai/bulat mata mayau kami nya! Bisi kabih gamal Duncan?




Gambar ukui tu diambi aku dalam taun 2007 maya Farm Show. Aku enda tingat gamal orang ka empu ukui nya. Pelaba aku nadai gamal orang ka empu nya ngenyai gamal ukui iya!

Nasib ga, kasih tudah enti gamal baka gamal ukui iya nya!

Nemu IT?

Betul? Amat? Nya meh sekeda komen bala ka bisi mansa ruai aku tu!

*ngemayuh - typo