Main Snow ba South Lake Tahoe

Peda pengaga gamal Duncan bemain ba snow! Serta datai ba rumah kawan aku ba South Lake Tahoe kemari, amat enda teranti iya enggau Denice bemain ba salji!




Betikau ka salji! Sejam lebih bemain, getar getar tama ka dalam rumah. Tapa jari, tunjuk jari enggau kaki nyu mirah diri gasak chelap. Duncan madah diri ka berendam dalam ai angat. Enda lama udah mandi, udah bekena ka baju tinduk, alu madah diri ka bemain ba salji baru! Nadai aku ngasuh saduai pansut baru, hari pan udah petang maya nya.



Pulai sembiang kami alu dibai ngetu ba Lake Tahoe. Rindu amat meda biew dia. Snow man nya ukai digaga saduai, endang utai digaga orang ka dia dulu agi ari kami.




Lebuh kami datai ba rumah, salji pan majak turun. Dan (laki kawan aku) alu nulung Doug masang rantai ba tayar belakang van kami. Nitih ka ramalan cuaca hari majak besalji datai ka pagila.




Rindu amat meda salji turun alu inggap ba daun pun kayu, enggau pun kayu ti nadai daun.



Louisa, pangan aku, ka ga dibai saduai ngaga snow ngena snow ba deck belakang rumah iya. Ngelaban salji sida tiga. Apin tembu digaga snow man, ngetu salji turun. Nindik ga, laban irau ga ati enggai ka salji majak turun alu tepagang ba South Lake Tahoe enda ulih pulai ka Galt! Enti kelalu balat salji turun tutup jalai.

Arap ka enda balat meh salji turun malam tu enggau pagi pagila!