Saturday, February 27, 2010

Cherita Semadi Nadai Hari Enam



Tu gamal mua hari kemari. Sayau angin enggau penyelap hari enda ulih digambar! mrgreen Sekejap ujan, sekejap ngetu, sekejap angin, sekejap ngetu. Begedi amat! Nyu buring asai diau dalam rumah meda gamal hari bakanya. Nya kebuah pansut ngelaban angin enggau chelap begambar ka utai!

Genap malam hari lima kami menyanak pansut makai ka restoran. Kapa enda ngelaban hari jai pansut makai demalam! mrgreen



Sahari tu bakanya ga gamal hari tang ma endang udah ka nurun suping, nurun meh. Nindik ga ujan meresi enda lama aja, taja gamal mua hari bakaka ka tebubuh gamal ujan.

Iya ka bendar Doug ti bisi utai ka dibeli ba Home Depot. Utai kena ngerepair alai ngantung gari ti patah. Pemayuh gari ti digantung ni enda abis runtuh alai ngantung gari! Alah penyampau gari aku!

Aku minta anjung ngagai Joann laban bisi discount coupon 50% ti tau dikena. Aku meli sekayu kain (10 ela) kena aku ngelapis quilt. Udah nya meli bunga palsu - sekali tu ngiga bunga tropika kena ngias pasu bunga. Aku rindu nanam bunga dalam rumah tang utai ka ditanam bansa ka enda bebunga. Iya ka bebunga, semadi idup, lama udah enggai bebunga. Kurang dibaja kini!

Wreath ka digantung ba mua pintu baru kemari ditukar ari wreath Christmas! mrgreen Aku bisi ngetu ba kedai Dollar Tree hari lima tu tadi, alu meli bunga palsu kena aku ngias manah agi wreath lama ti nyu bekuap laban debu. Bala sida strawberi enggau bunga mit ti enda manah agi dibuai alu diganti enggau bunga baru - iya ka burak enggau mirah/oren. Pama ga agi gamal iya udah di makeover!

Bah, naka tu aja cherita semadi nadai aku sekali tu!

Wednesday, February 24, 2010

CD Strollers



CD Strollers ka diorder aku kutai lama udah datai. Bendar aku bemain ka CD tu! Apu, nyu enda ingatka penginggar retak sekeda lagu ka dibai Strollers! Tanda kitai udah tuai, kini, nyu enda entu tan agi ninga utai kelalu balat inggar! mrgreen

Aku bisi 3 iku menyadi laki, semua rindu ka lagu rock, lagu inggar, nya kebuah aku tu enggau orang rindu ninga chukup macham lagu rock kelia. Tang diatu ma kelalu balat inggar muzik, nyu bingung laban! Nyu enggai agi ninga utai inggar. Nyu enda ulih ninga diri berunding, kenu!

Lebuh aku ninga CD Strollers tu, terunding ga aku nama kebuah nadai grup baka nya agi di Malaysia, grup ka nulis enggau nanyi lagu ngena jaku English. Grup ka ngundan raban chukup bansa.

Nama kebuah nadai grup baka Strollers ti dikerindu chukup macham bansa di menua Malaysia diatu? Ukai main agi perintah belandik ka 1Malaysia, tang nadai entu dipeda ba industri muzik Malaysia.

Hmmmmm.

Tuesday, February 23, 2010

Kitty



"Here, girl! Here, girl!" munyi Duncan ngangau mayau lebuh iya ka datai di rumah ari sekula lemai tu tadi. Mayau di luar din, enda nyaut kangau iya. Irau ati Duncan meda mayau iya enda datai taja hari benung ujan.

Bisi meh iya ba luar din. Pelaba aku nadai iya di atas perabung laban hari benung ujan. Ma hari enda ujan bisi iya niki ka atas perabung. Pagi tadi tekenyit aku malik katas meda iya atas perabung. Endang alai iya lari ma meda mayau laki orang sepiak kami. Mangah mayau laki semak kami ditu, berapa iku enda sida. Ka endar merekak iya. Ni tudah enda takut.

Diatu ma kami mindah ka Los Osos, endang enda tinggal iya. Bebai ka pemakai enggau alai peninduk iya meh ulah kami. Nyu teleba iya dibai nepan kerita diatu. Rindu ga iya di Los Osos din laban mayuh tikus! mrgreen Bulih belama iya ma udah datai din!

♡ ♡ ♡ ♡ ♡ ♡ ♡ ♡ ♡

Asa endar ati aku ngumbai musim bunga kiraka udah berengkah. Sapa kitai enda ngumbai udah berengkah laban manah amat hari kami minggu nyin tadi alu pun kayu bebunga magang. Sahari tu bemua alu ujan meh hari. Angin ti niup ngenyelap nya sepi aku. Abis angat sahari tu naka 10° C. Amat enda berapa! evil

Monday, February 22, 2010

Spelling Bee



Sahari tu aku bisi enggau sekeda bala apai indai bukai ngulu lapan iku nembiak sekula ka Spelling Bee (pekit nyepil) ba Faith Christian School di Yuba City. Denice saduai Ethan ngari Grade 1 ari sekula sida.

Sembilan buah sekula Kristian semak menua kami ditu bisi nganjung 2 iku pengari ari Grade 1 datai ka Grade 4 ngagai pekit tu. Kasih tudah Denice, baru raun keterubah alu alah. Leka jaku ka asuh di sepil, "carry". Siti urup 'r' ditinggal. Engka kelalu balat takut, alu enda ingat nyepil leka jaku "carry" agi! Ukai enda nemu iya leka jaku tu! Ethan alah ba raun ketiga. Siku tu ka pama agi, tang ma urup udah disebut, enda tau ditukar agi. Nya ti ngasuh Ethan alah ba raun tiga. Ukai tegal enda nemu nyepil.

Kami duai Doug ka meransang Duncan mega laban iya mereti agi ari Denice pasal spelling rules. Lebuh sekula sida madah ka ngiga pengari (try outs) dianjung ngagai pekit nyepil, Duncan udah tumu rauh rauh madah diri enggai enggau, enggai dipilih. Takut enggau orang bepekit! "Anang irau," ku aku madah ngagai iya. "Bisi orang bukai nemu agi nyepil ari nuan ba kelas nuan!" mrgreen

Taja Denice saduai Ethan nadai menang sebarang midul (pingat) ba pekit sahari tu arap ka pengawa tu tau meransang saduai bebendar agi dudi ila enti agi bisi ati enggau pekit bansa tu.

Sunday, February 21, 2010

Fresno



Kemari kami menyanak bisi ka Fresno, kiraka dua setengah jam penyauh ari rumah kami, laban enggai enda enggau bala kaban belayan Doug ba memorial service ka great-aunt iya. Umur niang great-aunt iya 96 taun lebuh iya ka ninggal. Chukup tuai.

Balat ga pemanah alai gereja People's Church di Fresno nya! Tanah alai iya besai, alai parking kerita besai, lalu chukup macham bangunan alai ngatur program gereja nya. Amat kaya gereja nya!

Udah bekau memorial service nya, bala ka datai bisi diundang makai. Manah endar pengawa nya. Kenyang diri kami menyanak! Doug enggau apai iya jarang betemu enggau sekeda bala kaban belayan saduai laban ka enda sama alai diau. Rindu amat sida begambar enggau betemu enggau pangan diri sahari nya.

Aku mina sekali aja udah betemu enggau great-aunt ti ninggal nya. Maya iya ngintu birthday iya ka 90 taun. Duncan saduai Denice apin nemu bejalai maya nya suba, alu tudah Denice apin lama udah datai di menua Amerika.



Rindu amat aku meda pun kayu tu! Pun kayu tu dikumbai Tulip Tree (Magnolia family). Nyenap menyenap! mrgreen Berapa buah enda pun kayu tu ditanam sebelah tanah gereja People's Church ti alai memorial service nya tadi. Aku madah ka Doug aku ka nanam berapa buah pun kayu tu sebelah tanah rumah kami ditu. Iya berengkah bebunga ujung musim chelap. Udah daun iya tumbuh, alu bunga iya gugur, nadai agi bebunga iya. Nya aja ti kurang pasal pun kayu tu! Mina sekali setaun aja bebunga. Enda berapa!

Have a great week!

Thursday, February 18, 2010

Bunga Rumput



Ok, ukai semina bunga rumput ka dibantai ditu! Lemai kemari, semadi nadai pengawa, aku pansut mai kamera alu ngambar sida rumput sebelah tanah ti bisi bunga. Mit amat bunga rumput ti digambar tang taja pia, manah endar gamal udah pansut ba gambar.

Mayuh macham rumput ka bisi bebunga sebelah tanah aku dia, tang enda nemu kebuah enda ngambar semua ka bisi dia! Engka laban limpang begiga ka sida indu kemindang! Udah mupuk ayan sida indu kemindang. Nya meh hari empat minggu nyin kemari Denice saduai Duncan begumpul ka indu kemindang. Sarang kena nyimpan sida indu utai nadai temu alai agi. Ujung ujung butul tusu lama dikena nyimpan indu utai.

Lemai tu tadi begambar ka bunga pun buah ba kebun apai tuai orang sebarai kami baru ulah aku. Amat gian endar aku meda bunga sakura nya! mrgreen Siti ari gambar ka diambi aku lemai tadi udah dikena aku ngaga header blog Puteri's Musings. Nyu boring meda header lama! biggrin Tambah mega lama enda diupdate blog nya. Asaika enda nemu nulis ngena jaku English agi!

Naka tu aja sekali tu!

Tuesday, February 16, 2010

Kelai Musim Bunga



Rindu amat aku meda pun buah ba kebuan apai tuai orang seberai kami udah mupuk bebunga. Tumu pagi tadi aku pansut mai kamera bejalai nisi pagar kebun nya ngambar bunga ti benung ngembai. Nya ka bisi dikena nukar gambar blog header aku sahari tu! mrgreen

Minggu nyin ila baru iya ngembai magang bunga pun buah ba kebun tu! Bisi aku mansut gambar ka diambi aku nya ila! Endang tiap taun aku begambar ka kebun nya. Endang rindu amat meda bunga ka ngembai. lol

Monday, February 15, 2010

Ujung Minggu ba Los Osos



Kami menyanak mupuk ka Los Osos tengah hari hari lima tu tadi. Bala nembiak sekula cuti dua hari, hari lima enggau hari satu.

Hari ba Los Osos manah amat, mina angin aja ti ngasuh hari berasai chelap mimit. Tang lebuh kami ka niki bukit tengah hari kemari nyamai amat asai hari alu angin enda entu kuat iga. Nyamai ngmbar utai ma angin enda balat.

Sekeda gambar ka diambi aku kemari bisi disimpan aku ba fotografi blog baru aku. Anang enda ngabas, au! mrgreen Rindu amat aku ngambar bunga babas!

Anak sungai ka ba gambar nya anak sungai ti ngimbai barn kami. Sungai nya nadai ai sepemanjai taun, mina maya musim chelap aja iya bisi ai, nya pan semadi chukup ujan bisi nurun maya musim chelap. Musim chelap taun nyin kemari rangkai sungai nya laban enda chukup ujan turun.

Sahari tu mupuk kami pulai ka Galt. Pagila sekula bala nembiak.

Sunday, February 14, 2010

Lion Dance



Demalam kami ampit meda main "tung chey". Maya kami menyanak baru pansut ari restoran kami tepedaka bala nembiak main tung chey ngatur diri depan restoran cina sebarai restoran ti alai kami makai. Beguai meh kami menyanak meraka jalai laban ti ka meda main tung chey!

Aku geli amat ati meda tak anak orang putih ti mangkung drum! Berapa iku enda sida anak orang putih ti enggau orang main tung chey nya. Raban tung chey tu raban main asal ari university ba San Luis Obispo, nya kebuah nadai milih orang ti tau enggau gerumpung main asal ba university nya.

Umbas iya ga pengelama sida bemain ba restoran cina nya. Rami orang makai ba restoran nya demalam laban nya malam sebedau taun baru cina. Bala nembiak cina bekenaka baju cheong sum peda aku.

Duncan nyu lelak diri laban ti betanda ninga pangkung drum. Endang enda ibuh ka orang iya ka betanda nunda rentak drum tung chey. Nyu tuchum bala orang ti ngetu meda main tung chey ba kaki lima depan restoran meda ulah iya.

Sekali agi aku meri Xin Nien Kuai Ler ngagai bala kaban ti ngintu taun baru tu. Enda tinggal mega meri bala kita Selamat Hari Valentine! mrgreen

Saturday, February 13, 2010

Gong Xi Fa Cai



Selamat Taun Baru Cina nuju bala kaban ti ngintu taun baru tu. Xin Nien Kuai Ler!

Friday, February 12, 2010

Prujik Baru



Pedis pala ngatur laman fotografi baru aku tu! Template enda entu nyadi, plugin kena mantai slideshow mayuh ulah. eek

Ukai nadai blog fotografi, tang aku ka ngiga iya ka mantai gambar baka slideshow aja. Baru kemari aku tetemu ka plugin enggau template ti digiga aku ngelama tu.

Bedau entu mayuh gambar dia, tang minta barangsapa kita ka rindu fotografi bookmark laman web aku nya, alu anang enda selalu ngabas, au! mrgreen

Wednesday, February 10, 2010

Tebing Tasik

Gamal hari pagi tu panas taja bisi embun tumu tadi. Taja mata panas terang manchar penyelap hari umbas iya ga, kiraka 6 °C.

Pama endur kami ditu nadai bisi salji. Enti salji penebal ti benung labuh di Washington DC din, endang cabin fever gasak hari baka nya. Sapa ka bekurung dalam rumah lebuh ari chelap? Manah enti bisi karan kena ngangat rumah, sekeda nyu nadai karan laban tiang karan abis tumbang kena tinggang pun kayu ti rebah - rebah laban pemerat salji ti begumpul ba dan kayu.




Sapa enggai pansut ngiga tempat ti angat agi baka menua ngimbai tebing tasik baka Shell Beach? Ba California, menua semak tebing tasik jarang ngeyelap menua ti jauh ari tasik. Pia ga maya musim panas, menua ngimbai tasik enda ngangat menua jauh ari tasik.



Kami menyanak bisi bejalai ba tebing tasik Shell Beach hari Thanksgiving taun nyin kemari. Nyamai amat hari sahari nya. Enda chelap enda angat.



Tebayang ba mata ka ngagai menua tebing tasik laban ka lari ari penyelap!

♡ ♡ ♡ ♡ ♡ ♡ ♡ ♡ ♡ ♡ ♡ ♡ ♡ ♡ ♡

Au, pulai ngagai randau aku ari kemari - fotografi. Ngambar landscape pedis amat! Nyenep menyenep tang utai ka pansut .... enda puas amat meda! Ukai main pemanah utai dipeda, tang udah pansut ba gambar .... confused



Sahari tu aku tetemu ka bup pri ba internet. Bup tu dikumbai Complete Self-Instructing Library Of Practical Photography. Lagi macha ngichaka nemu agi pasal ngambar landscape!

Tuesday, February 09, 2010

Fotografi

Demalam aku bepeda ka kamera enggau lens ba Amazon. Meliur meh aku meda utai ti di-ingin!
mrgreen Anang ngorder utai, ku Doug. Besai belanja kena pulai ka Malaysia lagi! Amat ga, tak apin lama udah meli kamera baru, udah berunding ka upgrade!

Sahari tu aku macha web site siku professional photographer. Utai ka disebut iya pasal kamera nyu ka sama utai disebut professional photographer bukai.

The best camera is the one you have with you.

Amat ga nya laban enti kitai berati gambar ti diambi orang kelia, baka sida Ansel Adams, ni nya bisi ngena kamera ti canggih baka kamera kemaya hari tu! Ni nya bisi ngena Photoshop ngasuh iya manah agi! Semua gambar manah ti dipeda ari pengelandik sida empu, ari untak ti ulih meda utai lebih ari utai ti dipeda leka mata!

Sekeda orang mina ngena kamera ari hp, manah meh utai diambi. Aku komplen kamera ba iPhone mina 0.3 megapixel - lousy camera, ku aku selalu komplen. Tadi aku bisi meda gambar diambi siku photographer ngena iPhone. Apu, balat ga ngemanah utai diambi iya!




Bekareh aku ngiga gambar ti diambi aku ngena kamera ba iPhone. Er, nadai entu manah! mrgreen Gambar dua iti nya tau ga dibantai ditu!

Photographers make photos, not cameras.

Ok, ok. Nemu aku reti jaku nya! Manah agi belajar pasal ngambar utai. Anang irau pasal bansa kamera ka dikena!

Monday, February 08, 2010

Bokeh

Leka jaku "bokeh" berasal ari jaku Jepun. Jaku tu dikena nerangka pemanah tauka kualiti gamal background ti kabur dalam gambar.

Bokeh ti alus meh siti ari utai ti dikerindu aku pasal kamera baru aku nya. Taja sensor ba kamera aku nya enda besai iga enti dibanding enggau kamera ti mar agi tang bisi software baka Neat Image ti tau dikena kena ngurang "noise" ba gambar.




Tiap kali utai ka digambar aku pansut manah, aku berasai teperansang! mrgreen Aku rindu amat ngambar utai semak (close up enggau macro) laban enti jari enda entu begetar bokeh utai digambar selalu pansut alus amat.



Enda rindu kita meda gambar ti diambi aku tu? Ok, ok, ukai gambar baru, tang kena nyadi chunto gambar ti bisi bokeh!



Maya musim chelap tu kamera aku nadai entu pansut iga .. bunga nadai ga entu manah, sida kesulai nadai ga bisi terbai. Burung mayuh tang siga amat, engka lapar! Humming bird ti nutu feeder depan rumah aku, meda ayung aku dalam rumah bekebu terbai! Ni nya ulilh digambar!

Aku nganti bunga ari pun buah ba kebun apai tuai orang seberai kami ngembai. Endang tiap taun aku ngambar bunga ari kebun apai tuai orang nya. Manah amat! mrgreen

Naka tu aja cherita photography sekali tu!

Friday, February 05, 2010

Dua iku burung



Rindu amat aku meda burung Western Blue Bird ayan baru musim chelap taun tu. Udah bekau musim gugur taun nyin kemari aku nadai kala meda burung tu ayan agi. Pagi tu pama ga angin muput alu pama endar ga sida burung terbai sereta turun ka tanah mutik sida ulat bulu. Gambar tu diambi ari dalam rumah. Enti ga chermin rumah aku nya beresi, enda ga ngawa! Tang tau dikenyadi ga gambar burung sekali tu.

Maya musim chelap ukai nadai burung tang pedis amat digambar. Minggu nyin kemari lebuh hari ujan meresi rami endar sida burung atas tali karan seberai rumah aku. Bekareh aku pansut mai payung mit Duncan. Tang sayau amat, lebuh aku download gambar ari memory card, tak rusak (corrupted) memory card aku nya. Akai pedis amat ati aku! 16 gig memory card rusak bakanya! Gambar ka diambi sahari nya berapa iti aja ulih didownload. Gambar burung ti diambi lemai nya siti nadai meh ulih didownload.

Nasib ga copy semua gambar bukai (bisi 2000 iti) dalam memory card nya udah didownload alu disimpan ba computer enggau ba portable hard drive. Enggai nyadi enda ngaga lebih ari siti copy! Takut hard drive rusak!!

Enggai nyadi enda diganti memory card ka rusak nya. Sekali tu aku meli 2 iti 8 gig memory card awak ka enti siti rusak bisi ga siti agi dikena. Memory card tu baru datai kemari, nya kebuah ulih ngambar utai sahari tu.

Hari sahari tu kira ka enda chelap iga kiraka 15°C tang angin ka pama endar. Hari ka enda chelap nyu nyadi chelap gasak angin. Tang enti tak agi mayuh burung bemain ba tanah dia, ngelaban angin meh aku tu lagi! mrgreen

Thursday, February 04, 2010

Nostalgia

Diatu enti kitai deka ninga baru lagu ti dikederindu maya kitai agi biak suba, nadai pedis alai ngiga. YouTube siti alai kitai tau ngiga lagu lama. Apin lama tu tadi, semadi ngadai pengawa, aku betaip ka nama grup enggau nama lagu ti popular maya tujuh puluhan kelia ba YouTube. Kelia meh nya laban mayuh bala kita ka macha blog aku tu apin ada maya nya!

Siti ari grup ti dikerindu aku maya nya suba dikumbai The Strollers. Menyadi aku bisi meli siti rekod ari grup tu. Maya aku pulai taun nyin kemari bisi aku nanya indai aku alai rekod lama tang iya madah nadai nemu alai bala sida rekod lama disimpan. Kebendar iya enggai kiruh nyerungkai store room!

Lemai kemari aku bisi nebah berapa buah lagi ari The Strollers ba YouTube. "Tu meh munyi lagi orang putih dibai kumpulan ari Malaysia dalam taun tujuh puluhan suba," ku aku madah ngagai Doug. "Lagu psychelic!" ku aku agi.

Lebuhka macha comments orang ba YouTube pasal lagu The Strollers aku bisi tebacha ka kempeni ari Spain udah meli album nya alu bisi ngeluar album nya baru ba CD. Beguai meh aku be-google ngiga alai tau meli CD nya.



Nah, tu alai aku meli CD nya kemari! Sahari tu aku udah nerima email ari Forced Exposure madahka CD udah dikirum! mrgreen

Rindu sereta sinu meh ati lebuhka ninga sida lagu lama. Nya meh reti nostalgia.

Wednesday, February 03, 2010

Enggai enda nunda



Ma siku udah ngulu alu ka nunda. Pemakai ti ku aku nya. Nyu baka penyakit, tau bejangkit! mrgreen

Nindik ga utai ti dikedeka ati ulih digiga. Kemari Lyana mantai ka gambar rujak ka digaga iya. Aku endang bisi 2 butul sambal rujak, dibeli ba Asian supermarket ba Sacramento din. Pagi tadi aku mina meli sida buah nenas, entimun, mengkuang enggau buah epal.

Tau dikenyadi rujak aku nya. Enti bisi suntung nya baru bisi oooooommmmpppphhh! mrgreen

Kemari aku bisi mega tepeda ka terung tunu Lysther. Alu tenguk meh aku tu tadi. Meli terung mega meh aku pagi tadi lebuh ka market.



Nganti lemai tu lagi nunu terung nya. "Tunu" ku aku. Tepu dalam oven alu ngena broiler. Dapur aku ukai ngena gas, nadai lah api - bansa ka ngena karan.



Ah, dah puas kitai makai, betanda agi kena nyelim ka tubuh! mrgreen
Related Posts Plugin for WordPress, Blogger...