Udah temu

Jam nyu ka pukul 8.00 malam maya kami ka datai ba rumah ari Los Osos sahari tu. Ku jaku ka tumu angkat ari nyin ... gamal nya ulih. Mayuh endar utai dikemas ba barn nya laban berapa bulan ka enda kala diabas. Maya ngangkut barang ari kerita, Doug komplen, "Kati tau mayuh agi barang dibai pulai?"

Amat ga nya ... ni enda mayuh, lebuh ka ngetu ba Thrift Store papa & nana sida Duncan ngangkut ga sida ayam, sida soft toys, sida gari ... Nasib ga enda berangkut lebuh ka shopping Black Friday tu tadi!

Bisi endar utai ti ngasuh beterima kasih beserimbai enggau Thanksgiving taun tu. Lebuh ka ngechek answering machine ... bisi siti mesej ari Polis. Kerita Doug ka kena churi kutai udah ditemu. Ditemu ba siti menua ti enda jauh ari kami ditu ga, menua ti endang selalu dipansa lebuh ka shopping ka Lodi. Kerita nya diangkut (tow) enggau ditinggal ba dealer nyual kerita ba Lodi din. Laban kerita nya ditarit enggau disimpan kempeni pribit, enggai enda bebayar ga maya ngambi kerita nya pagila. Enda ngawa laban nyamai endar asai ati kerita nya bisi ditemu. Ku polis, kerita nya baka gamal asal iya .. meda baka pagila.

Lima malam kami ka ninggal rumah tang nya chukup panjai ba Duncan. Bendar iya empakap ka dinding rumah, "I miss you, home" ku iya. Lelengau amat iya!

Naka tu dulu cherita sekali tu!

Lemai Hari ba Morro Bay

Lemai tu tadi kami menyanak bisi ka Morro Bay. Ngagai supermarket enggau kedai hardware dulu, udah nya bejalai ba marina ba Morro Bay.

Endang sengaja ngintai lemai hari laban ti ka ngambar sunset. Maya dia taun, tumu mata panas padam. Pukul 5.00 lemai mupuk petang hari.

Morro Rock (volcanic core)

Maya aku ngambar tu, mata panas endang udah padam. Hari endang sigi chelap ba tisi tasik, tambah mega angin tasik bisi niup.

Bala posing ba jetty dia. Chelap! Nesal enda mai jacket tebal agi!


Ba Morro Bay mayuh seafood restaurant ... mar! Kami bisi ngetu makai seafood combo and chips. Udah ga hari chelap enggai enda milih outdoor restaurant ... labanka bisi live music dia.


Bisi endar peluang aku ngambar utai under low light. Flash light endang enda dipasang lebuh ka ngambar utai. Mayuh agi gambar ka enda menyana!

Black Friday 2009

Sahari tu dikumbai Black Friday. Tu meh maya orang berebut rebut shopping, meli present kena musim Krismas lalu meli perengka electronics laban rega utai baka nya jauh murah ari hari bukai.

Kebuah iya dikumbai Black Friday laban sahari tu meh hari akaun sida bizniz in the black ... bulih untung ...

Aku endang enda kala enggau orang nganti ba mua pintu pukul 4.00 pagi laban ti ka berebut meli laptop tauka ka flat screen TV 32" rega $200 - $350. Sekeda orang peneka meli laptop murah nyu camping dua malam depan kedai ... ka dulu tama meh nya!

Aku mina sempat nganjung diri ngagai department store benama JC Penny laban Door Buster Sale sampai pukul 1.00 p.m. Maya aku datai dia, jam nyu ka pukul 12.00 tengah hari. Puaska bepusin ngiga utai, leather jacket dibai pulai ... enggai muai peluang meda rega iya enda bulih $50. Rega biasa iya $225. Isssh, enggai muai peluang! Beli aja!

Kami menyanak agi ba menua entua aku. Dua malam aja kami bemalam enggau sida, malam tu kami bemalam ba barn kami di Los Osos. Boring ku bala anak laban nadai TV. Tang bisi mai DVD, bisi ga utai dipeda kena ngerindang saduai. Enti enda, lelak ninga sadaui betundi. Mayau kami, gining gining meda menua tak lain. Bendar ngurung iya takut ka iya lari! Tang ba barn tu besai alai iya besegau ... rindu iya laban bisi bau tikus ditu!

Lemai tu anak menyadi Doug bisi nemuai ngagai kami laban ti ka main nimbak enggau Doug. Udah nya iya alu enggau kami makai lemai sebedau iya mupuk ka Santa Cruz alai iya gawa. Duncan ka endar mai iya bemain enggau iya tang orang bujang siku tu (cousin Duncan ka tuai sekali ari sepiak daddy iya) enda entu teleba enggau nembiak, enda nemu ngelayan anak mit. Ka irau mimit aku meda jam udah pukul 8.00 p.m. lalu maya iya ka angkat tadi, laban 3 - 4 jam penyauh pejalai iya. Tambah mega hari kuat endar angin lemai tu.

Naka tu aja sekali tu! Selamat ujung minggu!

Thanksgiving 2009

Taun tu kami ngintu Thanksgiving ba sida entua aku. Kami angkat ari rumah kami udah ngalih hari kemari. Bala anak mina nurun sekula setengah hari aja.

Tu meh gamal kami mupuk kemari .. mayau bai mega. Enggai ngiruh orang bukai ngintu iya laban orang bukai pan kiruh maya Thanksgiving. Tambah mega kami ba menua sida entua aku lima malam.

Tu gamal manuk kulok panggang digaga entua indu aku. Semalam malam manuk kuluk disimpan iya dalam oven. Muntang amat. Sekali aku nguji nyimpan manuk kuluk semalam malam ... tak enggai mansau enggi aku! Api mit dikena ba oven aku enda chukup angat!

Nadai orang bukai enggau makai maya Thanksgiving ba rumah entua aku. Mina kami sebilik .. bala menyadi Doug, ipar Doug, enggau dua iku anak menyadi iya.

Bala sida nembiak ba mija mit .. dulu sida berangkah, enda nganti orang bukai. Duncan enggai makai manuk kuluk, mina makai mashed potatoes. Denice mina makat sayap ... balat ga pemesai sayap manuk kuluk! Petunggal saduai lawa aja drum stick manuk kuluk ba chapak. Enda dempa laban perut enda nyamai asai (food poisoning ensenus).


Sekeda bala ka bisi ayan .. entua indu aku agi kerus kerus ba dapur. Aku tukang gambar.


Maya kami agi makai, menyadi entua aku enggau laki iya bisi datai. Saduai endang bisi dipanggil tang laun datai. Enda ga ngawa laban enda beguai makai utai ngemayuh nya.

Kami berengkah makai jam udah pukul 2.00 lemai. Dulu agi ari nya kami menyanak enggau Dillon (anak ipar aku) bisi bejalai ka Pismo Beach enggau Shell Beach ... semadi nganti jam ti ka makai Thanksgiving. Pagila mantai gambar diambi ba beach.

Naka tu aja dulu.

DWTS Finals

Aku sigi rindu amat meda program Dancing with the Stars. Ba season sekali tu aku nyukung Donny Osmond (teen idol zaman aku!) lalu demalam episod finals. Malam tu lagi finale, lalu kitai deka nemu sapa pemenang iya.

Enti dibanding pengelandik betanda enggau celebrity bukai, baka Mya, Donny sigi alah. Tang demalam Donny bulih 30 mata (perfect score) ba tanda freestyle. Amat rindu endar aku meda tanda iya nya.



Aku mina ngundi ngena lumur siti telipun. Each phone number is limited to 5 votes. Aku bisi 3 iti lumur telipun ba rumah aku ... arrrgggg, udah ka ngena siti lumur, lumur telipun kena ngundi Donny selalu aja busy. Udah nya alu enda ingat agi aku telipun laban mina setengah jam aja lumur nya dibuka. Arggghhh. Geram amat aku enti Donny alah malam tu!

Aku enggai dikachau ma jam udah pukul 9.00 malam tu lagi! Meda finale Dancing with the Stars, you! You go, Donny!

Cherita Hari Minggu

Tengah hari tadi, udah ka pulai sembiang, kami bisi ngetu ba supermarket laban aku ka nganjung video ka diinjau aku ari Redbox. Meda diri endang udah ba supermarket aku alu ngiga itit ka endang udah mansau .. temu tenguk ka makai itit!


Lebuh ka mansang ngagai peti ais alai itit nya disimpan aku bisi mansa rack video. Meli 3 iti aku meda rega nya enda entu mar. Video kartun Krismas kena ngerindang bala anak ba rantau jalai maya ka nurun ngagai menua sida entua aku hari tiga tu ila.

Ulih nganti sampai hari tiga tu lagi meda video nya?! Sereta datai ba rumah bala anak ngasuh aku main video nya ka saduai. Tu meh gamal siku garing garing meda video.


Nadai utai bukai dempa enggau itit ka dibeli aku nya tadi - asi enggau lauk entekai. Doug makai teda mee ari restoran Vietnamese maya makai tengah hari kemari lebuh ka suping.

Bendar meh aku ngangkut barang ari supermarket china kemari .. sida ikan pusu, santan, beras pulut, sida ruti kibin, sida ikan ais, sida roti canai, kangkung ... Nya gamal kupi tongkat ali enggau ginseng dibeli aku .. buatan Malaysia, you! Mina maggie mi ari Malaysia aja nadai dijual ba supermarket china tu .. tengukka maggi mi asam laksa.

Naka tu aja dulu .. ka manggang janik ka dibeli kemari! Janik ka bisi gemuk enggau kulit!

Foggy Morning

Maya jam gambar tu diambi iya nya pukul 10.15 pagi. Kiraka udah kurang agi penebal embun maya jam nya.

Kemari bisi ujan ba endur kami ditu lalu bisi salji turun ba menua bebukit ti tinggi ari 5000 kaki. Nya kebuah bisi embun pagi tu laban mayuh ai (moisture in the air) dalam udara. Nyu empelah, bisi jaku Iban "udara"?

Nadai entu program sahari tu ... suping! Ka meli perengka dapur - sida santan, sida ikan pusu, sida roti canai, sida kupi 3-dalam-satu - nyu nadai agi stok dalam rumah. Udah nya alu ka suping ba Big Valley Thrift .. ngiga pakaian enggau kasut ka bala anak ti tau dikena lebuh ka nganjung diri bemain ba salji tu ila. Enggai meli ka baru laban ukai nya lama ngena. Ma udah abis musim chelap, nadai tunga ngansing agi. Taun siti tu ila, ukai nya umbas agi gari enggau kasut! Nasib ga bala anak bedau nemu milih! Utai terpakai tauka enda, asal bisi dibeli ka utai, gaga amat saduai!

Pasal kerita Doug ti kena churi, alu nadai ninga rita pasal kerita nya bisi ditemu. Enti bisi ditemu madah sida polis. Ngarap ka bisi ditemu meh. Agi begedi aku ngenang pengawa sekeda mensia!

Nyau

Aku nadai ngelala orang, kelebih agi iya ka endang udah besai tuai, diberi apai indai sida sebuah kerita. Diberi dua buah kerita lebih agi aku nadai nemu orang baka nya!

Kami duai Doug endang beberkat endar laban bempuka apai indai/entua ka manah sereta murah ati. Taja kerita ka diberi saduai ukai kerita baru, tang enti kitai berunding, jarang kitai tetemu ka orang ti ka nyua ka kitai sebuah kerita! Tang entua aku ukai semina sebuah kerita ka diberi ngagai kami - dua buah. Uchu iya dua iku ka tuai sekali, ampit meh nerima sebuah siku kerita ari entua aku nya.

Nya meh, orang merkat kitai, tang sekeda nyamai amat enchuri utai ka diberi orang ngagai kitai.

Lemai kemari baka selama meh Doug sangkai ba alai iya ninggal kerita iya lebuh ka nurun kereja. Datai iya ba Park and Ride, nadai meda kerita iya dia agi. Pagi nya endang sengaja ga parking kerita iya ngimbai trak Goodwill ti endang dipark dia awak ka ulih nerima derma (gari, perabot, etc) ari orang mayuh. Ngicha ka selamat agi kerita iya dipark dia, kenu.

Denice saduai Kristen begambar ba mua kerita enggau trak Doug.

Kena churi orang meh kerita Doug nya demalam. Dulu agi ari nya, radio/dvd player dalam pick-up trak iya kena churi lebuh trak iya diparking ba endur nya tadi. Nasib ga trak iya nya enda alu ditaban penchuri.

Ukai semina kerita Doug aja udah kena churi ba tempat nya. Berapa buah enda kerita orang udah kena churi dia. Kerita orang jauh manah sereta baru agi ari enggi Doug. Meda kerita iya udah lama, nadai lah ngumbai orang ka enchuri laban mayuh kerita bukai ka manah agi parking dia mega.

Nya meh ngasuh aku pedis ati ngenang pengawa mensia. Nyamai nyamai ngambi utai orang!

Chelap

Pagi tadi, sereta dani tinduk, aku lalu masang heater dalam rumah kami laban penyelap dalam rumah kiraka 15º C. Aku enggai pan ngetat penyelap nya sebedau tama ka dalam bilik mandi! Agi ka bebungkur asai isi!

Tu meh gamal embun meku atas rumput pagi tadi. Aku berati ka sekeda utai tumbuh ba mua rumah aku ... mupuk mati sekeda laban hari chelap. Berapa pagi tu udah penyelap baruh - 0º C, tang aku nadai udah meda Doug mindah sida pasu pun naga (dragon fruit) ngagai tempat lindung! Nadai tan pan sida pun buah naga nya diteju ba luar!

Gamal ais (frost) atas atap rumah aku pagi tadi. Aku ngena kasut but lebuh ka nganjung anak ka sekula pagi tadi ... enda lama ka pansut ari kerita tang udah berasai tunjuk kaki tengut tengut enda tan chelap.


Diatu agi musim gugur tang taja pia, endang udah bisi salji labuh ba sekeda tempat. Ujung minggu tu lagi, nitih ka ramalan cuaca bisi turun salji ba menua bebukit enda jauh ari kami ditu. Enti ba bukit din turun salji kami ba baruh bukit mina bisi ujan.




Kemari aku bisi meli 4 iti scarf sutra ba pasar minggu. Orang ka nyual scarf nya indu Thai lalu iya madah diri iya baru udah pulai ari Thailand. Aku meli scarf nya ka diri empu enggau ka kawan aku siku .. Christmas present. Aku enda nganti Christmas lagi meri iya scarf nya laban aku ka meda iya ngena scarf nya diatu! Hari udah mupuk chelap tentu kitai ka bekena ka scarf!

Nya aja cherita sekali tu!

Cherita Hari Dua

Tiga pagi beturut-turut, hari ba menua kami ditu chelap amat. Embun ba rumput meku. Aku, taja udah 10 taun diau ba menua tu, agi meh apin teleba enggau penyelap menua kami ditu.

Begedi amat aku pansut ma hari ngenyelap nya laban tunjuk kaki aku enda tan. Alu pedis meh iya. Pagila enti hari agi ngenyelap sahari tu kapa aku enda regup regup ngena kasut but bulu kambing?!

Nya kebuah aku tu enda ulih diau ba menua ti bisi salji! Ba endur aku ditu nadai be-salji semadi meh nganjung diri ngagai menua bebukit, kiraka 2 - 3 jam ari rumah aku tu.


Nya meh pagi tadi aku tetunguk ka mee sup, ngicha ka tubuh angat mimit! Beguai meh aku manduk mee segera ka empa aku pagi tu tadi, udah ka pulai nganjung anak ka sekula. Nyamai amat asai isi udah nyirut sup angat!

Pagi kemari aku bisi nurun suping. Mayuh endar sale maya dia hari. Bebeli ka baju chelap ka aku empu, bebeli mega ka fleece robe enggau snuggie blanket ka bala anak. Lebuhka bediri nganti mayar utai ba cashier tepeda ka Christmas ornament (gambar atas). Rindu amat aku meda, alu meli se-set. Bala anak udah milih siti ornament ka diri empu minggu nyin tadi. Tiap taun saduai meli siti ornament kena ngingat ka Christmas taun nya. It's a very good Christmas ritual for the kids!


Saharit tu aku bisi nulis tutorial ... chara ngaga Christmas animated header ... ngena animated gif ti ulih mutik ari internet.

Bala kitai ka bisi blog, aram meh kitai mansutka Christmas header pun bulan dua belas tu ila!

Season of Giving

Tiap bulan sebelas gereja kami ngatur pengawa Season of Giving. Pengawa tu sambil begumpuru makai (pot luck) sambil nulung orang ka kurang agi pemisi ba menua Galt ditu.
Bala ba gereja ngambi siti tauka dua iti nama (kertas mirah ka begantung ba Christmas tree) anembiak ari Christmas tree, alu meli ka sida peminta sida ka udah ditulis ba kertas mirah nya. Bulan dua belas tu ila, gereja bisi ngatur party alai bala anembiak datai nerima Christmas present sida tu.

Aku bisi manggang manuk (pah enggau drumstick) dibai ngagai pot luck nya demalam. Rindu amat meda pemayuh utai dempa demalam! Aku semadi nagang diri, mina nyengkau 3 macham pemakai aja.


Tu gamal hiasan ba mija kami. Landik endar sida ngerias! Aku temu merening orang, temu kiruh makai, enda tingat gambar bala anak benung makai! Saduai dulu ngambi sida kek enggau cookies! Udah nya madah diri enggai agi .. mata aja amu .. minta utai bukai. Aku ngambi chicken wing ka saduai ... Denice agi minta, nya ngambi baru. Duncan enda ibuh sebut, alu angkat niki bemain ba pentas. Bendar ngerara, takut ka bepantup enggau nembiak bukai ka bemain ba pentas, takut meda anak orang labuh gasak iya!

Nindik ga pengawa nya tumu tembu. Enggai nyadi laun laban bala anembiak sekula hari siti. Puas ngumbuk saduai tinduk, agi belala bemain!