Kemari Doug mai bala anak ngagai Open Day Flying Club semak kami ditu. Aku tumu udah madah enggai enggau sida. Mayuh peluang nuan ngambar utai dia, ku Doug ngumbuk aku. Enggai!
Aku mesan Doug, anang nepan bilun mit enti bisi program mai bala temuai ka Open Day nepan bilun ngelingi menua Galt.
Peii! Kapa Doug muai peluang! Nepan meh saduai Duncan bilun mit! Denice enggai enggau orang, takut nepan bilun mit. Ku Doug, untung saduai Duncan laban siku ka duduk ba mua berimbai pilot bekawan enggau pilot nya. Di bai pilot nya jauh mimit grup sida (4 iku nyengkaum pilot). Kira ka lama agi ari grup bukai ka dulu ari sida meh ku Doug.
Nya meh gamal menua kami ari langit. Endang pengawa bekebun ka tebal agi ba menua kami ditu.
Padang bilun mit ti alai Open Day nya endang selalu alai orang terjun payung. Maya sida Doug datai dia, bala orang ti ka terjun payung ari bilun endang nganti ti ka tama ka dalam bilun maya nya. Bala tourist ari menua bukai ka selalu nganjung diri enggau pengawa terjun payung tu. Apin lama tu kemari bisi mati siku tourist ari Germany .. labuh atas madang anggur laban payung iya enda tebuka.
Ukai semina nya aja, bilun mit pasang siap ti dipasang diri empu selalu meh labuh .. nya ti ngasuh aku takut ngasuh Doug mai bala anak nepan bilun mit. Easier to ask for forgiveness, then ask for permission ku iya nusui ngagai apai iya lebuh saduai ka berandau ba telipun. Geram aku ngenang!
Doug enda ibuh kira, endang angan angan ka meli bilun mit. Iya agi ingat maya iya agi mit suba apai iya bisi bekunsi enggau orang meli bilun. Reti nya bisi lisen nerbai bilun meh entua laki aku nya. Bisi kala mai sida sebilik nepan bilun ari California ka Massachusettes maya sida agi mit suba. Ukai semak nya ... 20 jam! Ukai laju bilun mit nya! Ngetu enggau bemalam ba siti siti tempat meh sida sebedau datai ba Massachusettes.
Tiap kali Doug nyebut pasal meli bilun .... dalam mimpi aja lah ku aku madah. Ni bisi duit kena meli bilun!
No comments:
Post a Comment