Nadai Modal

Boring endar. Asai ka abis modal, nadai agi idea ka ditulis ditu. Modal abis dikena nulis blog jako orang putih. Anang enda kin kita ngabas utai ka ditulis aku ba blog siti nyin.

Sekali tu aku mina ka mantai ka sekeda gambar diambi aku maya kami ka ngagai sida entua aku apin lama tu tadi. Ka bala kita ka apin kala nemuai ka menoa kami ba California ditu tentu mayoh kita enda nemu menoa kami ditu tebal agi rangkai, nadai entu pun kayu asal enti enda ditanam mensia. Taja pia, tempat ka rangkai nya enti bisi ai lalu alai nya digaga ladang tauka alai betanam ka utai endang manah endar dipeda. Galak endar ga utai ditanam dia laban bisi ai dikena ngidup ka utai ditanam.

Kami nengah jalai bebukit (gambar atas), jalai nya mit lalu enggai enda bejimat maya nengah nya. Taja gamal bukit nya kuning enggau rangkai iya gadong serta manah dipeda maya musim chelap laban ujan bisi turun maya nya. Ba tempat bukai enti ukai desert maya musim chelap sida rumput mati laban chelap tang ba California rumput tumbuh!

Tang ba bukit tinggi din, bisi ujan, bisi salju, din gadong agi utai dipeda, galak agi utai tumbuh. Ba Yosemite National Park, ba Lake Tahoe, endang atas bukit tinggi din, manah amat pun kayu dipeda. Besai besai pun kayu din, alah pun kayu kitai di Malaysia.

Belah jalai ka ditengah kami maya ka ngagai sida entua aku endang rangkai magang, semadi meh nya ladang buah, ladang kapas, ladang anggur ... besai besai ladang nya, nyau rapas mata meda.

Tu siti ari winery (kebun/kilang anggur). Wine ari California sigi tebilang endar ba menoa kami ditu.

Diatu musin tomato, berapa buah enda trak ngangkut tomato dipansa kami.

Tu gamal bukit ba tanah sida entua aku. Nadai entu utai tumbuh dia. Sida entua aku enda diau ba tanah tu. Nadai nanam utai mega, mina bisi sida chapi, nya pen ukai enggi sida.


Tu gamal backyard sida entua aku. Sigi manah amat. Angan angan aku bisi backyard baka tu! Heheh, nadai duit kena ngaga iya manah baka tu! Endor rumah sida entua aku atas bukit mit (bluff) lalu view iya manah amat. Ba valley dibaroh din endang kebun - kebun sayur, kebun strawberry, kebun bunga. Rindu amat meda, tang ni enda pengelama iya kebun nya abis alu tanah nya dijual kena alai ngaga rumah? Sinu ngenang nya. Mina meda perabong rumah orang meh nya ila.

Naka tu aja sekali tu aku mai kita raun meda menoa kami ditu. Ila raun baru!

Enda Ingat

Kemari aku bisi nulis pasal ngiga chara meda TV ari Malaysia. Laban ka lama udah enda meda, nyau enda ingat aku pasal TV RTM 1 & 2 endang ulih dipeda ba internet. Kebuah aku enda ingat laban suba maya aku ka meda, selalu enda ulih sampai abis. Server busy lah, connection lubah lah .. nyau enggai agi nguji.

Enda nemu nama kebuah tengah hari tu tadi aku tak ingat pasal livestream TV 1 & 2 ba internet. Engka laban aku benong ninga radio Iban tumu pagi ari Sarawak! Lelengau meh nya ka ninga radio enggau meda TV ari menoa!

Sempat meda berita ari Selamat Pagi Malaysia aku sahari tu. Lelengau endar asai ati aku sahari tu! ;-(

Hari Raya tu lagi anang enda enggau meda program hiburan ba TV. Aku sigi rindu meda program hiburan ba TV Malaysia tauka ba Astro. Indai aku enggau aku meda maya aku bisi di Miri ujung taun tu tadi. Apai aku aja nyadi spoiler laban ti ka meda berita tauka bala anak ti enda tau enda meda Disney Channel!

Bisi siti agi tempat aku enda tingat ka bisi alai tau meda TV ari Asia. Aku baru udah ngabas tang TV3 alu bedau ulih dipeda ba tempat nya. TV Indonesia enggau China bisi ulih dipeda. Tang enda free, enggai enda bebayar. Enda berapa! :-(

Radio Iban

Lama endar aku nadai ninga radio Iban. Ukai enggai ninga, enda ulih ninga. Tiap kali aku click ba link, enggai buka link nya. Bisi lah hal pasal "error with external application" .. utai munyi nya. Ngelama tu aku ulih ninga radio Iban enti aku ngena Winamp. Tang enda nemu kebuah iya tak enggai agi bemain ba Winamp ti udah di-install ba laptop aku. Bisi berapa bulan aku nadai ninga radio Iban.

Lemai tu tadi aku bisi download baru Winamp ngagai desktop computer aku ka baru. Nyau ulih ngiga dulu ba Shoutcast Radio baru bisi bulih stisin radio Iban. Amat lelengau endar ka ninga lagu enggau berita ari menoa asal. :-)



Diatu aku benung ninga program Iban tengah hari hari enam. Speaker ti disambung ba computer tu aja ti enda entu berapa. Munyi lagu ti pansut ari speaker nya tau dikumbai semadi nadai. :-) Nganti aku meli baru ila. Tadi aku shopping nadai tingat pasal speaker. Bepedaka TV flat panel! Enti enda tegal Duncan tekemik ba tanjut endang bisi dibai pulai TV nya tadi! Tudah Duncan enda sempat ke jamban, nyau tekemik ba tanjut. Kelalu lama ditat nyau enda ulih ditat agi.

Aku agi ngiga chara ka meda TV ari Malaysia. Suba aku bisi besebut pasal parabola. Entua aku bisi ka meri enggi iya tang maya kami ka bisi ngagai sida apin lama tu tadi, aku nadai tingat ke nya. Tambah mega kami enda ulih mai iya pulai ngena mini van kami. Enti kami ngena pick up truck kami nya baru ulih mai iya.

Lagu sha la la, sha la la gaga ati, sha la la la oh sulu ... ah nya munyi leka lagu ditebah radio Iban!

Angus!

Ahhh, tu penyadi roti (garlic bread) enti kelalu gian nunga computer! Asai ka enda lama aku dudok nunga computer, udah nya ngabas roti dalam oven. Aku mina ka ngangat ka roti nya tang engka oven nya kelalu angat.

Issh, nadai aku muai roti nya. Kikis aja ka chelum udah nya tau diempa! Kekeke. Nyamai diempa pagi hari enggau jus!

Kurang endar aku update blog tu. Aku tepaksa concentrate ba blog siti nyin laban mayoh paid post ditulis. Paid post mesti diselang seli enggau personal post. Tambah mega, aku nguji improve Google Page Rank blog nyin. Enti page rank aku tinggi, mayoh agi peluang paid post ti tau ditulis aku. Enda samoa paid post ti bisi dia tau diambi aku. Tiap iti paid post nya nitih ka criteria ti diletak pengiklan.

Diatu tiap iti post ditulis aku terus di auto approve. Reti nya tulisan aku tu kira manah. :-) Bersemangat laban nya! Aku enda teranti blog aku siti da agi Puteri's Musings 2 , chukop tiga bulan awak ka aku ulih submit blog nya. Dua iti blog, reti nya mayoh agi post ulih ditulis, mayoh agi ka duit diulih! Hahaha.

Berendam

Tu gamal kami ka berendam ba hot tub sida entua aku, ujung minggu tu tadi. Hari lemai nya chelap, nyamai endar asai berendam ba ai angat! Denice enda enggau kami tama ka dalam hot tub laban iya takut meda ai nya nyau melidih peda iya!


Duncan nyau ulih nagang bemain dalam ai. Ka nyemerai, ni nya ulih laban ukai alai nyemerai. Nya meh iya bepangka ka ai ngena kaki iya baka ka nyemerai. Iya sigi enda nemu nyemerai tang angan angan ka nyemerai! :-)


Denice enggau bepasuk ka baju mandi tang udah ka meda ai nyau melidih gamal, alu enda nyadi enggau kami tama. Aki iya ngerindang iya leboh kami ka dalam tub nya. Malam ketiga baru iya berani tama. Nya pen jet (ngasoh ai beputar, melidih) enda dipasang enggai ka iya takut.

Chelap Bulu Nurun ka Pasar

Pagi tadi aku bisi nurun ka pasar (Galt Flea Market). Aku agi belala makai daun ubi nya kebuah nurun laban ka ngiga daun ubi! Bisi ga tetemu ka daun ubi, udah nya bisi ga meli kangkong, pisang kena ngaga chuchur, lia, enggau kachang tanah. Tengok ka makai kachang tanah rebus. Minggu dulu bisi aku meda tang nadai meli.

Aku enda lama ba pasar tadi laban chelap! Maya aku nurun nganjong anak ka sekula endang benong chelap hari tang enti mata panas udah tinggi agi enda ga chelap agi. Tang pagi tu bisi angin niup. Sangka aku enda kuat angin tang leboh aku ka bejalai ba pasar, tak majak angin nya betiup. Abis tekebu sekeda langkau alai sida ka bejual. Laban ka enda ngadang angin ngemalat nya nadai bekena ka baju chelap, mina baju t-shirt panjai lengan naka siku aja. Beguai meh aku ka shopping pagi tu tadi laban ka enda tan chelap.

Mupok meh hari ditu mansang chelap. Ba endor bukai endang udah chelap tang kami ka diau ba California lubah agi hari mupok chelap. Taja iya chelap diatu bisi maya iya angat baru ila sebedau iya betukar musim amat amat.

Kati baka hari ba menoa kita dia? Ujan? Angat? Bejerebu? :-)

Belauk ka daun ubi

Daun ubi, timun enggau serai.

Daun ubi tutuk diguring enggau ikan pusu, bawang burak, lia, enggau chabi.

Lama udah aku enda belauk ka daun ubi. Maya aku pulai ka Miri taun dulu nadai ga indai aku bisi mandok lauk daun ubi.

Nya meh naka pengaga ati aku pagi tadi leboh aku tepeda ka daun ubi! Ngelama tu aku nadai kala meda daun ubi. Engka aku nadai entu berati ka sida sayur ka bisi dia meh! Sayur kailan deh baru diatu aku ke ngelala ni bagi! Nya pen semadi kawan aku ka bisi kitu bulan empat kutai ka madah. Kailan lah nya, ko iya. Ngelama tu aku selalu mut mut, nadai sayur bukai kah, tak mina sayur tebal batang nya! Heheh, selalu aku makai kailan sigi udah dipandok ba restoran nadai lah aku nemu gamal iya ka bedau dipandok!

Hari tiga minggu tu ila nurun baru aku ka pasar. Agi belala belauk ka daun ubi. Dudi tu ila aku ka mandok manok enggau daun ubi bechampur enggau santan. Aku sigi rindu endar makai manok champur daun ubi. :*

Doug nadai kala makai daun ubi, makai lemai tu lagi baru iya nyepi. Aku endang udah belauk ka nya makai tengah hari tu tadi. Tepantup endar nyawa!

Makai Mee Maggi

Naka pengaga ati aku meda Maggi Mee ba supermarket endor aku selalu meli perengka diempa bansa kitai. Ngelama tu Maggi ka dipeda aku dia bansa ka diempa orang menoa India .. ahhh, ukai ayam, arr, apa nama nya? Ukai ga nya kari, bisi lah perisa ka diempa orang ari India. Enda ingat ka nama iya.

Maggi Mee ayam tu Buatan Fiji! Heheh. Tang sup iya sama asai Maggi kitai di Malaysia din. Aku mina rindu makai mee kari Maggi. Brand bukai aku enda entu minat. Kawan aku bisi mai mee kari Cintan maya iya ka datai bulan empat tu tadi. Indo mee sigi bisi ditu tang aku enda minat Indo mee agi. Kelia aku minat endar mee goreng Indo Mee tang bau iya aku enda minat agi diatu. Ditu mayoh macam mee ari Taiwan, Thailand, Vietnam, Indonesia, tang nya meh nadai mee ari Malaysia. Aku selalu tengok ka makai Mee Asam Laksa.

Ukai mina tengok ka Maggi mee, aku tengok makai kway teow goreng. Aku enda entu minat mee kolok, kelalu beminyak! :-) Mee pandok china ditu enda sama asai mee kitai di Malaysia din.

Aarrrrrgggh, aku ka pulai ka Miri! :-) Heheh, tang aku enggai mikir nepan bilun ... kelalu jauh!!

Iklan Iban Maybank

Keterubah iya aku macha pasal iklan tu, aku alu bekareh ngiga iklan Maybank tu. Iya ka temu aku mula mula nadai munyi, tang enda lama udah nya bisi siko orang agi upload iklan nya ka YouTube. Sempat ga aku download iklan nya ... nya ka dipeda kita ditu.

Apa komen kita pasal iklan tu? Ba blog Uchu Keling din bisi bala berandau pasal iklan tu. Manah ga penemu bala pasal iklan nya.

Komen aku ... nadai orang manah agi ari sida tu ka diambi belakon? Udah ga jako Iban nya munyi akih, enda berapa agi lakonan sida!

Enti ka ngiga Iban tulin ti nemu agi bejako Iban enggau belakon ukai nadai. Ko sekeda, udah manah bisi iklan dalam jako Iban, enda iboh kelalu balat mantah pasal munyi jako Iban nya tauka lakonan bala.

Sigi amat, tang lebih manah enti ari pun sida ka ngaga iklan nya ngiga orang ka nemu agi bejako Iban. Sangka aku laban sida ka ngatur pengawa iklan ukai bansa Iban, engka nya sida ngumbai sebarang orang tau meh asal nemu "bejako" Iban. Aku nemu meh bejako Cina tang enggai bala China ninga jako China aku dikena ba iklan! :-) Tentu sida nanya nama kebuah bala China enda diambi belakon? Kapa ngenyadi aku ti ukai bansa China?

Bah, aram kitai madah ka Yasmin Ahmad, anang ngudah ka bansa Iban. Awak ka dudi hari enti iya agi ngaga cherita ngena jako Iban iya nemu nama ka digiga bala Iban ka meda cherita Iban nya. Giga Iban tulin belakon cherita Iban. Bala Iban nemu ni bagi Iban ni bagi ka ukai! Ari jako kitai udah nemu. Err, tang ba ulu din ukai bansa Iban pen nemu bejako Iban neh, endang munyi jako orang dia ga neh! Heheh.

Aku nganti iklan jako Iban Gawai taun baru tu ila!

Besai

Sapa kala meda The Biggest Loser tauka Obesity Clinic? Aku bisi meda engka dua episode aja program dua iti tu.

Hari lima nyin kemari kami menyanak bisi keluar makai ba restoran china ba Sacramento. Baru berengkah makai kami menyanak alu tama empat iko orang. Apu, balat ga ngemesai sida empat iko nya! Bendar aku ngasoh diri enda merening sida! Sangka aku sida nya sebilik. Apai indai enggau anak laki enggau anak indu.

Aku alu tingat ka cherita The Biggest Loser enggau Obesity Clinic. Ko aku bejako enda inggar ngagai Doug. "They looked like they just escaped from Obesity Clinic! Or escaped from The Biggest Loser competition!!"

Ukai ka ketawa ka orang ka besai tubuh. Tang nya meh taja teleba meda orang besai tubuh ditu, enda meh sampai sebilik besai magang! Kerusi alai duduk pen baka ka enda ngundan. Nangi endar aku ka kerusi alai sida nya duduk. Enggai ka tak runtuh dia. Issshhh, pechuma orang ka empu restoran kena saman sida! Orang ditu sigi rindu endar nyaman orang!

Kasak kasak

Aku bisi ngirup teh peria udah aku makai tengah hari kemari tang taja pia mata aku ngantuk. Enti aku ngirup teh Lipton tauka sebarang teh chelum, sigi enggai tindok mata aku laban teh bisi ngundan caffeine. Ohh, manah nya, ko aku bejako ka diri, enda ngasoh aku bejaga teh peria tu. Amat ulih tindok enda lama ga aku leboh ka gali ba kerusi panjai tengah hari kemari.

Malam nya aku bisi ga ngirup sechangkir teh peria nya. Aku start tenguap nguap ari pukul 10.30 p.m. Ooh, ka mata aku tinduk malam tu ko aku bejako dalam ati diri. Perut pen start engkeriok. Aku lalu ngaga sechangkir cereal (baka nestum) alu bai ka bilik tindok. Eeee, manis endar cereal tu ... ai kelalu mimit! :-) Udah pukul 12.20 a.m. baru aku nutup api, alu ngali ka diri. Nama tak enggai tindok mata tu? Kasak kasak. Akai, kati tadi tak tenguap nguap?

Sangka aku ai manis ti dirup aku sebedau nya ti ngasoh aku enda ulih tindok. :-( Amat enda berapa! Pukul 3.30 pagi aku agi betilik ka jam! Merinsa endar sepi aku dani pagi tu tadi!

Salsa

Tu gamal salsa gaga aku lemai tu tadi. Baru iya meh aku nguji ngaga salsa. Resipi diberi cikgu sida Duncan ti bansa Mexico.

Meda tomato kami mayoh endar, nadai nemu chara agi nguna nya dia aku tepikir ka salsa. Setengah mangkok besai, mina sigi aja buah tomato diguna. Tomato nya mesai buah baseball! Udah nya sigi bawang besai, juice ari dua igi limau mit, daun soup (cilantro), sesudu mit chabi udah di injin, enggau mimit garam. Tomato enggau bawang di injin aku ngena food processor. Tau ga di putong mit mit.

Salsa di empa enggau corn chips. Enti makai ba restoran Mexico endang di idang salsa enggau chips sebedau pemakai kitai datai. Denice saduai Duncan sigi rindu endar makai salsa enggau chips. Enggi aku nya enda pedas tang enti ba restoran Mexico, endang sirut sirut ngetat pemedas salsa sida!

Pun tomato ditanam kami mina sepun aja tang mayoh amat buah. Bisi endar dibagi enggau orang.

Buah Semangka Manis

Manis endar buah semangka ari kebun kami! Minat endar Denice makai buah nya. Dua igi mansau sekali, kira bendar endar ngabis nya. Nadai alai peti ais alai nyimpan buah semangka ka udah dibelah.

Pansut baru juicer kami tu ila laban enti enda digaga juice enda alah di empa. Ka nganjong ngagai Kathy tang iya enggau laki iya nadai dirumah weekend tu.

Rindu endar meda buah semangka udah mansau. Gagit bekebun taun baru tu ila!

Urut

Apa nama minyak angin warna gadung nya? Ti bisi bau ti tau ngasoh sekeda orang mabuk, especially enti nepan kereta tauka bilun??

Pagi tadi aku pegi pedicure, udah nya alu ngasoh indu Vietnam nya ngurut aku. Sida endang bisi alai meri urut. Tengah iya ngurut belakang aku, iya alu nanya enti aku ka di unsut ngena minyak angin china. Err, ok ko aku. Hot oil, ko iya. Nadai pen asai angat ba belakang aku.

Puas puas iya ngurut aku alu nyium bau minyak angin warna gadong nya. Aku alu ngangkat pala aku alu malik ngagai alai iya ngengkah minyak urut. Paduhal, minyak gadong nya ti empu bau nya! Minyak senyonyong ko aku. Ya, ya, made in Singapore, ko indu Vietnam nya!

Heheh, kumbai aku nadai bulih minyak nya ditu, paduhal bisi dijual ditu minyak nya! Isssh, ka mandi baru asai aku. Enggai beperfume ka minyak angin gadong maya keluar makai malam lagi!

Enda Chukop Tindok

Sekumbang anak aku masuk Pre-Kindergarten, aku ngasai ka diri enda chukop tindok. Aku endang bansa ka laun tindok, tambah mega bansa ka pedis nindok ka diri! Berengkah hari satu tu tadi, aku dani sejam tumu ari ngelama tu laban anak aku mesti datai ba sekula sida pukul 8.00 pagi. Akai dai, lembau dani pagi lebih agi enti mata baru tindok pukul 2 tauka 3 pagi!

Enti anak tindok jenak malam enda ngawa ga laban tindok aku nadai dikachau orang. Tang Duncan bansa ka kasak kasak, nyabak tengah malam, angkat ari katil alu ngangau kitai ba moa pintu bilik kitai ..... aisey, ringat endar asai! Kelebih agi enti mata baru sejam tindok! Ukai nyamai ka ngasoh mata tindok baru lebih agi enti jam udah pukul 3 tauk 4 pagi.

Demalam aku ngirupu wine mimit sebedau aku tindok laban aku selalu berasai ngantuk ma udah ngirup wine. Tang wine ti di-irup aku demalam ukai ari botol ti baru dibuka, nye enda nyamai agi asai iya! Kadang kadang aku makai anti-histamine laban tu tau ngasoh kitai tindok, tang agi meh aku pedis nindok ka diri.

Ko Kathy kawan aku - You should exercise! It'll help you sleep! Heheh, sigi bansa ka enda enggau orang besenam!

Jagung Panas enggau Cantaloupe Chelap

Umbas iya ga pemanis buah cantaloupe kami tu. Nyamai endar diempa chelap! Tujuh igi sekali mansau, nye enda alah diempa!


Gambar jagung baru pansut ari periok! Agi berasap. Yummy, nyamai endar jagung manis! Agi bisi ba pun jagung, sekeda ti apin mansau. Bala anak pen rindu makai jagung, nadai irau ka enda alah diempa.

Pengerami Tikah

Tu sekeda gambar diambi aku ba pengerami tikah lemai kemari. Aku enda ulih ngambar pengantin lebuh sida ka ba moa paderi laban orang ka berimbai enggau aku besai tinggi magang.

Manah endar hari lemai kemari, panas tang bisi angin. Bok ti dipisin sebedau mupok abis tekusai. Udah mata panas turun hari pen berasai chelap. Sekeda ti ngena pakaian ayan belakang enggau dada, chelap bulu magang! Aku ti ngena baju gaun ti nadai lengan pen chelap, tang aku bisi mai selendang. Nya pen pama kena mukur tubuh!

Pemakai sigi enda mayoh macam tang chukop ka empa bala ka bisi datai. Mina iya lubah aja maya ke ka makai. Meja kami ka penudi endar mansang ka meja buffet.

Udah makai pengantin laki enggau indu muka joget. Amat landik saduai betanda salsa. Endang udah berapa bulan saduai pritis! Udah nya pengantin indu betanda enggau apai iya. Pengantin laki betanda enggau indai iya udah bekau nya. Manah endar ga custom sida ditu. Pengantin laki datai ari Mexico, nya meh ngasoh rindu endar meda dua macham culture malam nya. Sigi rami endar laban sida ka datai ari Mexico.

Kami pulai pukul sebelas malam enggai ka kelalu laun. Doug mesti ngangjong baby sitters pulai.

Pengantin baru, Oscar enggau Monica.

Pengapit indu, ngeso ka tenggak enggau antin ti digaga aku.

Kek pengantin. Nyamai endar, bisi asai nenas, cheese enggau chocolate.

Kathy, indai pengantin indu ngena antin enggau gelang mutiara digaga aku. :-) Sepiak iya Richard, apai pengantin indu, udah nya sepiak Richard, apai pengantin laki.

Ngiga Baby sitter

Kami duai Doug enda ulih mindah kediri empu enti enda bulih baby sitter kena nyaga Denice saduai Duncan. Lemai hari enam tu ila kami bisi dipanggil ka pengerami tikah anak kawan kami.

Demalam kami duai Doug telipun kin kitu ngiga baby sitter. Anembiak ka madah diri sanggup alu nadai malas pesan ditinggal ba telipun iya. Enggai nyadi enda ngiga back up enggai ka siko nya enda ulih datai. Bala ti selalu diambi kami nyadi baby sitter enda ulih magang laban bisi program bukai. Siko ti kerindu Duncan saduai Denice enda ga ulih laban iya enggau apai indai bisi kena panggil ka pengerami tikah nya mega. Apu, kati ko tu, deh?

Pagi tu tadi baka nya ga Doug, betelipun kin kitu. Datai ka betelipun ka opis gereja minta lumur telipun rumah anembiak ka madah diri sanggup. Nadai ga orang nyaut telipun. Nasit ga udah ngalih tengah hari tu tadi anembiak nya bisi malas telipun Doug. Au, ko iya, ulih iya baby sit Denice saduai Duncan lemai hari enam tu ila. Pangan iya ti patut enggau iya enda ulih datai ko iya. Enda ngawa laban endor kami ti rami tu ila, enda jauh ari rumah kami empu.

Phew! Enti enda bulih, aku tauka Doug enda meh ulih enggau orang party orang kawin tu ila! Tentu Doug ti enda ulih enggau! :-)

Nulong ngantong api pelip

Lemai tu tadi kami duai Doug nulong kawan kami Kathy saduai Rich ngantong lampu pelip. Anak indu saduai ka lumur dua deka kawin hari enam tu lagi. Sebelah pun kayu, pagar, pun bunga alai kami ka ngantong lampu pelip. Tang peda aku agi petang alai orang deka ngatur pengerami tikah nya ila! Pedis makai ma enda entu peda utai dempa!

Endang nunda stail orang ditu, rindu ngator garden wedding maya lemai hari. Pukul enam rami tikah nya berengkah ila. Arap ka enda entu panas meh hari nya ila. Lemai tu tadi bisi angin, chelap mimit asai iya.

Baru iya kami bisi dipanggil ka pengerami tikah. Aku bisi ngaga sida antin enggau tenggak ka pengapit indu (9 iko). Lemai kemari aku bisi ngaga gelik enggau antin ka Kathy, kena iya maya anak iya kawin tu lagi.

Ila kitai sama meda gambar pengerami tikah tu!

Picnic

Hari enam tu tadi kami menyanak bisi ka family picnic diatur company alai Doug kerja. Picnic tu endang diatur tiap taun, tang kami jarang enggau orang. Taun tu baru kedua kali kami bisi enggau. Taun dulu nadai enggau orang kami. Mina taun dulu agi ari nya.

Rami orang ba picnic laban company alai Doug kerja nya besai. Utai dempa mayoh, ai irup mayoh, beer pen bisi, ice-cream, balloons ka bala anembiak, raffles - manah manah prize iya, bemain bingo - kami duai Doug nadai bulih utai. Duncan asa asa ati ka bulih basikal.

Laban ti jarang enggau enda lah kami tingat ka mai tikai tauka pua alai dudok ba park. Orang bebai ka kerusi enggau tikai diri empu. Sekeda bebai ka tent, alai belindung. Tang park ti alai kami bepicnic nya mayoh pun kayu lalu mayoh alai belindung. Hari sahari nya manah amat .. mata hari terang tang bisi angin. Asai ka ukai summer. Kerusi meja endang bisi disedia, tang maya kami datai din udah penuh.

Udah dudok atas rumput, udah start makai sandwich baru Doug tetemu ka alai ba meja. Beguai Doug kin - kelalu balat beguai, anak pen abis nyau! Datai aku ba meja, nanya Doug, ni Denice? Kesal meh ati kami tu tadi, laban Denice selalu enda jauh nitih Daddy, tang sekali tu engka iya enda meda Daddy bilok ba row alai kami ti ka dudok, iya alu bejalai terus. Nya meh kami rauh rauh ngangau iya. Kelalu mayoh orang, nadai ulih peda anak mit bejalai kediri. Nasib Denice nemu nikal, aku alu meda iya. Kesal gamal tudah. Nyabak iya meda Daddy, ngumbai Daddy iya ninggal iya!

Raffle ticket prizes. Nadai bulih utai kami hari nya.

Bemain bingo, 10 iti cards kena main. Nadi bulih utai kami duai Doug.


Tu iya orang bebaris ngambi ai bisa .. free magang, sapa enggai?

Tu sekeda tent alai orang nyendia ai manis enggau pemakai. Mina makai burger, beef sandwiches, hot dogs .. di tunu fresh dia.

Duncan asa asai ati ngumbai kami ka "meli" ka iya basikal. Nadai nasib sahari nya. Nadai bulih utai.

Wajah Baru?

Enda lain gamal blog aku peda kita sahari tu? Semadi nadai pengawa meh nya!

Enti kita apin meda, aku bisi ngaga siti tutorial ba Puteri's Musings pasal chara nukar blog kitai ngagai 3 column. Cuthess ti nanya aku, aku alu bisi ati ngaga tutorial nya. But that tutorial is for the classic template. Ahhh, enggai nyadi ngena jako uhang putih .... nadai nemu ka nyalin jako nya enggau nyemetak agi.

Tang ba ujung tutorial nya aku bisi meri link ngagai siti tempat alai kita tau belajar nukar code ba blog style baru Blogspot. Enti kita ka nukar code, anang enda bejimat jimat laban enggai enda bacha enggau silik dulu instructions sebedau nukar. Udah nya anang enda double check, preview dulu blog nya sebedau Save Template Changes. Enti bisi enda betul aja utai dipeda, double check baru tauka click Clear Edits ... your blog will return to the pre-edit condition. Iya ka manah agi, anang enda download whole template dulu sebedau nukar sebarang utai.

Amat mayoh utai dipelajar aku sahari tu ba Tips for Bloggers. Asal kitai bisi ati ka belajar, alu nemu nitih instructions enggau silik, taja enda nemu utai pasal code, tau nyadi utai diadu! Heheh!

Tabin

Pagi tu tadi Duncan nyabak laban aku madah kami enda ulih nurun sembiang laban iya agi tabin. "Me like going to church", ko iya enggau sabak. Ari kemari saduai Denice nanya enti hari nya hari sida nurun ka Sunday School.

Saduai enda entu pengarai sekumbang hari lima tu tadi. Batuk, insak enggau angat isi. Nadai dibai ka klinik laban ditu enti enda raya, enda iboh dibai ka klinik. Enggai enda ngaga appointment dulu baru ulih betemu enggau lutur. Mina meri ubat kena nurun ka panas enggau meri ubat sengak (bansa ka panjit ka dalam nyawa) kena ngerai ka batuk. Ubat sengak tu ngasi agi ari ubat batuk.

Arap ka lemai tu lagi saduai nadai agi angat isi alu ulih nuru sekula pagila. Enti enda pedis endar aku laban saduai. Sahari tu bisi Daddy enggau saduai bemain, bisi ga awak kena aku blogging mimit!

Pemansang Kebun

Buah cantaloupe! Bisi ngenam igi buah nya dia. Cantaloupe tu lubah agi besai ari buah semangka.

Aku tekenyit meda morning glory aku udah bebunga. Rindu endar meda iya ila ma bunga iya lebat agi!

Tu gamal pemesai morning glory. Aku enda ngadang iya tau bebunga, kumbai aku agi mit!

Peda pemesai buah entekai tu! Aku enda nemu naka ni pemesai iya ila. Ni maya iya tau diambi ka? Nganti iya udah kuning? Sekeda buah entekai nya panjai taja iya ari pun ti sama.

Buah semangka tu tau diambi dalam dua tiga hari tu. Aku udah nguji nempap iya, alu sangka aku iya kira udah mansau. Tu meh buah semangka ti dipegai Duncan ba gambar ka dulu agi!

Sida pun jagung udah tinggi ari aku. Peda aku iya udah bebunga tang apin meda sayok jagung.

Nurun ka Pasar

Aku baru pulai ari pasar (flea market). Kena hari tiga orang ka bejual bisi nyual sida sayur, buah, ikan, enggau chukop macham utai bukai.

Aku nurun laban ti ka ngiga sida sayur. Nadai agi nyual kangkung sida dia, enda nemu kebuah, tang sida terong, tomato, chabi, mayoh peda aku pagi tu. Sida buah mayoh mega.

Nadai nemu nama ka dibeli, nadai entu selera asai iya, errr, ka bendar nadai nemu chara ka berapi agi ... nadai entu idea! Tengok endar ka makai lauk pandok indai aku. :-( Nya aku mina meli retak, ka diguring enggau babi tambah kichap. Udah nya bisi ga meli labu sigi, ka kena nyampur sup tulang babi.

Puas ka bepusin ba flea market dia, aku alu tama alai orang nyual sida ribbon. Aku tepeda ka ribbon ti tau dikena aku ngaga sida beg. Udah nya tepeda ka "bulu" ... ooohh tau kena ngaga beg binching ti tau bai ka party tauka rami tikah ... heheh.

Pansut ari alai nyual ribbon, aku bisi ngetu meda sida mangkuk enggau periuk. Orang ka nyual utai nya bisi mega nyual kertas jamban, dia aku meli sebungkus laban kira ka murah meh rega nya.

Enda nemu nama kebuah, tak bisi ati aku meli bungai buluh sahari tu, engka pasu ti bisi ngekatak meh ti nguing ati aku! Lima ringgit (dollars) rega sepasu, alu meli baja ai kena maja bungai buluh nya.

Sebedau aku pulai aku alu ngetu meli lauk ... tengok meda gamal ketam guring ti bisi dijual! Aku mina meli mimit, umbas kena aku makai tengah hari. Demalam aku bisi manggang tulang babi, alu ketam nya tau nambah ka lauk aku makai tengah hari tu lagi.

Enti bisi geng enggau nurun ka pasar, rindu agi asai iya neh!

Birthday

Kemari Duncan nyambut birthday iya ka empat. Aku bisi meli enggau mai kek enggau juice ka preschool iya. Maya nya endang maya sida makai snack, udah sida dani tindok tengah hari.

Gamal Denice enggau best friend iya, Jessica (indai Jessica indu Thailand) nunga kek.

Aku salah beli lilin ... meli "trick candles" bansa lilin ti enda nemu padam maya disepu! Bendar tudah Duncan nyepu alu enda padam padam! Bisi anembiak siko (anak cikgu) rauh rauh nyabak laban iya ka enggau nyepu lilin nya mega.


Mmmm. Yummy! Ngena jari Duncan makai kek laban ti ka makai whipping cream dulu!

Bala anembiak ba sekula sida Duncan.

Squash

Tu gamal squash (labu kuning panjai ... enda nemu nama Iban iya) diambi pagi tadi ari kebun kami. Jampat endar buah tu besai. Hari enam tu tadi aku bisi manggang squash enggau tomato (ari kebun kami mega) ... sedap amat dipanggang enggau garam, lada, cuka, udah nya dichampur mimit enggau kuah ayam panggang. Yummy!

Bejait Enggau Bekebun

Oooiii, bendar aku bejait! Peda beg bukai ba Puteri's Hobbies.

Tu meh gamal beg digaga aku sahari tu. Bedau entu tembu beg tu dijait, jarum injin jait telepas alu laboh tama ngagai baroh gigi injin, aisey, alu mogok injin jait aku!! Akai frust endar laban nya!!

Injin aku nya bansa ka computerised, nya lah ka sensitive mimit ma bisi utai ngejam iya. Pagila aku nganjong injin nya direpair. Arap ka enda lama meh nganti nya tembu direpair. Enti enda, issshhhh, meli injin murah kena back-up!!

Mansang endar gamal kebun kami! Nyau repa gamal utai dia. Pun semangka udah bebuah, entekai baka nya mega. Rindu endar meda pengalak utai ka ditanam dia.

Besai iya daun entekai tu!

Buah semangka!

Main Guni

Guni beras enda tebesau. Iya tau nyadi ayam ka bala anak.

Bekebun

Taun tu pun plum kami galak agi ari taun dulu. Aku mina ka makai buah plum enti iya mansau amat amat. Buah tu masam enti enda chukop mansau. Buah apricot enda entu manah taun tu, mit endar. Pear bekenya ga. Sida epal agi mit bedau ulih diambi.

Doug bisi nguji nanam radish panjai ari leka taun tu. Apu, balat ka bisa asai lubak tu!! Enda nyamai sepi aku. Ka agi aku makai bansa radish ka bulat.

Doug bisi nanam entekai, buah semangka, tomato, squash enggau jagung. Bisi meda? Jagung enda peda laban iya ba ujung sepiak kanan. Antara bungai ditanam iya nya gladiola (ba pasu), morning glory, awak ka bisi empakap ba pagar nya ila. Aku bisi nabur leka bungai baka daisy, bachelor's buttons, sunflower, tang apin tumbuh.

Kemari kami duai Doug bisi shopping alu bisi ngetu ba hardware store. Hardware store ditu ukai mina nyual hardware tang bisi mega garden center. Aku bisi meli pasu besai alai mindah pun ficus ... pasu alai iya diatu udah kelalu mit. Aku bisi mega meli sekeda perennials (idup sepanjai taun) bewarna engkodok (purple lah). Aku ka nanam ba tanah tang ko Doug alai bekebun sayur nya deka dichangkul baru ila ... anang guai ko iya. Tanah kami ditu kering enti enda dichangkul amat amat. Bisi mood aku bekebun bungai taun tu!

Cherita Baru

Lama dah enda nulis post baru, eh! Mina nyebut cherita pasal Cuthess ti udah betunang. Ukai nadai cherita, malas ..... gila begaga ka marik!

Aku bisi diasoh kawan aku ngaga tenggak enggau antin dikena bala bridesmaids enggau flower girl. Anak indu lumur dua (Monica) iya deka nikah bulan lapan tu ila. Lapan iti tenggak udah tembu. Tenggak flower girl baru tembu digaga sahari tu. Baru start ngaga antin. Kemari aku meri 4 iti sample. Siti sample dipilih, so start lah ngaga nya tadi udah pulai sembiang.

Gambar tenggak (left) nya 3 ringkat tang Monica minta mina seringkat. Ok lah, tang enda ngemanah 3 ringkat peda aku!

Lemai kemari aku bisi ngagai Bridal Shower Monica. Nadai entu mayoh orang dipanggil. Samoa orang diundang bisi mai present .. bala sida towel mandi, towel dapur, sexy lingerie, jeng jeng jeng enggi aku? Hahaha, sex manual!! Malu bala ka ngebak bup nya! Heheh.

Bala nembiak sekula diatu benong chuti musim panas. Bala anak aku agi nurun sekula, enggau orang summer program. Nadai aku tan begulai enggau saduai besari sari. Enti dirumah nadai ngetu minta utai dempa. Ni ka berebut rebut ka ayam agi ... manah agi anjung enggau orang summer program! Heheh. Sapa madah aku supermom?!

Tu video diambi maya sida graduation. Aku mina ngambi berapa sikin aja .. laban ngumbai enda peda utai digambar ... enda entu terang hall alai sida ka belagu nya. Bala sida pre-schoolers belagu The Wheels of the Bus. Bisi meda Duncan enggau Denice dia? Boleh tahan eh, Blogger Draft bisi alai upload video! Enda iboh beupload ngagai YouTube tauka Google Video tauka video hostings bukai.




Kami bisi bekebun mimit taun tu. Orang belakang rumah din alai bekebun. Enggi kami tak ba moa rumah!! Enti betanam bungai aja enda ngawa, sigi alai nanam bungai ga! Utai ka ditanam jagung, entekai, tomato, buah semangka, cantaloupe, carrot, radish, enggau chukop macham bungai. Radish tau udah diambi. Pun tomato udah bebuah. Pun entekai galak endar. Rindu meda buah iya ila! Pun jagung agi mit, apin lama udah ditanam.

Ma lemai hari rindu endar dudok ba moa rumah berati ka utai ditanam laban hari agi terang jam pukul lapan lemai. Hari pen enda angat. Aku bisi ngasoh Doug meli ka aku kerusi malas awak ka bisi alai releks maya lemai hari! Heheh. Tau macha bup tauka ninga muzik ba luar rumah dia.

Naka tu aja cherita sekali tu.

Selamat Betunang

(Gambar diambi ari blog Cuthess)

Selamat betunang nuju Catherine aka Cuthess, ari Bintangor, enggau "Bear" ari Canada. Ngajih ka saduai selamat nuju pengawa enggau pengerami melah pinang. Anang enda madah ma hari nya udah datai ila. Anang mina nyebut "ka tukar status enda lama agi"!