Fish Taco

Lemai tu tadi kami menyanak bisi nurun ngagai Parents Orientation ba sekula bala anak. Hari dua minggu nyin ila, berengkah meh sekula taun 2010/2011 bala sida anak. Sinu ga aku ngenang laban mina setengah ari sida sekelas bisi nyambung pelajar ba sekula nya. Sekula nya sekula pribit (Christian school) alu kiraka mar meh enti dibanding enggau sekula perintah ti enda bebayar.

Sepemulai kami ari sekula, kami alu ngetu makai ba restoran Mexico. Aku mina makai sekeping pizza sebedau kami mupuk ke sekula, agi lapar meh asai perut. Nya ti nganjung diri makai taco ikan. Aku enda entu minat iga makai pemakai ari Mexico. Sida fish taco nya ka ga aku laban aku sigi rindu makai ikan.

Dua tiga hari tu tak lembau endar asai ka berapi. Makai pizza, makai mee segera, makai sandwich telu ... Buring amat! Pagila nurun ke pasar minggu ngiga utai ti dikedeka nyawa!

Model Semadi Nadai

Semadi dipadah iya tau nepan basikal enggau niki pun kayu nya baru orang ka nyadi model! Tang nya meh, enti diasuh nepan basikal, nadai nemu jenuh ga orang. Mayuh ti enda menyana gambar!



Aku bisi diberi entua indu aku manual 50mm Pentax lens. Nya dikena ngambar model lemai kemari. Niece aku ka meda gambar diambi ngena lens lama tu. Tau dikenyadi ga lens tu, mina pedis di focus laban semua main manual!




Ditu orang udah nurun ari pun kayu. Nya pen, nyu nganti orang udah kating kating tunsang ba dan kayu nya baru tau ngambar.

Tu meh gamal model semadi nadai! Tau endar dikenyadi!

Roti Sardin

Tu meh breakfast aku pagi tadi. Roti canai (buatan Malaysia) ulih meli ari supermarket, nya ti ngasuh nyamai amat enti tenguk ke roti canai. Tiga hari beturut turut aku makai roti canai enggau kari manuk laban ti bisi manduk kari kutai. Nyu enggai ga nyawa makai kari agi tang agi ka makai roti canai!


Tembu makai roti canai aku alu mai kupi pansut duduk ba luar sambil ninga radio enggau ngintai indu tawir tauka burung hummingbird. Hummingbird mina sekali aja nyenguk lebuh aku betitihka indu kesulai siku tu. Kepuas kesulai tu nutu bunga morning glory iya alu terbai ke bukai. Kitai ti agi belala ngambar iya!


Indu tawir ti bajik (bechurak gadung enggau biru) enggai endar inggap. Mina bansa siti tu aja ti ka inggap ba daun layu alu enda ibuh ke kitai. Nya meh digambar laban ti sigi rindu ngambar indu utai!

Nya meh sahari tu aku ngining macro lens ngambika utai digambar semak agi dipeda. Aisey, nganti bisi budget dulu!

Gambar Hari Empat

Hari sahari tu enda ngangat hari kemari. Angin tasik bisi endar disepi muput sahari tu. Nya kebuah hari enda angat iga. Nitih ke ramalan cuaca ujung minggu tu lagi nyamai amat hari, asaika ukai musim panas.


Meda hari enda angat iga sahari tu, aku alu duduk ba luar pagi tadi ngemata sida indu kesulai enggau indu tawir ti bisi terbai sebelah kebun bunga. Indu tawir ke bechurak gadung tu enggai endar inggap, alu enti inggap nyu belalai ba daun pun gladiola. Bajik endar gamal indu tawir siku tu peda aku!


Bansa siti tu baru ka endar inggap ba daun gladiola ti udah layu. Nya ti ngasuh iya nyamai amat digambar. Maya musim panas mayuh endar indu utai mit mit terbai sebelah tanah. Nya ke nyadi pemakai indu tawir. Taun dulu asaika nadai aku meda sida indu tawir ngemayuh nya terbai sebelah tanah aku ditu. Rindu endar aku ngemata sereta ngambar sida!

Naka tu aja cherita semadi nadai aku sekali tu!

Daun Ubi

Anang jeles, Lyana, meda aku bisi tetemuka daun ubi!

Pagi tadi kami tiga menyanak ngelaban hari angat nurun ke pasar. Minggu nyin tadi laban ti mindah, nadai sempat nurun ke pasar minggu. Nya meh aku nagang diri meli sida sayur. Bansa sayur ti dibeli ukai bansa ti tan disimpan dalam peti ais. Enggai enda dipanduk dalam sahari dua ga nya!

Gaga amat aku meda daun ubi pagi tadi. Agi tingat ke daun ubi enggau upa kechala ti dipanduk ipar aku kutai! Kelimpah ari daun ubi, aku bisi mega meli kantuk peria enggau kangkung. Sigi sayur dikerindu aku magang!

Akai, mayuh macham buah dijual maya musim panas tu! Aku mina meli buah cantaloupe enggau nectarine. Berat dibinching! Udah ga hari angat!

Ninga bala pangan ke diau di Houston nyerita pasal sida ti bulih cangkuk manis, bekareh meh aku ngiga tadi. Amat nadai kala meda cangkuk manis dijual ditu aku. Nya aku ngumbai sida ti datai ari menua China, Vietnam, Laos, Philippines tauka Thailand enda nemu makai cangkuk manis. Tang kati ku tau bisi di Houston deh? Dibeli ari kedai china Hong Kong, ku sida.

Arapka dudi ila bisi meh orang nanam enggau nyual sayur nya!

Angat!

Apu, balat ga pengangat hari kami sahari tu! Enda aku berani pansut! Endang ari kemari hari kami ditu udah angat tang ninjik ga mina tiga hari aja hari ngangat tu enti nitih ke ramalan cuaca. Nadai kitai tan pen enti hari hari utai ngangat baka tu!


Taja hari angat dipeda, tang enda sehari hari ngangat tu. Tumu pagi chelap hari. Pia mega lebuh malam hari. Nya meh pagi tadi aku duduk ba luar ngipa burung hummingbird enggau indu tawir. Nigrup kupi sambil ninga radio meh aku ti duduk ba luar pagi tadi. Udah hari mupuk angat sepi aku, tama aku ke dalam rumah.


Rindu diri ga aku ti duduk ba luar laban burung hummingbird ti nutu bunga morning glory aku pagi tadi tak enda entu ibuh ke aku. Nya meh sempat endar aku ngambar iya.

Indu tawir mayuh terbai tang jarang inggap. Siku tu enggai ga inggap ba sida daun ti menyana agi dipeda. Enggai enda inggap ba tiang besi! Baka ti be-gymnastic iya nya!

Ma hari udah mupuk chelap lemai tu lagi, duduk baru aku ba luar. Kiraka lindung patio kami nya laban bisi pun eucalyptus ti ngelindung. Maya musim panas tu mata panas padam kiraka udah lalu pukul 7.30 lemai. Panjai meh siang kami maya dia taun.

Bah, nadai entu cherita ti ditusui ditu. Naka tu aja dulu!

Kebun Bunga 2010

Dua tiga hari tu gaga amat aku meda sepun ari bunga gladiola aku benung bebunga. Maya aku ke mupuk nemuai ke menua ujung bulan lima kutai, bunga pun gladiola apin ngembai. Rugi amat asai aku enda ulih meda kebun aku penuh laban bunga gladiola.


Tu meh gamal kebun bunga aku lebuh aku ke pulai ari kemisi tengan bulan tu tadi. Repa sereta nadai meda bunga gladiola siti. Mina bekau iya aja ke agi tinggal. Nya meh aku tekenyit meda sepun tak nyumbuk bunga alu dua tiga hari tu pansut bunga. Bakaka sinu ke aku! Sepun dipeda aku bebunga pama meh! Enda ga punik!

Sida bunga morning glory enda ibuh sebut agi. Nyu melit pagar enggau pun bunga bukai ke dia. Puas endar muai nya ila! Meda sida bunga sigi rindu tang mantun rumput, muai iya ke udah mati - akai, lembau amat asai tulang!

Cherita Semadi Nadai Hari Enam

Pun minggu tu tadi kami menyanak nemuai 3 malam ngagai entua aku. Ngelama tu, kami enda bemalam ba sida enti kami nemuai kin laban ti bisi endur diri empu ba Los Osos tang sekali tu kami bemalam ba rumah sida laban ti bisi penanggul ba Los Osos din.

Nya meh rindu amat aku meda pengalak kebun bunga entua aku maya musim panas tu. Ni iya munyi burung ti ngemayuh nya ga dia. Mayau kami (dibai tudah iya) rindang diri besegau sebelah kebun ngipa sida burung.



Dua pagi aku tumu pansut mai kamera laban ti ka ngipa burung hummingbird. Akai, amat rindu diri meh aku betitih ke burung tu! Sekeda gambar burung tu tau dipeda kita ba blog gambar aku ditu.

Bah, naka tu aja cherita sekali tu. Sida perengka ti dibai pulai ari menua tu tadi apin abis dikemas!

Buah Entekai

"Udah mansau buah entekai kitai nya?" ku aku nanya Doug. "Kati kitai nemu buah nya udah mansau?"

"Enti udah kuning, mansau meh nya," ku iya. Nyau meh aku ngambi dua igi buah entekai ti endang kuning amat peda aku. Dua pun entekai ditanam iya taun tu, ditanam dalam pasu. Taun tu iya endang sengaja milih bansa entekai ti mit, alu endang bansa ti kena ngaga lauk.

Lebuh aku mela entekai, meda tak agi gadung senentang kulit iya. Heheh, reti nya apin entu mansau meh entekai nya tadi! Meda nya bakanya, digalau dulu ga sigi ari buah ti diambi aku nya.

Taja buah entekai nya apin entu mansau iga iya endang udah tau dipanduk. Nya meh lauk kami demalam alu lauk buah entekai nya diembal enggau babi panggang. Lapa deh, laju meh perahu!

Hummingbird

Rindu amat aku nitih hummingbird ti rami amat ba kebun entua aku ditu. Iya ga sida enda entu takut meda mensia! Rindu amat aku meda background gambar siti tu laban ulih dipeda embun ba belakang. Tumu pagi aku pansut kemari mai kamera.


Ma siku udah inggap ba dan kayu, mansang nuan dia meh iya, enda terbai lari baka ti ditemu ba kebun aku di Galt din. Siga endar sida ba kebun aku. Ayung aku ba jendela deh enggai meda, alu terbai lari.


Kami menyanak ba rumah entua aku di Nipomo. Hari minggu kemari kami angkat laban Doug bisi nyadi saksi ba case makhamah ditu. Pagila (hari tiga) pulai kami. Lelak endar ga asai tubuh dibai mindah laban ti agi jetlag.

Taja diatu musim panas, ba menua Nipomo asaika ukai musim panas. Pagi hari tebal embun. Lemai hari bakanya ga. Ku jaku lemai kemari ka bejalai ngagai tebing tasik ngambar mata panas padam - ni mata panas bisi dipeda laban embun!

Bah, naka tu aja dulu!

Picnic

Au, enggau orang picnic meh kami tengah hari tu tadi. Tang siti gambar orang ti bepicnic nadai meh ngambi!

Endang tiap taun company sida Doug ngatur picnic ke bala pekerja sida alu tikit mina $2 aja ke tiap iku orang ti ka enggau. Sereta datai ba Rancho Seco Park, kami ngiga alai duduk, udah nya alu enggau orang bebaris ngambi pemakai - hot dog, hamburgers, tri-tip sandwiches, potato chips, nachos, ice cream, beer ...

Hari udah lalu pukul 12.00 ngalih hari, engkeriuk meh perut. Engka nya kebuah enda terunding ngambar utai enggau orang ti bisi dia.
Iya ke bendar aku mina bisi ati ka ngambar biew dia. Taun nyin kutai simbing gambar cooling towers tu diambi aku. Sekali tu berati meh aku enggaika simbing baru gambar diambi.


Mayuh endar indu tawir bechurak biru terbai ngimbai ai ba park dia. Aku nadai mai telephoto lens, nyu tepaksa aku lubah lubah mansang ngagai indu tawir enggaika iya terbai lari. Rindu amat aku meda indu tawir nya dia! Bisi hari aku kin baru ila.

Kami menyanak enda lama ba picnic - kiraka dua jam aja. Mata bala ngantuk laban enda entu tinduk demalam. Mayuh macham raffle drawings enggau Bingo games tang laban ti enda ulih lama dia, nadai meh kami enggau main utai nya. Ku jaku angan angan menang raffle.

Enda lama udah datai di rumah bala alu tinduk - jetlag.

KLIA Jungle Boardwalk

Kami menyanak bisi bejalai ba KLIA Jungle Boardwalk, semadi ti nganti jam chukup nganjung diri ngagai gate alai bilun ti angkat.

Taun nyin kemari, aku nadai berati pasal Boardwalk tu - enda ingat enti utai nya endang udah bisi tauka enda.


Meda diri ti endang udah nemu ngambar ai terjun ngena slow shutter speed, bekareh meh aku ngambar ai terjun gaga ba utan KLIA. Kamera dipanggai atas pagar titi ti alai bejalai, enti enda enda menyana gambar. Tripod udah masuk dalam beg ti dicheck-in, ni nya bisi dikena agi!


Asaika meda ai terjun ba utan di Lambir din lebuhka meda ai terjun tu. Tau endar dikenyadi utan ba KLIA tu!

Raun ke Putra Jaya

Lemai kemari kami bisi dibai sida Margaret menyanak ke Putra Jaya. Menua nya endang selalu dipansa ma ka ke KL ari KLIA tang nadai kala ngetu dia. Baru iya meh kami menyanak nya meda menua dia.


Tu gambar Palace of Justice. Manah amat gamal bangunan nya peda aku. Kiraka rami orang dia lemai kemari laban bisi konvokesyen enda jauh ari nya alu rami orang ke begambar ba dia.


Tu ba taman Masjid ba Putra Jaya dia. Kebuah ke Putra Jaya lemai hari ngambika aku ulih pritis ngambar utai ngena "low light". Rindu meda gambar bala geng ti udah ngambar utai di menua nya dia alu aku ka mega nguji!


Tu Masjid ba Putra Jaya. Rindu ngambar iya lemai hari. Bala ti sembiang sembiang, bala ti raun raun ga sebelah taman nya dia.


My favourite shot of the evening! Enggai enda petang hari baru tampak api ba jematan tu. Laban ti nganti hari ti petang ti ngasuh kami laun datai ba rumah sida Margaret ba Bandar Utama. Lauk nyu chelap enggau nyu lapar diri bala Margaret ti nganti kami datai! Kasih bala laban aku ti ngeringak ngambar biew!

Udah ngalih hari hari tiga tu lagi baru kami menyanak angkat pulai ke California.

Hari Ini Dalam Sejarah

Sahari tu genap sebelas taun kami duai Doug udah jadi melaki bini. Rindu ga meda gambar ba album ti bisi ba rumah apai indai aku ditu. Enda beresai, taun beganti taun, bala anak mansang besai, pala majak buban enggau lalak (sekeda!) tang enti kami duai nanya pangan diri,
"Will you do it all over again?", saut iya tetap "Yes!"

Happy Anniversary, Sweetie!

Taman Buaya Miri

Tengah hari tadi kami menyanak bisi ngagai Taman Buaya Miri ba Kuala Baram. Endang tiap taun besebut ka kin alu ga enda, nya meh kemari enda irau ke hari benung panas terit mupuk meh kami menyanak.

Amat mayuh ga baya nya dia, alu gemuk endar gamal sida. Nangi endar aku lebuh kami ke bejalai ba titi atas pegong baya. Nangi ka titi nya runtuh .... tak nganti rangap rangap baya!

Ukai semina baya aja bisi dia - burung enggau jelu bukai bisi meh - kiraka mini zoo meh taman nya. Rindu bala anak meda sida burung achang, burung tiong, sida kera, kijang, beruang ...


Aku rindu diri meda bunga lotus, rindu ngambar. Tang sayau amat laban ukai musim iya bebunga lebat.


Ngambar sida indu tawir enda ibuh disebut. Endang ditith sida indu tawir ngambika bisi digambar! Indu tawir endang bisi tang enda ngemayuh dipeda ba Borneo Rainforest Resort kutai.

Hari ngumba endar ga, nyu ka ninting hari ujan. Nyu nadai agi hari alai mindah laban hari minggu tu lagi mupuk kami menyanak.