Selamat Taun Baru

Ngajih ka kita bulih berkat, pengerai enggau umur panjai dalam taun baru tu.

Selamat taun baru!

Selamat Hari Krismas

Siko anak mit udah ada ka kitai!
Siko anak lelaki udah diberi ka kitai
Lalu iya deka dikumbai "Pengajar Sidi"
"Allah Taala ti Pemadu Bekuasa"
"Apai ti meruan belama,"
"Raja Pemaik."

Isaiah 9:6


Selamat ngintu Hari Krismas
alu ngajih ka kita bulih berkat enggau pemaik
dalam daun 2008.

Ari kami sebilik,

Puteri, Doug, Denice & Duncan

Selamat Hari Krismas

Sekeda gambar diambi malam hari lima sebedau kami mupok ka Christmas concert sekula sida Denice enggau Duncan.

Siti ari gambar tu deka dikena kami ngaga Christmas card. Kami alu apin ngirum Christmas card ngagai orang taja udah belaboh nerima ari kaban belayan enggau ari pangan semak.








Duncan mina ulih ngetat diri digambar enda lama. Udah nya enggai agi, merengut moa, bekachau ka Denice maya kitai ti ka ngambar iya. Abis nadai terang gambar diambi laban ka enda ulih jenoh!

Christmas Concert

Denice saduai Tara.

Duncan, Denice enggau Gavin. Ko Denice, "I want to marry Duncan and Gavin."


Amat enda puas ati aku. Nadai manah siti gambar diambi maya concert. Kelalu jauh.

Duncan enda nemu leka lagu tang enggai enda enggau orang belagu. Rauh rauh ngapa meh iya dia! Enda panjai concert nya, mina 15 minit aja. Hehe, mina bala apai indai, bala aki ini, enggau bala menyadi aja ti meda. Bendar ga bala apai indai ngambi video enggau ngambi gambar bala anembiak ti bediri ba pentas din.

Taja concert nya enda panjai, rindu endar ga meda sida anembiak.

Happy Thanksgiving

Tu iya manok kulok! Taja puchat mimit gamal tang udah mansau endar, crispy ka kulit iya!

Ubi randau, tomato, bawang besai, enggau carrot dipandok ngena "minyak" (drippings) ti laboh ari manok kulok.

Oysters baru pansut ari oven! Sedap!

Tu meh famili aku.

Gamal utai dempa.

Pumpkin Pie, ulih meli. Kiroh ngaga.

Aie, enda ingat ngambar asparagus enggau green beans. Potato casserole pen kena tinggal! Cameraman kelalu lapar, ni enda pukul 2.00 pm baru berengkah makai. :-)

Happy Thanksgiving!

P.S. Ditu alai recipe manggang manok kulok. Ka kita ka udah enda makai janik agi tau ditukar enggau beef bacon kah ... :-)

Salad bayam

Salad anak bayam bechampur manok panggang

Sapa rindu makai salad? Aku kira ka diatu ti nemu makai salad. Kelia ma orang ka meri aku salad, ko aku, "Ukai aku tu kambing. Ni nemu kenyang makai salad!" Heheh.

Diatu aku nemu makai salad. Salad dikerindu aku iya nya salad bayam (baby spinach). Hari minggu nyin kemari aku bisi ngaga salad bayam, semangkuk besai, dibai ka pot luck. Tang laban ti kelalu mayoh utai dempa, salad aku enda sempat dibantai, alu nadai ditegu meh salad nya. Bai pulai baru.

Nya hari satu enggau hari dua kami duai Doug bendar makai salad bayam. Salad bayam tu dichampur aku enggau buah limau manis enggau leka bunga matahari (sunflower seeds). Dressing dikerindu aku iya nya Ranch Dressing. Enti mina salad sayur aja sigi enda entu kenyang, nya kebuah aku bisi nyampur kerat manuk (baked chicken breasts).

Dada manuk dipanggang aku enggau Cream of Mushroom soup. Nadai beleman. Manuk nya pen teda lauk dibai aku ka potluck malam hari minggu ti ko aku nya. :-) Kenyang ga makai salad bayam bechampur manuk, eh!

Ni kita enda ka nguji?

Salji

Benjamin Ujang madah diri iya jakun laban ti enda kala meda salji. Ni baka salji kah, ko iya nanya aku. Baka ais dalam peti ais kah? Heheh.

Aku keterubah iya meda salji pen baka jakun! Ba menoa Peranchis din keterubah iya aku meda salji turun ari langit. Bendar aku berati ka leka salji ti inggap ba jendela bilik alai aku diau. Maya nya aku bisi nemuai ngagai petunggal aku ti diau ba menoa Peranchis din. Iya belaki orang bansa Peranchis.

Tu sekeda gambar salji diambi aku ari snowcrystals.com Tu meh gamal salji enti iya turun baka kapas ari langit. Enti salji kelalu lebat nyau enda entu peda shape iya. Enti ka nemu kati iya tau nyadi shape baka nya bacha ditu. Aku enda nemu nyalin jako nya dalam jako Iban! Kelalu complicated! Haha, nadai kala belajar science ngena jako Iban!





No two snowflakes are the same. Kati ko iya tau nadai sebaka? Tiap iti snowflake ti laboh endang nadai bisi sebaka. Nya meh kitai meda pemesai Tuhan ti ngaga dunya! Puji Tuhan!

Pagi Tadi

Ansa bemain dalam embun. Aku berati ka bulu sida ansa. Nyau tebal agi diatu, laban musim chelap ka datai.

Simpang depan rumah kami. Nadai entu peda rumah orang seberai jalai kami.

Embun pagi tadi tebal agi ari enggi kemari. Sama simpang digambar aku kemari.

Gamal Hari Sahari Tu

Pagi tu tadi bisi embun. Tu gamal simpang enda jauh ari rumah kami. Ko Duncan, "Mommy we can't see anything." Of course we can! Mina unlih meda kira 200-300 meter, lebih ari nya enda tampak utai.

Tu jalai nuju sekula sida Duncan. Embun enda tebal ba samoa tempat.

Tu parking lot ba gereja/sekula alai sida Duncan belajar. Udah aku ka nganjong Duncan saduai Denice, aku alu ka pasar. Pangan aku indu ari Thailand enggau aku ke pasar sekali tu. Kami duai endang udah besemaya ka ke pasar sahari tu.

Chelap endar ga asai iya laban kami duai sama enda ngena jacket tebal agi. Kadang kadang asai ka moa kena tempias ujan. Penebal asai embun ba moa.

Nadai mayoh utai beli aku sekali tu, mina meli kacang tanah, sayur bunga, buah persimmon, enggau jujube. Kala kita ninga pasal buah jujube? Gamal iya baka epal, tang isi iya baka jambu ai. Asai iya enda ga baka jambu ai, manis agi, enda kelat.

Kacang tanah manah dempa ko sida researchers. Iya bisi ngundan phytochemicals ti manah kena nyaga cell ari penyakit kanser, kencing manis, enggau penyakit jantung.

Lemai tu tadi Duncan berebut enggau aku makai kacang tanah rebus. Nah, enti udah munyi nya, aram kitai sama sama makai kacang rebus!

Sardine Puff

Aku tengok meda sardine roll ka dempa Pat pagi kemari. Pagi tu tadi aku alu ka supermarket ngiga perengka ti tau dikena aku ngaga sardine roll. Nadai nemu utai ti tau dikena ngaga roll enti enda mungkal ngaga kediri. Aku enggai ngaga pastry ka diri empu laban enda entu nemu.

Ba supermarket kami ditu bisi dijual pie crust (kulit pie), udah digaga, mina nganti ngena ngaga pie aja. Nya dibeli aku pagi tu tadi kena ngaga kulit sardine puff.

Dua keping pie crust dalam kutak tu. Aku mina ngena sekeping, digunting mit, kena ngisi sardine.

Sardine dichampur enggau bawang enggau chabi disirap mit mit.

Pie crust udah di gunting enggau di-isi enggau sardine. Enda entu nemu ngadu manah tisi puff nya!

Nahhh! Enda boleh tahan gamal sardine puff nya? Atas puff nya disapu enggau teluk, ngambi ka tampak kuning mimit.

Tu meh sardine puff dempa aku pagi tadi. Tau dikenyadi eh! Pie crust nya "flaky". Err, enda nemu kati ko nyebut ngena jako Iban, sepur? Aku bisi ngiga recipe kena ngaga flaky pie crust. Ka aku nguji dudi ila.

Nama utai dempa kita pagi tu tadi?

Udog

Ni betul? Udog tauka ukoi? Heheh. Ko kami ukoi. Tang kadang kadang ka ga ngenduan bala bakih ti ngumbai ukoi udog.

Aku tepeda ukoi tu maya kami ka meda Farm Show bulan nyin tadi. Nadai memunyi tudah dudok baroh kaki orang ka empu iya. Balat ga ngenyai gamal ukoi tu, ko aku bejako dalam ati diri. Ngeli ayan, moa gamal ka ngerising.

Pelaba aku ba orang ka empu ukoi tu sigi sigat endar gamal anak ukoi iya. Orang putih sigi sayau amat ka jelu ka ditupi sida. Datai ka dibai tindok sama atas katil! Cheeessss! Nadai aku ka begulai enggau jelu tindok! Mina agi mit suba rindu bebai ka mayau tindok!

Enti kami bisi nupi ukoi dudi ila sigi diluar din meh alai iya diau. Tang tentu lah aku nyendia alai ka manah alai iya diau. Kasih tudah chelap maya musim chelap enti enda diberi langkau iya empu. Enggai aku ngasoh iya dempa nyamuk maya musim panas. Taja kami ditu nadai penyakit dengue tang kami bisi penyakit dikumbai West Nile virus, dibai nyamuk. Tau mati jelu enggau mensia enti kena gigit nyamuk ti bisi mai penyakit tu.

Mayau sigi enda ulih kami nupi. Doug allergic amat ka mayau. Ngasoh mata iya berai, idung beingus enggau engkasi, alu sendat seput.

Ni kala kita ninga tauka meda ba TV pasal World's Ugliest Dog Competition? Akai nya baru jai gamal ukoi ti dianjong betanding. Endang ka mutah meda gamal ukoi ti bulih lumor satu! Heheh.

Peda nuan nya? Enda ka mutah nuan meda ukoi ngenyai nya? Ka nuan merap ukoi gamal baka nya? Tak bisi kurap gamal isi iya! Pala baka ka bisi jambol. Sekeda ngeli nadai agi. Mata enda entu meda. Kasih tudah.

Naka tu aja cherita semadi nadai sekali tu! Bye bye.

Nadai Modal

Boring endar. Asai ka abis modal, nadai agi idea ka ditulis ditu. Modal abis dikena nulis blog jako orang putih. Anang enda kin kita ngabas utai ka ditulis aku ba blog siti nyin.

Sekali tu aku mina ka mantai ka sekeda gambar diambi aku maya kami ka ngagai sida entua aku apin lama tu tadi. Ka bala kita ka apin kala nemuai ka menoa kami ba California ditu tentu mayoh kita enda nemu menoa kami ditu tebal agi rangkai, nadai entu pun kayu asal enti enda ditanam mensia. Taja pia, tempat ka rangkai nya enti bisi ai lalu alai nya digaga ladang tauka alai betanam ka utai endang manah endar dipeda. Galak endar ga utai ditanam dia laban bisi ai dikena ngidup ka utai ditanam.

Kami nengah jalai bebukit (gambar atas), jalai nya mit lalu enggai enda bejimat maya nengah nya. Taja gamal bukit nya kuning enggau rangkai iya gadong serta manah dipeda maya musim chelap laban ujan bisi turun maya nya. Ba tempat bukai enti ukai desert maya musim chelap sida rumput mati laban chelap tang ba California rumput tumbuh!

Tang ba bukit tinggi din, bisi ujan, bisi salju, din gadong agi utai dipeda, galak agi utai tumbuh. Ba Yosemite National Park, ba Lake Tahoe, endang atas bukit tinggi din, manah amat pun kayu dipeda. Besai besai pun kayu din, alah pun kayu kitai di Malaysia.

Belah jalai ka ditengah kami maya ka ngagai sida entua aku endang rangkai magang, semadi meh nya ladang buah, ladang kapas, ladang anggur ... besai besai ladang nya, nyau rapas mata meda.

Tu siti ari winery (kebun/kilang anggur). Wine ari California sigi tebilang endar ba menoa kami ditu.

Diatu musin tomato, berapa buah enda trak ngangkut tomato dipansa kami.

Tu gamal bukit ba tanah sida entua aku. Nadai entu utai tumbuh dia. Sida entua aku enda diau ba tanah tu. Nadai nanam utai mega, mina bisi sida chapi, nya pen ukai enggi sida.


Tu gamal backyard sida entua aku. Sigi manah amat. Angan angan aku bisi backyard baka tu! Heheh, nadai duit kena ngaga iya manah baka tu! Endor rumah sida entua aku atas bukit mit (bluff) lalu view iya manah amat. Ba valley dibaroh din endang kebun - kebun sayur, kebun strawberry, kebun bunga. Rindu amat meda, tang ni enda pengelama iya kebun nya abis alu tanah nya dijual kena alai ngaga rumah? Sinu ngenang nya. Mina meda perabong rumah orang meh nya ila.

Naka tu aja sekali tu aku mai kita raun meda menoa kami ditu. Ila raun baru!

Enda Ingat

Kemari aku bisi nulis pasal ngiga chara meda TV ari Malaysia. Laban ka lama udah enda meda, nyau enda ingat aku pasal TV RTM 1 & 2 endang ulih dipeda ba internet. Kebuah aku enda ingat laban suba maya aku ka meda, selalu enda ulih sampai abis. Server busy lah, connection lubah lah .. nyau enggai agi nguji.

Enda nemu nama kebuah tengah hari tu tadi aku tak ingat pasal livestream TV 1 & 2 ba internet. Engka laban aku benong ninga radio Iban tumu pagi ari Sarawak! Lelengau meh nya ka ninga radio enggau meda TV ari menoa!

Sempat meda berita ari Selamat Pagi Malaysia aku sahari tu. Lelengau endar asai ati aku sahari tu! ;-(

Hari Raya tu lagi anang enda enggau meda program hiburan ba TV. Aku sigi rindu meda program hiburan ba TV Malaysia tauka ba Astro. Indai aku enggau aku meda maya aku bisi di Miri ujung taun tu tadi. Apai aku aja nyadi spoiler laban ti ka meda berita tauka bala anak ti enda tau enda meda Disney Channel!

Bisi siti agi tempat aku enda tingat ka bisi alai tau meda TV ari Asia. Aku baru udah ngabas tang TV3 alu bedau ulih dipeda ba tempat nya. TV Indonesia enggau China bisi ulih dipeda. Tang enda free, enggai enda bebayar. Enda berapa! :-(

Radio Iban

Lama endar aku nadai ninga radio Iban. Ukai enggai ninga, enda ulih ninga. Tiap kali aku click ba link, enggai buka link nya. Bisi lah hal pasal "error with external application" .. utai munyi nya. Ngelama tu aku ulih ninga radio Iban enti aku ngena Winamp. Tang enda nemu kebuah iya tak enggai agi bemain ba Winamp ti udah di-install ba laptop aku. Bisi berapa bulan aku nadai ninga radio Iban.

Lemai tu tadi aku bisi download baru Winamp ngagai desktop computer aku ka baru. Nyau ulih ngiga dulu ba Shoutcast Radio baru bisi bulih stisin radio Iban. Amat lelengau endar ka ninga lagu enggau berita ari menoa asal. :-)



Diatu aku benung ninga program Iban tengah hari hari enam. Speaker ti disambung ba computer tu aja ti enda entu berapa. Munyi lagu ti pansut ari speaker nya tau dikumbai semadi nadai. :-) Nganti aku meli baru ila. Tadi aku shopping nadai tingat pasal speaker. Bepedaka TV flat panel! Enti enda tegal Duncan tekemik ba tanjut endang bisi dibai pulai TV nya tadi! Tudah Duncan enda sempat ke jamban, nyau tekemik ba tanjut. Kelalu lama ditat nyau enda ulih ditat agi.

Aku agi ngiga chara ka meda TV ari Malaysia. Suba aku bisi besebut pasal parabola. Entua aku bisi ka meri enggi iya tang maya kami ka bisi ngagai sida apin lama tu tadi, aku nadai tingat ke nya. Tambah mega kami enda ulih mai iya pulai ngena mini van kami. Enti kami ngena pick up truck kami nya baru ulih mai iya.

Lagu sha la la, sha la la gaga ati, sha la la la oh sulu ... ah nya munyi leka lagu ditebah radio Iban!

Angus!

Ahhh, tu penyadi roti (garlic bread) enti kelalu gian nunga computer! Asai ka enda lama aku dudok nunga computer, udah nya ngabas roti dalam oven. Aku mina ka ngangat ka roti nya tang engka oven nya kelalu angat.

Issh, nadai aku muai roti nya. Kikis aja ka chelum udah nya tau diempa! Kekeke. Nyamai diempa pagi hari enggau jus!

Kurang endar aku update blog tu. Aku tepaksa concentrate ba blog siti nyin laban mayoh paid post ditulis. Paid post mesti diselang seli enggau personal post. Tambah mega, aku nguji improve Google Page Rank blog nyin. Enti page rank aku tinggi, mayoh agi peluang paid post ti tau ditulis aku. Enda samoa paid post ti bisi dia tau diambi aku. Tiap iti paid post nya nitih ka criteria ti diletak pengiklan.

Diatu tiap iti post ditulis aku terus di auto approve. Reti nya tulisan aku tu kira manah. :-) Bersemangat laban nya! Aku enda teranti blog aku siti da agi Puteri's Musings 2 , chukop tiga bulan awak ka aku ulih submit blog nya. Dua iti blog, reti nya mayoh agi post ulih ditulis, mayoh agi ka duit diulih! Hahaha.