Gamal Hari

Enti udah nadai cherita bukai ka dikunsi ditu, cherita pasal hari dibantai!

Tu meh gamal hari kami di Galt pun minggu tu. Nyu irau aku meda pengangat hari. Kada bisi dipanjah sida bunga? Kati mayau ke ditinggal ba luar lebuh Doug ke kerja?

Ku Doug, sprinkler udah dipasang - tiap dua hari iya menyadi ke diri - dipasang otomatik. Mayau, nadai ku enggau laban iya sigi ka diluar din.

Munyi ku pangan aku ke diau di Houston din - nadai kitai di Malaysia kala hari ngangat ba menua kami din lebuh musim panas! Endang ukai utai alai diau enti nadai air-con ba rumah. Tang nindik ka enda hari-hari hari ti bisi ngangat datai 40°C tauka tinggi ari nya. Enti nya ba desert, enda ibuh sebut laban nama udah desert!

Naka tu aja dulu!

Meli Bup

Pagi tadi kami tiga menyanak bisi suping ba Belle's Bookshop. Udah aku tetemuka bup Matematik ti tau dikena bala anak pritis, aku alu ngiga bup pasal menua Sarawak. Dia aku tetemuka bup dua iti tu.

Keterubah iya bup Iban dikumbai Iban Pegai Rajah Brooke, bup dikarang Nalong anak Buda saduai Johnny anak Chuat. Kebuah aku milih bup tu laban iya ngena jaku Iban - bisi ga bup ti tau dikena aku nambah penemu aku pasal nulis ngena jaku Iban, sereta mega tau dikena aku nambah penemu aku pasal bansa kitai Iban lebuhka dipegai perintah Rajah Brooke.

Bup kedua iya nya bup dikumbai Rentap - Warrior, Legend and Enigma, dikarang James Ritchie saduai Edmund Langgu anak Saga. Sapa kitai Iban enda kala ninga nama Rentap? Pelaba aku nyu ka semua kitai Iban nemu nama Rentap, tang enti ditanya lebih pasal pengidup enggau pendiau Rentap, nadai mayuh kitai nemu iga pasal utai nya. Nya kebuah aku meli bup tu sahari tu. Bup nya enda entu pedis iga dibacha, not heavy reading enti disalin ngagai jaku ribai!

Amat jerita ba bup nya pasal sejarah Rentap, tang bup nya bisi ngundan gambar, alu jerita siti siti enda entu panjai iga. Enti nya heavy reading nyu lembau ga asai ti ka macha iya!

Naka tu aja cherita sekali tu!

Miri City Fan

Kemari udahka badu bemain ba kulam renung, kami tiga menyanak alu bejalai ba Miri City Fan. Mata panas benung manchar amat pansut ari lindung awan. Nya meh bala anak madah diri angat alu kumplen pasal beg perengka mandi ti berat.


Aku ti kiruh ngambar utai dia, enda peduli pasal anak ti kumplen pasal beg saduai berat. Aku enda ga bisi ati nganjung perengka mandi ka dalam kerita dulu! Nyu di irit tudah beg. Nadai endar ga tulang!


Penudi iya aku bejalai ba Miri City Fan dua taun ka udah. Maya nya kawan aku enggau anak iya sama bisi kemisi pulai ka Miri ari Indiana. Kami duai sigi mai bala anak main ba kulam renang tang nadai buka kulam maya nya. Ku jaku buka pukul 1.00 lemai alu nadai ga orang datai muka kulam sahari nya! Semadi nganti kulam buka meh kami ti bejalai ba Miri City Fan.


Rindu diri meh aku ngambar sekeda utai sebelah Miri City Fan. Enti enda pasal hari angat sigi ka lama agi bejalai sebelah dia.


Dudi ila, nganti hari nyu udah lemai baru bejalai dia, enda tak ngelaban panas bisa! Taja hari bemua kemari pama endar ga pengangat hari sepi aku!

Sahari tu nyamai amat asai hari lebuhka duduk ba patio nulis blog tu! Bisi angin alu enda angat asai iya!

Mandi 2

Sekali tu aku enda masau jam mina ngemata bala anak bemain dalam kulam mandi. Enda ka nyamai kitai alu ulih beblog sambil ngemata ka bala anak mandi?


Hari sahari tu bemua, amat nyamai alai bemain ba kulam renang laban mata panas enda bisa. Mina hari ti humid aja ti enda ulih dikelari. Udah ga isi sigi ti ka endar angat - biasa lah ma umur udah manggai baka enggi aku tu!

Ma bala kita bisi hari, datai lah nyemerai ba kulam renang di Miri ditu. Kami tiga menyanak endang bisi ditu pagi hari dua enggau hari empat.

Ukui enggau Mayau

Anak ukui dua iku, mayau lima iku - nya meh penyampau jelu ditupik apai enggau indai aku.

Enti aku bejalai sebelah kebun bunga indai aku ngambar sida bunga enggau kesulai enda tau enda bejimat enggaika ngindik tai ukui enggau mayau! Nyu nyadi jamban sida jelu sebelah kebun nya!

Dia kitai nyerungkung ngambar kesulai tak ngesuh bau tai - pei, nyu berimbai enggau tai sida ukui deh kitai ti ngeringik ngambar utai dia!

Tiap kali aku pansut ari rumah, beterudus bala mayau ngumbai aku tu mai pemakai. Meda nya aku nikal bala sida laban sida nemu ukai aku ti meri sida makai. Isssh, anak mensia siku nya nadai mai pemakai siku tu, kada enda nya runding sida lebuhka meda aku!

Bah, semadi nadai cherita meh tu!

Mandi

Bala anak endang ari sida ka baru datai udah minta bai ka kulam renang. Aku enggai laban bala nembiak sekula agi kemisi maya nya. Enggai enggau orang begelut ba kulam renang!

Pagi tadi udahka nganjung aki ini saduai ka Miri Dialysis Centre kami tiga alu ngagai kulam renang. Nadai nembiak bukai dia, mina saduai aja. Nyamai amat bakanya!

Bisi 10 minit kini, Denice mina bejalai kin kitu dalam kulam nya labanka agi takut. Nyu udah dipegai aku jari ari tisi kulam, alu ngasuh iya melepung nya baru iya berani mimit. Ni nya ga tenggelam, pelepuk endang meruan ba lengan sepiak sepiak! Ngetu ba kedai dulu meh kami meli sida pelepuk awakka bisi dikena maya mandi ba kulam sebedau ka kulam pagi tadi.

Enggai pulai pulai saduai. Ku aku, pagila meh nurun baru. Endang buka hari hari ga kulam nya, mina hari satu aja tutup. Tang enti hari enam enggau hari minggu sigi enda aku mai saduai kia, kelalu mayuh orang!

Aku empu sigi nadai dianjung terjun ka dalam kulam renang. Lembau ngenang bok balut chlorine, tambah mega sigi enggai ngelaban panas! Enti ngenang pengangat tubuh, sigi ka meh asai berendam. :-)

Ni bala kita bisi nganjung diri berendam ba kulam renang maya hari angat tu?

Bok Tusut

Tu meh gamal dua iku petunggal Denice ti nguji ningkil ka sugu bok ti dibelit Duncan ba bok Denice. Nya meh upah kitai ka ngenat adik diri nyetail bok kitai! Tak apin lama kami datai ba rumah petunggal, udah nya siku ari petunggal alu madah bisi sugu kating kating ba bok Denice! Engka maya meda sugu, dia Duncan alu betukang!

Nasib ga petunggal siku nya sanggup nguji ngelepas ka bok Denice ti tusut bebelit ba sugu. Amat sabar endar siku nya! Ukai enda agi bok ti tusut ba sugu!

Buntak

Geli ati diri aku meda mua buntak ka digambar aku pagi tadi! Enti meda ngena leka mata aku empu sigi enda entu ulih meda mua buntak nya. Tang dipeda ari lens kamera, asaika meda mua monster dipeda aku ba wayang Clash of the Titans demalam!

Prugrim sahari tu

Tengah hari tadi kami tiga menyanak bisi ngundang Evenlyn makai ba Sau Pau. Kami tiga menyanak mina udah makai pagi, nya kebuah lebuhka datai ba Sau Pau perut pan nyu engkeriuk. Nadai meh ingat ngambar utai ka dipakai laban ti udah lapar amat. Udah abis utai diempa nya baru mansutka kamera!

Badu makai kami alu raun ba Court Mammoth ti sepiak Sau Pau. Agi belala meda utai dia, Duncan alu madah diri ka ka jamban. Jamban ba Court Mammoth sumbat magang, ni nya ulih dikena! Nyau ga ngagai Sau Pau, ngena jamban dia.

Udah chukup jam nya baru kami ka Miri Dialysis Centre ngambi apai enggau indai aku. Meda jam agi tumu, pansut kami empat ari kerita alu bediri baruh pun cheri semak car park dia. Rugi amat, tak nadai siti buah cheri mansau! Agi mit kelia, rindu amat niki pun cheri!


Sempat meh ngambar bunga cheri, enggau kesulai ti nutu bunga babas semak pun cheri nya tadi. Aku mina mai kamera point and shoot lama aku - agi tau dikenyadi kena ngambar utai close-up!

Naka tu aja cherita sekali tu!

Nginti

Pagi tadi, baka selama aku nganti indai aku pulai ari market ba taman tisi sungai. Dia aku ngemata nembiak dua iku masang ginti saduai. Keterubah iya kelalu balat palung iya tali ginti. Nyu sangkut ba dan kayu!

Pama ga apin mupuk kami, meda ginti siku bulih ikan Lundu - nyu ka baka gamal ikan belukang gamal ikan nya. Amat tau endar bulih lauk enti kitai rajin begiga!

Makai Malam

Demalam aku bisi ngundang Pengajar Grace enggau pangan aku, Evelyn, makai malam ba restoran Citrus di Miri.

Sekumbang aku udah pulai mina sekali aja udah betemu enggau Evelyn, alu penudi iya aku betemu enggau Grace dua taun kutai ba rumah apai indai iya di Sarikei. Bisi endar insur Pengajar Grace! Nganti iya empu nyerita ba blog iya!

Sahari tu aku bisi mega ngundang saduai ngirup ba kedai kupi Sau Pau, tang saduai madah diri enda ulih laban bisi prugrim bukai. Enti munyi nya, dudi ila ga chia orang ngirup lemai!

** P.S. Aku nganti international blogger, Sebugey, ngundang aku makai pagi!

Kingfisher

Collared Kingfisher

Agi aku mit suba, selalu amat aku meda burung tu inggap ba sida tali karan. Maya nya suba, kami rindu amat nginti ba parit besai berimbai enggau rumah kami ba los Shell di Lutong. Ma ai pasang parit nya penuh alu sida ikan puyu mayuh amat ba parit nya. Ikan nya meh ka ditutu burung kingfisher.

Nya meh tu tadi rindu diri aku meda burung kingfisher inggap ba tali karan seberai rumah apai aku. Lemai nya aku meda iya baru inggap ba pun mango. Nya ka sempat digambar aku tu.

Biew ari patio

Tu meh gamal work-station aku ba patio rumah apai aku di Lutong ditu. Nyamai amat gawa nunga komputer baka hari sahari tu. Bisi endar angin muput alu enda angat asai iya. Tang enti hari udah angat sereta bekum asai iya nadai ku enggau. Tat aja laban dalam bilik ngangat nya ga asai iya.


Laban work-station tu tak nunga kebun bunga indai aku nyamai amat limpang ngambar utai ma udah meda sida kesulai, indu utai, bunga tauka burung ti bisi ngetu ba kebun bunga tu.


Dua tiga hari tu aku endang betitih ka kesulai ti bisi terbai sebelah kebun bunga. Rindu amat aku meda mayuh bansa kesulai ti bisi ngetu ba kebun bunga indai aku tu. Indu tawir (dragonfly) alu nadai bulih. Bisi siku ngetu ba dawai alai ngantung gari tang enda sempat aku focus kamera, iya alu terbai. Mayuh endar ga sida terbai atas ai ba parit besai tisi rumah apai aku tu. Geram diri aku meda!

Kami ka sakit mata, nyu mansang gerai ga penyakit nya. Agi mirah mata tang nadai agi pedis tauka pedi. Mata pan enda ga tak bangkung iga. Denice siku ti nadai enggau orang sakit mata. Kami ka bukai, peiiiii, amat enda berapa!

Nya aja cherita aku sekali tu!

Prugrim Bejait

Dua hari kami duai ipar udah numbuhka prujik nyait pua tampung seribu. Munyi ku aku kutai, ipar aku nya enda entu nemu bejait. Ka ketawa aku meda pengelubah iya nyait utai! Tang ku iya, hari kedua kami bejait laju mimit ga iya ari hari ti keterubah. Amat nya, lubah lubah meh laban kitai ti baru belajar.

Sahari tu ngetu ari bejait kami duai mipar laban aku ti bisi kena sakit mata. Nyu kembai mata sepiak, alu asaika enda entu meda mata nya. Ni nya ulih dibai bejait! Amat enda berapa endar ga laban kena jangkit sakit mata tu!

Sakit Mata

Begedi amat aku! Enggai enda enggau orang sakit mata!

Kemari, Duncan ti madah bisi asai utai ba mata, alu bendar meh iya ngusuk mata iya dataika mirah. Aku ngumbai kulit mata iya digigit nyamuk .. paduhal sakit mata! Pagi tadi, ipar aku ngerara tai mata ba tisi mata aku. Aieee, enda patut, indai aku enda ngerara lebuh ka betunga mua makai ba food court?!

Lebuhka nyermin diri alu beratika mata sepiak kanan, amat nyu mirah ga gamal tisi mata. Apu, sakit mata meh nya! Bisi aku macha tauka ninga rita pasal orang bisi sakit mata di menua tu. Kati ku tau kena? Orang ka enggau begulai nadai siku ti bisi sakit mata. Kami ka baru datai tu pulak mai penyakit!

Lemai tu tadi apai aku madah diri kena sakit mata lebuhka tama ka dalam kerita udah ti pulai ari dialysis centre. Akai, nya iya, tiga iku kami sebilik kena penyakit nya! Nyu ngetu dulu ba pharmacy meli ubat ka Duncan enggau ka apai aku.

Enggi aku udah dibeli tengah hari tadi. Limpang enda lama ari prugrim bejait enggau ipar aku. Nadai nyangkung Duncan laban meda mata iya pagi tadi tak pama agi ari kemari. Kepuas ka bemain enggau bala petunggal, meda kedua dua mata iya mirah. Nah, nyu majak penyakit iya nya! Titik aku ubat mata aku ba mata iya. Tang ku pharmacist ubat dikena ba anak mit enda sebaka enggau ka dikena orang besai tuai! Kapa nya deh, semadi ti nganti meli ubat ka iya empu! Nya ka meli baru lemai tu tadi.

Arapka bala kita selalu betuchi jari, anang bepegai ka lalau ba escalator lebuhka suping! Pelaba aku dia Duncan bulih penyakit iya! Iya ga nadai begulai enggau orang ti bisi sakit mata!

Bemain ba Tebing Tasik

Hari dua tu tadi, kami bisi ngagai tasik ba Batu Satu semak Lutong ditu. Gaga amat bala anak dibai ngagai tebing tasik. Betiki ka batu, begaga ka sand castle, bemain ba ai. Mina Duncan siku ti mandi ba ai mabu.

Batu Satu nya kiraka stesen bala orang ninggal ka kapal kena sida nurun mukat, enggau alai orang bejual ikan ti baru diulih. Sida apai indai aku endang selalu kia suping ikan tauka bubuk maya musim bubuk.


"It is the most fun day, I've ever had", ku Duncan. "I can't wait to go back there again." Au, kin baru meh kitai. Ukai nya jauh.


Maya kami ti ka mupuk pulai, alu pansut bala ti ka mukat mai kapal berikan sida. Nyu merati ka orang mindah ka kapal nya dulu kami sebedau kami mupuk. Dua buah kapal ti ka pansut mukat malam nya.


Rindu amat ga kami duai mipar ngambar mata panas padam lemai nya. Ukai enda mayuh gambar diambi, tang ni ulih dibantai ditu magang? Buring ga bala meda nadai gambar bukai!

Betemu Enggau Indai

Pulai sembiang pagi tadi kami duduk makai ba kedai kupi. Kiak kiak Duncan madah diri lapar ba gereja. Udah nya ngelubah nya ga sida mee enggau asi bubur datai! Ngemayuh nya ga orang duduk makai ba kedai kupi Wong!

Semadi nganti indai aku meli sayur ba market kami menyanak enggau apai aku nganti iya ba baruh pun kayu ba taman Sungai Lutong. Enchadi ka bisi lindung. Akai, berasai endar angat hari sepi aku!



Enda lama udah nya tak peda datai indai endar Denice nuju kami ka duduk baruh pun kayu. Indai iya nya baru pulai nganjung anak iya beguntin.

Taun nyin kemari kami alu nadai betemu enggau iya laban iya apin lama udah beranak maya nya. Gagit Denice dipadah iya bisi adik laki. Tang nemu malu iya meda indai enggau adik (mina sama indai) iya pagi tadi. Ukai nya ngelala indai iya, mutik ti ngada ka iya aja indai iya nya! Endang nadai kala begulai enggau indai endar iya.

Tak sinu diri aku meda gambar tu. Peda gamal Denice meratika indai iya. Nama enda utai ti mansa runding iya! :-(

Bejegau

Pagi tadi, udahka nganjung apai enggau indai aku ka Miri Dialysis Centre, kami tiga menyanak alu ngetu ba Boulevard Mall. Aku kia laban ti ka meli penuduk netbook ti bisi kipas. Engka laban putar karan ditu tinggi agi ari putar karan ba menua kami nya kebuah netbook aku angat. Kelalu angat nyu takut aku meda utai pengangat nya. Pechuma aja enti netbook aku nya rusak!

Lebuhka ba kedai komputer, aku alu meli LCD monitor 18.5", kena aku ngadu gambar. Enda puas ati aku ngena screen mesai 10"! Kelalu mit utai dipeda! Enti dikena meda utai ba internet aja, skrin mit nadai ngachau.

Udah kami pulai ari Boulevard Mall, kami alu ngetu ba rumah ipar aku siku. Kiak kiak bala anak mai kin laban ti ka bemain enggau bala petunggal. Panjai meh cherita kami duai mipar. Cherita kami duai alu bisi limpang ngagai cherita iya ti ka belajar ngaga quilt. Kasih tudah, bejait ngena mesin jait deh enda entu nemu.

Dia iya alu mantai sekeda quilt block ti bisi digaga iya. Masau kain, ku iya, laban nadai nyadi utai dijait. Amat kasih endar meda utai ti dijait. Amat enda nemu bejait meh siku nya!

Ila aku ngajar nuan, ku aku. Bala nembiak sekula bisi 2 minggu agi kemisi. Nyamai meh alai kami duai bejait. Aku endang udah bisi mesin jait ditinggal aku ba rumah apai aku, nyamai ga kami duai sama bisi.

Bah, naka tu aja cherita sekali tu.

Makai Pagi

Endang ninting pagi kami nganjung diri makai pagi ba kedai kupi. Sahari tu tak tetenguk ka makai mee sup ba resotran Melayu. Kami duai apai aku makai mee sup, Duncan makai roti canai, Denice makai mee guring alu indai aku makai mee hoon guring.

Rindu endar makai pagi ba kedai kupi! Lama udah ati ngiga utai dempa baka tu! Nah, bebendar meh nupi nyawa!

Lemai Hari ba Menua

Lemai kemari aku bisi bejalai ngagai pangan aku siku ngambi kek buah ka diudar aku ari Kumang Sedinang. Kumang Sedinang udah pulai ka menua begawai din, alu kek nya tadi diasuh aku tinggal ba rumah pangan aku siku.

Apu, enda lebu aku ngudar kek nya! Nyamai amat!


Lebuh ka driba pulai ari rumah pangan aku nya, aku berati ka langit. Akai, sayau amat enda sempat nganjung diri ka tasik ngambar mata panas padam. Datai di rumah aku alu beguai niki ka sadau mai kamera.

Mua langit muak ka barat kuning mirah. Tu meh gamal utai digambar aku lemai kemari.



Mua langit tunga ka utara mirah amat. Rindu amat aku meda tang nya meh, mayuh utai ngelindung biew langit! Kurang amat!

Agi panjai pemisi kami, bisi hari ila bejalai ba tasik ngambar mata panas padam!

Musim Gawai 2010

Denice enggau bala cousins iya lemai 31hb Mei.

Malam 31hb, bala ipar enggau bala anak menyadi bisi enggau kami sebilik beserumpu makai.

Udah ngalih tengah hari 1hb June, datai baru ga bala ipar enggau anak menyadi. Menyadi aku ka indu enggau dua anak iya bisi ga datai. Rami meh kami sebilik duduk ba mija makai sahari nya.

Alu datai ga bala pangan cina aku. Nyu rami amat orang ba rumah apai aku maya nya. Bakaka bejanji sida ka datai sereta jam nya!

****

Internet connection aku ditu enda berapa. Free wifi ka dikarap nadai nemu kebuah enda ulih dikena. Signal bisi tang enda ulih nyambung ngagai network.

Sahari tu Celcom broadband engka kelalu mayuh orang ngena. Tak enda ulih connect. Enda berapa endar!

Tu semadi numpang wifi orang semak kami ditu. Minta ampun laban numpang wifi nuan, oh jiran! Kasih ka aku tu nadai internet connection!

Bah, nama cherita kita ti ngintu gawai tu deh? Arapka mujur magang, alu nadai sebening pala!