Pagi tadi, udah kami duai indai aku nganjung menyadi aku siku ke airport, kami alu ngetu ba tamu semak market ikan di pasar Miri ditu. Ngemayuh nya ga mensia ti bisi ke pasar pagi tadi. Nyu puas bepusin baru tetemu ka alai ngepark kerita, nindik ga semak market nya.
Keterubah iya bejalai ba pasar tamu nya empu, tang lebuhka meda utai dijual sekeda bala ti duduk ba tisi jalai, alu kin kami duai. Ikan keli, petai, chabi mata, upa pantu, jagung meh sekeda utai dibeli.
Udah nya aku alu bejalai ngagai orang ke bisi nyual burung. Asaika enda tau agi nyual burung tu kitai tang engka sekeda bala enda nemu. Aku alu ngerandau nembiak indu ka duduk bejual dia. Laban ti udah begambar ka utai dulu agi ari nya aku alu ngachit mengachit kamera dia. Mina burung enggau tekura ka dijual iya dia ke digambar aku.
Enda lama udah nya ari seberai jalai indai nembiak nya bejaku, "Enti siku nya agi ngambar utai, pinta 10 ringgit siti gambar!" Enda rindu meda aku ngambar utai dia meh iya nya!
"Apu", ku aku bejaku inggar. "Ngumba bala Iban, nyau nemu bepinta ka duit tegal orang ngambar utai! Uji pandang ke lisin nuan betamu ba tisi jalai tu dulu!" Amat pedis endar ati aku ninga jaku indai nembiak nya. Apai tuai orang ti betamu ngimbai nembiak nya sigi ninga utai disebut aku.
Pelaba aku enti agi ba tempat awam, nadai salah kitai ngambar sebarang utai ti deka digambar kitai. Nya aku alu tingat ka apai tuai Laos ti nganu aku ngambar mija sayur iya ba market di Galt din! Amat bisi orang ka enda berapa!
Ba menua Amerika din, seagi tempat nya tempat awam, nadai orang tau nagang nuan ngambar utai tauka orang ti bisi ba tempat nya. Ku jurugambar ti ngulu workshop ba library kutai, "If he says "Boo!" to you, say it back to him" ku iya lebuh aku nyerita pasal apai tuai ari Laos ti nganu aku.
Burp! Sori, terai bai makai jagung ti dibeli ba tamu tadi!
No comments:
Post a Comment