X-ray

Lemai tu tadi aku nganjung apai aku ke spital besai Miri udah aku ke ngambi iya ari dialysis center. Nganjung iya ngambi x-ray. Mina indai aku pansut enggau iya ngagai alai orang ngambi x-ray. Kami tiga menyanak nganti dalam kerita ba alai parking kerita.

Enda lama udah nya datai saduai, alu apai aku dipeda aku minching envelope besai - filem x-ray ke dalam envelope nya. Udah kami datai ba rumah ku aku madah ngagai apai aku. "Ba alai kami berubat di Amerika din, nadai agi ngena filem orang ngambi x-ray. X-ray nya alu pansut ba komputer, udah nya file x-ray nya alu dikirum terus ngagai lutur, ngena komputer/internet nya tadi ga."

Udah nya result x-ray nya tau dipeda ari account diri empu ari laman web klinik nya. Kelimpah ari nya result x-ray tauka result peresa bukai bisi mega dikirum ngagai kitai ngena pos.

Aku alu tingat ka utai ditusui ipar aku minggu nyin tadi. Ipar aku nya bisi nganjung pangan iya ngagai klinik Ibu dan Anak di Miri ditu. Ku iya, nyu beraba file kertas sebelah klinik dia. Ni ka pengalama nganti betemu enggau lutur tauka misi! Teruk amat servis dia.

Apu, kemaya mih opis perintah kitai di menua Sarawak/Malaysia tu ngena computerized filing magang?